“Unimwaane Patrick Kearon: Tauraoi n Weteaki iroun te Uea,” Riaona, May 2024.
Wewete aika Boou
Unimwaane Patrick Kearon: Tauraoi n Weteaki iroun te Uea
E a tia te Uea ni katauraoa Unimwaane Kearon n te kawai ae onoti ao n anganna aekaki nako kakabwaia n tamnei are e na kona ni kakabwaiaia temwangina ni weteana ae tabu bwa te tia kakoaua ae onoti “iroun Iesu Kristo ni kabuta te aonaba.”
N te kaonobong teuana n te ririki are moan weteaki iai bwa te Itingaun ni Kabuta, Unimwaane Patrick Kearon ma kainabana, Jennifer, a rin n teuana te tabo ni boobwai ike a kaitibo iai ma Unimwaane W. Rolfe ao kainabana, Janeil, ni kawaia n otinako man te tabo ni boobwai. A kawariia, ao e aki maan ao a nako naba n toka ni baoia Unimwaane Kerrs ma kainabana.
E aki maan imwiin anne, ao e roko temanna te aomata n titirakina Unimwaane Kearon ma te bwanaa ae ingainga, “Te Aobitia ni Kabuta are ko marooro ma ngaia arei?” E kaeka Unimwaane Kearon, “Ngaia anne. Teuarei bon Unimwaane W. Rolfe Kerr man te Itingaun.” E katoutoua atuuna, ao n taraa Unimwaane Kearon ao n aki te roko ni kina, ao e taku, “Ko kona n taainako ni kinaia Aobitia ni Kabuta, tiaki ngaia anne?” Imwiina ao e a taonnako.
“I rang tatangira te rongorongo anne ibukina bwa e bon tei raoi ni kabwarabwara au namakin,” e taku Unimwaane Kearon ma te moangare. “I kona ni karekea te namakin anne n te bong aei, ao te mwaane arei e bon aki kinaai ae te Aobitia ni Kabuta ngai ibuakoia aomata aika mwaiti.”
Aki kinaakain Unimwaane Kearon e karekea nakoina bwa e na tangiriia riki naake a kinaa ke iai te nano irouia ni kan beku ma ngaia. E weteaki, ao ni katabuaki bwa te membwa, n te Kooram n Abotoro n te Tengaun ma Uoman n Ritembwa 7, 2023, e ataia Unimwaane Kearon bwa nakoana ae boou bon tiaki ibukin kinaakina ma bon karaoan ana mwakuri te Uea ae reitinako.
“Ti bane n iai tabera n Ana mwakuri,” e taku, “buokaia aomata n namakina Otana ao Ana tangira ao Ana mwamwannano. “E tangiirira bwa ti na kakabwaiai maiuia aomata ngkai ti mena n Ana Ekaretia.”
E a tia te Uea ni katauraoa Unimwaane Kearon n te kawai ae onoti ao n anganna aekakin nako kakabwaia n tamnei are e na kona ni kakabwaiaia aomata ni weteana ae tabu bwa te tia kakoaua ae onoti “iroun Iesu Kristo ni kabuta te aonaba” (Reirei ao Berita aika Tabu 107:23). E rairaki nakon te Ekaretia n ana ririki ae 26 ao bon ti ngaia te membwa n te Ekaretia ibuakoia tarina ma mwanena, Unimwaane Kearon bon te aomata ae korakora ana tangira ao e rabakau n ongora, n reitaki, ao ni karau nanoia natin te Atua. E angaanga ma nanona ae itiaki ao e karekea te kimwareirei ni karaoan te mwakuri n ibuobuoki. I riingaki n arona n tangiriia aomata ake a tia ni bua, e kakoaua te Tia Kamaiu Iesu Kristo, ao rinanon Ana Mwakuri ni Kamaiu, ti na kamaiuaki ao ni kabebetei bwaai ni kabane.
Unimwaane Kearon bon ana reirei Iesu Kristo ae kokoaua ao n onimakina te Uea. Bon te tia kairiiri ae bebete aron iriirakina ibukina bwa e kakaonimaki n iriira te Tia Kamaiu ao ni kairiia aomata bwa a na Nakoina.
