Jisus Kraist ac Muhtwacwacack Sasuc Lom

Jisus El tuh “forfor in acn nukewa ac oru ma wo.” Kuht riti ke ma se inge ke puk luhn Orekma. Kunohkohn na yohk se pa ingacn! Pwacyena lah Jisus El tuh forfor oruh ma wo! El pa kuhiyacn ma wo nuhkwewa! El sislah pacl Lal ke lusen moul Lal fin facluh in oruh ma wowo. El “kulang ac pakoten, su tia sa in mulat, ac sesseslana ke [wo ac pwacye].”

In ahkuhtweyac kuh ahkfototoiyac kulacng ac pahkotwen Lal pa sufahl! Pwacyena lah, oacna ke Mwet Sap John el tuh fahk, fin kuht srihke in suhmuhslah nohfohn ke orekma wowo luhn Mwet Lahngo lasr, “faclu nufon ac tia ku in nwauk book ma ac simisyukla inge.”

Mwe srihkasrak ekahsr oasr ke ma suhmuhslah ma sruhmuhn kacl Jisus ke El forfor ”oruh ma wo” use mwe nuhnak yohk, finne in nuhnkuh lah fuhkah atac uh fin pa kuht wi pac oasr we ke pacl sac, in wi liye ke mwenmwen Lal, in eis luti Lal, ac in puhlakihn unweyuck Lal. El sramsram nuh sin mwet sruhngwacyuck, El kahl elos suc mas ac fohkfohk, El ahkkweye elos suc tohtohlah, El luti ke ma pwacye, ac El suli mwet uh in auliyak. Nuh sin mwet lepa sac, mukul ohkohk sac, muhtwacn kosro sac; nuh sel suc tiac kuh in fahsr, el suc sohlohngkahs, ac el suc tiac kuh in sramsram; nuh sin ninac ahsor nuhkwewa, mwet sruhngweyuck, ac mwet kweok; nuh sel suc muhnahs in mahno kuh muhnahs ke nguhn, ma El oruh pa El sang muhtwacwacack sasuc nuh selos. Ahok, sie pac ahkuhtweyac yohk pa inge!

Ma nuhkwewa El fahk ac oruh sang muhtwacwacack sasuc nuh sin kais sie selos suc El unwelah, ahkinsewowoyelah, luti, ac ahkmuhlahlahyelah liki ma koluk. El tiacna forlah luhkwelos, ac El fah tiacna forlah liki kom. Srihke nuhnkuh ke pacl se inge kom fin lohng kahs inge Sel:

“Wen nutik, ma koluk lom nunak munas nu sum.”

“Tulik mutan, nga fahk nu sum, tukakek.”

“Kom in nasnasla.”

“Nga ac tia pac nununkekom. Kom ku in som, tusruktu nimet sifilpa oru ma koluk.”

“Acn nutik, lulalfongi lom akkeyekomla. Som in misla.”

Kahs luhn Mwet Lahngo nuh sin kais sie mwet inge fototo, tuhsruhk kahs inge El orekmakihn in oakiyac muhtwacwacack sasuc nuh ke nuhnakmuhnahs, auliyak, fohlohkyak, mislac, ac moul ma pahtpaht. Ac mwe fahkwack wolacna nuh sesr pa, El use pac muhtwacwacack sasuc se pacna inge nuh sum ac nuh sihk. Kuht nohfohn kuh in eis muhtwacwacack sasuc kacl, ac ke sripacl, Jisus Kraist. Finne kom. Muhtwacwacack sasuc uh yohk sripac nuh ke plwacn lal Pahpah nuh sin tuhlihk Nahtuhl. Pa inge alu nuhke muhtwacwacack sasuc uh! Pa inge alu nuhke moul sasuc!

