“Na Toe Aumai A’u e le Faaola,” Liahona, Aok. 2025.
O Atatosi o le Faatuatua
Na Toe Aumai A’u e le Faaola
I le oo ai i aafiaga o tulaga faigata, lea na fesoasoani ia te a’u e tuputupu a’e ai ma sui, ua ou iloa ai e mafai e le Faaola ona suia i tatou—e tusa lava po o le a le tele o a tatou agasala.
Ata na pueina e Christina Smith
Sa ou faapea o lo o o’u alu mo se malaga puupuu i le faaiuga o le vaiaso e asiasi i lo’u aiga i le taimi o le faaipoipoga a se uso. Ae ina ua tuuina a’u e lo’u toalua o Etelani i le malaevaalele, tuu mai ia te a’u se atopau ua uma ona teu, ma fai mai ou te nofo faatasi ma o’u matua seia oo ina ou saunia e avea ma se tane, sa ou iloaina ua oo ina matuia mea uma. E tatau ona ou faia ni suiga tetele i lo’u olaga.
A o ou vaavaai atu i lona alu ese atu, sa ou le iloaina le tele o lona tiga. Sa ia ta’u mai mulimuli ane ia te a’u, sa alu atu o ia i se nofoaga saogalemu e paka ai i le auala, lea sa tagi masūsū ai. Ou te lei iloaina le tele o le tiga o la’u amio—inupia ma le faaaogaina o fualaau faasaina—ia te ia, ma ou te lei iloaina le tele o lo’u tiga.
Sa ma ola ae uma i Samoa, lea na ma feiloai ai. Sa auai lo’u aiga i Le Ekalesia a Iesu Keriso o le Au Paia o Aso e Gata Ai a o ou i ai i le aoga maualuga. Ae na faalavelave poloaiga i lo’u olaga ma pati sa ou fiafia e auai i ai. E oo ane i le taimi na faamauina ai isi tagata o lo’u aiga i le malumalu, ua ou le toaga i le Ekalesia ma faia ni ’alofaga uma e aloese ai mai gaoioiga a le Ekalesia.
Ina ua ma faaipoipo ma Etelani, sa ma siitia atu i Seattle, Uosigitone, lea sa nonofo ai lo’u aiga. Ona matou siitia ese atu lea mai ia i latou i Iuta. O iina, sa taumafai malosi ai Etelani e fesoasoani mai ia te au e sui o’u ala.
E masani lava, ou te alu mo se vaiaso pe lua i le taimi e inupia ma pati a o nofo o ia i le fale, ma le le iloaina po o fea o o’u i ai. Sa matuai tiga lava o ia, ma iloa ai e le mafai ona ia suia a’u. O aso pogisa ma tiga ia mo ia. Sa oo ina faanoanoa o ia, ma tumu i tiga o le le saogalemu. Sa ia mafaufau pe o a’u amioga lē pulea na mafua mai i lona lē mafai ona fanauina o se fanau.
“Afai e tatau ona ma nonofo faatasi,” sa ia tatalo ai i le Tama Faalelagi, “ona faamolemole lea fesoasoani mai ia te a’u ia ou iloa le mea e fai.”
Na uunaia o ia e le Agaga e galue e fai se mea ina ua valaau mai o’u matua e faailoa mai o le a faaipoipo se tasi o o’u uso. O le aso na tuu ai a’u e Etelani i le malaevaalele, sa ia fai mai, “Ou te manatu o se taimi lelei lenei mo i ta’ua e valavala ai.” Na iu ina 10 masina talu mai lena taimi na ma toe faatasia ai.
Alofa Faaleaiga ma le Fesoasoani Faalelagi
O o’u matua ma nai ou tei o ni tagata malolosi o le Ekalesia. Sa malosi lo’u tina i lana molimau ma sa ia iloaina lo’u tulaga. I le 10 masina na ou nofo faatasi ai ma o’u matua, sa ia tuuina mai ia te a’u ni valaaulia agalelei ma le agamalu e auai faatasi ma le aiga i le lotu ma gaoioiga faalelotu, ma sa ia faamanatu mai ia te a’u le taua o le faamauina ia Etelani i le malumalu. O na valaaulia faigofie, ma le siomia ai i le alofa o lo’u aiga, na fesoasoani ia te a’u e toe foi atu ai i le lotu.
