Aia Kairoro Aine

Mwaaneu aika tangiraki n te Bootaki n Aine, I kakaitau ngkai I marooro ma ngkami n te bong aio. Kam teimatoa ni memena n au iango. I rangi ni kakaitau ibukim ao n namakinna bwa I bae i roumi. E bati te tamaroa are ea tia n karaoia te Ekaretia—ao e mwaiti ibuakon te tamaroa ae riki n te aonaaba—e riki mai iroumi! Kam rabwa ibukin nanomwaakami iroun te Uea ao n raonaki naba ma ami mwakuri n tabekiia rake tabeman. I ataia bwa e korakora tangirakimi iroun te Uea ao e katan iroumi.

I mataiakinii ami onimaki ao ami mwamwannano nakon bwaai ake a irekereke ma te Tamnei. I kaungaaki n mwakuri korakorami, ami kairiiri, ao rabakaumi n noora te kainano ao n kakoroa nanona. Tao te aki konabwai ni koroboki ao n wareware, te bakitaia man aki tamaroan te amwarake, tabetaben te iango, ke kainanoia aomata n te bong teuana–ma–teuana, kam kaitarai kangaangan te maiu aio ma te rabakau ae aki nonoraki, te nanoanga, te nonori mai ieta, ao te tangira. Bwaninin ana mition ana Ekaretia te Uea e kakorakoraaki iroumi.

Mwaaneu, iai iroumi te mwiokoaki ae angani ngkami te konabwai n bitii maiu! Aio e koaua raoi bwa are ti bane n waaki inanon te kaantaninga ae mai karawa ibukin ikoikotan Iteraera. N taai nako ti buoka temanna n karekea te kawai are e tabu ao n teimatoa iaona, ti buoka ikoikotan Iteraera. Akea riki ae kona n tamaroa karaoan aio irouna nakomi—bwa tiina, taan kairiiri, tia reirei, taari aine, ao rao. Kam kakatauraoi ibukin te roro are imwiina n ana Ekaretia te Uea ao n te aonaaba!

N te tai ae aki maan n nako, ti reiakinna taekan te teinnaine ae teniua ana ririki are e uti man matuuna. Ni katabetabea, mwanena e anganna teuana imwiin teuana te taore ae te man. Ma tera ae e anganna te rau n nano ma te kimwareirei? Oin ana kaobi n Ana Boki Moomon! Te ataeinaine ae e uarereke aio e matakuakina tinana n wareware man ana Boki Moomon ni katoa bong. E tangiria ni kan riki n ai aron tinana!

E aki bebete ma e kona n koro nanon kakorakoraan te maiu ae katamaroaaki man aia kairoro ainen te berita iroun te Atua. I tangiriia Tariu, ao e kakawaki irou te tibwanga n mwakuri ma ngaiia. Ma e ngae n anne, uoman aomata n te aonaaba ake a tia n kairoroai i nanon maiu bon buu ae Dantzel, tinaia natira ake 10, are e a tia n motirawa ngke 78 ana ririki, ao, i nanon maiu i mwiina ae 18 te ririki, kainnabau ae tamaroa ae Wendy.

N au tai n tiku n kamarurungai man mwiin bwakau, e tabeakinai Wendy n te aro n rabwata ao n tamnei. E a tia ni karaoia n anga aika akea riki ae kona n karaoia. Te kairooro are bubura are Dantzel ma Wendy ae a tia n anganai e aki kona n kabotauaki. A tia ni bita maiu! A tia n katabwanina riki maiu.

Aine ake a tei i boton ana kainibaire Tamara are i Karawa man te moan. Ana kainibaire ni kamaiu te Atua e boboto iaon mwakuri korakoraia uoman aine aika ninikoria—Ewa, “tinaia ni kabane ake a maiu,” ao Maria, tinan ara Uea Iesu Kristo.

Mwaaneu, taiaoka n aki nananokokoraki n te mwaaka are e korakora inanom n kairoroia aomata nakon te raoiroi. Bon te bwaintangira mairoun Tamara are i Karawa are ea tia n anganiia ainen te berita ae tabu ni kabane. Ngkai natin te Atua te aine n te berita ngkami, kam a tia ni kakarekea ana wirikiriki te Tamnei ao n kakorakora am kambwati n karaoa te raoiroi are e anganiko te konabwai n karekei kaotioti aika a onoti ao ni kona ni kinaa te koaua man te kairua. N taekinan aio, I aki kona n kabureia mmwane man kinaakin te eti man te bure ke man karaoakin ana mwakuri te tamnei ibukin karekean te kaotioti. Ma e ngae n anne, ngkana te aonaaba e bua mairouia aia rabakau n rinea te raoiroi aine, te aonaaba e na aki kona n manga marurung.

Mwaaneu, ti kainanoi bwanaami n reiakinan ana reirei Kristo. Ti kainanoa rabakaumi bwa aine ni kinaa te kewe ao ni kabutaa te koaua. Ti kainanoa rabakaumi mai karawa n ami utu, kauntira n te titeiki, ao n raonaki naba ma n taabo nako ake kam kona n kakairi ni kabuta te aonaaba. Ami utu, te Ekaretia, ao te aonaaba a kainanoi ngkami! Mwaaneu, akea temanna ae kona ni karaoi bwaai ni kabane, ao kam konaa ni kataia. Ma e ngae n anne, I ataa kakawakin ami mwakuri ni katean abanuean te Atua.

Ngaia are, n te bong aio, I kaoi ngkami n karaoi ami boki aika tabu bwa oin ami Riaona, te tembora bwa nnem n kamanomano ao n katauraoi, ao ami tataro bwa te anga n reiakinna bwa iaa t tabo ae kainanoiko iai te Uea n te bong anne. I nanon taina, ko na kubanako n aron Ana kairiiri raoi nakoimi n te tabo are kona kairiiri iai, kairia, ao n mwananga ma temanna are e kainanoiko.

N tokin anne, I kakabwaiai ngkami n karakaan ami noonori n tamnei ao ami konabwai n karekea te kimwareirei n anganakiia aomata te rau n nano. I kakabwaiai ngkami ma te wanawana n nooria bwa tera ae kainanoaki ao n aki kabirimwaakai ngkami nakon are e kainanoaki. I kakabwaiai ngkami ma te ninikoria n maiuakini tibwangami mai karawa bwa te nati te aine iroun te Atua n te berita ae tabu. I kakabwaiaia ngkami n namakinna raoi bwa Tamam are i Karawa ma Natina, Iesu Kristo, a kinai ngkami ao n tangiri ngkami. A karuoi ngkami nakon te aonaaba ngkai bukina bwa kam kakawaki nakon abanuean te Atua ngkai! I kakabwaiai ngkami bwa kam na kakoroi nanon ami bwaintangira mai karawa bwa natin te Atua te aine are e anganiko te mwaaka n aki ti bitii maiumi ma n bita naba te aonaaba!

I tangiri ngkami, mwaaneu. Taeka akanne a koaua. Ti irekereke n ana mwakuri te Uea. I kakoauaa bwa e maiu Iesu Kristo! E tei n atuun te Ekaretia aei. N aran Iesu Kristo, amen.