Sesesslah ke Ohiyac Wo luhn Mongfihsrwacsr

Ke Mei 2021, ke muhtwacta ac liye ahksasucyeyacn orekma Salt Lake Tempuhl, Prestuhn Russell M. Nelson el fwefwelac ke kampare luhn paeniuhr suc, wacngihn suhna selos ac yohk luhlahlfongi lalos, muhsaheack iwac se inge, suc tu kuh ne mihsenge. Tuhsruhktuh, el oacyacpac akihlen lah oasr ma kuhlawi, pwacnacng oruh oasr acn oalallah ke pwelucng in yot muhsahiyucklac emet ke tempuhl ah ac muhnahslah luhn yot ingacn, petsac kahlwem se lah enenuh in sifilpac akkfokokoyeyucklac.

Oruh mwet pahluh sacohklacna lasr el luti kuht lah oacna ke enenuh in orekmakihn mwe ahkwo pwacye fal in ahkfokokoyelah pwelung ke tempuhl in tu kuh uh, kuht enenuh pac in orekmakihn mwe srihkasrak pwacye—sahp mwe ahkwo ma kuht tiac eis met—in ahkfokokoye pwelung in nguhn lasr kacl Jisus Kraist. Ke kahs in acsmakihn lal, el fihliyac yohrohsr kihsen siyuck luo kuht in nuhnkuh kac: “Fuhkah kuhiyacn pwelucng lom an? Ac mwe ahkkweye fuhkah enenweyuck nuh ke luhlahlfongi ac kahlwem lom ke wosasuc uh?”

Wosasuc luhn Jisus Kraist use nuh sesr pweng muhtahl ac ohiyac wowo in tulokihn ma muhsahlah ke nguhnasr, ahkfokokoye pwelucng lasr, ac kahsre kuht in tiac oasr acn oalal ke luhlahlfongi lasr ac tahfuh luo ke kewana luhlahlfongi ac kahlwem lasr ke ma pwacye muhtahl ke wosasuc. Sie srikasrak yohk srihpac in kuhtanglah ohiyac se inge oasr ke sactin 12 Doctrine ac Covenant, fwackyuck se sin Mwet pahluh Joseph Smith nuh sel Joseph Knight, mwet suwohswohs se ma suk in kahlwem ke kena luhn Leum, tiac ma mwet in kaksakuhnuhl, tuhsruhk in tu kuh ke luhlahlfongi lal—fokoko oacna soko sru inkuhsrao. Leum el fahkwack:

Liye, Nga fahk nuh sum, ac oacyacpac nuh selos kwewa suc oasr kena la in ahkyohkye ac akiyac orekma Lal.

Wacngihn mwet kuh in kahsruh orekma se inge sahyacn elos suc puhsisacl ac seseslah ke luhngse ac oasr luhlahlfongi, finsrak, luhngse pwacye ac muhtweng in ma nuhkwewa ma e fah ituckyang elos in oruh.

Kolyuck luhn Mwet Lahngo, sruokyucki ke fwackyuck muhtahl se inge, ahkacsmakihnye kuht lah mongfihsrwacsr el mwe ahkkweye yohk srihpac se nuh ke pwelucng fokoko se kacl Jisus Kraist. El sie sin ohiyac yohk srihpac ma wo, tiac nuh selos muhkwena ma pahng in kuhlwacnsap tuhsruhk nuh selos nuhkwewa pac suc oraclah wuhlweacng muhtahl yurin Leum ac insese in fahsr Tohkohl ke luhlahlfongi. Mongfihsrwacsr kahsruh in awiyac ac ahkfokokoye ohiyac luhn Kraist ma sruhmuhnyuck ke fwackyuck se inge: mongfihsrwacsr, luhlahlfongi, finsrak, luhngse pwacye, ac luhngse nwacsnacs ma kahklah Kacl. Weacng pac, orekmakihnyen muhtweng kahsruh in karihngihn nguhnasr liki ma e ahkolukyelah kuh ma luhn facluh suc ma inge ahkmuhnahsyelah pwelucng lasr kacl Jius Kraist.

