Sucu pa Yohk Srihpac Emet ke Wosasuc luhn Jisus Kraist

Mwe luti ke Alu luhn Jisus Kraist luhn Mwet Luhlahlfongi Lal ke Lwen-sahflah siiac sucu. Yohk srihpac nuh ke wosasuc ke sucu pa tacmpuhl. Akwuck eisyucklac we oruh kuht kuh in fohlohk nuh yurin Pahpah Tuhmasr Inkuhsrao ke sucu ma pahtpaht.

Toeni Luhlahp April 2025 ne ingena, Prestuhn Russell M. Nelson el fahkwack muhsahiyen 200 tacmpuhl sasuc. El luhngse fahkwack tacmpuhl sasuc e sahflahiyen kais toeni luhlahp, ac kuht kwewa engan yohrohl. Tuhsruhktuh, ke nacmpuh yohk luhn tacmpuhl oasr ke muhtwacwacackiyen plwacn ac muhsahi, enenuh kuht in sipihsrpihsri fahkwackiyen tacmpuhl sasuc. Ohinge, ke lwelah luhn U luhn Mwet Singucul Luo, kuht ac tiac fahkwack kuhtwena tacmpuhl sasuc ke toeni se inge. Ingena kuht fah fahsr nuh met in kihtac akwuck luhn tacmpuhl nuh sin macmpuhr luhn Alu uh fin facluh nohfohn, wi pac ngwac ac oyac in fahkwack muhsahiyacn tacmpuhl sasuc.

Ipin sramsram se inge lah nga tuhfana ritelah sihmihsyucklac tukun misac lal Prestuhn sacohk lasr Russell M. Nelson. Ma tuhkuh ingena sihmuhsyucklac ac ahkfalye wik ekahsr ah, tuhsruhk el srackna ayaol mwe luti luhk, tuhkuh sin Leum.

Mwe fahkwack luhn sucu, sulkackihnyuck ke yac 30 tari, fahk lah “sucu uh ma ahkkweyeyucklac sin God” ac “yohk srihpac ke plwacn nwe tok Lal nuh sin tuhlihk Nahtuhl.” Fahk pac kac lah “masap luhn God nuh sin tuhlihk Nahtuhl uh in puhseni ac nwacklah facluh uh srackna fahsr.” Ac “kuht oacyacpac ahkkweye lah God el sapkihn lah kuh muhtahl in orwaclah tuhlihk uh enenuh in tuhkuh yurin mukul ac muhtwacn pahyuck se muhkwena.” Met ke el tuh–Elder Russell M. Nelson el tuh luti un mwet BYU se, lah sucu uh “yohk srihpac nuh ke plwacn luhn God. … Ma pwacye kac an, srihpac luhn plwacn sacn pa in pahtok sucu uh.”

Alu luhn Jisus Kraist etweyuck muh alu lohacng yohk nuhke sucu. Pwacye! Kuhpahsr lasr nuh sin God ac srihpac lasr ke moul suhkawihl se inge ahkuhtweyucki ip srihsrihk ke sucu. Wosasuc luhn Jisus Kraist pa plwacn se luhn Pahpah tuhmasr Inkuhsrao nuh ke ma wolacna luhn tuhlihk nguhn Nahtuhl. Kuht kuh in fahk na pwacye lah wosasuc tuh lutiyuck kuht emet ke toeni in sucu ma pahtpaht sac, na utuckuh nuh lun sucu suhkawihl lasr uh, ac finsrak la uh pa in sruhkwack tuhlihk nuhtin God nuh ke sucu ma pahtpaht.

