Ngwet nuh Sin God ac Moul

Ke June ah, accident upac se sikyak fin acn Lesotho ma an nuh epang Africa. Pas srihsrihk soko us muhtwacn fuhsr longoul ke Pracns Maputsoe ke Alu uh ac mwet kol itkohsr lalos tuh som nuh ke kacptohl, Maseru, nuh ke toeni se luhn muhtwacn fuhsr ke acn se elos muhta kac ingacn. Ke elos kahsruhsr ke inkacnek ohsrihksrihk luo ke litutacng sacn, car soko tuhkuh ke lacfahl se lacah ah, srihke in pahselah siepacna stosah, uh tuh yucyang suwohsacng nuh ke pas nwacnwaclah soko ah. Wacngihn suhnuhn pacl in kahingkuhnlah yucme sac, ac ke kihtin pacl ah, stosah ah fuohf, ipiplac liki inkacnek ah, ac fihrihryak.

Mwet singucul limekohsr nohfohn misac ke accident sac, weacng muhtwacn fuhsr ohnkohsr, mwet kol luo luhn Muhtwacn Fuhsr, ac prestuhn luhn Pracns ac muhtwacn kiyacl. Mwet painmoullac ah, sucu, ac kawuck ahkkahlwemye kain in ma puhlakihnyuck, weacng kasrkuhsrak, suhpwacr upac, ac finne puhla ma koluk. Finne ma puhlakihnyuck ac kihsensiyuck uh tiac topukyuck, elos ahkkweye sie sin sie ac ngwet nuh sin God ke on muhtahl, ma suhmuhslah, ac pruhe, ke acn elos sokwack mihslac. Setso’ana Selebeli suc matwac yac singucul itkohsr suc painmoullac el fahkwack lah “Jisus Kraist El luhngse kuht ac El wi kuht, finne kweok insiacsr.”

Muhtwacn fuhsr se ac mwet kol se suc kauli hospital ke follah kaclos ah tuhkweni lutlut ke Puk luhn Mormon. Sie fahk, “In pacl inge kuht riti Moroni, ac Moroni el fahk ma nga puhlakihn inge. … Ke el sramsram, oacna in muh el fahk, ‘Kom enenuh in lotwelah kahs inge ke srihpen elos sihmlac nuh sum in kahsre kom sahslah liki ma inge.’”

Orekeni nuh sie alu in mas kaclos suc misac, Elder Siyabonga Mkhize ke Eria Itngucul el fahk, “Kuht nohfohn enenuh in foracng nuh sin Leum ke pacl se inge ac siyuck Sel in ahkmihsye insiacsr ac … in ahkwoyelah kweok ma kuht puhlakihn.” Prestuhn luhn Muhtwacn Fuhsr ke Leribe Pracns, Mampho Makura el fahk, “Foracng nuh sin Leum, ac suk in kuh in insese nuh ke kena Lal. Jisus Kraist pa ‘mwet sihm ac mwet ahksuwohsye luhlahlfongi lasr’ [Hebrews 12:2]. Nimet ngwetlah liki, tuhsruhk ngwet nuh Sel.”

Ngwet nuh Sel. Kahs lal uh oacna kahs in kahsruh lal Alma nuh sin wen nahtuhl, Helaman: “Ngwet nuh sin God ac moul.” Alma el sramsramkihn pacl lal Lehi ac mwet lal ma sruok Liahona sac: “Fihsrwacsr in lohacng nuh ke kahs luhn Kraist, ma fah srihsrngi nuh sum soko inkacnek suwohs nuh ke engan ma pahtpaht, oacna ke pahpah tuhmwacsr lohacng nuh ke kampahs se inge, ma fah srihsrngi nuh selos soko inkacnek suwohs nuh ke acn wihlwihl.” El fahk: “Elos fin ngwetwacng elos ac kuh in moul. … Ac kuht fin … ngwetwacng kuht kuh in moul ne tok ma pahtpaht.”

Sie pac pa, Alma el orekmakihn srihkasrak se ke serpent prahs ma sruhkyuckyak sel Moses ke Mwet Israel mahtuh tuh ngalngucluh ke serpent fol sac. Leum El fahk nuh sel Moses elan oraclah in oacna soko serpent ac likiyac ke muhtuhn soko sahk, ke olwelah se muh “kutena mwet su ngalnguli fin ngetak nu kac, elos fah moul ac tia misa.” Alma el ahkuhtweyac lah serpent osra sac pa sie mwe akucl luhn Kraist, suc e fah srihpsrihpyak fin sahksin. Puhs mwet ngwetwacng nuh kac ac moul, tuhsruhk ke kahs lal Alma, elos “arulacna kwekwe” oruh elos tiacna ngwetwacng ac elos misac.

