Unimwaane Sandino Roman

E kabwarabwaraaki Unimwaane Sandino Roman nakon ana euangkerio Iesu Kristo ngke te ataei ngaia. Ni katoa Taabati e kairaki ma mwaanena iroun raoraon tinaia bwa a na kaitibo ma 15 riki kaain Ana Ekaretia Iesu Kristo ibukiia Aika Itiaki ni Boong aika Kaitira i nanon te autinibootaki ae uarereke i Mexico. 

Te ataei ae nimaua ana ririki e tataro ni katoa bong ibukiia ana utu bwa aonga n rairaki nakon te euangkerio. Uoua te ririki i mwiina, a bwabetitoaki tinana ao tamana. Teuana te ririki i mwiin anne, e bwabetitoaki iroun tamana. “Ibukin anne, I ataia bwa te Uea e ongo aia tataro ataei,” e taku Unimwaane Roman.

Butimwaean te euangkerio ao ni beku n te Ekaretia e karika te bitaki ae moan te korakoa i aoia ana utu. “I a tia n noora mwiina n te kabane are e uota te euangkerio nako nanon maiuia aomata,” e taku Unimwaane Roman. “I ataia bwa e uota te kukurei ao te kantaninga.”

E bungiaki Sandino Roman n Aokati 7, 1973, irouia Lidia Corral ao Prometeo Roman i Iguala, Guerrero, Mexico. Inanon takakarona ngke e kaaina te tiim n nete n ana kauarinan n reirei te Ekaretia ae Benemérito de las Américas, e kaitibo Roman ma Guadalupe Villanueva Rojas. A kabaeaki n te Mexico City Mexico Tembora n Ritembwa 19, 1998. Iai aman natiia.

E reke ana beebwa ae bubura ae te degree n te tiaeanti n te kombiuta tititem man ITESM (te Monterrey Institute of Technology and Higher Education) n 2000 ao te mwaatita ibukin tararuaan te bitineti man Brigham Young Iuniwetiri n 2006. E a tia ni mwakuri bwa te manatia ni mwakete ibukin Johnson & Johnson ao ibukin te Ekaretia bwa te manatia n ana Aobiti Mexico Area Support Services.

N ana tai ni weteaki, e beku ngaia ma buuna n te Ecuador Quito North Mition. E a tia Unimwaane Roman ni beku bwa te Itingaun n te Aono, kauntira n te beretitentii n te titeiki, bitiobi, kauntira ae rietaata, ao te beretitenti n te kooram n unimwaane.

E taku Unimwaane Roman bwa oin ana kouru inanon maiuna, n te tabo are e beku iai, bon karekean onimakinan te Uea. “I tangiria bwa e na ataia bwa E kona n onimakinai ngkai N na karaoa te mwakuri aei,” e taku.