Mekim Hap Wok Bilong Yu Wantaim Olgeta Bel Bilong Yu
Trastim Sevia inap long mekim wok, wantaim bel isi and hat wok, na wokim hap wok bilong yu wantaim olgeta bel bilong yu.
Las yia taim mi raun i go long Europe mi bin go lukim olpela ples mi bin wok long en, Lufthansa German Airlines long Frankfurt ples balus.
Long skulim ol pailot bilong en, Lufthansa i yusim ol masin bilong mekim ol flait i kamap wankain olsem ol flait i save kamap long taim bilong bikpela bagarap. Insait long planti yia mi bin wok olsem kepten bilong balus, mi mas pasim wanpela flai tes insait long masin bilong flai olgeta 6-pela mun long holim yet laisens bilong pailot. Mi tingim gut ol dispela taim bilong bikpela hevi na wari tasol tu mi pilim amamas olsem mi pasim tes. Mi bin yangpela long dispela taim na mi laikim dispela salens.
Long visit bilong mi, wanpela bilong ol bosman bilong Lufthansa i askim mi sapos mi laik traim gen na flaim B747 masin wanpela taim moa.
Bipo mi gat taim long skelim gut dispela askim, mi harim wanpela nek—i krai olsem nek bilong mi yet—i tok, “Yes, mi laikim tru dispela.”
Taim mi mekim ol dispela tok, planti tingting i pulap long tingting bilong mi. Em i bin longpela taim i go pinis taim mi bin flaim 747. Long dispela taim mi bin yangpela na kepten i gat konfidens. Nau mi gat dispela reputesen we mi mas soim. Bai mi semim mi yet long ai bilong ol dispela saveman?
Tasol em i bin leit long tok nogat, olsem na mi sindaun long sia bilong kepten, putim han long ol kontrol bilong balus we em i no nupela long mi, na mi pilim gen amamas bilong flait taim balus i ron i go daun long ples balus na flait i go insait long wanpela longwe ples.
Mi amamas long tok olsem flait i bin kamap gut, balus i stap gut, na nem bilong mi yet tu i stap gut.
Maski i olsem, dispela ekspiriens i mekim mi i gat daun pasin. Taim mi stap long mak bilong strong bilong mi, flai i kamap olsem namba tu pasin bilong mi. Nau em i kisim olgeta tingting bilong mi long mekim ol liklik samting.
Pasin bilong kamap Disaipel i nidim Disaplin
Ekspiriens bilong mi long masin bilong flait i kamap em i wanpela impoten samting long helpim mi tingim olsem long kamap gutpela long olgeta samting—maski em i flai, pul long kanu, samapim klos, makim hol long graun, o save—u mas bosim yu yet na praktis oltaim.
Yu ken yusim planti yia long kamap gut long wanpela samting o kamapim wanpela talen. Yu ken wok hat tru we dispela i ken kamap olsem namba tu pasin bilong yu. Tasol sapos yu tingim dispela i min olsem yu ken stop long praktis na stadi, yu bai isi isi lusim ol save na strong yu bin kisim long bikpela pe.
Dispela i wankain long ol skil olsem lainim wanpela tokples, pilaim wanpela musik instramen, na flaim balus. Em i wankain tu long kamap wanpela disaipel bilong Krais
Long tok isi, wok bilong kamap disaipel i nidim disiplinim yu yet.
Em i no wanpela wok nating, na em i no kamap nating.
Bilip long Jisas Krais em i wanpela presen, tasol long kisim em i wanpela gutpela sois we yumi mas givim wantaim olgeta “pawa, tingting na strong” bilong yumi. Em i wanpela praktis bilong olgeta dei. Olgeta aua Em i nidim lainim olgeta taim na strongpela tingting. Bilip bilong yumi, loyol pasin bilong yumi long Seivia, bai strong moa taim em i kisim traim long birua yumi bungim hia long dispela graun. Em i save stap strong long wanem yumi wok long givim kaikai long en, na yumi wok strong long bihainim, na yumi no givap.
Long narapela sait, sapos yumi no yusim bilip na pawa bilong en long winim tingting, bai yumi no inap bilip tumas long ol samting we bipo yumi bin tingim olsem i sekred—yumi no inap bilip tumas long ol samting we bipo yumi bin save olsem em i tru.
Ol traim we bipo yumi no save laik lukluk long ol i stat long luk orait na naispela tumas.
Paia bilong testimoni bilong aste inap long hotim yumi inap longpela taim tasol. Em i nidim kaikai oltaim long stap strong yet.
Long Nupela Testamen, Seivia i givim tok piksa bilong bosman husait i givim wanwan wokman bilong em wanpela sekred tras—sampela moni ol i kolim talen. Ol wokman husait i wok hat long yusim ol talen bilong ol i mekim planti moa talen. Wokman husait i bin planim talen bilong em i lusim dispela talen.