Ke pacptais ke kof ac Nguhn, kuht “sifil isusla” ac kuh in “moulkin sie moul sasu.” Fuhkah luhpan finsrak se ma muhtwacwacack sasuc se inge sang nuh sin sie suc muhta in toasr ke ma koluk lal kuh kweok ke ma elyah in moul lal ac fuhs inmahsrlon mwet lal? Jisus El tiacna enenuh nuhnakmuhnahs nuh ke ma koluk kuh muhtwacwacack sasuc in moul lal, tuhsruhk El pacptaislac, in ahkkahlwemye nuh sesr mwe ahkkweye nuh ke muhtwacwacack sasuc suc El orwaclah nuh sesr kais sie.

Ac muhtwacwacack sasuc lom an tiacna sikyak ke pacl se fanna. Kuht kwacna muhta nuhnkuh muh pacptaislac lasr uh pa finsrak se fanna lasr nuh ke sie muhtwacwacack sasuc. Tiac na. Tiac finsrak se fanna lasr. Muhtwacwacack sasuc inge kuh in sikyak ke lwen nuhkwewa! Ac pwacyena lah wik nuhkwewa ke kuht ipeis ke ipin fuhlao ac nihm ke kuhp in kof srihsrihk se in esamuhl ke mwe sang luhn Mwet Lahngo lasr, suc misac in use muhtwacwacack sasuc nuh sesr ke pacl nuhkwewa kuht enenuh uh! Jisus El use nuh sesr muhtwacwacack sasuc nuh sesr pacl puhkantwen oacna ke kuht enenuh uh.

Ke oaru ac kampare nuh ke moul sasuc in Kraist, kuht kuh in eklac “sie mwet sasu” ke ma mah uh wacngihnlac ac ma nuhkwewa eklac sasuc. Mwacta fuhkah muhtwacwacack sasuc se inge sang nuh sin sie suc sikalweni in srihke, ke tahfwelah na in sulaclah luhlahlfongi ke kuh luhn Mwet in Molwelah lasr in unwelah ac fohlohkohnwack, finne ke mwe lusrohngtwen el puhlakihn ke facl se inge? Mwet Lahngo lasr tiacna fuhlweack ke sulaclah Lal in ahkfahsryelah kena luhn Pahpah ac ahksahfyelah orekma wolacna lal ke Iwaclah Lal, finne ke El puhlakihn kweok upac, in oruh srah uh in tuh kahklah kacl, in kweok ke mahnol ac nguhnal, ac pruhe tuh kweok lal in itucklac luhkwel. Sulpac, El ahkuhtweyac nuh sesr in kampare pwacye sin God.

Ke wuhlweacng nuhkwewa kuht orwaclah ac srihke lasr nuhkwewa kuht sang in liyacacng wuhlweacng lasr, kuht kuh in eis sie “inse sasu” ac sie “nunak sasu.” Ke kuht suli wolacna Lal nuh insiacsr ac sislah puhsra in ahkmuhnahs lun sifacsr uh, kuht eklac mwet Lal ke srihpen kuht fihliyac tuh Elan God lasr. Jisus El kena ma luhlahp tuh elan Tohkohsrah se lasr ac mwet Shepherd lasr ac Sripack luhn Mislac, ac kuht enenuh in sulaclah tuh Elan ohinge ke insiacsr ac nuhnak lasr.

Auliyak uh ikucslah sruhnguhl nuh ke muhtwacwacack sasuc lasr, moul sasuc, ac pacl ahkluo. Mwe luti luhn Prestuhn sacohk lasr Russell M. Nelson elah nuhnak suhtuh ke mwe sang wolacna ke auliyak, ac nga nuhnkuh muh kuht inge muhtwacwacack in kahlwem kac.

