Bilas wantaim Gutpela Pasin bilong Stap Isi
Mi salim strongpela invitesen long yumi olgeta long bilasim ol tingting na bel bilong yumi wantaim ol isi pasin bilong Krais.
Long Mei 2021, taim Presiden Russell M. Nelson i go lukim wok bilong stretim Salt Lake Temple, em tingim hatwok bilong ol husat i kam long hap namba wan taim, wantaim ol liklik samting na strongpela bilip, i bin sanapim dispela holi haus, na i stap long dispela taim i kam nau. Tasol em lukim tu olsem wara na ol samting i bagarapim ol faundesen ston bilong temple na ol ston i no stap gut, soim klia olsem i gat nid bilong stretim.
Profet bilong yumi laikim tru i skulim yumi wankain olsem i gat nid long mekim ol bikpela wok long strongim faundesen bilong temple bai i sanap strong long dispela graun, yumi mas kirapim ol banis—ol banis i strong moa yumi no save mekim bipo—long strongim spiritual faundesen insait long Jisas Krais. Em lusim yumi wantaim 2pela bikpela askim bilong skelim: “Faundesen bilong yu i strong olsem wanem? Na wanem ol samting long testimoni na save bilong gospel yu nid long strongim moa?”
Gospel bilong Jisas Krais i givim yumi ol gutpela tingting long banisim sol bilong yumi long ol bagarap, strongim tru faundesen bilong yumi na helpim long abrusim ol spes insait long bilip na taim bilong hevi long testimoni na save long ol tok i tru na save bilong gospel. Wanpela bikpela as toktok bilong inapim dispela i stap insait long seksen 12 Doktrin na ol Kavanen, wanpela revelesen i kam long Profet Joseph Smith i go long Joseph Knight, wanpela stretpela man husat i laik tru long save gut long laik bilong Bikpela, i no bilong senis long skin tasol, tasol long sanap strong long wok disaipel bilong em—“strong olsem ol pos bilong heven.” Bikpela i tokaut:
“Lukim, mi toktok long yupela, na tu long olgeta husat i gat laik bringim kam na kamapim dispela wok;
“Na tu nogat man i ken halivim long dispela wok tasol man husat i gat daun pasin na i gat planti lav insait long em, feit, hop, na siariti, na i mas gat pasin bilong lukautim ol filings bilong em long olgeta samting, ol samting i stap long lukaut bilong em.”
Gaidens bilong Seivia, ol i rekotim insait long dispela sekred revelesen, i helpim yumi tingim olsem pasin bilong stap isi em wanpela bikpela banis bilong strongpela faundesen insait long Jisas Krais. Em i wanpela gutpela pasin tru, i no bilong ol husat i kisim singaut long sev tasol tu tasol bilong olgeta husat i mekim sekred kavanen wantaim Bikpela na i wanbel long bihainim Em wantaim bilip. Pasin bilong stap isi i bung wantaim na i strongim olgeta narapela pasin bilong Krais insait long dispela revelesen: daun pasin, bilip, hop, siariti, na piua lav i kam long Em. Moa yet, kamapim stap isi pasin i gutpela long banisim ol sol bilong yumi bai ol samting bilong spirit i noken raus bikos long ol pasin bilong dispela graun i mekim faundesen bilong yumi long Jisas Krais i no strong.
Namel long ol pasin i save bilasim ol trupela disaipel bilong Krais, stap isi pasin i stap plesklia olsem Krais yet i soim, em wanpela gutpela prut bilong Spirit, i stap bilong olgeta husat i opim ol yet long God. Em gutpela pasin we i save bringim pasin wanbel kam insait long bel, stiaim ol laik na tingting wantaim gutpela save na isi pasin. Insait long skripsa, bel isi pasin em i wanpela bikpela hap long wokabaut bilong yumi insait long spirit, i bringim yumi i go long bel isi, klinpela pasin, na bel sore, taim yumi stretim tu ol piling, ol toktok, na ol pasin bilong yumi.
Ol disaipel bilong Krais husat i wok strong long kamapim dispela pasin bilong Krais bai daunim ol yet moa na bai pulap wantaim laikim. Wanpela isipela strong bai kirap insait long ol, na ol bai daunim belhat moa, kirapim bel isi, na ol bai mekim gut long ol narapela, rispektim na strongim ol narapela, maski ol birua i kam planti. Ol i traim long noken mekim samting nating tasol sus long bihainim wisdom bilong spirit, wantaim gaidens bilong daun pasin na isipela pasin bilong Holi Spirit. Long dispela rot, ol bai sanap strong na i no inap raus, long wanem, olsem Aposel Paul i tok, ol i save olsem Krais i save givim strong long ol long mekim olgeta samting insait tu long ai bilong ol traim we i ken mekim testimoni bilong ol long Em i pundaun.