Inmahsrlon ma uh ma ahkahtoyelah atacn mwet tuhma lutlut luhn Kraist, mongfihsrwacsr el sruhlaclah petsac se kacn Mwet Lahngo Sifacna, fukunsahk emwem se nuh ke Nguhna, mwesahs nuh selos nuhkwewa suc ikacslah insiyac in eis. Elah nwacsnwacs se inge ahkmihsye insiyac, nahwelah kena ac nuhnak in lahlmwetmwet ac mihs. Ke ma suhmuhslah, mongfihsracsr el utuckuh oacna sie ip yohk srihpac nuhke fuhfahsryucr in nguhn lasr uh, kol kuht in muhtweng, suwohs, ac pahkomuhta ke pacl se kuht ahknwacsnwacsye puhla lasr, kahs lasr, ac mukwikwi lasr uh.

Mwet tuhma lutlut luhn Kraist ma srihke in orekmakihn ohiyac kuh atacn Kraist inge elos eklac puhsisacl ac seseslah ke luhngse. Kuh fokoko se kapwack yohrohlos, ac yohkelihk etuh lalos in kutong kasrkuhsrak, in puhsisacl, ac orekmakihn suhnak, ahkfuhlwact ac oruh wo nuh sin mwet sahyac finne upac mwe sruhf elos puhlakihn. Elos tiac sahrtahk tuhsruhk elos okak ke lalmwetmwet luhn nguhn, ma kolyuck ke puhsisacl ac orekma luhn Nguhn Muhtahl. Srihpac inge, oruh srihklac ma muhsahlah ke nguhnalos ke srihpen, oacna ke Mwet Sap Paul el luti, elos etuh lah elos kuh in oruh ma nuhkwewa ke kuh ma Kraist el sang nuh selos finne ke pacl elos sun ma upac ma kuh in osrokack luhlahlfongi lalos.

Ke Lacta lal nuh sel Titus, Paul el tuh sang kahs in kahsruh muhtahl nuhke ma eneneyuck nuh selos ma oasr kena la in ahol Mwet Lahngo ac oruh kena Lal ke luhlahlfongi ac oaru. El fahk lah enenuh elan kulang, lungse oru ma wo, suwohs, ac mutal—kuhtuh ohiyac kahlem ke muhteng.

Tuhsruhktuh, Paul el sensenkackihn lah elos in “tia orek lumah ke ma kunal, tia mongsa, … [ac] tia sie mwet lungse anwuk.” Atac inge tiac nuhnak luhn Mwet Lahngo ac kosraclah kapwack luhn nguhn pwacye se. Ke ahkuhteyucki luhn fuhs se inge, “tia orek lumah ke ma kunal” pa elos suc tiac kohnkihn orekma la; “tia mongsa” pa elos suc ma tiac sa na foloyak ac kasrkuhsrak; ac “tia sie mwet lungse anwuk” pa elos suc ma sruhnga ahkngalye mwet ke mahno, ke kahs, ac ke nuhnak. Ke kuht moniyuhk in ekuhlah elah lasr uh nuh ke luhlahlfongi ac puhsisacl, kuht kuh in kawucki fokoko nuh ke yot kuh luhn kuhlwacng Lal ac eklac nwacsnwacs ac kuhfwen mwe orekma nuh in po muhtahllacna Lal.