Lah fuhkah kanon mwe luti ingacn, oasr mwe kihsrucngyac. Fin acn Macrike, kuht liye muhnahslah ke moul in pahyuck ac isus fahko. Ke lusen yac siofok, pihsen mwet in lohm se ma tuhkuh ke siyacnyacn pahyuck suhpuhseni, oacyacpac pihsen ahwowo isuslac kac. Macruht ac ahwowo isuslac yurin mempucr ke Alu uh puhslac, tuhsruhk elos oacyacpac puhtati. Yohk srihpac nuh sin mwet Luhlahlfongi in Lwen-sahflah in tiac muhlkuhnlah kahlwem lalos ke srihpac luhn macruht ac yohk srihpaciyen tuhlihk uh. Pa ingacn ma kuht finsraki nuh ke pacl fahsruh uh. “Ahkfuhlwactiyen sucu pa ma luhn sucu,” Prestuhn Nelson el luti. “Ke akwuck moul luhn wosasuc luhn Jisus Kraist muhkwena kuh in ahkfuhlwactye sucu.”

Puhs acn luhlahp etweyuck tiac pahtok macruht ac isus fahko ke facsin lalos, tuhsruhk Mwet Luhlahlfongi in Lwen-sahflah luhlahlfongi yohk srihpaciyac ac enenuh in ahkfahsrye na—tiac ukwe—oruh lalos.

Ke nga srihk yac 80 tari ah, nga muhta yurin ninac pahpah mahtuh ke acn in imac se suc ma nuhkewa sikyak insacn ke lwen an kolyuck sin sucu ah. Wacngihn tv kuh electronic sahyac in lusrong mukwikwi luhn sucu lasr. Fahsruh nuh inge, misenge ke moul se inge, suhpuhs mwet in sucu puhla tuhkweni orekma inmahsrlolos. Fasien muhtwacngacsr ac mwe kahsruhsr sasuc, mwe inte sunlacna, ac inkacnek pihsrpihsr in sramsram nuh sin sie sie oruh fihsracsr nuh sin mwet fuhsr in oruh lohm selos, muh acn in mutul na kuh mongo na ac srihklac pacl in eis kai yurin pahpah ninac nuh ke mukwikwi lalos.

Usyacn kai luhn pahpah ninac srihkeni pac ke inkaiyen mempucr ke Alu uh orekma. Pacl somlah ah, sie ma sruokyac sucu se pa ma elos tuhkweni puhlakihn ke srihke lalos in oraclah finsrak se—kain nuh ke ekuhlah acn alal se nuh ke acn yohk srihpac se kuh in sokwack orekma se. Mwet in sucu se tuhkweni orekma ac inseselac ke ma elos kosracni. Mihsenge, puhs sucu sifacna ke orekma lalos, pwacnacng tiac enenuh tuhkweni ac inseselac lalos.

Ke muhtwacwacack in eflah kai luhn pahpah ninac, Mwet Luhlahlfongi in Lwen-sahflah srackna sruok kunohkohn luhn God in luti tuhlihk nahtuhlos in ahkolah nuh ke sahflahiyen sucu lasr ma pahtpaht (Doctrine and Covenants 68:25). Puhs sesr enenuh in oruh ma se inge ke tiac mwet nuhkewa ke sucu lasr uh luhlahlfongi uh. Tifohrs, misac, ac fahsrwelihk pwacye sikyak. Nga puhlakihn ma inge ke sucu se ma nga kapack kac ah.

Pahpah tuhmuhk ah misac ke nga yac itkohsr, oruh nga ac tuhlihk mukul srihsrihk ac muhtwacn srihsrihk se wiyuck tuhfweyucklac sin ninac katinmas se. Ke pacl upac uh, el fasrweacng na. El muhkwena ac el muhnahs, tuhsruhk ke kahsruh luhn Leum, mwe luti fokoko lal ke ma pwacye luhn Alu fohlohkyak kol kuht. Fuhkah luhpan pruhe lal ke kahsruh inkuhsrao in tuhfahlah tuhlihk nahtuhl, ac el ahkinsewowoyeyuck! Kuht tuhfeyucklac ke lohm engan se suc kuht puhla muh pahpah suc misac ah el srackna wi kuht. El luti kuht lah oasr pahpah tuhmwacsr ac oasr mukul tuhmwacl ac kuht e sucu se na ke srihpen macruht lalos in tempuhl. Pahpah tuhmwacsr ah wacngihnlac na ke kihtin pacl ke srihpen Leum El pahnglol nuh ke siena orekma.

