Karim Nem bilong Jisas Krais

Long yia 2018, long University bilong Utah, ol i kamapim wanpela spesel profesasip ol i kolim “Dr. Russell M. Nelson and Dantzel W. Nelson Presidential Chair in Cardiothoracic Surgery”—cardiomeaning “heart,” and thoracic, meaning chest. Em i onarim impoten wok bilong Presiden Nelson olsem dokta bilong hat na sapot em i kisim long meri bilong Em i dai pinis, Dantzel. Dispela profesasip ol i bin baim wantaim wanpela fan bai stap inap bihain tru. Husat ol i makim long kisim dispela biknem profesasip bai kisim bikpela luksave, sapot bilong pe, na moni bilong mekim wok painimaut.

Namba wan dokta ol i makim long holim dispela profesasip em Dokta Craig H. Selzman, wanpela dokta i gat bikpela save husat i no memba bilong sios bilong yumi. Long seremoni bilong givim dispela profesasip i go long Dokta Selzman, planti ol bikmanmeri i kam, wantaim tu Presiden Nelson na meri bilong em Sista Wendy W. Nelson. Long taim bilong kibung, Presiden Nelson i toktok liklik tasol long wok dokta em i kamapim namba wan taim.

Bihain Dokta Selzman i tok moa long wanem em i min long em long apoinmen long dispela profesasip. Em i stori olsem 4-pela dei i go pinis, bihain long wanpela longpela dei long operesen rum, em painimaut olsem wanpela sikman bilong em i nid long kisim operesen gen. Em taired na bel hevi stret, long wanem, em save olsem em bai stap narapela nait gen long haus sik.

Long dispela nait, Dokta Selzman i mekim wanpela toktok wantaim em yet we i senisim laip bilong em. Long dispela taim, em tingim olsem, “Long Fraide, ol bai apointim mi i go long wanpela profesasip i karim nem bilong Dokta Nelson. Nelson em wanpela man olgeta i save olsem em i save bosim gut tingting bilong em, rispektim olgeta lain, na i no save belhat kwik. Nem bilong mi nau bai pas wantaim bilong em, olsem na mi mas kamap moa olsem em.” Dokta Selzman em bin wanpela gutpela dokta pinis. Tasol em i laikim kamap moa gut.

Bipo, ol wan wok bilong bilong em ating i save olsem taim em taired na bel hevi tem i save soim long pasin na toktok bilong em. Tasol insait long rum bilong operesen long dispela nait, Dokta Selzman i wok strong long sapotim na klia gut long grup bilong em. Em pilim olsem narakain samting i kamap na em i laik traim moa long kamap olsem Dokta Nelson.

5-pela yia bihain, Presiden Nelson i donetim ol pepa bilong wok bilong em i go long University of Utah. Ol biklain bilong yunivesiti i kam long tok tenkyu long Presiden Nelson. Long dispela taim, Dokta Selzman i toktok gen. Em toktok long nem bilong Presiden Nelson, RMN, olsem, “I gat wanpela ‘RMN’ pasin nau i stap bikpela long Division of Cardiothoracic Surgery long University of Utah”

Long taim bilong bel hevi, Dokta Selzman i tok klia, “mi save mekim wanem mipela nau i skulim ol sumatin bilong mipela—lukluk gut long samting, sklelim, na mekim wantaim olgeta strong bilong yu. Dispela pasin i save stap wantaim mipela olgeta dei. Mipela givim ol lapel pin long olgeta memba bilong grup na long olgeta sumatin. Aninit long pin em dispela ol leta RMN. Pasin bilong RMN em stap namba wan tru long skul bilong mipela; mipela save skulim olgeta lain long em.” Dokta Selzman i stretim pasin na tingting bilong em, long wanem, nau nem bilong em i pas wantaim bilong Presiden Nelson.

Ol dispela samting i kamap wantaim Dokta Selzman mekim mi askim mi yet: “Hau na mi senis taim nem bilong mi i pas wantaim nem bilong Jisas Krais? Mi bihainim pasin na tingting bilong Krais taim mi mekim olsem? Mi trutru traim long kamap gutpela na moa olsem Em?”