Alma el siyuck:

“Kowos fin kuh in unweyucklac ke ngwetwacng muhkwena ke motowos tuh kowos in kuh in unweyucklac, yac kowos ac tiac silahklahk liye, kuh yac kowos ac ahkkwekweye insiowos ke suhlahlahlfongi, ac tiac mukwikwi, oruh kowos tiacna ngwetwacng ke motowos, tuh kowos in misac?

“ … Na ngwetwacng ke motowos ac muhtwacwacack in luhlahlfongi ke Wen nuhtin God, tuh El fah tuhkuh in molwelah mwet lal, ac tuh El fah kweok ac misac in iwaclah ma koluk lalos; ac tuh El fah sifilpac tuhkahkwek liki misac, suc fah sang sifil moulyak, tuh mwet nuhkwewa fah tu ye muhtahl, in nuhnuhnkweyuck ke lwen sahflah ac ke lwen in nuhnuhnkuh, fal nuh ke orekma lalos.”

Pwacyena, kahs in kahsruh in “ngwet nuh sin God ac moul” oasr kalmac nuh sesr ne tok ma pahtpaht tuh oacyacpac oruh oasr eklac wo ke ohiyacn moul lasr uh. Esam kahs lal Tahmtahel fuhsr Selebeli fin acn Lesotho ma fwack tari—“Jisus Kraist El luhngse kuht ac El wi kuht, finne kweok insiacsr.”

Pa inge ohiyacn facl puhtatlac uh—yac setuhn el kasrkuhsrak ac yac mwet nuhkwewa sesuwohs—lah e oasr suhpwacrlac ac ahkkoluk, kweok ac ahsor, puhtatlac ac kuf, ahkkweok ac nuhnuhnkuh koluk. Fin sie mwet, sou, ac finne muhtuhnfacl se kuh in ngwet muhkwena nuh sin God kuh in kapkapwack. Prestuhn Russell M. Nelson el luti, “Ke srihpen Mwet Lahngo, ke Iwaclah wacngihn sahflahiyac Lal, molwelah kais sie sesr liki muhnahs, tahfonglac, ac ma koluk, ac ke srihpen El puhla kewa ngal, elyah, ac toasr kowos puhla tari [liye Alma 7:11–13], oruh ke kom auliyak na pwacye ac suk kahsruh Lal, kom kuh in kuhtanglah ma upac fin facl se inge.”

Wacngihn olwelah ma kwacna kalweniyuck ke Puk luhn Mormon puhs liki ma inge: “Yohk na ke kowos fah liyacacng masap luhk kowos fah kapkapwack fin acn uh; tuhsruhk yohk na ke kowos fah tiac liyacacng masap luhk kowos fah lihsyucklac liki ye Muhtuhk.” Ma sikyak nuh sin mwet ke Puk luhn Mormon ke yac siofok kuhtuh ahkkahlwemye pwacyeiyacn kahs inge. Kalmacn “kapkapwack” pa engankihn kolyuck ac insewowo inkuhsrao in moul lasr. Kalmacn “kapkapwack” pa in sun moul-kahsruhp ma oruh elos in kuh in macruht, tuhfahlah sucu, ac in kahsruh enenuh luhn mwet sahyac. “Kapkapwack” nwacnwacak kuhiyac in kuhtanglah pacl upac ac ma upac. Ke kuhlwacng luhn Kraist, “ma nukewa [tuhkweni] oasr wo tuku [kaclos],” aksuwohsyelos, ac ahkloalye kuhpahsr lalos Kacl.