Nga etuh lah puhs sucu sahyac tiac engan, tuhsruhk muhtwacn katinmas kuh muhkena uh kuh in luti luhngse luhn Pahpah Inkuhsrao ac mwe insewowo pucsucs ke macruht tempuhl uh. Kom kuh pac in oruh ma inge! Plwacn lal Pahpah Inkuhsrao ahkpwacyei lah mwet nuhkewa kuh in oruh. Kuht nuhkewa tarilac ke macruht tempuhl ac ke mwe insewowo puhs in kuh in sil ekihn sucu ne tok. Oacna ninac kiyuck, kuht luhngse muhta fahk olwelah lal Lehi nuh sin wen nahtuhl Jacob lah God “El fah akmuhsraelah kweok lom nuh ke kapkapwacak lom” (2 Nephi 2:2). Olwelah sacn som nuh sin Mwet Luhlahlfongi in Lwen-sahflah nuhkewa, sucu fohn kuh tiac fohn. Kuht sucu ke alu se.

Mwe luti ac luhlahlfongi lasr ke sucu ma pahtpaht ahkkweye kuht ac oracni inmahsrlosr. Nga tiac kuh in muhlkuhnlah olwelah luhn pahpah mahtuh kiyuck Harris, ke kuht tuhlihk muhta ke imac lal fin acn Payson, Utah. El fahk nuh sihk pwacng suhpwacr lah pahpah tuhmuhk ah misac fin acn Denver, Colorado. Nga kahsruhsr nuh ke mwe an kiyuck ac puhtati, fuhlwaclihk insiyuck ke tuhng. Pahpah mahtuh el fahsruh tukuk ac muhta siskuck ac fahk, “Nga e pahpah tomom.” Olwelah kuhlwacng se ingacn mwe srihkasrak fokoko se ke kuhtuh ma ninac pahpah mahtuh kuh in oruh in kanelah acn alal ke pacl oasr mwet wacngihnlac ke sucu se.

Pahpah ninac, lolahp kuh macruht—ac sahyac, nuh kacl pahpah ninac mahtuh, ma kanelah kunohkohn ingacn nuh sin tuhlihk—elos pa mwet luti fuhlwactlacna. Mwe luti kuhlacna lalos tuhkuh ke srihkasrak lalos. Kais sie mwet in sucu pa acn in lutlut se ma oruh ac luti ma yohk srihpac, kain nuh ke yohk srihpaciyen macruht ac tuhlihk uh, srihpen moul se, ac ma use engan. Oacyacpac acn wowo se emet in lotelah mwe lutlut yohk srihpac ke moul, pa nuh ke kuhlwacng, nuhnak muhnahs, in kuh in sifacna, ac yohk srihpac in eis etwacack ke lutlut ac orekma pwacye.

Ahok, puhs mempucr ke Alu uh ma oasr mwet in sucu lalos tiac akkweye pahtok wosasuc ac finsrak uh. Mwet ingacn enenuh luhngse ac muhtweng lasr. In oruh nuh sie sin sie, kuht enenuh in esam lah suwohs se kuht suk uh wacngihn sahflahiyac nuh ke mwe ahkfohs ke moul suhkawihl se. Mwe luti wowo ke Doctrine and Covenants 138:57–59 ahkkweye kuht lah auliyak ac kapkapwack in nguhn kuh in tahfweyucklac na ke facl luhn nguhn tukun moul suhkawihl se. Yohk liki nuhkewa, ke sucu uh tuhkweni in ahkkweye sie sin sie, kuht enenuh in esam lah ma koluk ac mwe muhnahs ma kuht nuhkewa puhlakihn ke facl se inge kuh in iyucklac fin kuht auliyak ke srihpen Iwaclah wolacna ac sacohklac lal Jisus Kraist.