Long Dokta Selzman, yumi ken lukim 5-pela samting i wankain long rot yumi karim nem bilong Jisas Krais antap long yumi. Maski dispela rot i stat taim yumi kisim baptais, em i no pinis inap yumi kamap klin na holi moa na kamap wankain olsem Em.

Namba wan samting i wankain em yu husat. Dokta Selzman taim ol i makim em long Nelson profesasip i pasim nem bilong em wantaim nem bilong Presiden Nelson, na Dokta Selzman i stat kamap moa olsem Presiden Nelson. Taim yumi kisim nem bilong Jisas Krais kam antap long yumi, yumi pasim nem bilong yumi wantaim bilong Em. Yumi pas wantaim Em. Yumi amamas olsem yumi Kristen. Yumi luksave long Seivia na yumi sanap strong long stap olsem bilong Em.

Klostu long nem em —pasin bilong tingim. Taim Dokta Selzman i go long ofis bilong em, ai bilong em save lukim medol em i kisim taim ol i makim em go long Nelson profesasip. Olgeta de dispela medol i mekim em tingim ol pasin bilong RMN. Yumi save kisim sakramen olgeta wik long helpim yumi tingim Jisas Krais insait long wik. Taim yumi kisim sakramen, yumi mekim long tingim prais Em i peim long baim bek yumi. Yumi promis long tingim em, luksave olsem Em i bikpela, na tok tenkyu long gutpela pasin bilong Em. Mipela luksave olgeta taim olsem long marimari bilong Em i Em i kisim bek yumi long dai bilong bodi na spirit wantaim.

Long tingim em olsem yumi mas bihainim stia toktok profet Alma long Buk bilong Momon i givim. Yumi “larim olgeta samting [yumi] mekim i go long Bikpela, na wanem hap [yumi go, yumi] go long nem bilong Bikpela; … [yumi] larim olgeta tingting bilong [yumi] i stap tasol long Bikpela; … [na yumi] putim ol hevi bilong [bel bilong yumi] i go long Bikpela oltaim oltaim.” Maski ol narapela wok i pasim yumi, Em mas stap long tingting bilong yumi, kain olsem yumi tingim nem bilong yumi yet, maski yumi lukluk long narapela samting.

Taim yumi tingim wanem Jisas i mekim long yumi, i bai kamap namba 3 samting—bihainim pasin. Dokta Selzman i stat long bihainim pasin bilong Presiden Nelson na ol pasin bilong RMN. Mi bilip olsem olgeta pasin bilong Presiden Nelson i soim tru wok disaipel bilong em long Jisas Krais long olgeta laip bilong em. Long yumi, sapos yumi tok yumi bilong Jisas Krais na tingim em, yumi bai laik moa long kamap olsem Em. Olsem ol disaipel bilong Em, yumi senis na kamap gutpela taim yumi lukluk moa long Em, moa long yumi lukluk long yumi yet. Yumi strong long kamap wankain olsem Em na kisim ol pasin bilong Em. Yumi beten strong long pulap wantaim pasin bilong laikim narapela, dispela em piua lav bilong Krais.

Olsem Presiden Nelson i skulim yumi long Epril: “Taim siariti i kamap pasin bilong yumi, tingting bilong daunim ol narapela bai lusim yumi. Yumi bai lusim pasin bilong skelim ol narapela. Yumi bai laikim olgeta manmeri bilong kain kain sindaun . Siariti long olgeta … i bikpela samting long wokabaut bilong yumi. Siariti em i faundesen bilong pasin bilong God.” Long sait bilong siariti, yumi painim, “lukautim, … na mekim bikpela” ol narapela presen bilong spirit Seivia i givim, olsem integriti, daun pasin, na pasin bilong wok strong.