Alma el ahkuhtweyac lah ngwet nuh sin God pa in liyacacng masap Lal, pahng nuh Sel pacl nuhkwewa in suk kahsruh Lal, suk kahs in kahsruh Yohrohl ke ma nuhkwewa kom oruh, ac lwelah insiom in sesseslah in sang kuloh nuh Sel ke lwen ac ke fong. Masap ac kahs in kahsruh luhn God sukokyak ke ma suhmuhslah ac kahs luhn mwet kuhlwacnsap Lal. Ip yohk ac wo sihmihsyucklac oasr ke “Sucu: Sie Mwe Fahkwack nuh fin Facluh” uh pa sie srihkasrak wo. Siepac pa kolyuck ma sukokyak ke puk srihsrihk se Nuh ke Kuh luhn Mwet Fuhsr. Sifac luhn Mukul Fuhsr ac Muhtwacn Fuhsr ke yac se inge pa “Ngwet nuh sin Kraist,” tuhkuh ke kolyuck wo luhn Leum nuh sel Joseph Smith ac Oliver Cowdery ma fahk muh in ngwet nuh sin Leum ke nuhnak nuhkwewa; in tiac ahloloh, tiac sahngweng. Nuh ke Kuh luhn Mwet Fuhsr sramsram ke masap ac ohiyac pucspucs luhn God ac luti in ngwet fuhkah nuh sin Leum in oraclah sulaclah wowo. Mwe kol se tiac ma nuh sin mwet fuhsr muhkwena tuhsruhk nuh sesr nohfohn.

Oacna sie mwe srihkasrak yohk srihpac, oasr mwe kolyuck ke sapta se ke Nuh ke Kuh luhn Mwet Fuhsr sifac an pa “Monum Muhtahl.” Ma inge luti: “In suhnakihn monum—ac monun mwet sahyac. Ke kom oruh sulaclah lom ke nuknuk lom, stael ke insifom, ac lomom, siyuck sum sifacna, ‘Kuh nga suhnakihn monuk oacna mwe sang muhtahl se sin God?’”

Nuh ke Kuh luhn Mwet Fuhsr fahk pac muh: “In liyacacng na in ahkmuhtahlye orek ac ma puhlakihnyuck kac an. Elos tiac enenuh in ahksruhksruhkyeyuck kuh srihkkihnyuck. Fin mukul se ac muhtwacn se tiac pahyuck, tahfonglac koluk in kahl acn ten, kuh acn lukmac ke monun siepacna mwet finne elos nuknuk. Ke kom sulaclah lah mac kom e oruh, liye, riti, lohng, nuhnkuh kac, suhmuhslah, kuh text, kahingkihn kuhtwena ma ma e ahkmuhnahsye kom ke mwet sahyac kuh keim sifacna.”

Ma inge ahkacsmakihnye [kuht] ke kahs in kai lal Prestuhn Nelson:

“Ma ekahsr e sa na ahk upacye moul lom an liki na in kuhnahoslah masap muhtahl se inge. Nuh selos suc oraclah olwelah la nu sin God, moul fohkfohk pa sie inkacnek ma sa in tohllah luhlahlfongi pwacye lom.

“… Kuh se ma sang oraclah moul uh pa suwohs se ke ma Pahpah Inkuhsrao El lwelah tuhlihk Nahtuhl facluh in orekmakihn. Ohinge, God El akiyac in kahlwem mwe kolyuck in orekmakihnyuck nuh ke kuh muhtahl se inge. Apuhsral mahno ma nuh sin mukul ac muhtwacn ma macruhtlac nuh sin sie sin sie muhkwena.

“Puhs mwet facluh tiac luhlahlfongi ma se inge, tuhsruhk nuhnak luhn mwet uh tiac pa e fahk lah piac ma pwacye uh. Leum El fahkwack lah wacngihn mwet fohkfohk e fah usrui tohkohsrahi celestial. … Kowos fin tiac nwacsnwacs, nga kwacfe kowos in auliyak. Tuhkuh nuh yurin Kraist ac eis olweacng Lal ke fohnlah luhn nuhnakmuhnahs ke kom auliyak na pwacye ke ma koluk lom [liye Isaiah 1:16–18; Doctrine and Covenants 58:42—43].”

Esam lah ke olweacng se ke Puk luhn Mormon, tiac kihsruhngyacn kahsruhp pa suhkahsruhp—tuhsruhk pa in lihsyucklac liki ye muhtuhn Leum. Ke El oasr uh ma inge luhmweyuck nuh ke mokleyuck luhn Nguhn Lal ke moul luhn mwet se. Mwet nuhkwewa tolyuckyak ke Kahlem luhn Kraist ke elos tuhkuh nuh facluh. In weacng, kuhtuh mukwilac pacptaislac ac eis mwe sang ac eis kahlwem ke Nguhn Muhtahl. El acse mokleyuck ac kolyuck, ahkyohkye ac ahkwoye mwe sang ac kuhiyacn mwet se, ac kahsruh in kahingkihn mokleyuck koluk, sulaclah koluk, ac ma wacngihn srihpac.

