O Le Faamuamuaina o le Atua e Aumaia ai le Filemu ma le Manuia

Saunia e Hilary M. Liloux

I le tausaga na te‘a nei, ina ua oo mai suega faaiu o le tausaga, sa ou lagona ai le popole. I le avea ai ma se tagata popole tele, sa le mafai ai ona pulea o‘u lagona. I le loloto i totonu o a‘u lava, sa ou ta‘u ifo pea ia te au, o le a ou le manuia. O le a ou toilalo. Sa tumu lo‘u mafaufau i le masalosalo, ma sa amata ona ou lagona le leiloa.

Ae sa ou galue malosi—sa ou faaalu se taimi tele e suesue ma saunia ai—ma sa sili atu ona taua, sa ou tuu atu lo‘u talitonuga i a Keriso. Sa o se mea o le a le galo lava ia te au. Ona sa ou faauamuaina le Atua, sa ou maua ai se mea sili atu nai lo le manuia. Sa ou mauaina le filemu.

O Se Faavae e Faatotonugalemu i le Talalelei

I totonu o lo‘u aiga, e toafa i matou: o o‘u matua, lo‘u uso, ma a‘u. O o‘u matua ua 35 tausaga talu ona faaipoipo, ma o lo‘u uso ua lima tausaga talu ona faaipoipo. Ua oo foi ina liua o ia ma papatisoina lona toalua.

Ae e ui sa o ma ola a‘e ma lo‘u uso i le Ekalesia, ae e le mafai ona ma faalagolago i molimau a o ma matua. E tatau ona mauaina o ma‘ua faatuatua e ala i o ma‘ua aafiaga, aemaise lava i taimi o tofotofoga o le olaga. Ma mo a‘u, o se tasi o na aafiaga sa oo mai i a‘u suega.

Faatoilaloina o le Fefe i le Faatuatua

A o latalata mai suega, sa ou faalogoina le atuatuvale ua faatuputeleina ia te a‘u. Ana ou mulimuli i le ala o o‘u mafaufauga “tagata natura”, semanu ua ou faapea ifo ia te a‘u, o le a e faia‘ina, e le mafai ona e faia lenei mea. Sa ou manao e to‘a, ae ou te leiloa pe faapefea.

Muamua lava, sa na o na ou taula‘i atu i le suesue, toe iloilo ma aoaoina le tele o mea ou te mafaia. Ae sa ou iloa o le a le lava lea, a o le‘i oo mai suega, sa ou tatalo ai i ou tulivae, sa ou anapogi, ma sa ou suesueina tusitusiga paia, ma tausia la‘u vaaiga mamao ia sili atu nai lo mea o lenei lalolagi.

O sina mea itiiti, sa ou lagona ai le suia o lo‘u loto. Sa ou le toe lagonaina le malemo ifo i le fefe. Nai lo lena, sa faatumulia au i le filemu ma le malosi.

Malosiaga mai Tusitusiga Paia

I le taimi lava e tasi a o o‘u faasauni mo a‘u suega, sa matou suesueina le Feagaiga Tuai i le seminare. O se faamanuiaga tele lenei mea ona sa ou maua le tele o tali i mea sa ou manaomia. O le mau sa fesoasoani ia te a‘u o le Faataoto 3:5–6:

“Ia e faatuatua i le Alii ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

O le mea tonu lava lena sa ou faia. Nai lo le faalagolago i lo‘u lava malosi, sa ou faataga le Atua e taitaiina a‘u. Ma sa ou iloaina ua Ona silafia lo‘u gafatia—Sa ia silafia o le a mafai ona ou manuia.

O Le Mana o Faaaliga Faaletagata Lava Ia

O le isi mea sa aumaia ia te a‘u le filemu o le mauaina lea o lo‘u faamanuiaga faapeteriaka. Pe a ou faitauina, sa ou lagonaina le alofa o lo‘u Tama Faalelagi, ma sa ou iloa sa Ia leoleoina a‘u. Sa aumaia e lo‘u faamanuiaga le mafanafana, malosi, ma le lototele e agai ai i luma.

Sa iai taimi sa ou lagonaina ai pea le masalosalo i le taumafai e toe foi mai, ae o taimi taitasi ia, sa ou faamanatu ai ia te a‘u lava ia folafolaga i lo‘u faamanuiaga. Sa ou taofi mau iai, ma sa avea ma taula mo lo‘u faatuatua. Faatasi ma le Atua, na ou iloa ou te mafaia soo se mea.

Faamanuiaina e Ala ia Keriso

Na iu ina oo mai le aso o le suega. Ae nai lo le tumu i le fefe, sa ou lagonaina se mea ese—to‘a. Sa ou le popole e uiga i le faaiuga o a‘u suega. Aua sa ou faia mea uma ou te mafaia, ma sa ou tuu atu le mea o totoe i aao o le Atua.

Ina ua maua mai faaiuga, sa ou fiafia e vaai sa lelei la‘u faatinoga, e oo lava i luga atu o le averesi. Ae e sili atu i lo’u manuia, sa ou faafetai mo mea uma na faia e le Atua mo a‘u i le tausaga atoa, mo le malosi na Ia aumai, ma mo le filemu sa ou le mafaufauina o le a ou maua.

Ma o iina sa ou malamalama ai i se mea taua: o le faamuamuaina o le Atua i o tatou olaga ua le na o le fesoasoani ai tatou te manuia—e fesoasoani tatou te agai ai i luma i le filemu ma le mautinoa.

O Se Lesona Tumau i le Faatuatuaina o le Atua

I le toe vaai i tua, ua ou iloa ai o lenei aafiaga e sili atu nai lo se suega i le aoga—sa o se suega o le faatuatua. Sa ou aoaoina afai ou te faatuatua le Alii, Na te faamalosia a‘u. E pei ona fai mai ai i le Filipi 4:13, “Ou te mafaia mea uma lava i le faamalosi mai o Keriso ia te au.”

Ae o le mea aupito sili ona taua na ou aoaoina o le, e popole moni lava le Atua e uiga ia i tatou. Na te silasila i a tatou taumafaiga, Na te silafia o tatou popolega, ma e finagalo o Ia e fesoasoani ia i tatou. O nisi taimi tatou te le vaai ai i o tatou gafatia, ae Na te silafia. E faamanatu mai ia i tatou e le Mataupu Faavae ma Feagaiga 18:10: “Ia manatua ua tele lava le taua o agaga i le silafaga a le Atua” E aofia ai i lenei mea o a‘u ma oe.

Ona sa ou faamuamua ia te Ia, sa ia taitai a‘u, aumai ia te a‘u le filemu, ma fesoasoani mai ia ou manuia. Ma ou te iloa o le a Ia faia foi le mea lava lena mo soo se tasi e faatuatua ia te Ia.