Eis Inen Jisus Kraist

Ke 2018, ke Utah University, wal sasuc yohk srihpac se akwucki pahngpahng “Dr. Russell M. Nelson ac Dantzel W. Nelson Prestuhn ke Siah luhn Cardiothoracic Surgery”—cardio, kalmac pa “heart,” ac thoracic, kalmac pa “inyuwac.” Akihlenyuck orekma yohk srihpac lal Prestuhn Nelson ekihn mwet in laslas heart se ac kahsruh ma el eis yurin muhtacn kiacl, Dantzel suc somlah tari. Wal se inge moliyuck ke mani se ma oreklac in oan nuhke pacl fahsruh uh. Mwet ma sollac nuhke kain wal etweyuck se inge elos akihlenyuck, kahsreyuck ke mani, ac kahsruh ke mwe lutlut.

Mwet in laslas se emet solac in sruok wal se inge pa Dr. Craig H. Selzman, mwet in laslas suhmaht se ke heart ma tiac mempucr ke Alu lasr uh. Ke toeni in sang award se inge nuh sel Dr. Selzman, puhs mwet yohk srihpac wi, suc pa Prestuhn Nelson ac muhtwacn kiacl, Tahmtahel Wendy W. Nelson. Ke toeni sac, Prestuhn Nelson el sruhmuhn ke el tuhfahna orekma ke laslas.

Tohkoh Dr. Selzman el akacsruhi lah meac kalmeyac sel in srihsrngiyucki nuhke wal se inge. El fahk lah lwen ahkosr met liki ac, tukun ao puhs lun rum in laslas ah, el konwacack lah sie mwet mas el karihngihn ac enenuh in fohlohk laslas. El ulac ac suhpwacrlac, etuh na lah elac sulpac sislah fong se muhta hospital.

Ekuh se inge, Dr. Selzman el sramsram ke sie eklac luhn moul nuh sel sifacna. Ke pacl sac, el nuhnkuh: “Fracte uh, nga ac fah srihsrngiyucki nuh ke wal se ma us inel Dr. Nelson. El etweyuck pacl nuhkwewa oacna sie mwet liyacacng ohiyac lal, oruh wo nuh sin nuhkwewa ke ahkfuhlwact, ac mongfihsracsr. Ingena ke inek e kuhpasryang nuh ke inel uh, nga enenuh in srihke in oacna el.” Dr. Selzmen el arulacna pihsrlac ke laslas tari. Tuhsruhktuh el ke eklac in wo liki na met ah.

Ke pacl somlah, u in laslas soko lal ah kuh in akihlen ulac ac ahngyang lal uh ke srihpen el oruh kahlwem ke ohiyacl ac lihkihn puhsracl. Tuhsruhk ke rum in laslas sac ke fong sac, Dr. Selzman el srihke in oraclah sie ma wowo yohkiacna in kahsruh ac kahlwem ke u se lal inge. El puhla muh oasr eklac kac ac sulaclah in tahfwelah na in oacna Dr. Nelson.

Yac limekohsr tohkoh, Prestuhn Nelson el sang pwepuh in wal lal inge nuh ke University of Utah. Mwet kol ke University se inge ahkahlwemye srui lalos nuh sel Prestuhn Nelson. Ke toeni se inge, Dr. Selzman el tuh sulpac sramsram. El orekmakihn ine fototo lal Prestuhn Nelson ah, RMN, el fahk, “Oasr ohiyac wowo ke ‘RMN’ suc ingena fohlwelah Division of Cardiothoracic Surgery ke University Utah.”

Ke ohiyac fohs uh, Dr. Selzman el ahkuhtweyac: “Nga oruh ma kuht luti ingena nuh sin mwet tuhfahna sroacng ah in oruh—lohacng, fuhlweack, ac sang kuhiyom nohfohn. Ohiyac wowo se inge wi kuht lwen nuhkwewa. Kuht sang pin mahkiyucki nuh sin mempucr nuhkwewa ke ohfuhs sac ac kais sie mwet tuhfahna sroacng ah. Acn e ten ke pin ingacn sihmlac ‘RMN.’ Ohiyac wowo se ke RMN inge pwelucng se nuh ke lutlut lasr; kuht luti nuh sin mwet nuhkwewa.” Dr. Selzman el ekuhlah ohiyac lal met ah ac finsrak lal ke srihpen inel ingena kuhpahsr nuh ke ma lal Prestuhn Nelson.

Tahklac luhn ma sikyak kacl Dr. Selzman oruh ngan siyuck sihk sifacna: “Fuhkah ohiyacn eklac luhk uh ke nga kapsrweni inek nuhke inen Jisus Kraist? Kuh nga orekmakihn ohiyac wowo luhn Kraist? Kuh nga srihke kuhiyuck in eklac wo liki oacna El?