Oacna kom, nga etuh kuhtuh suc tuh insewowokihn ke mwe sang luhn Nguhn Muhtahl tuhsruhk tuhlac mwe insewowo ingacn ke elos koflah in liyacacng masap luhn God. Sie suc tuhkuh nuh ke nuhnak luhk uh pa mwet mempucr ma itucklac liki Alu uh ke srihpen tahfonglac la. El fahk lah muhtwacwacackiyac ah el foloyak. El puhla muh el nuhnuhnkweyuck sin mwet kol sesuwohs. El etuh lah suhtuhelac mukwikwi lal ah, tuhsruhk el srihsrngi tahfonglac ac oruh stuh-uh luhn luhn mwet sahyac. Tukun puhlan pacl se, el muhtwacwacack in puhlakihn ma wo ke moul sahyacn Alu uh ke wacngihn kunohkohn kuh pahng in wi alu ac kuhlwacnsuhpuh mwet sahyac.

Ma se inge fahfahlacna ke lusen pacl se, tuhsruhk el muhtwacwacack in puhla wacngihnlac luhn Nguhn Muhtahl—God—ke moul lal. Ke ma el puhlakihn inge, el etuh lah fuhkah puhla lal penganalwen, in ahkkweyeyuck, eis kolyuck, ac luhlahlfongi ma tuhkuh ke Nguhn, ac el ahsrelah. Sahflahiyac ah, el oruh ma el enenuh in oruh in auliyak ac sifilpac fal in pacptaislac ke kof ac ke Nguhn.

Oacna in wacngihn sahflahiyacn kain in ma ma mwet uh suk in etuh ke kalmac, engan, ac kahsruh. Inkaiyac uh “ngwetlah ahluhkwelah akucl.” Tuhsruhk kuht tiac sifil “moul in tulik, ikwot ikme ke noa ac eng uh, oana elos su srifeyuk ke mwe luti [kuh luhmah].” In ngwet nuh sin God, kuht kuh in konwacack mislac ke pacl upac ac luhlahlfongi lasr uh kuh in kapwack finne ke pacl in ahlohloh ac srihkeyuck in nguhn. Kuht kuh in eis kuh ke pacl [kuht] lainyuck ac srwenglah. Kuht kuh in unwaclah ma wo uh ke ohiyac in pacl inge uh. Pwacye lah wacngihn inkacnek sahyacn ma God Sifacna El akiyac: “Mwet faclu nufon, Forma nu sik, tuh kowos in moliyukla. Nga mukena pa God, wangin pac sie saya.”

Kalmacn ngwet nuh sin God pa El tiac sie na sin ma yohk srihpac nuh sesr uh, tuhsruhk kalmac pa El pa yohk srihpac emet nuh sesr uh. Nga sifilpac esamwack accident upac se fin acn Lesotho ke June ah. Ke bed se lal hospital ah, sie sin mwet kol luhn Muhtwacn Fuhsr suc painmoullac, suc tiac luhlahlfongi God met liki el welah Alu uh, el fahk lah srihpac lal ingena uh pa in sokwack lah efuh el painmoullac. El fahk, “Nga eis top kac ke nga kuhlwacnsuhpuh God pacl nuhkwewa, fin topukyucklac nga.” “Met nga motko muh nga luhngse God, tuhsruhk ingena nga arulacna, arulacna, arulacna, arulacna, arulacna luhngse El. Ingena El pa [yohk srihpac emet] ke moul luhk uh.”

Nga fahkwack ke luhlahlfongi ke Pahpah, Wen, ac Nguhn Muhtahl, muh elos ma sefanna ke kahs, nuhnak, srihpac, ac orekma elos God sefanna, ma kuht ngwet nuh se ke ma wo nuhkwewa. Nga fahkwack ke luhlahlfongi ke Iwaclah luhn Jisus Kraist, ma kuh uh tuhkuh we me in ahkpwacyeye olweacng wolacna se: “Ngwet nuh Yuruk, ac muhtweng ne ke na sahflah, ac kowos fah moul; tuh nuh sel suc muhtweng ne ke na sahflah Nga fah sang moul ma pahtpaht.” Ke inen Jisus Kraist, amen.