Sie Mwe Fahkwack luhn Sucu—Kahs tuhkuh sin God me

Toeni luhlahp se ke Ohktopa 2025 mahkiyac yac ahk tolngoul ke mwe fahkwack se ke “Sucu: Sie Mwe Fahkwack nuh fin Facluh.” Ke akwuck wolacna, mwe fahkwack se inge, ke kahs in fwackyuck, tuh oreklac in “ahkwoye ac ahkkweye sucu oacna in muhsahi ohiyac wowo inmahsrlon mwet uh.”

Mwet nuhkwewa oasr sucu la, lah kom ninac se, pahpah, muhtwacn nahtuh, mukul nahtuh, nuhtin nahtuh, tuhmwacn ninac pahpah, wiyacn ninac pahpah, tamuhlwel, tahmtahel, kuh fihl se met wiyom. Yohk liki nuhkwewa, kais sie sesr, oacna ke mwe fahkwack sac fahk, “sie wen kuloh nguhn kuh acn nuhtin ninac pahpah inkuhsrao … [ke] sie ohiyac wolacna ac mwe finsrak.”

Ke nga tuh pahngonyuck in sie sin mwet sap muhtahl ke 2015, tuh fwack me nuh sik, “Ingena mwe fahkwack se inge ma lom. Inem [srihsrngi nuh ke kahs sac ‘U luhn Mwet Sap Singucul Luo’ ke sifac sac] pa inge. Puhla ac luti oacna ma lom.”

Nga luhngse ke mwe fahkwack luhn sucu. Nga tuh fahkwack sahslah Africa lac nuh Australia ac yen nuhkwewa inmahsrlon kunohkohn luhn sucu se ke plwacn ma pahtpaht luhn God. Mwe fahkwack se inge oreklac sin God, na kuht enenuh in orekmakihn ke ahkfuhlwact kahs ma tuhkuh sin God me.

Esam, tamuhlwel ac tahmtahel, oacna ke nga tuh fahk ke toeni luhlahp se tari ac ke pohlpet sepacna inge, “Kahs uh yohk srihpac.”

Lwelah ngan tahfuh nuh sum kuhtuh ma wolacna ke mwe fahkwack se inge oacna sie ma yohk srihpac ke pweng ma kuht luhlahlfongi uh.

Ke 1994, yac se met liki mwe fahkwack sac utuckuh, U luhn Mwet Sap Singucul Luo tuh sramsramkihn ke un mwet ac kafihrmacn elos eslah masap luhn God nuh sin sucu, pahyuck, ac mukul muhtwacn. “Tuhsruhk tiac pa ingacn sahflahiyen ma kuht tuh liye ah,” Prestuhn Russell M. Nelson el ahkuhtweyac tohkoh. “Kuht kuh in liye ke kuhtuh acn ma srihke in eslah akwuck nuhkwewa ac tiac tulokihn mukuikui in kosro. Kuht liye fohsack luhn gender. Kuht kuh in liye ma nuhkwewa sikyak.”

Mwet Singucul Luo ah otwelah in ahkolah sie ma suhmuhslah, sie mwe fahkwack nuh sin mwet nuhkwewa,ahkuhtweyac ke luhlahlfongi luhn Alu uh ke sucu. Ke yac se ingan, Mwet Sap inge, mwet liyactwen pahngonyuck sin God, tuh ahkolah mwe fahkwack se ke sucu uh. Prestuhn Dallin H. Oaks el esamwack ke eltahl forwacng nuh sin Leum nuhke “ma [eltahl] fah fahk ac [eltahl] ac fahk fuhkah.” Eltahl ituckyang nuh sin Prestuhnsi Se Met—Prestuhn Howard W. Hunter, Gordon B. Hinckley, ac Thomas S. Monson— nuhke ma elos sulaclah.

Mahlwem na tohkoh, ke Mahs 1995, Prestuhn Hunter el misac, ac Prestuhn Hinkley el tuh Prestuhn ahksingucul limekohsr (15th) luhn Alu uh. Mwe fahkwack se inge tuh ingena oan in pahohl. Piac pacl wowo se in oraclah mwe fahkwack se inge nuh sin Alu uh? Pacl sac tuhkuh tukihn mahlwem ohnkohsr tohkoh.

Lwen ekahsr met liki Septempuh 23 miting Luhlahp luhn Rilif Sosaiti ma tuhkuh met liki toeni luhlahp sac, Prestuhn Hinkley ac mwet kahsruh lal ah toeni in sang kahsruh nuh sin General Prestuhnsi luhn Rilif Sosaiti. Tahmtahel ah, oacna Mwet Sap ah, arulacna nuhnak yohk ke muhtwacn ac sucu. Eltahl tuh nuhnak yohk ke miting ma ac orek ke sucu.

