Hin endurreista kirkja Jesú Krists

Nám í Kom, fylg mér á þessu ári um Kenningu og sáttmála mun varpa ljósi á það hvernig Drottinn endurreisti kirkju sína og fagnaðarerindi fyrir tilstilli síðari daga spámanna. Margar greinar þessa mánaðar undirstrika blessanir endurreisnarinnar.

Læra í þessari útgáfu

Takið þátt í samansöfnuninni

Á bls. 2 segir Russell M. Nelson forseti frá því hvernig við getum safnast saman til frelsarans, safnast saman með hinum heilögu og safnast saman í þjónustu Guðs. Íhugið að setja markmið fyrir þennan mánuð um að leggja af mörkum til einhverrar þessara þriggja tegunda samansöfnunar.

Þjóna í hinni endurreistu kirkju

Öldungur Patrick Kearon í Tólfpostulasveitinni ræðir um þau tækifæri sem við höfum í hinni endurreistu kirkju Jesú Krists til að „þjóna öðrum af kærleika“ (sjá bls. 8). Er fólk í deild ykkar eða grein sem á í erfiðleikum? Þið gætuð beðið fyrir þessu fólki og beðið um innblástur til að þjóna því.

Læra efnið í yfirlýsingunni um endurreisnina

Árið 2020 gáfu Æðsta forsætisráðið og Tólfpostulasveitin út skjalið „Endurreisn fyllingar fagnaðarerindis Jesú Krists: Tvö hundruð ára afmælisyfirlýsing til heimsins“ (sjá bls. 40). Þegar þið lesið yfirlýsinguna um endurreisnina, gætuð þið íhugað þessar spurningar: Hvaða lykilatburðir eru nefndir þar og hvernig leiddi Drottinn þá atburði?

Kom, fylg mér Fjölskylduskemmtun

Kenning og sáttmálar 1:30

Í þessu versi lýsir Drottinn kirkju sinni sem „hinni einu sönnu og lifandi kirkju á gjörvallri jörðinni“. Eftirfarandi kennsluhugmyndir geta hjálpað börnum ykkar að skilja hvað „sannleikur“ og „lifandi“ merkir:

Í Líahóna í júní 2024 tók öldungur J. Devn Cornish, aðalvaldhafi sem látið hefur af störfum, fyrir spurninguna: „Hvað eigum við við með því að segja að kirkjan sé sönn?“ Þið gætuð miðlað börnum ykkar nokkrum lykilatriðum í greininni. Hvaða andlegar upplifanir hafið þið hlotið sem hjálpa ykkur að vita að kirkjan er sönn – að hún er leidd af Jesú Kristi, að hún hefur prestdæmisvald, að spámenn leiða hana, að hún miðlar fagnaðarerindi Jesú Krists?
Ef mögulegt er, fáið þá börnin til að hjálpa ykkur að ná í laufblað eða litla grein af tré eða nærliggjandi gróðri. Ræðið hvað verður um laufblaðið eða greinina núna þegar það er ekki tengt trénu. Hvers vegna deyr laufið eða greinin? Lesið Jóhannes 15:4, þar sem frelsarinn líkir sjálfum sér við vínvið og fylgjendum sínum við greinarnar. Hvernig gæti kirkja Jesú Krists annars verið álitin lifandi kirkja?