Long pas bilong em i go long Titus, Paul i givim ol sekred kaunsel long ol pasin bilong ol husat i laik makim Jisas na bihainim laik bilong Em wantaim bilip na strongpela tingting i mas gat long en. Em tok ol i mas mekim gut long ol narapela, laikim na bihainim stretpela pasin tasol, na em i mas stap klin—em ol pasin i soimaut pasin bilong stap isi.
Tasol, Paul i givim tok lukaut tu olsem ol i mas “noken ting [ol] i gat biknem, … noken belhat kwik, [na] noken paitim ol man nabaut.” Ol dispela pasin em i narapela long tingting bilong Jisas na i stopim spirit long gro. Insait long skripsa, “noken ting [ol] i gat biknem” em wanpela husat i les long bihainim pasin bilong apim nem bilong em yet; “noken belhat kwik” em wanpela husat i save abrusim pasin bilong bel isi na weit; na “noken paitim ol man nabaut” i toktok long man husat i les long ol tok pait, tok kros, na hatpela pasin long toktok, pasin, na tingting. Taim yumi wok strong long senisim pasin bilong yumi wantaim bilip na daun pasin, yumi ken anka strong tru long strongpela ston bilong marimari bilong Em na kamap ol klinpela instramen tru long ol holi han bilong Em.
Mi skelim nid bilong kirapim gutpela pasin bilong stap isi, na mi tingim ol toktok bilong Hannah, mama bilong profet Samuel—em wanpela meri i gat strongpela bilip tru husat, bihain long ol bikpela traim, save singim song bilong soim belgut bilong em long Bikpela. Em i tok, “Noken toktok wantaim biknem; noken larim apim nem pasin i kam aut long maus bilong yu: long wanem Bikpela i God bilong save, na long Em olgeta wok bai kisim skel.” Singsing bilong em i moa long wanpela beten—em wanpela askim bilong bihainim daun pasin, bosim yu yet, na bihainim pasin isi. Hannah i mekim yumi tingim olsem trupela strong i kam long spirit i no nap kam aut long ol wei i gat planti toktok o nois, tasol long pasin isi, na pasin bilong skelim samting i pas wantaim wisdom bilong Bikpela.
Planti taim, ples graun i apim ol pasin bilong pait, strongpela pasin, les long weit, na pasin em i nogut tru, na oltaim ol i save tok olsem ol presa bilong laip na laik bilong kisim biknem i kamapim. Taim yumi givim baksait long gutpela pasin bilong stap isi na givim baksait long ol isipela pasin bilong Holi Spirit long pasin o toktok bilong yumi, isi tru yumi bai pundaun long han bilong birua, dispela bai bringim yumi long mekim ol toktok o mekim ol pasin yumi bai sori tru bihain olsem yumi mekim pinis, insait long ol pren, famili, o sios bilong yumi. Dispela gospel bilong Jisas Krais i invaitim yumi long eksasaisim dispela pasin long taim bilong salens, long wanem em long dispela taim trupela pasin bilong ol man i save kamap ples klia. Olsem Martin Luther King Jr bin tok, “Skel tru bilong wanpela man em i no hap em save sanap long taim ol samting i stap isi, tasol long wanem hap em sanap long taim bilong hevi na birua.”
Olsem ol manmeri bilong kavanen, yumi kisim dispela singaut long stap wantaim ol bel i pas tru insait long ol sekred promis yumi mekim long Bikpela, na bihainim tru pasin Em kamapim long stretpela piksa Em i soim. Long bekim, Em promis olsem, “Tru tumas mi tokim yupela, olsem dispela em trupela tok bilong mi, na husat i sanap antap long dispela tok i sanap antap long ston bilong mi, na dai bai i no inap tru long winim ol.”