Mwet Lahngo lasr, Jisus Kraist, pa mwet se kuht liye etahi uh. Kuht e ahkinsewowoyeyuck fin kuht moulkihn moul lasr nuh ke mwe luti ac kihsackuhnlah Lal. Ukwe Kraist ac eiskuhtyang in kuhlwacnsuhpuh sie sin sie el ono fokoko se in tiac nuhnkuh kac sifacna ac nuh sin kais sie.

Ma pac kunacn ninac pahpah pa in luti tuhlihk nahtuhlos in etuh orekma sahyacna na mwe luti ke wosasuc. Sucu uh fototoi ke elos tuhkweni oruh ma oasr kalmeyac. Tuhkweni imac muhsahi kuhpahsr luhn sucu. Engan tuhkuh ke tuhkweni etaclah kuh oruh ma se ahkkweye inmahsrlon sucu. Kacm, kain in sritacl, ac mukwikwi sahyac yohk srihpac in ahkfototye sucu. Sucu uh enenuh in oraclah lwen in oasr tuhkweni luhn sucu elos in esam mwet mahtuh, ma kuh in som nuh tempuhl.

Ninac pahpah enenuh in luti tuhlihk uh ke ma srihsrihk ke moul uh, kain in nuh ke orekma lihkihnihm imohm ac lohm ah. Lotwelah kahs sasuc el mwe ahkoelah wowo nuh ke kuhlwacnsap luhn misineri ac moul sahyac. Mwet luti nuh ke lutlut kahs sasuc kuh in ninac pahpah kuh ninac pahpah mahtuh kuh mwet ke sucu luhlahp. Sucu uh kapwack ke elos tuhkweni lutlut ac eis kahsruh sie sin sie ke ma nuhkewa ma elyah nuh sin mwet in sucu an.

Kuhtuh kuh in fahk muh, “We wacngihn pacl nuh ke ma ingacn.” In sokwack pacl in oruh ma yohk srihhpac, puhs ninac pahpah kuh in konacack lah elos kuh in ohniyac sucu lalos fin elos konelah technology nahtuhlos nohfohn. Ac pahpah ninac, esam, lah ma tuhlihk ingacn luhngse ke pacl in mongo in ekuh lalos pa pacl lalos in wi kowos.

Mwe insewowo tuhkuh nuh yurin sucu ma tuhkweni pruhe, sikuck muhtuhnte ke fong ac litutacng in kaksakihn mwe insewowo ac pruhe ke mwe enenuh. Sucu uh ahkinsewowoyeyuck ke elos tuhkweni ahkfuhlwact lohm Alu ac ke acn in ahkfuhlwact sahyac. Kuhpahsr luhn sucu uh fokokoi ke sramsram ke sucu lalos, oruh facsin luhn sucu, ac akacsruhi ke ma muhtahl. Prestuhn Spencer W. Kimball el ahkacsmakihnye kuht lah “sramsram mokleyuck ke moul lasr sifacna ac mwet mahtuh lasr … mwe luti fokoko.” Pa kuhfa wowo se emet nuh sesr ac fihlin tuhlihk nahtuhsr.

Nga fwahkack kacl Leum Jisus Kraist, suc pa Wen Kuloh Sefanna nuhtin God, Pahpah ma Pahtpaht tuhmasr. El suli kuht in ukwe inkacnek in wuhlweacng ma fahsr nuh ke tuhkweni in sucu inkuhsrao. Kuh in sili luhn pristut, kollah ke ki fohlohkihnyuckyak ke Kirtland Tacmpuhl, us sucu tuhkweni ke ma pahtpaht (liye Olweacng ac Wuhlweacng 110:13-16). Elos orekmakihnyuck ingena ke pihsac puhs ke tempuhl luhn Leum fin facluh nohfohn. Ma pwacye se. Lwelah kuht in wi oruh, nga pruhe, ke inen Jisus Kraist, amen.