Elos Mwet Nuhnuhnkuh Lalos Sifacna
Kuht fin orekmakihn luhlahlfongi ke Jisus Kraist, oraclah ac karuhnganwacng wuhlweacng yurin God, ac auliyak ke ma koluk lasr, na iwen nuhnuhnkuh ac fah engan.
Puk luhn Mormon ahksahfyeyuck ke solsol moniyuck sel Moroni in “tuhkuh nuh yurun Kraist,” “ahksuwohsyeyucklac Kacl,” “lahfwekihn [kuht sifacna] ke ma koluk nuhkwewa,” ac “luhngse God ke [insiacsr], nuhnak [lasr], ac [kuhiacsr] nohfohn.” Usrnguck lah, pohloh kahs sahflah se ke ahkuhtweyac lal an ngwetlah tuhpan kwewana Moulyak ac Nuhnuhnkuh Sahflah.
El fahk, “Ke pacl na sa nga ac som monglac ke pacruhtais luhn God, ne ke na nguhnihk ac monuk ac fah sifilpac fahsrweni nuh sie, ac nga utuckuh kuhtanglah yen engyeng uh, in ohsun nuh suwos ye muhtuhn nien nuhnuhnkuh wolacna luhn Jehovah kuhlacna, Mwet Nuhnuhnkuh Ma Pahtpaht luhn kwewana mwet moul ac mwet misac.”
Nga fwefwelac ke orekmakihnyacn kahs se “wolacna” sel Moroni in ahkuhtweyac Nuhnuhkuh Sahflah. Mwet pahluh sahyac ke Puk luhn Mormon elos oacyacpac ahkuhtweyac Nuhnuhnkuh uh muh oacna “lwen wolacna” ac sie suc kuht enenuh in “ngwet nuh met [nuh sel] ke sie muhta luhn luhlahlfongi.” Tuhsruhk inkaiyacn pacl uh ke kuht ngwetlah tuhpan Lwen in Nuhnuhnkuh, mwe ahkuhtweyac sahyac ma palyeiyuck tuhkuh nuh ke nuhnak [lasr] uh, ma oacna “mwekihn ac ma koluk yohk,” fosrngah upac ac sahngweng,” ac “ahsor ma wacngihn sahflahiyac.”
Nga luhlahlfongi muh yohk sielacna ke kahs inge ahkkahlwemye muh luti luhn Kraist uh ahkkweyacl Moroni ac mwet pahluh sahyac in ngwetlah tuhpan lwen luhlahp sac ke semuhtweng ac finsrak liki na sahngweng se ma elos sensenkackihn nuh selos suc tiacna ahkolah in nguhn. Meac Moroni el kahlwem kac ma kom ac nga enenuh in lotwelah?
Nga pruhe ke kahsruh luhn Nguhn Muhtahl ke kuht motko ke plwacn in engan luhn Pahpah Lucng ac pahkotwen, srihpen Mwet Lahngo iwaclah ke plwacn luhn Pahpah, ac kuht e eis fuhkah “mwacta ke ma koluk [lasr] sifacna ke lwen in nuhnuhnkuh.”
Plwacn in Engan luhn Pahpah
Srihpac yohk ke plwacn luhn Pahpah pa in sang nuh sin tuhlihk nguhn Nahtuhl pacl wowo in eis sie mahno, in lutiyuck “ma wo liki ma koluk” ke ma puhlakihnyuck ke moul suhkawihl, kapkapwack in nguhn, ac kapkapwack ne tok ma pahtpaht.
Ke ma Olweacng ac Wuhlweacng motko oacna ke sukohsohk in “sulaclah nwacsnwacs“ uh yohk srihpac nuh ke plwacn luhn God in ahkfahsrye moul kawihl ac moul ma pahtpaht luhn wen ac acn Nahtuhl. Ip yohk srihpac se inge ahkuhtweyucki pac ke ma suhmuhslah oacna sukohsohk in sulaclah ac suhkohsohk in mukwikwi.
Kahs se nge “sukohsohs in sulaclah nwacsnwacs” uh mwe luti se. Kahs ma oacna sie kalmac nuh ke kahs se “nwacsnwacs” weacng “wo,” “suwohs,” ac “ma wo.” Kahs ma oacna sie kalmac nuh ke kahs se “sukohsohk in sulaclah” weacng “kwac mukuikui,” “mukwikwi,” ac “orekma.” Ohinge, “sukohsohk in sulaclah nwacsnwacs” kuh in kahlwem kac muh kuh ac sukohsohk in sulaclah ac mukwikwi nuh kacsr sifacna ke ohiyac wo, suwohs, orekma wo, ac pwacye.