Mwe engan se in lohng ke tuhlihk fuhsr lasr ngwe ahkuhtweyac lah meac kalmeacn auliyak nuh seltahl uh. Pacl fototo somlah ah nga lohng sie muhtwacn fuhsr el fahk, “Ke nuhnkuh ke auliyak uh, nga puhla engan yohk ac finsrak. Nga puhla luhngse ac engan luhn Pahpah tuhmuhk Inkuhsrao ac Mwet Lahngo luhk. Nga tiac sahngweng in ngwet nuh sin Pahpah Tuhmuhk Inkuhsrao ac siyuck ke kahsruh Lal ke oacna sie ma nga puhlakihn upac kac. Nga etuh lah Elos tiac srihke in lohiyucwi ke nga oruh ma koluk se. Paholos ahsroelihk. Pangwe auliyak nuh sihk,” el fahk. Muhtwacn fuhsr se inge kahlwem kac lah ke srihpacl Jisus Kraist, el kuh in eis muhtwacwacack sasuc se!

Kuh kom enenuh sie muhtwacwacack sasuc? Kuh kom kuh in oruh sie muhtwacwacack sasuc an, finne in kom? Nuhnkuh kaclos suc Mwet Lahngo el kahsruh ah—mwet El luti, ahkkweyelah, ahkmoulyeack, nuhnakmuhnahs nuh se, ac fohlohkohnwack. Kuh El sulaclah mwet inge ke srihpen ma etweyuck kaclos kuh ke sucu elos tuhkuh we me? Kuh El srwelah inmahsrlon mwet suwohs ac mwet koluk? Kuh El sulaclah mwet kais sie ke srihpen el luhngse elos yohk liki na mwet sahyac? Moh.

Kuhtuh mwet som nuh Sel, luhlahlfongi ke kuh Lal in ahkkweyelah mas—oena mutan se su musen srah, mwet kuhlacnsap luhn makul Roman senturiyacn suc misaclah, mukul leper se, Jairus, ac mwet kun Bartimaeus. Kais sie selos fihliyac luhlahlfongi lalos facl, finsraki tuh wolacna ac kuh luhn Leum fin acn Nazareth fah ekuhllah moul lalos ac liye lalos. Ac El oraclah. El fuhlwelah ahkkweye Lal in fahsr.

Tuhsruhk Jisus El oacyacpac ahkinsewowoyaclos suc muhnahs luhlahlfongi la, oacna ke pahpah tuhmuhn tuhlihk mas sac tuh wowoyak ac fahk, sahp oacna ke kom oruh, “Nga lulalfongi, tuh soenna fal, Kasreyu akyokye lulalfongi luhk uh.” El oacyacac sang nohfohn pahkomuhta nuh selos suc tiacna sokuhl, oacna muhtwacna se suc tuh sruhuh ke srihpen kosro, katinmas se fin acn Nain ah, mukul suhkahpahs se ke inluhluh in kof se fin acn Bethesda, ac mukul se suc isuslac ohkohk ah. Yac kom na puhla El oruh ma wo in moul lom finne ke pacl kom tiac Sokuhl kuh fahsr Tohkohl uh?

El sang moul sasuc nuh sin kais sie mwet kuht riti ke ma suhmuhslah uh, ac nuh sin nohfohn suc e fah lohng ac topuk, finne in moul sasuc se ma nuhnakmuhnahs ke ma koluk la, kuh moul sasuc se suc ma ahkkweyeyucklac liki mas la, kuh moul sasuc se suc ma moulyak liki misac.

Meac kalmeacn ma se inge keim ac keik? Wolacna lal ac pahkotwen ac luhng kuhlwacng lal wacngihn sahflahiyac. Muhtwacwacack sasuc uh yohk srihpac na upac ke placn luhn Pahpah! Muhtwacwacack sasuc uh pa srihpen orekma luhn Wen! Litutacng sasuc, sapta sasuc, ac muhtwacwacack sasuc pa ma yohk ke pweng wo luhn wosasuc uh!

Pwacnwacng, yac kom som loeskalah liki wuhlweacng lom kom in tiac eis sie muhtwacwacack sasuc? Moh. Yac puhkantwen lac tahfonglac lom in sifil utuckoht sie muhtwacwacack sasuc ah? Moh. Kuh kom som loeskalah luhkwel Kraist elan kahsrwe kom ke muhtwacwacack sasuc lom ingena lac fahlac? Moh. Setuhn muhkwena pa eis wo ke nuhnak in puhtatlac lom. Kom tiac muhkwena.