“Te Uea,” e taekinna Beretitenti Jeffrey R. Holland, Bonomwi n Beretitenti n te Kooram n Abotoro n te Tengaun ma Uoman, “e kaira Patrick nakon te nakoa are e a reke irouna ngkai.”
Kaaro aika Kakaonimaki, ao n Tatangira
E bungiaki Patrick Kearon i Carlisle, Cumbria, i Engiran maiaki n Turai 18, 1961, nakon Paddy ao Patricia Kearon. A kaitibo ana karo, ngke a beku n ana taanga ni buaka Engiran n te kauoua ni buaka n te aonaba—tinana bon te neeti n te taanga ni buaka ao ni beku i India ao Burma ao tamana e beku n te Royal Air Force (RAF), i Buranti, Aberika Meang, Sicily, ao Itare.
E uringiia ana karo Unimwaane Kearon, Paddy ao Patricia, n aia banna ni katooto ni maiuakinan te kakaonimaki, mwakuri n ibuobuoki, ao aia mwakuri n anganano.
Bon aomata aika tiaki kain te aro, ma a maiuakina te kakaonimaki n aia utu, mwakuri n ibuobuoki, ao te mwakuri n anganano are e a tiku betina iroun Patrick, are bon te kabanea n uarereke mai ibuakoia natiia te taanga aei ake niman. E uringa aron Pat n tatangira, “te tina ae rang tamaroa,” e kakaota te tangira, n arona ni kabane, ao n aki kabuakakaia aomata. Bon te aine ae rang n ibuobuoki, e matoatoa, ao ni barongaaki. Ao e uringa Paddy ibukin “korakorana, ana mwamwannano, ao n taraiaro; mamaten nanona … te rereua i Arabia [ao] tabuki ake i Engiran ao i Ireland; ao nanona n tatangira te kibakiba i karawa, otan taai, ao taari. I kona n ataia ao n namakinna bwa e mena ikekei, n taabo nako, i eta i karawa ao n otan taai.”
Reitanako ana taneiai ni beku n te RAF, taman Unimwaane Kearon e nako ni beku bwa te tia tararua ana taanga ni buaka Saudi Arabia. Patrick, ngke itiua ana ririki ni maiu, e reiakin reirei aika a rang kakawaki ni kaineti ma te ongeaba, ao e kataia n uringnga ao n taekinna n ana moan tai n taetae n te maungatabu ni kabuta bwa te Aobitia ni Kabuta. E bakan aki ongo aia kaetieti ana karo bwa e na karini ana kau ni wae n aia tai ni mwananga n nakon te rereua, e nako n mamataku n te “tabo-ni kau n wae” ike e a tenaaki naba waena n te Scorpian.
Patrick Kearon ngke te teei ni mwaane i Saudi Arabia.
Teniua te ririki imwiina, e namakina te maroaa ae korakora ngke e kitaniia ana karo n nakon te reirei teuana i Engiran, e toki te botu ma te maroa aei man aia reta ana karo ni kaungaunga.
“Kabotauaki ma Harry Potter ngke e mena i Hogwarts. E bon rang kangaanga,” te maiu n reirei. “Au tai n okira mwengau bon ti te Kiritimati, te Itita, ao te tiamwa. I karaoa au karentare i aon te beeba teuana, ao n mwaakena au bong aika tia n nako, ware bong ni karokoa te tai are Nnang okiriia iai au utu.”
Tabeua te ririki imwiina, n ana tai ni mena Patrick n ana reirei i Engiran, iai te angibuaka ae korakora n roko man marawan Irish. A bon rotaki 5,000 mweenga n te aono aei imwiin rokon te angibuaka. Patrick ao raona n reirei a weteaki bwa na ibuobuoki ni kaitiaki imwiin te angibuaka.
“I teimatoa n uringa tinebun rabunan nanon te auti ao boina ae mwaung,” e taku. “Ma I uringnga bwa ti waaki ngai ma raou n reirei ni karokoa e tia te mwakuri. Ao I uringiia aomata ma bwanaaia ni kakaitau.”