Taim yumi bihainim pasin bilong Jisas Krais, dispela bai kisim yumi go long namba 4 samting—bihainim laik bilong Em. Yumi joinim Em long wok bilong Em. Olsem wanpela sejion, Dokta Nelson em wanpela tisa, man bilong oraitim, na man bilong painimaut. Lapel pin ol i yusim long divisen bilong Dokta Selzman i strongim ol dispela pasin, soim ol dispela tok skulim, oraitim, na painimaut. Long yumi, wanpela hap bilong kisim nem bilong Jisas Krais antap long yumi em yumi mas, wantaim bel, tingting, na wantaim amamas yumi bihainim ol laik bilong yumi wantaim bilong Em. Yumi joinim Em long wok bilong Em taim yumi “laikim, serim, na invaitim.” Yumi joinim Em long wok bilong Em taim yumi helpim ol arapela, olsem ol turangu lain na husat ol pilim pen, hevi, o bel i bruk i kamap taim sampela samting i kamap long ol.

Yumi karim nem bilong Jisas Krais moa antap long yumi long rot bilong save long nem, tingim, bihainim pasin, na bihainim ol laik bilong Em. Ol dispela 4-pela samting bai kisim yumi go long namba 5 samting—strong. Yumi save kisim strong na blesing bilong God long laip bilong yumi. Nelson profesasip i givim Dokta Selzman luksave na sapot mani em i yusim long senisim ol samting insait long grup bilong em. Em yusim dispela “ pawa” long helpim ol arapela. Long wankain rot, taim yumi kisim nem bilong Sevia kam antap long yumi, Papa bilong yumi long heven bai blesim yumi wantaim strong bilong helpim yumi inapim wok bilong yumi long dispela graun.

Taim yumi mekim sampela moa kavanen wantaim God, yumi kisim antap long yumi moa nem bilong Jisas Krais. Long dispela rot, God i blesim yumi wantaim strong bilong Em. Olsem Presiden Nelson i skulim yumi: “Wan wan husat i mekim promis long hap bilong baptais na insait long templel—na bihainim ol—i ken kisim moa strong i kam long Jisas Krais. … Pe bilong holimpas ol kavanen wantaim God em pawa long heven—pawa we bai strongim yumi long sanap strong long ol tes bilong yumi, ol traim, na long sore moa gut.”.

Yumi kamap moa redi long kisim spirit. Yumi gat moa strong long winim ol samting yumi ting em i hat long yumi. Yumi kisim strong moa long bihainim Jisas Krais. Yumi bai hariap moa long tok sori long asua bilong yumi na go bek long Em taim yumi pundaun. Yumi bai kamap moa gut long serim gospel bilong Em wantaim strong na tok orait. Yumi bai helpim husat i gat nid na bai nonap jasim ol. Yumi kisim marimari bilong sin bilong yumi. Yumi bai gat bikpela bel isi, na yumi bai orait moa bikos yumi bai amamas oltaim. Glori bilong Em bai raunim yumi, na ol ensel bilong Em bai lukautim yumi.

Seivia i invaitim yumi, “Kam long Papa long nem bilong mi, na kisim olgeta samting bilong em.” Mi laikim tru yupela long mekim olsem. Kam long Papa bilong yumi long heven. Kisim nem bilong Jisas Krais antap long yu yet. Pas wantaim Em. Tingim Em oltaim. Wok strong long kamap moa olsem Em. Joinim Em long wok bilong Em. Kisim pawa bilong Em na ol blesing long laip bilong yu. Putim nem bilong Em long bel bilong yu, wantaim olgeta tingting na bel bilong yu. Dispela bai givim yu “namba hap” long ai bilong God na Krais bai inap long sanap olsem namelman bilong yu. Yu bai kamap wankain olsem em na kisim kingdom bilong Papa bilong yumi long Heven, na kisim ol samting wantaim Namba Wan Pikinini bilong Em, Seivia na Ridima.

Em i stap laip. Mi save trutru. Em laikim yu tru. Em givim laip bilong Em long yu. Em laikim yu long kam long Papa long nem bilong Em. Long nem bilong Jisas Krais, amen.