Ma nuhkwewa ma God El oraclah uh “kwewana ma in orekma ac ma in orekmakihnyuck.” Ac sukohsohk in sulaclah nwacsnwacs uh pa “kuhiyacn kais sie mukwikwi” ma ahkkweye kuht ekihn tuhlihk nuhtin God in eklac mwet orekma in oruh ac in tiac ma e orekma ma nuh se.
Facluh oreklac oacna sie acn ma tuhlihk nuhtin Pahpah Lucng in muhta we kuh in ahkpwacyeiye in liye lah elos e “oruh ma nuhkwewa ma Leum God lalos El sapkihn nuh selos.” Srihpac yohk se luhn Oreklac uh ac ke moul suhkawihl lasr uh pa in acse nuh sesr pacl wowo in orekma ac eklac oacna ma suc God El suli kuht in eklac oacna.
Leum El fahk nuh sel Enoch:
“Liye tamuhlwel wiyom inge; eltahl oreklac ke pouk sifacna, ac nga sang nuh selos lahlmwetmwet lalos, ke lwen se nga tuh oracltahllah ah; ac lun Imac Eden, nga tuh sang nuh sin mwet uh sukohsohk in sulaclah la;
“Ac nuh sin tamuhlwel wiyom nga tuh fahk, ac oayacpac sang masap, tuh elos in luhngse sie sin sie, ac tuh elos in suleyuclah, ngan Pahpah tuhmaclos.”
Akwuck se ma yohk emet nuhke orekmakihn sukohsohk in sulaclac pa in luhngse sie sin sie ac in sulaclah God. Ac masap luo inge pwacyelah oacna masap se met ac ahkluo in luhngse God ke insiacsr kwewa, nguhnasr, ac nuhnkacsr, ac in luhngse mwet tuhlan lasr oacna kuht sifacna.
Motko lah sapkihnyuck nuh sesr—in tiac luti kuh kahsruh muhkwena, tuhsruhk sapkihnyuck—in orekmakihn sukohsohk in sulaclah lasr uh in luhngse sie sin sie ac sulaclah God. Lwelah ngan fahkwack lah ke ma suhmuhslah, kalmen kahs se inge “nwacsnwacs” el tiac yohkliki tuhsruhk sahp el oacyacpac sie ohiyac wolacna ke orekmakinyen sukohsohk in sulaclah lasr uh.
Soko on in alu akihlenyuck sifac “Choose the Right” nuhke srihpac se. Kuht tiac ahkinsewowoyeyuck ke sukohsohk in sulaclah nwacsnwacs in oruh oacna sie ma kuht luhngse ke pacl na kuht luhngse. Tuhsruhk, in oacna plwacn luhn God, kuht eis sukohsohk in sulaclah nwacsnwacs in som suk ac orekma fal nuhke ma pwacye wacngihn sahflahiyac. Ekihn “mwet orekma lasr [sifacna],” kuht enenuh in oaru na pwacye ke srihpac wowo, “in oraclah ma pucspucs [ke] sulaclah lasr sifacna, ac use in yohk ma suwohswohs.”
Ma yohk srihpac wacngihn sahflahiyac ke sukohsohk in sulaclah nwacsnwacs el sruhmuhnyuck kahlwem ke ma sihmlac lun ma suhmuhslah ke toeni luhlahp se oreklac inkuhsrao ah. Lucifer el tuh lain plwacn luhn Pahpah nuh sin tuhlihk Nahtuhl ac tuh suk in kuhnahoslah kuh se luhn sukohsohk in sulaclah. Kalmac pa, lain luhn defil som suwohswohs nuhke akwuck luhn sukohsohk in sulaclah nwacsnwacs.
God el ahkuhtweyac, “Ke ma inge, ke srihpen … Satan el lainyuc, ac suk in kuhnahoslah sukohsohk in sulaclah luhn mwet, … Ngac oruh tuh elan sisilac nuh ten.”
Inkacnek kuhtasrihk luhn defil pa in eslah tuhlihk nuhtin God liki kuh se in eklac “mwet orekma lalos sifacna” suc kuh in orekmakihn suwohswohs. Nuhnak lal pa in uslah tuhlihk nuhtin Pahpah Inkuhsrao in oacna ma tiac kuh in orek sulaclah lalos.