Anne bon ana moan taneiai Patrick ni karekea te kakabwaia man karaoan te mwakuri n ibuobuoki. Imwiina, ao e a ataia bwa ana namakin n aki mano ngke te kairake ngaia e bua mai irouna ngke “I ira waakin te mwakuri ae korakora ni buokiia kaain rarikiu.
Imwiin ana kauarinan, e okira Saudi Arabia Patrick, ike e a moana iai ana kataneiai iaon te babaronga ni kambwana n amwarake ao ni mooi. E moana ana mwakuri ma rabwata aika mwaiti, ni karokoa e a riki bwa te tia rabakau ibukin te reitaki i Engiran ngaia ma Titita Kearon.
“Kangaanga n te Maiu”
Ngke 19 ana ririki ni maiu Patrick, ao a kabuanibwai n te kaa tamana ao butikana i Saudi Arabia. “I rootaki ni buaia mai irarikiu,” e taku. Bain tamana ni kairia, ana kaunga nano ao n tangira, ao ai bon kukurein nanona ni kan noora tamaroan te aonaba a bane ni mauna nako. Bon te nanokawaaki ae bati irouia, a okira Engiran Patrick ma tinana ma imwiina ao e a manga okira riki kaua Saudi Arabia ni mwakuri ikekei.
“I karekea au taneiai n reiakin aroia bitineti n rikirake,” e taku. E rang kakaitau nakon “ana tia kairirii ae tamaroa are reireinna ao ni kairia ao n riki bwa te rao ae tangiraki irouna. E rang kakabwaiaki bwa e riki bwa kanga ai aron ana karo man te tai are motirawa iai tamana.”
Imwiina, n ana tai ni mwakuri i London, e kaitibo Patrick ma tabeman membwa n te Ekaretia.
“Bon banna ni katooto ibukin ara onimaki,” e taku. “Temanna mai ibuakoia bon kain California, ao I nako ni maeka ma te utu aei ngke I mwakuri ikekei.”
Te Taneiai anne e bon buoka Patrick ni karekea ootana n te Ekaretia. E ringaki n te kimwareirei are a karekea te utu aei man karaoan te mwakuri n ibuobuoki, ma e bon mwaiti ana titiraki iaon taekan ana reirei ao koaua n te Ekaretia. E okira Engiran uoua te ririki imwiina, ao ni, kaitibo ma tabeman “mitinare aika tamaroa” ni kawain London. Imwiin ana marooro iaon te euangkerio ma ngaiia inanon namwakaina aika bati ao e kaongoaki bwa e tuai n tauraoi nakon te bwabetito, a tuangnga ngkana e tangira te kakabwaia.
“I kariaia bwa n na karekea te kakabwaia mai iroun te mitinare n ikawai ae i kina,” e taku. “Te bwai are I namakinna n au tai ni kakabwaiaki bon te bwai are karika rairakiu. Bon te namakin ae koaua ibukin te oota ao te kimwareirei ma te rau ae I aki kona ni kabwarabwara. Mwanewen taeka n te kakabwaia a bon anaa nanou ao anganai te mataata.”
Te namakin anne, n raonaki ma “bwaai riki tabeua ake a kaineti ma au kekeiaki nakon au bwabetito,” e bon kaira Patrick ni karekea ana koaua iroun te Tia Kamaiu ao Ana Ekaretia ae kaokaki. Tabeua te namwakaina imwiina, n tain te Kiritimati 1987, ao e a bwabetitoaki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira.
Nakoimi ake kam kakaea ami koaua, e taekinna Unimwaane Kearon bwa ti na: “Rineia n onimaki, ao ni kaeka nakon kaeka ake a koreaki n Aramwa 32. Ira am namakin n tamnei. A na kairiko, bwa ko aonga n ataia.”
