O Se Meaalofa o le a Ou Le Faagaloina Lava

Ina ua o mai faifeautalai faamisiona i lo’u fale i Farani e fai se galuega faatino o le auaunaga, sa le o ni tagata malolosi o’u matua i le Ekalesia, ma ou te lei papatisoina foi. E lei umi ae aoaoina a’ e faifeautalai i le talalelei, lea sa ou fiafia i ai. Ma e lei umi ae toe foi mai o’u matua i le lotu.

“O ai o le a papatisoina oe?” na fesili mai ai faifeautalai ia te au.

“Lo’u tamā,” sa ou tali atu ai.

O lo’u tamā, o lē e mai Italia, o se tagata lelei. Sa ia aoaoina a’u ia vaai atu i tagata e pei ona vaai i ai Iesu ia i latou. Ae i le faanoanoa ai, na maliu o ia i ni nai vaiaso ae ou te lei papatiso

Mulimuli ane, ina ua maua lo’u valaauga faamisiona, sa ou matua fiafia lava ma sa ou talosagaina lo’u tina e tatala.

“O le a e fiafia,” na ia fai mai ai ia te a’u, a o tagi. “O le a e alu i le atunuu o lou tamā!”

Sa ou moemiti e auauna atu i Italia. O misiona e faatatau i le auauna atu i tagata, ae le o le auauna atu i eria. Ae sa ou tatalo ina ia ou auauna atu i Italia, ae faapitoa lava le aai o Gaeta, lea sa nonofo ai tuaa o lo’u tamā talu mai le seneturi lona 10.

Ina ua uma ona ou auauna i Roma ma Sicily, na ou maua ai le tala fiafia ou te siitia atu i le eria e aofia ai ma Gaeta. A o lei oo i lena siitiga atu i le amataga o le 2023, sa tuuina mai e la’u soa ma se uo lelei o Elder Jack Beck ia te au se meaalofa o le a le galo lava ia te au. O Elder Beck o se tusiata talenia. Mai se ata laitiiti sa ou maua o lo’u tamā, sa tusia ai e Elder Beck se ata matagofie o ia.

Sa ou tilotilo i lena ata i aso uma i le taimi o suesuega patino. Na tuuina mai ai ia te a’u le malosi e faasoa atu ai le talalelei.

O le taimi lava na tofia ai a’u i Gaeta, na ou sa’ilia ai o’u tauaiga. Ina ua ou faaali atu i le uso matua o lo’u tamā le ata, sa tagi o ia. Ua tele tausaga talu ona le’i vaai o ia i lona uso ma e leai ni ona ata.

Sa ou aoaoina le uso o lo’u tamā e i ai se aso o le a toe vaai ai o ia i lona uso—e le o se ata ae o se tagata lava. Sa ou aoaoina o ia e ala i le talalelei, e mafai ai ona la toe nonofo faatasi ma lona uso i le alofa ma le filemu faatasi ma le Faaola.

Sa ou vaaia vavega tetele i Gaeta a o ou faasoa atu i tagata o le aiga le tala lelei e faapea, ona sa faatoilaloina e Iesu Keriso le oti, o lea ua na o se taimi le tumau le maliliu o e pele ia i latou (tagai i le Mosaea 16:8). Ou te molimau atu e ala i Lana taulaga togiola, ua mafai ai e le Faaola ona faapotopotoina o tatou aiga e faavavau.