Ke puhla lal Dr. Selzam ingacn, kuht kuh in liye ohiyac limekohsr nuhke inkacnek in eis nuh facsr ine muhtahl luhn Jisus Kraist. Finne inkacnek se ingacn muhtacwacack ke pacptais, tiac sahflah ne ke na kuht nwacsnwacslah ac muhtahl ac eklac oacna El.

Inkacnek se emet an pa akihlenyuck. Sollac lal Dr. Selzman nuhke wal se yurin Nelson kuhpahsriyac inel nuhke inel Prestuhn Nelson, ac Dr. Selzman el muhtwacwacack in akihlenyuck yohrohl Prestuhn Nelson. Ke kuht eis nuh facsr inen Jisus Kraist, kuht oracni inesr nuh ke Inel. Kuht oacna El. Kuht engan in eteyuck muh Mwet Christian. Kuht ahkfuhlactye Mwet Lahngo ac ahkahlwemye lah kuht Weluhl.

Tuhkuh tukun akihlen pa sie pac inkacnek: esamyac. Ke Dr. Selzman elac som nuhke ohfuhs lal ah, pwacnlah muhtahl opi se el tuh eis ke el tuh srihsrngiyucki nuhke wal se yurin Nelson inge. Opi se inge ahkacsmakihnyacl lwen nuhkewa ke puhla ac ohiyac wowo ke RMN. Nuh sesr, eis kuhfa luhn Leum ke kais sie wik kahsre kuht in esam Jisus Kraist ke wik na fohn sacn. Ke kuht ipeis ke kuhfa luhn Leum, kuht oruh ohinge in esamyac ke molo se ma El molikuhtlac ah. Kuht ahksasucye wuhlweacng lasr in Esamuhl, akihlen wolacna Lal, ac kaksakihn luhng kuhlwacng Lal. Kuht in esam na esam lah ke na srihpen luhng kuhlwacng Lal kuht moliyucklac liki misac luhn mahno ac misac luhn nguhn.

Kalmen esamyac pa in ukwoe kahs in kahsruh utuckuh sel mwet pahluh Alma ke Puk luhn Mormon. Kuht “lwelah orekma [lasr] nuhkwewa in ma nuh sin Leum, ac oacna sie [acn kuht som nuh we, [kuht] lwelah in ma ke Leum; … [kuht] lwelah nuhnak [lasr] nuhkwewa in som na nuh sin Leum; … ac [kuht] lwelah luhngse luhn [insiacsr] in fihliyucki fin Leum ne tok ma pahtpaht.” Finne ke kuht kahfofo ke ma sahyac, kuht in Esamuhl na, oacna ke kuht esam inesr sifacna, finne ke oasr elyah lasr.

Ma pucspucs in esamyuck ke ma Mwet Lahngo el oruh nuh sesr use inkacnek ahk tolu: srihke in etahi. Dr. Selzman el muhtwacwacack in etahenuhl Prestuhn Nelson ac ohiyac wowo luhn RMN. Nga luhlahlfongi muh mukwikwi ac ohiyacl Prestuhn Nelson ahkahlwemye lah el mwet tuhma lutlut luhn Jisus Kraist. Nuh sesr, fin yohk ma kuht akihlen ac esam kacl Jisus Kraist, na e yohk luhngse in oacna El. Ekihn mwet tuhma lutlut Lal, kuht eklac wo emet ke kuht Silyac na, liki na kuht lohacng nuh sesr sifacna. Kuht kampare in oacna El ac suk in ahkinsewowoyeyuck ke ohiyac wolacna Lal. Kuht pruhe ke insiacsr in sesseslah ke luhngse, luhngse pwacye luhn Kraist.

Oacna ke Prestuhn Nelson el luti ke Eprel ah: “Ke luhngse pwacye el oasr yohrohsr, ac wacngihnlac pacr lasr in ahkolukye mwet sahyac. Kuht ac tui tilac nuhnuhnkuh mwet sahyac. Ac oasr luhngse pwacye lasr nuh selos suc tuhkuh ke kain in moul nuhkwewa. Luhngse pwacye nuh sin mwet nuhkewa yohk srihpac nuh ke kapkapwack lasr. Luhngse pwacye pa pwelucng se nuh ke ohiyen mwet wowo se.” Wi pacna luhngse pwacye, kuht suk in,“ahkkahpye, … ac ahkyohkyelihk”mwe sang muhtahl sahyac sin Mwet Lahngo, weacng pac nwacsnwacs, muhtweng, ac insacnweacng.

