O Le Atua o lo tatou Tama Faalelagi, e Silafia ma e Alofa o Ia ia i Tatou

O le Atua o lo tatou Tama Faalelagi, ma o Lana upumoni e faamalamalamaina ai mea uma ua avea ai i tatou ma mea uma e mafai ona avea ai i tatou. Na Ia silafia ma alofa ia i tatou ae tatou te lei fananau mai. Sa Ia foafoaina i tatou i Lona faatusa, ma le gafatia paia, ma vaavaaia i tatou ma se popolega atoatoa. I se lalolagi lea atonu tatou te ono lagona ai lo tatou le taua, e faamafanafanaina le iloa e iai so tatou Tama Faalelagi alofa e malamalama atoatoa i a i tatou.

Na faaalia atu e le Alii i le perofeta o Ieremia, “Na a‘u iloa oe a o lei faia oe e au i le manava; na au faapaiaina oe a o lei fanau mai oe.” (Ieremia 1:5). O nei upu paia e faamanatu mai ia i tatou e le o i tatou o ni fua o le avanoa. Na silafia ma alofaina i tatou e le Atua a o le‘i taitai o tatou fananau mai i lenei lalolagi. Na te silafia vaega uma o o tatou olaga—tofotofoga uma ma naunauga uma. Na aoao mai e Iesu Keriso lava ia, “A o outou lauulu lava ua faitaulia uma ia” (Mataio 10:30). E leai se mea i o tatou olaga e i tua atu o Lana silafaga alofa. O a tatou tatalo, o tatou loimata, ma o tatou faamoemoega loloto o faafofogaina e se Tama alofa.

O le alofa o le Atua mo i tatou e aunoa ma se aiaiga pe tapulaa. E le faalagolago i o tatou manuia po o sese. O Lona alofa e tumau ma e faavavau. O le alofa lena na musuia ai o Ia e aumai i tatou i le lalolagi ma le avanoa e tuputupua‘e ai ma toe foi atu i a te Ia.

Ua faamanatu mai e Elder Dieter F. Uchtdorf i a i tatou, “E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se taimi itiiti. E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia.”

O Lona alofa sa faaalia mulimuli ane e ala i le meaalofa o Lona Alo, o Iesu Keriso: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). E ala mai i lenei osigataulaga, e mafai ai ona tatou faatoilalo o tatou vaivaiga ma tiga ma toe foi atu ai i Lona afioaga.

O le iloa o lenei upumoni e le lava lea; e ao ona musuia se tali atu i totonu o i tatou. Afai tatou te iloa e silafia i tatou ma alofaina i tatou e le Atua, e ao la ona faatumuina o tatou loto i le faafetai ma se manaoga moni e faalatalata atu i a te Ia ao tatou savavali ai i tulaga‘a‘ao o Lona Alo, o Iesu Keriso.

Na aoao mai Keriso, “Ona tali atu ai lea o le Tupu, e faapea atu ia te i latou, E moni, ou te fai atu ia te outou, Auā na faia e outou i le tasi o e aupito itiiti o o‘u uso nei, o au lea na outou faia i ai” (Mataio 25:40). A o tatou fesoasoani atu i isi ma faasalalau atu le alofa ma le agaalofa, ua avea ai i tatou ma meafaigaluega i Ona aao ma faalatalata atili atu ai ia te Ia. E lei tuuina mai e le Atua poloaiga ia i tatou e taofiofia ai i tatou ae e puipuia ai i tatou ma taiala i tatou i le fiafia moni. O laasaga uma tatou te faia i le usiusitai e fesoasoani tatou te lagona atili ai Lona alofa ma maua ai Ana faamanuiaga.

O nisi taimi atonu tatou te liliu ese mai le Alii—atonu e ala i le faatamala, faalavelaveina, pe o luitau foi o le olaga. Peitai, e lē tuai lava le toe foi atu ia te Ia. Ia o tatou manatua e le faamatalaina i tatou e le Tama Faalelagi i o tatou vaivaiga ae e ala i le maoa‘e o le tulaga e mafai ona avea ai i tatou i Lana fesoasoani.

A o tatou agai atu i luma i le faatuatua, e alagatatau ona manatua o le taimi ua tuuina mai ia i tatou i lenei lalolagi e taua. O aso taitasi o se avanoa e faamalosia ai o tatou sootaga ma le Atua, ola e tusa ma Ana aoaoga, ma saunia ai mo le mea o le a oo mai. Ua tuuina mai e Peresitene Russell M. Nelson ia i tatou lenei valaau paia:

“Uso e ma tuafafine, o le taimi lava lenei mo oe, ma a‘u, e saunia ai mo le Afio Mai Faalua o lo tatou Alii ma le Faaola, o Iesu le Keriso. O le taimi lava lenei mo i tatou ina ia avea ma a tatou faamuamua aupito silisili lo tatou avea ma so‘o.”

Ia faatumuina la tatou tali atu i lenei valaaulia i le faatuatua ma le naunautai-tuu le Atua i le fatu o o tatou olaga ma agai ma le lototoa i luma i le ala e tau atu ia te Ia.

O le aso o le avanoa sili lea e faalatalata atili atu ai lo tatou Tama Faalelagi. Ia tatou talia Lona alofa i totonu o o tatou loto ma faatagaina o Ia e suia o tatou olaga.

O le Atua o lo tatou Tama alofa. Na te silafia i tatou. E alofa o Ia ia i tatou. Na te leoleoina i tatou, taitai i tatou, ma faatalitali mai ma aao mafola.