Iwaclah Ke luhngse luhn Jisus Kraist

Kom fin oraclah ma koluk upac ac oasr kena lom in auliyak ke insiyom nohfohm ac puhla engan ke eis nuhnak muhnahs, etuh lah ma usrnguhk se inge tuhpan kom. Mwet Lahngo el tahfwelah na in pahngon kuht, “Fahsruh nuh yuruk.”

Ahkfokokoye luhlahlfongi lom ke Mwet Lahngo lasr, Jisus Kraist, e sang kuh nuhke moul lom in Etwacl, luhlahlfongi in El, ac fuhlweacng insiom nuh Sel. Enos el tuh siyuck ke nuhnak muhnahs lal sifacna, “Leum, fuhkah tuh in ohinge?” Leum el tohpkohl, “Ke srihpen luhlahlfongi lom ke Kraist, suc kom tiac lohng met me kuh liye.”

Ac Moroni el tahfwelah, “Ac kowos fin lahfwekihn kowos sifacna ke ma koluk nuhkwewa, ac luhngse God ke insiom kewa, ke nuhnkom ac kuhiyom kewa, na luhng kuhlwacng Lal ac fal wo nuh suwos.”

Forlah liki ma koluk, forwacng nuhsin God, ac ahkfokokoye luhlahlfongi lom ke Jisus Kraist pa muhtwacwacack wowo se. Sang ke puhsisacl kena lom nuh sin God weacng fahkwack ma koluk yohk nuhsin pisap kuh pracns prestuhn lom, tuhsruhk nuhnak muhnahs sahflah lom an fah tuhkuh sin Mwet Lahngo me. Nuhnak muhnahs el mwe sang se utuckuh nuh sesr ke luhng kuhlwacng luhn Jisus Kraist.

Kena lasr in fohlohk nuh yurin God akihlenyuck ke ohiyac pwacye nuhsin Pahpah Inkuhsrao, nuh sum sifacna, nuhsin mwet kom ahkngalye, ac yurin mwet kol lom ke pristut. Pahpah tomom Inkuhsrao El engan ke sulaclah lom in tuhkuh nuh Yohrohl ke inse muhsahllah se ac nguhn toasr. Oasr luhn nguhn toasr pa in sifacna eiskomyang nuh in poun God; oasr luhn sie inse muhsahllah pa Mwet Sap Paul el ahkuhtweyac oacna “auliyak pwacye,” kena yohk se luhn nguhn uh in fohlohk nuh Yohrohl finne meac molo uh.

Kena lom uh kol kom in luhngse ahkwoyelah ma kom tuh kuhnahoslah. Tuhsruhk, in kahlwem lah kuhtuh ma uh wacngihn kuh lom in ahkwoyelah, kom insacnweacng in pruhe muhkwena nuh sin Leum, ke kuhlwacng Lal, fah kahsruh ahkwoyelah elos suc ngalyak ke srihpen mukuikui lom.

Ma sikyak ke ma koluk yohk luhn mwet sahyac uh kwacna upac in kuhtangyucklac. Yac kom ukwe srihkahsrak luhn tuhlihk mukul nahtuhl Mosiah, suc “kena yohk in srihke in ahkwoyelah kuhnausyuck nuhkwewa ma elos oraclah nuh ke alu uh,” Sramsram nuhsin mwet kom ahkfuhlwactye ke ma sahp kom tiac kuh in liye.

Ke nga ahkoo sramsram se inge, Nga eis email se ke tiac motko kac sin sie mwet oruh mukuikui in auliyak ac kena fohlohkoh nuhke Alu uh. Muhtwacn se kiacl met ah srwackna kweok ke wacngihnlac luhn “macruht ne tok ma pahtpaht [lalos], [puhlakihn ma upac sin tuhlihk nahtuhlos], wacngihnlac luhn mani, … tiac [kuh] in ahkfalye ma nuhkwewa ma enenuh, [ac] puhla toasr ke ahklahlfon luhn mukul tuhmwacl nuhsel.”

El akacsruhi nuhsihk ke mwet kol lal “puhla kolyuck in [siyuck sel] in pruhe ac motko lah meac [yohk el kuh in oruh nuh sin muhtwacn se kiacl met ah ac tuhlihk nahtuhl].” Ke lwelah, nga ahkacsruhi ke sie ip ke email se lal inge:

“[Met] nga nuhnkuh muh [mani] se nga sang ke pacl se kuht fahsrwelihk ac tuh arulacna ahluhkwelah, tuhsruhk pracns prestuhn luhk uh pahtokyuc in lalo ac pruhe kac. …

“Met liki na, nga tahfuh luo ke nuhnak in sifilpac fohlohkihn oacna sie ma nuhsin muhtwacn se kiyuck met ah. Ke srihpen ma koluk luhk uh tiac ma ke mani, nga motko lah meac kalmac na pwacye luhn ‘auliyak pwacye’ se … [tuhsruhk] nga sa in akihlen lah tiac ma ke mani muhkwena.