Oruh ac Eklac Oacna
President Dallin H. Oaks el ahkuhtweyac lah wosasuc luhn Jisus Kraist suli kuht kwewa in etuh sie ma ac in eklac sie ma ke orekma suwohswohs ke sukohsohk in sulaclah nwacsnwacs. El fahk:
“Pwacpuhl puhkantwen ac ma suhmuhslah ke lwen inge sruhmuhn ke sie nuhnuhkuh sahflah ma mwet nuhkwewa ac fah opiyuck fal nuhke ohiyac lalos kuh orekma kuh kena luhn insiaclos. Tuhsruhk kuhtuh ma suhmuhslah sahyac ahkyohkye ma se inge in luhmweyuck nuhke nuhnuhnkweyuck kuht ke ohiyac kuht kuhtanglah.
“Mwet pahluh Nephi el ahkuhtweyac ke Nuhnuhnkuh Sahflah nuhke ma kuht eklac nuhkac: ‘Ac orekma lalos fin fohkfohk elos enenuh in fohkfohk; ac eltahl fin srackna fohkfohk enenuh se tuh elos in tiacna kuh in muhta ke tohkohsrahi luhn God’ [1 Nephi 15:33; emphasis added]. Moroni el fahkwack, ‘El suc fohkfohk ac fah srwackna fohkfohk; ac el suc suwohswohsac fah srwackna suwohswohs’ [Mormon 9:14; emphasis added].”
President Oaks el tahfwelah: “Ke mwe luti ohinge kuht ahksahfye lah Nuhnuhnkuh Sahflah uh tiac top ke ma wotlac ke mukwikwi wo ac koluk nuhkwewa— ma kuht tuh oraclah. Ma in akihlen sahflahiyen mukwikwi ac nuhnak lasr—ma kuht tuh eklac nuhkac.”
Iwaclah luhn Mwet Lahngo
Orekma ac kena lasr muhkwena uh tiac kuh in molikuhtlac. “Tukun ma nuhkwewa kuht kuh in oruh,” kuht kuh in sie sin sie yurin God tuhkuh muhkwena ke kuhlwacng ac pahkotwen ma oasr yurin Leum ac ke kihsac in iwaclah yohklacna ma pahtpaht.
Alma el fahk, “Muhtwacwacack in luhlahlfongi ke Wen Nuhtin God, lah El fah tuhkuh in molwelah mwet lal, ac tuh El fah kweok ac misac in iwaclah ma koluk lalos; ac tuh El fah sifilpac tuhkahkwek liki misac, suc fah use moulyak, tuh mwet nuhkwewa fah tu ye muhtahl, in nuhnuhnkweyuck ke lwen sahflah ac ke lwen in nuhnuhnkuh, fal nuh ke orekma lalos.”
“Kuht luhlahlfongi muh ke Iwaclah luhn Kraist, mwet nuh kwewa kuh in moullac, ke ahkostwen nuh ke masap ac akwuck ke Wosasuc.” Fuhkah luhpan kaksak lasr lah ma koluk ac mukwikwi fohkfohk lasr uh ac tiac sang lain kuht fin kuht pwacye in “sifilpac isuslac,” orekmakihn luhlahlfongi ke Mwet in Molwelah, auliyak ke “inse pwacye” ac “nuhnkuh na pwacye,” ac “muhtweng ne ke sahflah.”
Sahngweng sin God
Puhkantwen yohrohsr sahp motko muh tulac lasr ke muhtuhn iwen nuhnuhnkuh luhn Mwet Nuhnuhnkuh ne tok ma pahtpaht ac fah oacna ke sie ma orek ke masap luhn kohrt facluh uh. Mwet nuhnuhnkuh se fah kol. Mwe ahkpwacye fah tohuyak. Sie ma wotlac ac fah ituckyang. Ac kahlwem lah kuht ac tiac etuh ac sahngweng ne kena kuht etuh ke sahflahiyacn ma sikyak uh. Tuhsruhk nga luhlahlfongi muh kain luhmah se inge tiac pwacye.
Siena liki tuhsruhk kuhpahsr nuh ke sahngweng kuht kwacna puhlakihn pa ma ma suhmuhslah uh ahkuhtweyac oacna “sahngeng sin God” kuh “in sahngeng sin Leum.” Tiac oacna sahngweng facluh ma oraclah fosrngah ac elyah, sahngeng sin God use nuhke moul lasr uh mihslac, ahkpwacye, ac luhlahlfongi.