Muhtwacwacack sasuc uh tiac ma nuh ke ma koluk ac tahfonglac lasr muhkwena. Ke wolacna ac kuhlwacng luhn Mwet Lahngo, kuht kuh in eis muhtwacwacack sasuc ma pahtok eklac ke ohiyac mah, ohiyac koluk, aoras, elah suhfal, puhla wacngihn srihpac, ac kena la in sang mwacta nuh sin mwet sahyac ac kahingkihn kunohkohn la. Kom kuh in ekuhllah ma keim sifacna ma ahktoasrye kom ke yac nuh ke yac. Kom kuh in sifilpac muhtwacwacack ke kuh luhn Leum nuh ke muhtwacwacack sasuc. El tiacna tohtohlah in use muhtwacwacack sasuc nuh sesr.

Nuh suwos suc kalweni na in puhlakin ma upac ke na ma koluk sac na ke pacl puhkantwen, fahsr na nuh met. El tiacna fihliyac ma met liki kom in kosrwekomlac. El tiacna fihliyac in oasr tui se ke muhtwacwacack sasuc lom uh. Fahsr na nuh met. Tahfwelah na in kampare. Sukok kahsruh selos suc raunikomlac. Ac kom luhlalfongi ke mutwacwacack sasuc oasr yurum pacl nuh kewa kom folohk nuh ke Pahpah ke inse pwacye. Lwelah kuht in fahsr liki orekma koluk, ac fihliyac nuhnak in lain uh tohkohsr ke yen fal in an we. Kom tiac enenuh in muhta na ke ohiyac se lom met ah. Eis moul sasuc lom, pacl ahkluo kuh ahktolu kuh ahkahkosr—kuh ahksiofok—pacl, suc utuckot nuh sum ke srah in kihsac luhn Jisus Kraist.

Nga srui yohk liki ahkuhtweyucki ke muhtwacwacack sasuc ma sang nuh sihk ac ke ma nga fah kihsacyuck nuh sihk.

Mwet Lahngo lasr fahk kahs sahflah Lal ke ac fin wacngihn srihpac nuh ke finsrak kuh enganwack ke lwen se inge. Tukun kweok upac ma sikyak Gethsemane ac ke sahflahiyacn srihpsrihpyak lal fin sahksin soko ah, El fahk, “Sahfla tari.” Ahkfahsryeyucklac ma palyeiyuck Kacl, ac molin misac luhn ma koluk luhn mwet uh ac kweok uh moliyucklac. El fahk “sahflah” Kihsac wacngihn sahflahiyac ac ma pahtpaht Lal. Tuh Iwaclah Lal e tiac sahflah nekena El Sifacna puhlakihn moul sasuc ke lwen ahktolu, sie muhtwacwack sasuc ke wolacna, sifilpac moulyak ke kuh luhn Pahpah.

Ke srihpen El oruh ma inge pacl nuhkwewa in ahkpwacrye Pahpah Tuhmwacl, ac ke srihpen El “kweokkihn luhngse luhn Pahpah ke ma nuhkwewa,” nga kom kuh in eis muhtwacwacack sasuc. Nuhnakmuhnahs eis muhtwacwacack sasuc lom, finne mihsenge, ingena. Jisus Kraist pa Muhtwacwacackiyac ac Sahflahiyac ke luhlahlfongi lasr, ac el tiacna tui ke sihmihsyacn sapta sasuc lasr uh. El pa Muhtwacwacack ac Sahflah—sahflahiyacn mwekihn lasr ac kweok, ac muhtwacwacackiyen moul sasuc in El, lwelah nuh sesr kuht in eis kuhlacng Lal, sislah ma somlah tari ac sifilpac muhtwacwacack ke sie litutacng sasuc ke pacl nuhkwewa kuht enenuh uh. Pwacyena lah “wo ac lungkulang fah wi [kuht] in len nukewa in [moul lasr].” Ke inen Jisus Kraist, amen.