“Bwain Kakorakoraan te Maiu n Tamnei”
Uoua te ririki imwiin bwabetitoakina, e kaaina Patrick te uoote ibukia kairake n ikawai i London ike e a kaitibo iai ma Jennifer Hulme, ataein te Bringham Young Iuniwetiri mai Saratoga, California. E roko Jennifer i London ibukin ana kamatebwai ae onoua te namwakaina iaon rongorongon rimoa ao te Ingiriti. Te kabanea ngaia n uarereke ma ibuakoia tarina ao mwanena aika waniman, ao n kaikawaaki inanon te Ekaretia.
E aki rang maan, ao e a reke nanon neiei iroun Patrick.
“Ngkana I nooria n iwawaaki ma aomata n te uoote, ao I bon noora arona n tabeakiniia,” E taetae Jennifer ibukin Patrick. “N aki taraia bwa te membwa ae boou, ke te membwa ae manga tibwa okira te aro, ke te rao ae mena inanon te rawawata, ke raoraona ni kaan, e tabeakiniia ni kabane ma te tangira. Te anua anne are ngaia e bwaka iai nanou irouna. Bon te anua are I nooria bwa e tabe n rikirake, ao ni kateimatoaki iroun te Atua, inanon 33 te ririki are ti mareaki iai.”
Aia tangira ma aia karinerine Unimwaane ao Titita Kearon imarenaia e bon anganiia te kona ni beku inanon te onimaki.
Imwiin aia kareke tangira, ao te taanga aei a mareaki n te Oakland Califonia Tembora n Tianuare 1991. Imwiina ao a kaikawaia aia utu i Engiran inanon 19 te ririki ni karokoa e a weteaki Unimwaane Kearon bwa te Itingaun ni Kabuta n 2010 imwin tauan nakoa irouna aika mwaiti n te ekaretia, n aron te beretitenti n te titeiki ao te Itingaun n te Aono. E beku bwa te Beretiteinti n te Itingaun ike e a weteaki iai nakon te Kooram n Abotoro n te Tengaun ma Uoman.
E taekinna Unimwaane Kearon bwa kainabana bon te tia reirei ae kakaonimaki are e kina rikina ni koaua. “E maiuakina te kukurei, kaantaninga ae raoiroi, manena, ibuobuoki, ao te kimwareirei, ma te Tia Kamaiu bwa ngaia te boto ni maiuna. Bon ngaia te tia kakorakoraai ao bon te kakabwaia ae korakora nakoiu man te tai are ti moan kaitibo iai.”
Susannah, te kauoman mai ibuakoia natiia te taanga aei ake teniman, e taekinna bwa tinaia e bon rang tatangiria n tibwaa are irouna: “E kaonaki n te oota ao nanona ae korakora ibukin te euangkerio.” Ai aron naba Tamana, tinana bon te tia “ongora ae bane arona.”
Susannah ma tarina a taekinna bwa aia tangira aia karo imarenaia ao aia ikarinerine a karekea te kona ni katiteuanaki n te onimaki ni mwakurian aia kouru. A uaia n ongora ao ni karineia imarenaia ao n nanoraoi n aia iango ma aia kaantaninga.
Emma, natiia te taanga aei te aine ae uarereke, e taekinna bwa aia reitaki ma aia tangira aia karo ibukiia natiia “e bon kakukurei ao n namakinaki te mano inanon mweengara.”
Lizzie Kearon Staheli, te ikawai, e taetae ibukin tamana: “E nooria aomata tamau n ana taratara Kristo. E tauraoi n taainako ni kakorakoraia ao n kaungaia aomata. E noora aia konabwai aomata, n aki taraa aia kangaanga.”
E reitia Emma n taekinna: “E kaonaki nanona n te onimaki ao n tatangiria ni karekea te kimwareirei man te euangkerio. E kunea te euangkerio ae kaokaki ngkai e a bon ikawai, ao e kakaitau n te bitaki are karaoia are e a kairia nakon ataakin te oota ma te kimwareirei.”
E arania natina aine Unimwaane Kearon bwa—Lizzie (tamneina ma buuna ae, Jonathan), Susannah, ao ai Emma—“bon ngaia ootan maiura aika rang tamaroa, ao bon kaubwaira.”