Prestuhn Hinkley el tuh ahkoo in sramsram nuh sin muhtwacn ke toeni sac. El tuh motko ke atacn sramsram se lal uh. Ke mwe sramsram ah fahfahlac ah, el luhmahlah ine se nuhke ma sasuc se oreklac tuhsruhk sonna etweyuck sin mwet uh “Sucu Uh: Sie Mwe Fahkwack nuh fin Facluh.” Yac miting se luhn muhtwacn inge akwuck wowo se in tuh oraclah wotlac luhn mwe fahkwack se ke sucu uh?

General Rilif Sosaiti Prestuhn Elaine Jack el ahkuhtweyac tohkoh: “Kuht tiacna etuh lah meac Mwe Fahkwack se nuh sin Sucu ke pacl sac. … [K]uht kuh in fahk ke sifac sac, tuhsruhk kuht puhla muh oacna sie ma ke sucu … ac kuh in ma wo se. … Nga puhla wo ke oasr yohrohsr mempucr luhn U luhn Mwet Sap Singucul Luo ma tuh eis fwackyuck ah.”

Miting se luhn Rilif Sosaiti ke Sactte sac pwengpweng. Prestuhn Hinkley el tuh muhtwacwacack ke mwe fahkwack se luhn sucu ke kahs inge:“Ke puhslac luhn ma kikiacp ahollah ma pwacye, ke puhslac kikiacp ke akwuck ac luhlahlfongi, ke puhslac mwe ahkmuhnahs ac mwe sruhf in kais kuhtuh tuhnelah facluh, kuht puhla muh enenuh in sensenkackihn ac tuh sensenkackihnyuck met … ke akwuck, mwe luti, ac mukuikui kuhpahsr nuhke sucu suc mwet pahluh, mwet liyactwen, ac mwet fahkwack ke Alu se inge kalweni in fahk ke sramsram mahtuh nuhkwewa.”

Na el riti ke mwe fahkwack sac nohfohn. Oacna ke Leum El tuh fahk, “Lah ke puhsrwek sifacna kuh ke puhsrwen mwet kuhlwacnsp luhk, el oacna sie.”

Mwe Fahkwack se inge fahk: “Sucu uh ma ahkkweyeyucklac sin God.” Nga luhngse ahkuhtweyac se ke fahk sacn. Mwe fahkwack se inge pahng se nuh sesr in muhta in moul suhkawihl in nuhnkuh yohk ke ma muhtahl in kuht ac moul ma pahtpah suc oan met liki kuht. Prestuhn Nelson el tuh luti: “Pwacyena lah kom tuhlihk nuhtin God. … Nikmet tahfonglac kac: Ma kom finsrak nuhkac el wolacna. Ke insacnweacng lom in suk, God El fah usot petsac se ke mwet se sahp kom ac eklac nuhkac uh.”

Ke ahkkalwemyeyuck tari, mwe fahkwack se inge tiac na fal nuhke liye luhn mwet puhs fin facluh. Tiacna met. Tiacna inge. Oasr selos suc fohs ke mwe fahkwack se ke sucu, pahyuck, ac mukul muhtwacn inge. Kuhtuh siyuck Alu uh in eslah, ekuhllah, kuh finne in fihliyac mwe fahkwack se inge nuh sahyac.

Mwe fahkwack se ke sucu inge pa, oacna Prestuhn Hinkley el tuh fahk, mwe luti, tamuhlwel ac tahmtahel sacohk luhk. Ip yohk inge eltahl tiac masap se tuhsruhk fahsr ke ohiyac luhn Leum ac inkacnek in wuhlweacng Lal. Mwe luti ke mwe fahkwack se inge tuh ikacklah sin Leum lasr Jisus Kraist nuh sin Mwet Sap Lal met ah ac ingena. Pa inge Alu Lal; El akiyac ke ma pwacye suc kuht moulkihn.

Kuhtuh suwos sahp esamwack ke mwe fahkwack se inge ac fahk, ”Ma se inge tiac ma nuh sihk.” “Oacna in tahfuhnkahs.” “Sucu luhk uh tiana liyeyuck oacna ngacn.” “Nga suhfal.”

Nuh suwos ma oasr fosrngah la, etuh lah kom tuhlihk se nuhtin ninac pahpah inkusrao, ip se ke sucu luhn Pahpah Inkuhsrao. Wacngihn mwet etwekom na pwacye kuh luhngse kom yohk oacna El oruh. Forlah nuh Sel; okwaclah insiyom nuh Sel; luhlahlfongi in El ac olwelah Lal. Oasr sucu lom ke Mwet Lahngo lom, Jisus Kraist, suc luhngse kom. El tuhkuh nuh facluh in iwe ma koluk lasr ac us ma toasr ke tahfonglac lasr ac lwen koluk na upac lasr. El kahlwem ke ma kom sun ac puhla. Forlah nuh Sel; luhlahlfongi lah El fah suhpacma Nguhn Muhtahl in wi kom, sruhkkomyak, ac pwen kom. Puhla luhngse Laltahl ma “sifacna maelihk nuh ke insiacn tuhlihk nuhtin mwet: … ma se inge pa luhngkihnyuck emet liki ma nuhkwewa … ac engankihnyuck yohk emet nuh ke moul uh.”