Etahi Jisus Kraist kolkuhtlac nuh ke inkacnek ahk ahkosr: oruh fal nuh ke srihpac Lal. Kuht Weluhl ke orekma Lal. Ekihn mwet laslas se, Dr. Nelson el etweyuck oacna sie mwet luti, mwet in onwe se, ac mwet ilucstwen se. Pin se ma mahkiyucki orekmakihnyuck ke ohfuhs lal Dr. Selzman ah ahkuhtweyac ma srihkeyuck, ke kahs inge LutiOnwe, ac konwacack. Nuh sesr, ip se ke kuht eis nuh facsr inen Jisus Kraist enenuh inse pwacye, oruh ke srihpac, ac engan in fihliac mwe finsrak lasr in oan Yohrohl. Kuht Weluhl ke orekma Lal ke kuht “luhngse, akacsruhi, ac suli.” Kuht Weluhl ke orekma Lal ke kuht muhtwacta nuh yurin mwet, yohk na nuh selos suc muhkahimtacl ac nuh selos suc kihnet, tuhlac, kuh muhnahslah ke ma elos puhla facluh.

Kuht eis yohk nuh facsr inen Jisus Kraist ke kuht akihlenyac, esamyac, srihke in etahi, ac insese. Oruh ma ahkosr inge penkuhtlac nuh ke inkacnek ahk limekohsr: eis kuh. Kuht eis kuh ac insewowo luhn God nuh in moul lasr. Wal se Dr. Selzman el eis yohrohl Nelson ah oruh ahkihlenyuck el ac kahsreyuck el ke mani ma elan orekmakihn in ekuhllah facsin ke acn in orekma lal. El orekmakihn “mwe sang kuh” se inge in kahsruh mwet sahyac. Ke atac se pacna inge, ke kuht eis nuh facsr inen Mwet Lahngo, Pahpah tuhmasr Inkuhsrao el ahkinsewowoye kuht ke kuh Lal in kahsre kuht ahkfalyelah kuhlwacnsap lasr facluh.

Ke kuht ahkyohkye wuhlweacng lasr nuh sin God, kuht eis nuh facsr inen Jisus Kraist. Ma sikyak pa, God el ahkinsewowoye kuht ke kuh Lal. Oacna ke Prestuhn Nelson el luti ac: “Kais sie mwet ma oraclah wuhlweacng la ke acn in pacptais ac lun tempuhl—ac karuhnguhnwacng—elos ahkyohkyelihk inkacnek nuh ke kuh luhn Jisus Kraist. … Opi nuh ke karuhnganwacng wuhlweacng yurin God pa kuh inkuhsrao … se ma ahkkweye kuht in kuhtanglah ma upac nuh sesr, mwe sruhf ac inse toasr lasr in wolac.”

Kuht eklac yohkwelihk oasr luhn nguhn. Yohkwelihk yohrohsr puhlaik in lain ohiyac ma tiac motkwoeyuck muh ac siyak. Kuht ahkkweyeyuck yohk likina met ke sulaclah lasr in fahsr tukihn Jisus Kraist. Kuht silahklahk likina met ah in auliyak ac fohlohk nuh Yohrohl ke kuht puhtatlac. Kuht eklac etwaclah ma sasuc ke kuht akacsruhi wosasuc Lal ke kuh ac wal. Kuht kahsruh mwet enenuh ac tiac nuhnuhnkuh. Kuht eis iyucklac liki ma koluk lasr. Yohk mislac lasr, ac kuht engan ke srihpen kuht kuh in enganwack ke pacl nuhkwewa. Wolacna Lal e raunikuhtlac, ac lipufacn Lal e kol kuht.

Mwet Lahngo El suli kuht in, “ tuhkuh nuh yurin Pahpah ke Inel, ac ke pacl fototo e fah eis wolacna lal.” Nga kwacfe kowos in oruh ma se inge. Tuhkuh nuh yurin Pahpah tuhmasr Inkuhsrao. Eis nuh fohm inen Jisus Kraist. Akihlenyuck Yohrohl. Esamuhl pacl nuhkwewa. Srihke in oacna El. Weluhl ke orekma Lal. Eis kuh ac mwe insewowo Lal in moul lom. Taflwelah Inel insiom, ke luhngse ac kena lom. Ma se inge usot nuh sum in “tu” ye muhtuhn Godac oraclah kom in akihlenyuck ke orekma luhn Mwet Lahngo keim. Kom e moul ne tok ma pahtpaht ke tohkohsrai luhn Pahpah tuhmacsr Inkuhsrao, wi usrui yurin Wen Se Emet Nahtuhl, Mwet Lahngo ac Mwet in Molwelah sacohk lasr.

El moul. Nga etuh na pwacye. El luhngse kowos. El sang moul Lal keim. El kwacfe kom in tuhkuh nuh yurin Pahpah ke El. Ke inen Jisus Kraist, amen.