Ke nga nuhnkuh ke ma enenuh in sesseslah ke mongfihsrwacsr, nga esamack kahs lal Hanna, ninac kiacl mwet pahluh Samuel— sie muhtwacn sesseslah ke luhlahlfongi, tukun kweok yohk, el kaksakihn Leum ke puhsren on. El fahk, “Nikmet sifil kaskas filang; Misla liki kaskas fulat lom. Tuh LEUM GOD El sie God su etu ma nukewa, Ac El nunuku orekma nukewa lun mwet uh.” Kalmen on lal yohk liki pruhe uh—nguhsr se nuh sel sifacna in puhsisacl, kuh in sifacna, ac efahl. Hanna el ahkacsmakihnye kuht lah fokokoiyen nguhn pwacye el tiac fwack ke ingunyacr luhn nuhnak kuh kahs kohu tuhsruhk ke mongfihsracsr, nuhnak puhsisacl ma oacna lahlmwetmwet luhn Leum.

Pacl puhs, facluh kaksakihn elah ma oswelah fuhnmwet, inse fuhlwact, se muhtweng, ac rahpkuh, kwacna kahlwem kain elah inge ke ma sikyak lwen nuhkewa ke moul ac ma elos puhla ac ke oruh ac pwengpweng lalos. Ke kuht forlah liki nuhnak in muhtweng ac pihlesruh puhsra srihsrihk ac orekma luhn Nguhn Muhtahl ke inkacnek in mukwikwi ac sramsram lasr, fihsracsr kuht in puhtaltac nuh ke mwe sruhf luhn mwet lokoalok lasr, ma penkuhtlac in fahk kahs ac oruh mukwikwi ma kuht e auli yohk kac, finne nuh sin u, sucu lasr, kuh mwet luhlahlfongi wiyacsr. Wosasuc luhn Jisus Kraist suli kuht in ahsrosrye muhtweng se inge ke pacl ma upac uh, tuh pacl se inge pa e fahkack na pwacye lah kuht mwet fuhkah. Oacna ke Martin Luther King Jr. el tuh fahk ah, “Kuhiyacn mwet se tiac kahlwem ke acn el tu kac ke pacl wo ac tiac kemkahtuh, tuhsruhk ke acn el tu kac ke pacl puhs mwe sruhf ac kahs in ahkoluk sonol .”

Ke kuht mwet wuhlweacng uh, kuht pahng in akiyac fokoko moul lasr ke olwelah muhtahl kuht oraclah nuh sin Leum, ahklohye in ukwe pactuhn El akiyac ke srihkasrak suwohs pwacye Lal. In fohlohkihn, El olwelah ohinge, “Pwcayena, pwacyena, Nga fahk nuh suwos, tuh pa inge mwe luti Luhk, ac el suc muhsahyak fin ma inge muhsah fin yot Luhk, ac muhtuhnpot nuh ke hell ac fah tiacna kuhtanguhloslac.”

Kuhlwacnsap luhn Mwet Lahngo facluh akihlenyuck kahlwem ke mongfihsrwacsr ke ma nuhkwewa El oruh. Ke srihkasrak suwohs Lal, El luti kuht in muhtweng ke ma upac, ac tiac fohlohkihn nuh sin mwet oruh koluk nuh sesr. Ke El luti lah kuht tiac enenuh in sa foloyak ke srihpen fohs ac acmacin, El sapkihn: “Kowos enenuh in auliyak, ac eklac oacna sie tuhlihk srihsrihk.” El oacyacpac luti lah elos nuhkwewa suc kena tuhkuh nuh Yohrohl ke inse pwacye enenuh in inseselac nuh selos suc elos kasrkuhsrak se kuh finne elos suc ma orek fohs nuh selos. Ke elah wo ac inse nwacsnwacs inge, El ahkahlwemye nuh sesr lah finne orek koluk kuht, fahk ma koluk, pihlesreyuck, kuh tiac oacwac, luhngkuhlwacng Lal fah tiac som liki kuht, ac wuhlweacng luhn mihslac Lal fah tiac pac mokleyucklac liki moul lasr.

Yac ekahsr somlah ah, oasr pacl wowo se luhk ac muhtwacn kiyuck in ohsun nuh sin kuhtuh mempucr ke Alu uh fin acn Mexico City. Puhs selos, elos sifacna kuh mwet elos luhngse, sun elyah upac, elos pihsrapasrlah, uniyucki, ac ma upac sahyac.