Jean B. Bingham, te Beretitenti ngkoa ni Kabuta n te Bootaki n Aine, e kabwarabwaraa Unimwaane Kearon bwa te aomata ae rang n nanorinano n tibwangana aika mwaiti. E taekina te tai are ngke ngaia, ao Unimwaane David A. Bednar man te Kooram n Abotoro n te Tengaun ma Uoman, ao Unimwaane Kearon, ma aomata tabeman ake a bae kibaia ibukin te itabarara imarenaia aomata ma te tautaeka. Iaan ana mwioko Unimwaane Bednar, ao e kabanea tabeua te aoa Unimwaane Kearon i aon te tiataraite n tatareboon ma taan mwakuri n te tabo ao taan tei ibukin te Ekaretia bwa a na kakaea te anga ae na reke iai kibaia.
“Arona n nanorinano, n kekeiaki, ao n iango e bon buoka ara kangaanga ibukin reken kibara ae ti mano iai,” e taku Titita Bingham.
Inanon Ritembwa 2021, a kubanrou aia utu n ongo bwa Titita Kearon e reke irouna te kaentia n te mamma.
“Akea au kaantaninga bwa e na reke aio nakoiu ke nakoira,” e taku Titita Kearon. E taekinna bwa e matoatoa aron bwainaorakiana, ma te Tia Kamaiu bon ngaia te tia anganna te kakorakoraaki i aon bwaai nako. “I teimatoa n bwainaorakiaki, ma I taekinna ma te kakaitau bwa e a toki aorakiu n aron aia rongorongo taokita nakoiu.”
E taekinna Kearon bwa: “e teimatoa Jen ao ni kakaonimaki nakon bwaai ni kabane. Ti kakaitau ni katoa bong ibukin anganakina te marurung, ao ti kakaitau ibukin te tararua are e a tia n anganaki.”
N te kataaki are a tia n rinanona ngaia ma kaainabana, e taekinna Titita Kearon bwa, “Ti anganaki bwaai aika ti aki kantaningaia bwa ti na karaoi. Bwaai aika ti aki tangiria. Bwaai aika ti aki tuatua ibukina. Ma ti riai ni kaitarai ni kabane. Arora ni kaaitara ma kangaanga aika rang matoatoa bon te rairaki nakon te Uea ao n bubutia te korakora, n onimakina Iesu Kristo ma Ana akoi ao mwaakana. N taai aika bwakanako, I reiakina ae mwaiti iaon taekan te Tia Kamaiu ni buokiira n ara tai ni kainano, ao n rawawata.”
A karekea te atatai ae tabu Unimwaane ao Titita Kearon imwiin bungiakin aia moan nati ae, Sean.
“Ana Bwaa ni Kamaiu Iesu Kristo”
Ngke e moan bikoukou Titita Kearon, a reiakinna taanga aikai man mwiin aia tutuo bwa natia te mwaane “iai buakakan buroona, bon te aoraki ae rang kakamaku,” e taku Unimwaane Kearon. “Ti kabanea nikiran ana bong ni bikoukou ni kawariia taokita aika rang mwaatai, taokita n te buroo, ao taokita n te korokoro bwa na kakaea katokan te kangaanga aei. Ti kunea teuana te tiim ae a rang bwakuaku i London, ao a anganiira te aki nanokokoraki ma aia kaeka bwa a kona ni katoka te kangaanga.”
E karaoaki te korokoro nakon Sean ngke 19 ana ririki ni maiu. E karauaki raoi ni karaoaki te korokoro n te aro ae nang maan. Imwiin anne, ao e taekinna Unimwaane Kearon, “bwa e aki mwakuri buroon Sean. Ngaia, are e a bua mai irarikira. E bon rang kammaraki aron matena. Aio bon tiaki kaekaan ara aki mamatam are ti karaoia, n tataro ibukina, ma ti ataia bwa e butimwaeaki raoi i karawa.”
E taekinna Titita Kearon, “E a tia ni buokiira te Atua inanon au namwakaina ni bikoukou ao e rang tamaroa, e angan maiun natira, ma n te kabanea n tai, ao ti karaoi bwaai ni kabane ibukina bwa e na marurung. Anne bon te karau nano ae moan te tikiraoi.”