Noken Larim Bel Bilong Yu I Hevi, Howard Lyon i mekim, ketesi bilong Havenlight
Ministri bilong Seivia long ples graun i bin soim tru dispela isi pasin bilong Em long olgeta wok bilong Em. Long stretpela eksampel bilong, Em skulim yumi long “bel isi long taim bilong hevi, na noken mekim tok nogut long ol husat i mekim tok nogut.” Em givim skul olsem yumi noken larim pasin kros i kisim yumi, Em tokaut olsem, “Yupela i mas tanim bel, na kamap olsem wanpela liklik pikinini.” Em i givim tok skul tu olsem olgeta husat i gat laik long kam long Em wantaim bel i mas kamap wanbel wantaim husat ol i belhat long en o wantaim husat i gat kros wantaim ol. Wantaim isi pasin na bel sore, Em strongim yumi olsem taim ol lain i tok hat long yumi, i no mekim gutpela pasin long yumi, i no rispektim yumi, o i no laikim yumi, gutpela pasin bilong Em bai i no stap longwe long yumi, na kavanen bilong bel isi bilong Em bai i no raus long yumi.
Sampela yia i go pinis, mi wantaim meri bilong mi i gat dispela sekred sans long bung wantaim ol feitful memba bilong Sios long Mexico City. Planti bilong ol, ol yet o long ol lain ol i laikim tru, i karim ol bikpela traim tru, kain olsem ol man i stilim ol, kilim ol, na ol narapela hevi i brukim bel tru.
Taim mipela lukluk long pes bilong ol dispela Seints, mipela i no lukim belhat, les, o laik bilong bekim rong. Tasol, mipela i lukim isipela daun pasin. Pes bilong ol, maski sore i stap long en, i soim aut olsem ol i laik kamap orait gen na kisim bel isi. Maski ol hevi i brukim tru bel bilong ol, ol dispela Seint i go het wantaim bilip long Jisas krais, na ol i no larim ol hevi bilong ol i mekim ol speis long bilip bilong ol o mekim testimoni bilong ol long dispela gospel.
Long pinis bilong dispela sekred bung, mipela i tok halo long olgeta wan wan. Olgeta sekhan, olgeta holimpas i kamap olsem wanpela isipela testimoni olsem wantaim helpim bilong Bikpela, yumi ken bekim ol hevi na belhat bilong laip wantaim pasin bilong stap isi. Dispela isipela piksa ol i soim i stap olsem gutpela askim bilong wokabaut long rot bilong Jisas wantaim pasin isi long olgeta samting. Mipela pilim olsem mipela stap namel long ol ensel.
Jisas Krais, bikpela tru long olgeta, i karim hevi bilong yumi inap blut i kapsait long olgeta skin, tasol Em i no larim belhat i kirap long bel bilong Em, na ol toktok hat, toktok i no stret, o tok nogut i no kamap long maus bilong Em, maski em i stap long hevi. Wantaim stretpela pasin bilong stap isi na daun pasin yu no inap long lukim, Em i no tingim Em yet tasol em tingim olgeta wan wan pikinini bilong God—long bipo, nau, na bihain. Aposel Peter i testifai long isi pasin bilong Krais taim em tokaut, “Husat, taim ol i tok nogut long em, em i no bekim tok nogut bilong ol, taim Em i karim pen, em i no kros long ol, tasol Em i putim em yet long han bilong husat bai jasim stret.” Long namel long bikpela hevi tu, Jisas i soim stretpela na klinpela pasin bilong stap isi. Em tokaut, “Maski wanem i kamap, Papa i ken kisim biknem, na mi inapim na pinisim tru wok bilong redim ol pikinini bilong man.”
Ol brata na susa mi laikim tru, mi invaitim yumi olgeta long bilasim tingting na bel bilong yumi wantaim dispela gutpela isi pasin bilong Krais long stap isi olsem wanpela bekim long singaut bilong dia profet Presiden Russell M. Nelson. Taim yumi wok strong wantaim bilip na strongpela tingting long putim pasin bilong stap isi i go insait long pasin na toktok bilong yumi, mi tokaut olsem yumi bai strongim na ankaim laip bilong yumi moa antap long faundesen bilong Man Husat i Baim Bek Yumi.
Mi berim testimoni bilong mi olsem pasin bilong stap isi bai klinim sol bilong yumi na mekim bel bilong yumi i holi long ai bilong Seivia, em bai kisim yumi go klostu long Em na redim yumi, wantaim hop na bel isi, long dispela gutpela dei taim yumi bai bungim Em long Kam Bek bilong Em. Mi serim ol dispela ol sekred toktok long nem bilong Seivia, Jisas Krais, amen.