Ke kuht liye muhtuhn Mwet Luhlahlfongi inge, kuht tiac liye kasrkuhsrak, ahngyahng, kuh kena se in fohlohksahk. Tuhsruhk, kuht liye puhsisacl. Muhtahlos, finne akucli ke ahsor, ahkkahlwemye kena se nuh ke onweyuck ac in muhta wo. Finne insiyaclos muhsahlah ke puhla ma upac inge, Mwet Luhlahlfongi inge fahsr na nuh met ke luhlahlfongi lalos kacl Jisus Kraist, sulwaclah in tiac sang ma upac inge in afuhnlah luhlahlfongi lalos kuh ahkmuhnahsyelah luhlahlfongi lalos ke wosasuc.

Ke sahflahiyen toeni muhtahl se ingacn, kuht ohsun nuh sin kais sie selos. Usrusr po nuhkwewa, aetuhilac nuhkwewa, ahkahlwemye lah ke kahsruh luhn Leum, kuht kuh in sulwaclah in top ke muhtweng nuh ke fohs ac ma upac ke moul uh. Sihkasrak mihs ac puhsisacl lalos inge use petsac se in fahsr ke inkacnek luhn Leum orekmakihn mongfihsrwacsr ke ma nuhkewa. Kuht puhla muh kuht oasr inmahsrlon lipufacn.

Jisus Kraist, suc kuh liki nuhkwewa, kweok kacsr nekena srah Kacl sohrohor yen nuhkewa, ne ohinge, El tiac lwelah ahngyahng in nacklah Insiyacl, oacyacpac tiac lwelah kahs kohu, fakfuck, kuh koluk in tuhkuh liki Inwacluhl, finne upac na pwacye. Ke muhtweng ac puhsisacl, El tiac nuhnkuh kacl Sifacna tuhsruhk ke kais sie tuhlihk nuhtin God—met, ingena, ac pacl fahsruh uh. Mwet Sap Peter el fahkack ohiyacl Kraist ke el fahkwack, “Ke mwet uh fahk kas in akkolukyal, el tia topkolos ke kahs koluk; ke el keok, el tia fahk kutena kas in aksangeng, a el esalang nu sin God, El su nununku suwos.” Finne ke pacl upac Lal, Mwet Lahngo el ahkahlwemye mongfihsrwacsr sahflah ac suwohs. El fahk lah kaskak nuhkwewa ma nuh sin Pahpah. El eis ac ahksahfyelah ahkoo Lal nuh sesr.

Tamuhlwel ac tahmtahel sacohk wiyuck, nga ngihsre kuht nuhkwewa in nwacklah insiyacsr ac nuhnak lasr uh ke mongfihsrwacsr pwacye luhn Kraist ke top sacohk se nuh ke nguhsr luhn mwet pahluh sacohklacna lasr Prestuhn Russell M. Nelson. Ke kuht fahsr nuh met ke luhlahlfongi ac moniyuck in orekmakihn monfihsrwacsr nuh ke mukwikwi ac kahs lasr, nga fahkwack lah moul lasr e fokokoi ac kawucki wo ke pwelucng kuhlacna luhn Mwet in Molwelah lasr.

Nga fahkwack etuh luhk lah orekmakihnyen mongfihsrwacsr ahkmwesahsye nguhnasr ac ahknwacsnwacsye insiacsr ye muhtuhn Mwet Lahngo, kahkahsrihk na kolkuht in fototo nuh Yohrohl ac ahkoekuhtlac, ke finsrak ac mihs, nuh ke lwen wolacna se kuht e fah ohsun nuh Sel ke Tuhkuh Ahkluo Lal. Nga akacsruhi kahs muhtahl inge ke inen Mwet Lahngo lasr, Jisus Kraist, amen.