A o i ai Etelani i Iuta, sa galue faasoloatoa i itula ovataimi ia faalavelaveina ai o ia mai lona faanoanoa, sa ou oo i se suiga na aumaia e le alofa o lo’u tina ma le alofa tunoa togiola o le Faaola.
Sa ou taumafai i le tele o taimi i le aluga o tausaga e aveese ou mausa leaga, ae ou te lei mafai lava. I aso ua mavae, sa ou faaaogaina ai ’alofaga uma e ’aloese ai mai le lotu, ae o le taimi nei a o ou feagai ma le nofo ese mai lo’u toalua, sa ou iloaina e tatau ona ou suia.
Sa lei faigofie le suia. “O ai a’u e laveaina ai?” Sa ou tau mafaufau ai. I aso ua mavae, sa ou taumafai ai na’o a’u ia ou sui. I le na’o a’u, sa le mafai ona ou faatoilaloina o’u mausa, ae faatasi ai ma le fesoasoani mai le Tama Faalelagi ma Lona Alo, faatasi ai ma tusitusiga paia, anapogi ma le tatalo, le faamanatuga, ma le salamo, sa ou iloa ai e mafai ona ou suia. O le aafia ai i le auai i le Ekalesia ma le faaaogaina o le faatuatua ia Iesu Keriso na suia ai lo’u loto ma le ala sa ou mafaufau ai (tagai i le Mosaea 5:7; Alema 5:12–13). Sa vave ona ou iloaina e mafai ona ou faia mea sa le mafai ona ou faia muamua.
Faatasi ai ma le mausali, i le aluga o taimi na oo ina ou lagonaina le alofa mutimutivale o le Faaola. Sa Ia silafia i ma’ua ma Etelani. Sa ou lagonaina e alofa o Ia ia i ma’ua. O Lona alofa na suia ai o’u manaoga. Ou te le’i toe faananau i mea sa ou fiafia i ai i le tuanai. Ina ua iu ina maua sa’u molimau i le talalelei, sa ou manao e toe faatasi ma Etelani.
Ina ua ia vaai ua i ai sa’u galuega tumau ma ou teuina se tupe mo se nofoaga e nofo ai, sa ia faatasi mai ma a’u i Seattle. Sa manao pea o ia ia ma faaipoipo. Ina ua uma ona ou faaalia o lo’u tuuto atu ia te ia ma le talalelei sa moni, sa ma vaetamaina ai se afafine. O le i ai o se tamaitiiti na fesoasoani ia te a’u e tautino atu ai i suiga na ou faia. Sa ou iloaina e tatau ona avea a’u ma se tamā lelei mo ia. Sa ou fiafia i le mea sa ou agai atu i ai, ma sa ou manao e ave lo’u aiga faatasi ma a’u. Sa faamauina a’u i o’u matua. Sa ma vaetamaina ma Etelani se tama tama. Ma ua faamauina i matou i le malumalu o se aiga. Ua agalelei le Atua ia i matou.
O Tony ma lona atalii o Tony Jr.
I le oo ai i le afi a le tunu auro, ua ou iloa ai mai aafiaga patino e mafai e le Faaola ona suia i tatou. Ae muamua, e tatau ona tatou faalatalata atu ia te Ia. O le a e maofa i mea e mafai ona Ia faia. O le lagonaina o Lona alofa paia e mafai ona taitai atu ai i le salamo faamaoni, ma e mafai ona suia ai oe—e tusa lava po o le a lava le tele o au agasala.
Ou te faafetai mo se avanoa lona lua. Ou te faafetai mo le talalelei! Ou te faafetai na toe aumai a’u e le Faaola. Ma ou te faafetai, na Ia fesoasoani ia te a’u e avea ma se tane sili atu i lo’u toalua ma se tamā i la’u fanau.
Afai tatou te faatuatua i le Faaola ma faalagolago ia te Ia, o le a faate’ia i tatou i suiga e mafai ona Ia faia ia i tatou.
E tumau pea le faafetai o Tony na fesoasoani le Alii ia te ia e avea ma se tane sili atu i lona toalua o Etelani, ma le tamā i lana fanau, o Tony Jr. ma Prelain.