Mwet Sap nuhkwewa luhn Leum luhngse kom na pwacye. Kuht pruhe keim ac suk kolyuck sin Leum nuh sum. Muhta yohrohsr. Kom muhta ke pacl upac se ke Satan el suk in oruh kom in ma lal. Nikmet fuhlweack. Ac kom fin oruh, fohlohkuh. Pahosr ahsrweyucklac nuh sum, fah oacpacna mwet sahyac ma luhngse kom.

Mwe fahkwack sac fahk, “Oasr kunohkohn muhtahl se luhn pahpah ac ninac in tuhfahlah tuhlihk nahtuhlos ke luhngse ac suwohswohs.” Puk luhn Mormon sang pac sie mwet loh nuhke ma pwacye se inge. Ke fuhs se met ke sapta se met, kuht rit, “Nga, Nephi, isuslac nuh sin ninac ac pahpah wo.” Suc sesr muhtwacwacack tari ke Puk luhn Mormon— ac sifilpacna muhtwacwacack— ac sulaclah in oruh kahs inge in esamyuck? Fihliac ma inge insiyom.

Sie sin ahkuhtweyac ma nga luhngse ke mwe fahkwack sac pa inge: Engan ke moul in sucu se el kwacna kuhtanglah ke el konweyuckyak ke mwe luti luhn … Jisus Kraist.”

Suc tiac luhngse engan?

Ac meac luti luhn Jisus Kraist uh? Kalweni, ke mwe fahkwack sac: “Luhlahlfongi, pruhe, auliyak, nuhnak muhnahs, ahkfuhlwactye, luhngse, pahkomuhta, orekma, ac kain in mukwikwi wo sahyac.”

Moul luhn suc ac tiac wolac ke el orekmakihn ki nuhke ip yohk inge? Wacngihn sie sesr ac fah oruh wo na pwacye; tuhsruhk kuht kuh in ukwoe kahs lahlmwetmwet lal Prestuhn Hinckley, “Oruh ke kuhiyom nohfohn.”

Kuht rit ke mwe fahkwack se inge, “Pahpah uh nuhnuhnkuh fin sucu laltahl ke luhngse ac suwohswohs,”ac “ma kunacn ninac uh pa in tuhfahlah tuhlihk nahtuhlos.” Koltiac kalmac in leum fac, ac tuhfahlahtiac kalmac pa kunohkohn srihsrihk se. God el tuh sang nuh sin mukul ac muhtwacn kunohkohn tiac oacna sie tuhsruhk fal ac yohk srihpac suc orekma wo ma kahsruh sie sin sie.

Lwelah ngan akacsruhi ke sie sramsram keik sifacna.

Nga ac muhtwacn kiyuck tuh lotwelah in ahkwoye orekma lasr in fal inmahsrlosr tukihn sie lwen ah nga otwelah in oraclah sie sulaclah yohk srihpac ke wacngihn sukok kahsruh sel. Mukuikui se luhk ah tuh oruh el lut, tiacna ahkolah, ac fihlilyac ke ohiyac na upac se. Tohkohyang, el fihliac pahol fin pihsuck ac fahk, “Ron, nuhnak muhnahs, tiacna sifilpac oruh ma sacn nuh sihk.” Kuht ingena aetuhi ke ma nuhkwewa ke pacl sac ne mihsenge.

Kuht sokwack ke mwe fahkwack nuh sin sucu: “Pahpah ac ninac eltahl tuhkwenilac in kahsruh sie in sie ekihn toeni wowo se.”

Fal el kahs yohk srihpac se. Kuhtuh yac somlah, ke nga ac Sister Rasband tuh tuhkweni orekma in oacna ma mwe fahkwack sac sruhmuhn ke “kunohkohn muhtahl lasr,” kuht oraclah sie pahyuck ke luhlahlfongi sefanna. Ke kais sie tuhlihk nahtuhsr pahyuck ingena, nga ac Sister Rasband tiacna tui in kahsrweltahl ac mwet eltahl pahyuck se fuhkah ohiyen sie toeni wowo.

Ke kuht moul ke muhtahsr suk muhkwena wolacna luhn God, kuht ahkfuhlwactye sie sin sie ac kahsruh sie sin sie Ohiyac wolacna luhn suwohswohs ingoh kol nuhke ahkfokokoye moul lasr kais sie, sucu lasr, ac un mwet in acn sesr.

Pahpah tuhmacsr Inkuhsrao el oraclah mwe fahkwack se luhn sucu in kahsre kuht in fohlohk nuh Yohrohl, in kahsre kuht in luti ac sesseslah ke luhngse, kuh, srihpac, ac lahlmwetmwet ne tok. Ke nguhnihk kwewa, nga kwacfe suwos in muhta fototo nuh Yohrohl ac Wen Kuloh Nahtuhl. Nga olwelah muh kom fin oruh ohinge, Nguhn el fah mokle kom ac kol kom ac kahsre kom in puhla insiyom olwelah mislac Laltahl suc “kuhtwanglah lahlmwetwet nuhkwewa.” Ke inen Jisus Kraist, amen.