“Mwet kol luhk uh ohsun nuhsin [muhtwacn se kiyuck met ah] ac tuhlihk nuhtihk ah ac akihlacnwack lah elos srackna puhlakihn ma upac ac sonna onweyucklac.”…

“Finsrak sasuc luhk pa in fahsr nuh met ke luhlahlfongi. … Nga ahkkahlwemye kena luhk in kahsruh ke wacngihn fohlohkihnyac. … Nga sulaclah in [suhpuh sie luhpah ah nuhsin muhtwacn se met kiyuck ah] ke kais sie pejack luhk, suc pa ip na luhlahp se ke net pe luhk ah. Met liki na nga suhpwacacng luhpah se met ah, Leum el [fihliyac ke nuhnak luhk uh lah nga enenuh] in moli [pacl luo ke luhpah se inge].

“Nga lotwelah lah misac tiac ma ke mani muhkwena. Sripac uh pa in sang moul luhk nuhsin Leum ke inse puhsisacl. … Mani se inge ma in kahsruh ahollah ma nga tuh eslah liki sucu luhk ke srihpen sulaclah koluk luhk. Srihpac uh pa in oraclah ac liyacacng olwelah uh in tiac nuhnkuh in oasr fohlohkihnyac ac kahsrwel in tiac elyah ke mani elan kuh in suk Nguhn.”

Srihke lom in fohlohkuhnwack ma kom kuhnahoslah kuh in tiac ma ke mani, tuhsruhk ke kom puhsisacl in eis kahsruh sin Leum, kom kuh in konwacack lah puhs ma kom kuh in oruh.

Ke kom suk nuhnak muhnahs sin Leum, kom in muhtweng ke kom tuhpan ke ahkkweyelah Lal. Motko ke ma suhmuhslah se inge:

“Elos … ahkpuhsisaclyeloslac sifacna … in ahkpuhsisaclyeloslac na pwacye; ac … elos pruhe yohk nuh sin God; ahok, finne lwen fohn se. … [Tuhsruhk] Leum El suhmuhi in lohng tuhng lalos ke srihpen ma koluk lalos.”

“Ne ohinge Leum El lohng tuhng lalos, ac muhtwacwacack … in ahkfihsrwacsrye toasr lalos; … ac … elos muhtwacwacack in insewowo ke luhpah yohk.”

Kom in mongfihsrwacsr oacna ke Leum el usot nuh sum mwe insewowo Lal ac lwelah ke ma fal.

Ke pacl luhn Leum sifacna, kom fah puhla Puhsrwacl fahk nuh sum, “Lwelah ma inge in tiac sifil ahkfohsye kom.” Lwen se, ke kom tiac tui in nget nuh sin Mwet Lahngo, Pahpah tomom Inkuhsrao fah “eslah mwacta liki [insiom], ke ohiyac wo luhn Wen Nahtuhl.”

Nuh sum suc tiac fal in ahkngalyeyuck ke ma koluk yohk luhn mwet sahyac, nga kena akacsruhi ke luhngse ac pahkomuhta luhn Mwet Lahngo, akwoye ac mislac Lal.

Ahsor ma kom tuh puhlakihn, kweok, ma wacngihnlac, puhla toasr ke srihpen ahklahlfon, finsrak se ke moul lom ma tiac sikyak oacna ma kom motko—nga usot nuh sum mwe ahkkweye pwacye luhk, lah Mwet Lahngo el etwe kom ac luhngse kom. Pahng nuh Sel. El mwe ahkwoye ac kuh lom; El ac fah suhpwacoht lipufacn Lal in sruhkkomyak. Kweok lom ac wacngihnlac ngac, fihsrwacsrlac ahsor lom, mwe acsmakihn muhlkihnyuhklac? Nga tiacna etuh. Tuhsruhk ma se inge nga etuh: Oasr kuh Lal in use ma kahto liki apact ke mwe kweok lom.

Tahmuhlel ac tahmtahwel sacohk lasr Grand Blanc, Michigan, ke luhlahlfongi kuh la ke Jisus Kraist, ke puhlaik ac pahkotwen la, eislah ac fah, ke wik ac mahlwem tuhkuh an, eis luhngse ac kuhlwacng koflah in kapsra luhn Mwet Lahngo.

Ke kom tahfwelah in fihliyac luhlahlfongi lom in El, puhkuhnyeng luhn lohsr ac tuhng mwemwelihl lom ke fong uh ac fah eklac nuhke engan ac mihslac ke kahlwem in litutacng uh. “Asor lowos fah ekla nu ke engan. … Ac engan lom wacngihn [sie] fah eslah liki kom.” Pacl se ingacn ac tuhkuh. Nga fahkwack kac lah ac tuhkuh.