E kamaoaki nanora man ara atatai iaon ana Mwakuri n anga karea te Tia Kamaiu ao te Mangauti are karekea Titita Kearon n ana kamatebwai n 1 Nibwaai ao te 2 Nibwaai. “Rarawatara ibukin natira are bua, I namakinna bwa i mena inanon te mwanono ae rootongintong,” e taku. “Ao eng, imwiin te tai teuana ma teuana, a bane n raoi bwaai ni kabane n ana bwaa ni Kamaiu Iesu Kristo—ibukina bwa e koaua. Ana akoi, ma arona ni maiu, e tia n rinanon te maraki ae aki kaantaningaaki.”
A kamaoaki nanoia ngke a bungiia natiia aine aika teniman. “A uota te kamaiu nakoira,” e taekinna Unimwaane Kearon. “Bon ngaiia ootan maiura aika rang tamaroa, bon kaubwaira n taainako.”
E reke te kamaoaki man aia taeka n rabakau ara taan kairiiri n te Ekaretia, n raonaki ma ana marooro Unimwaane Lance B. Wickman n te maungatabu ni kabuta, are e tibwaa iai Unimwaane Wickman taekan natina te mwaane ae uarereke ngke reke irouna aorakiia ataei ao n wene ni mate n te onaoraki. “E reirei Unimwaane Wickman bwa ‘e reke te koaua ngkana ko nooria’ ao te onimaki bon te kakoaua iroun te Uea,” e taku Unimwaane Kearon. “E rang kakaongora ao n manena ana marooro nakoiu ibukina bwa titebo te namakin are ti a tia n rinanona. Aio are e a kaunga iai nanou bwa nna warekia ao n ongora nako iai n taai aika a mwaiti.”
E reke te kamaiuaki man am mwakuri n ibuobuoki nakoia ake a bua raoia aika tangiraki—naake taan birinako n maeka i Eurobe, naake a iraeaki ao ni bwainikirinaki, ke tao te rao ae te tia kairiiri n te Ekaretia ae ai aron Unimwaane Paul V. Johnson man ana beretitentii te Itingaun, are e mate natina man te kaentia uoua te namwakaina imwain ae na raona Unimwaane Kearon n te Beretitentii n te Aono n Eurobe n te ririki 2015.
“Ngaia ao Titita Kearon a rang tatangiria ni kan buokiira n ara tai n rawawata,” e taku Unimwaane Johnson. “A tauraoi n taainako ni buoka ara kangaanga. I teimatoa n tangiriia n aroia anne.”
Bon aia waaki raoi taan reirei ni koaua. Tauraoi ni katokaa i aomi rawawataia raomi. Ti na tang ma ake a tang. Ti karau nanoia ake a kainnanoa karauan nanoia. Ao ti na tei bwa taan kakoaua ibukin te Atua—ao te berita ibukin te manga ikotaki ae kakukurei e na reke rinanon ana Mwakuri ni Kamaiu Iesu Kristo. (Taraa Motiaea 18:8–9.)
E kamauriia membwa Unimwaane Kearon n Aonon Eurobe Mainiku.
Ao ngkana, a roko taai ni kangaanga nakoira, e na kabooi mwiin ara tangira ao n ibuobuoki man karaoan naba are ti karaoia. Ngkai e riki ngaia bwa ana Abotoro te Uea Iesu Kristo, e tauraoi Unimwaane Kearon n tibwaua ana reirei te euangkerio iaon te kaantaninga, te kamaiuaki, ao te rau n te aonaba.
“E aera ngkai a na roko iroura taian kataaki aika matoatoa?” E titiraki Unimwaane Kearon. “Ibukina bwa ti karuoaki nako aon te aba bwa ti na reiakin bwaai, n rikirake, maiuna te itiaki, ao n tangira man onimakina Tamara are i Karawa ao ara Tia Kamaiu. N te tai aei, ao ti bon aki kona n Noriia, ao A aki naba ni kona n ringiira. Ma ana kakabwaia te Tia Kamaiu ngke mate ibukira bon akea tokina—akea tokina!”