Unimwaane I. Raymond Egbo

N ana tai n reirei n teuana ae maekanaki irouia ataein te reirei i aon Nigeria, mwaanen Unimwaane I. Raymond Egb e teimatoa ni kaoia bwa e na “roko ao n nooria” bwa tera are e anga Ana Ekaretia Iesu Kristo ibukiia Aika Itiaki ni Boong aika Kaitira. Ngke e koro 14 ana ririki, e a moanna n nanako ni kaea te tieminari ae boo n te tairiki.

N ana tai ni wareware n te boki are a kamatebwaia ataein te tieminari, Unimwaane Egbo e nakon Reirei ao Berita aika Tabu 135 ao bon taekan tiringan Iotebwa Timiti.

“Bon te bwai ae moan te mwaakaroiroi ae riingaki nanou iai, ao I ataia bwa te Burabeti Iotebwai Timiti bon ana burabeti te Atua. I ataia bwa e tiringaki ibukin te koaua,” e taku Unimwaane Egbo, are n te tai ae waekoa ao e a kaaina te Ekaretia. “I bon teimatoa n namakina te nakoraoi n te bong anne ngke I wareware iai.”

I mwiina, ngke e riki bwa ataein te iuniwetiri, e kaungaaki iroun mwaanena bwa e na nako ni mitinare. E un tamaia irouna ngke e kitana ana reirei, ma e teimatoa Unimwaane Egbo ni kororeta ni kabwarabwarai bwaai ni kabane ake e kakaraoi ao are e anga reirei i aona.

Ni miimiin Egbo, ngke e nang roko n tokin ana mition, e a wareka te reta nakoina ana beretitenti n te mition mairoun tamana are e taku bwa e a tia ni bwabetitoaki. “Tuangnga bwa I bon tataningaia,” e koroboki tamana.

E bungiaki Unimwaane Idyo Raymond Egbo i Port Harcourt, Rivers State, Nigeria, n Tuun 25, 1974, irouia Udo Idio Egbo ao Veronica Ukamaka Egbo. E kaitibo ma Comfort Ikip Ese ngke a mwaing ana utu nakon ana mwaanga n 1994. A mareaki ni Meei 15, 2003, i Calabar, Nigeria. Iai natiia aika teniman.

E reke ana tikuri Unimwaane Egbo ibukin te reirei, babaire ao mwakuri n tararua ibukin kabonganaan te aba, ao te tararua ibukin bitineti man iuniwetiri aika teniua. E a tia ni mwakuri n te Tieminari ao Intitute n Taekan te Aro man 2002 i nanon nakoa aika a kakaokoro, n ikotaki ma te tarekita ibukin te aba ao ibukin te aono.

I nanon ana tai ni weteaki, e beku Unimwaane Egbo bwa te Itingaun n te Aono n Aonon Aberika Mainiku. E a tia ni beku bwa te beretitenti n te Nigeria Calabar Mition ao n tia n riki bwa te kauntira n te beretitentii n te titeiki ao te kauntira ae rietaata. E a tia ni karaoa ana mwakuri ni mitinare n te Nigeria Lagos Mition.