Iwaclah ke luhngse luhn Jisus Kraist kuh in konweyuckyak ke ohiyac ma upac emet, tuhsruhk kuht nuhkwewa enenuh pacl nuhkwewa iwaclah pahkotwen luhn Mwet Lahngo lasr. Prestuhn Dallin H. Oaks el tuh luti: “Ke srihpen ma sikyak ke iwaclah Lal ke moul suhkawihl, Mwet Lahngo lasr El kuh in ahkwoye, unwelah, ac ahkkeye mukul ac muhtwacn nuhkwewa yen nuhkwewa, tuhsruhk nga luhlahlfongi muh El oruh ohinge nuh selos suc Sokol ac siyuck ke kahsruh Lal. Mwet Sap James el luti, ‘Ahkpuhsisaclye kom sifacna ye muhtuhn Leum, ac el fah sruhk komyak’ (James 4:10). Kuht fal nuhke mwe insewowo sac ke kuht luhlahlfongi ke El ac pruhe ke kahsruh Lal.”

Nga eis lwelah luhn kawuck sacohk luhk ac emeritus General Authority, Elder Robert E. Wells, suc ingena yac 97(yucngucul itkohsr) matwac, in akacsruhi ke ma tuh sikyak nuh sel ke yac 60 somlah ah:

Ke nga muhta fin acn Paraguay ke 1960 ac orekma ekihn mwet orekma ke bank, Robert Well, tuh yac 32 matwac, ac muhtwacn kiacl, Meryl, tuh tuhkweni paeloht ke oaksohk lukoac, sohksohk liki acn Uruguay nuh Paraguay. Ke eltahl sun puhkuhnyeng mahtoltol, Robert ac Meryl tilac kuh in liye ac pahngon sie sin sie ke redio. Robert el silahklahk na oai, ke el konwacack lah oaksohk soko muhtwacn kiacl ah tuh us ac acksitacn. Muhtwacn kiacl ah ac kawuhk luo ma weluhl ah tiacna pain moullac. Tuhlihk nahtuhl, ma muhta oasr lohm seltahl, elos yac itkohsr, limekohsr, ac luo.

Elder Wells el sruhmuhn ke ahsor lal ah:

“Kahs uh suhfal in ahkuhtweyac ke kweok ma nwacnwaclah in ikok, uslah insiyuk ac nga koflah puhla kuhtwena ma. Sronin muhtuhk tiac kuh in tui ke srihpen ahsor. In ahkupacyelah ma nga puhla uh, ke nuhnak luhk uh srihke in nuhnkuh ke misac luhn muhtwacn kiyuck, nga puhla koluk kac muh nga pa srihpen acksitacn luhn muhtwacn kiyuck ah.”

Robert el eis mwacta uh nuhsel sifacna ke el tiac checkiyac oaksohk soko ah ac ke el tiac sang mwe ahkuhtweyac nuhsin muhtwacn kiyacl. El puhla koluk ke el tiac lohacng in wo.

Robert el fahk:

“Nuhnak luhk ah fohsack. … Nga srackna oasr—[ke srihpen tuhlihk ac,] wacngihn ma yohk liki.”

“Wacngihnlac … kena luhk in fahsr nuh met.”

Ke kuhtuh pacl tok, Robert el ahkinsewowoyeyuck ke sie puhla yohk ke nguhn. El tuh sruhmuhn:

“Sie ekuh ah, tukun yac se tohkoh, ke nga sikuhkmuhtuhntei in pruhe, sie ma usrnguck sikyak. Ke nga pruhe ac siyuck kahsruh sin Pahpah Inkuhsrao, nga puhla oacna Mwet Lahngo el tuhkuh tu siskuck ac nga lohng sie puhsra mislac fahk kahs inge nuh in nguhnihk ac insrwek: ‘Robert, iwaclah luhk molwelah ma koluk lom ac tahfonglac lom. Muhtwacn kiom ah nuhnak muhnahs nuh sum. Kawuhk lom ah nuhnak muhnahs nuh sum. Nga fah eslah mwe toasr lom. …’

“Kena pacl se ingacn, toasr ke puhla koluk [ac ahsor] luhk ah wacngihnlac liki yuc. Nga moliyucklac! Nga lihksrweni na kahlwemyak ke kuh luhn Iwaclah luhn Mwet Lahngo ac … lah el ma nuh sihk. … Nga … puhlakihn kahlwem ac engan suc nga tiac puhlakihn met. … Nga eis sie mwe sang ke wacngihn molo—mwe sang ke luhng kuhlwacng luhn Leum. … Nga tiacna fal in eis—wacngihn ohiyac wo nga oraclah in eis, tuhsruhk El use nuh sihk finne ohinge.”

Tahmuhlwel ac tahmtahel, lwelah kais sie sesr in “ahkmuhtahlyeyucklac in Kraist ke luhng kuhlwacng luhn God, ke kahklah luhn srah luhn Kraist, … [eklac] muhtahl, tiac fohkfohk.”

Nga fahkwack ke luhngse, pahkotwen, ac kuhlwacng luhn Mwet Lahngo ac Mwet in Molwelah lasr. El moul. Kuht ma Lal; kuht tuhlihk nuhtin wuhlweacng. Ke kuht luhlahlfongi ke El, fahsr Tohkohl, El fah sruhk kuhtyak liki ahsor ac ma koluk lasr. Ke pacl sac, tukun moul in ikoac se inge, lun lohm sin Pahpah Tuhmwacl, kuht fah muhta Yohrohl ma pahtpaht ac ma pahtpaht. Ke inen Jisus Kraist, amen.