Sahngweng pwacye el oraclah sie puhla na loal ke ahkfuhlwact ac sahngweng sin Jisus Kraist, ahkos masap Lal, ahkoo Nuhnuhnkuh Sahflah, ac nuhnuhnkuh suwohs oan in Pahol. Sahngweng sin God kapwack nuh ke sie mwe etwacack pwacye wolacna ac misin luhn Mwet in Molwelah, mwe engan se in sang kena lasr nuh ke kena Lal, ac sie mwe etwacack lah mukul ac muhtwacn nuhkwewa fah nuhnuhnkweyuck ke kena, nuhnkuh, kahs, ac orekma la sifacna ke Lwen in Nuhnuhnkuh.
Sahngweng sin Leum el tiac ahlohloh in tuhkuh nuh ye muhtahl in nuhnuhnkweyuck. Tuhsruhk, pa ma sahflah se in akihlen ke sifacna ohiyac pwacye lasr ingena ac pacl fahsruh uh.
Mwet nuhkwewa ma tuh moul, suc moul ingena, ac suc fah muhta fin facluh “fah utuhkuh in tu ye muhtuhn God, in nuhnuhnkweyuck Sel fal nuh ke orekma [mukul kuh muhtwacn] lalos lah wo kuh lah koluk.”
Fin kena lasr uh suwohswohs ac orekma lasr uh wo—kalmac pa kuht ahkpac ke luhlahlfongi ke Jisus Kraist, oraclah ac karuhnganwacng wuhlweacng yurin God, ac auliyak ke ma koluk lasr—na iwen nuhnuhnkuh ac fah engan. Oacna ke Enos el fahk, kuht fah “tu ye muhtuhn [Mwet in Molwelah sac]; na [kuht] fah liye muhtahl ke engan.” Ac ke lwen sahflah kuht ac fah “eis insewowo ke sowohswohs.”
Ke ma sruhmuhnyuck uh, fin kena lasr uh fin ma nuh ke ma koluk ac orekma lasr uh suhfal, na acn in nuhnuhnkuh fah sie ma in sahngwengkihn. Ac fah oasr yohrohsr “sie etuh suwohs,” “sie esam kahlwem,” ac “sie etuh ke ma koluk [lasr] sifacna.” “Kuht fah tiac kuh in ngwetwack nuh sin God lasr; ac kuht ac luhngse liki na fin kuht kuh in sapkihn yot ac finohl ah in puhtatlac nuh facsr in okankuhtlac liki ye muhtuh God.” Ac ke lwen sahflah ac “fah eis usru luhn ma koluk [lasr].”
Sahflahiyac, kuht mwet nuhnuhnkuh lasr sifacna. Wacngihn mwet enenuh in fahk acn kuht ac som nuh we. Ke ye muhtuhn Leum, kuht fah akihlen ma kuht tuh sulaclah in eklac ke moul suhkawihl ac sifacna etuh acn kuht enenuh in oasr we ke moul ma pahtpaht.
Olwelah ac Fahkwack Luhlahlfongi
Etuh lah Nuhnuhnkuh Sahflah sac kuh in mwe engan el tiac sie mwe insewowo fihliyucki nuh sel Moroni muhkwena.
Alma el ahkuhtweyac mwe insewowo olwelah nuh sin mwet tuhma lutlut pwacye nuhkwewa luhn Mwet Lahngo. El fahk:
“Kalmeyacn kahs se fohlohkihnyuckyak uh pa in sifil fohlohkohnwacng ma koluk nuh ke ma koluk, kuh ikoac nuh ke ikoac, kuh ohiyac koluk nuh ke ohiyac koluk—ma wo nuh ke ma wo; suwohswohs nuh ke ma suc suwohswohs; suwohs nuh ke ma suwohs; pahkotwen nuh ke ma pahkotwen.
“… Oruh ma suwohs, nuhnuhnkuh in suwohs, ac oruh ma wo pacl nuhkwewa; ac kom fin oruh ma inge nuhkwewa na kom fah eis usru kac; ac pahkotwen ac fah sifilpac fohlohkihnyuckwot nuh sum; ac fah oasr nuhnuhnkuh suwohs sifil fohlohkihnyuckwot nuh sum; ac fah oasr sie nuhnuhnkuh suwohswohs sifilpac fohlohkihnyuckywot nuh sum; ac kom fah sifilpac eis mwe usru wo.”
Nga engan in loh kac lah Jisus Kraist pa Mwet Lahngo moul lasr. Olwelah lal Alma ah pwacye ac fal nuh sum ac nga—mihsenge, lutu, ac ne tok ma pahtpaht. Nga fahkwack ke ine muhtahl luhn Leum Jisus Kraist, amen.