Wanem dispela lainim? God i givim yumi ol presen—bilong save, bilong strong, bilong sans—na Em i laik bai yumi yusim na mekim bikpela bai ol i ken blesim yumi na ol narapela pikinini bilong Em. Dispela i no inap kamap sapos yumi putim ol dispela presen antap long wanpela selp olsem wanpela tropi we yumi save lukim na laikim long wanwan taim. Ol presen bilong yumi i save kamap bikpela na kamap planti taim yumi yusim ol.
Yu Gat Presen
“Tasol Elda Uchtdorf,” yu ken tok, “Mi no gat wanpela presen o talen—nogat wanpela we i gat bikpela pe olsem.” Ating yu lukim ol narapela husait i gat ol presen i stap ples klia na i gutpela na yu pilim nomol tasol taim yu skelim wantaim ol. Yu ken tingim olsem long laip bipo long dispela graun, long de bilong bikpela presen na talen smorgasbord, plet bilong yu i luk olsem i no planti tumas—moa yet taim yu skelim wantaim ol plet bilong ol narapela i pulap nogut tru.
Oh, mi wis bai mi ken holim yu na helpim yu long kliagut long dispela bikpela tok tru: Yu wanpela blesing bilong lait; spirit pikinini bilong God i no gat pinis bilong en! Na yu gat insait long yu wanpela strong we yu inap long kisim we yu no inap tingim.
Olsem ol man bilong raitim poem i bin tok, yu kam long graun wantaim “ol klaut bilong glori”!
Stori bilong hau yu kamap em i bilong God, na pinis bilong yu tu. Yu lusim heven long kam long hia, tasol heven i no lusim yu!
Yu wanpela samting na i no samting nating.
Yu gat presen!
Doktrin na ol Kavanen 46,:
“I gat planti presen, na long olgeta [manmeri] ol i kisim wanpela presen long Spirit bilong God.
Long sampela ol i givim wanpela, na sampela ol i givim long narapela, olsem olgeta i ken kisim helpim long dispela.”
Sampela ol dispela presen bilong yumi i stap insait long skripsa. Planit i nogat.
Olsem profet Moronai i bin tok, “No ken sakim ol presen bilong God, long wanem, i gat planti; na ol i kam long wanpela God tasol.” Ol bai soim ol yet long “ol narapela wei … ; tasol em i wanpela God tasol husait i save wokim olgeta samting.”
Ating em tru olsem ol presen i kam long spirit bilong yumi i no stap ples klia oltaim, tasol dispela i no min olsem ol i no impoten. Bai mi serim wantaim yu sampela presen bilong spirit we mi bin luksave long ol memba long olgeta hap bilong dispela graun? Skelim sapos yu bin gat blesing wantaim wanpela o moa presen olsem dispela:
-
Soim pasin sore
-
Luksave long ol man o meri husait ol i no save luksave long ol.
-
Painim ol as long kamap amamas.
-
Kamap man bilong givim bel isi
-
Luksave long ol liklik mirakel.
-
Givim ol gutpela tok amamas
-
Fogivim
-
Pasin bilong tanim bel
-
Stap strong.
-
Tok klia long ol samting long isipela we.
-
Bung wantaim ol pikinini
-
Sasteinim ol Sios lida.
Yu no inap lukim ol dispela presen i stap long wod talen show. Tasol mi hop yu ken lukim olsem ol i bikpela samting tumas long wok bilong Bikpela na hau yu tatsim, blesim, o sevim wanpela pikinini bilong God long ol presen bilong yu. Tingim: “Bikpela samting save kamap wantaim ol liklik samting.”
Orait yumi wanwan i mas mekim ol liklik hap wok bilong yumi.
Mekim Liklik Hap Wok Bilong Yu
Ol brata na susa bilong mi, ol dia pren, mi prea olsem Spirit bai helpim yumi long luksave long ol presen na talen God i givim yu. Orait, yumi ken, olsem ol gutpela wokman insait long tok piksa bilong Bikpela, mekim ol i kamap bikpela na kamap bikpela moa.
Dispela de bai kamap taim yumi sanap long ai bilong Papa bilong yumi long Heven we i gat pasin sore long givim stori bilong wok yumi mekim long lukautim ol samting. Em bai laik save wanem samting yumi mekim wantaim ol presen Em i bin givim yumi—moa yet, hau yumi bin yusim ol long blesim ol pikinini bilong Em. God i save yumi husait tru, husait yumi i bai kamap, olsem na em i laik bai yumi mas mekim ol wok gut.
Tasol Em i no laikim yumi long mekim wanpela bikpela, strongpela, o supaman kalap long kamap long dispela hap. Insait long dispela graun we Em i bin wokim, gro i save kamap isi isi na isi stret—tasol tu i save kamap olgeta taim na i no save stop.
Tingim, Em Jisas Krais husait i bin mekim supaman hap taim Em i winim dai na sin.
Wok bilong yumi em long bihainim Krais. Em i hap wok bilong yumi long givim baksait long sin, tanim i go long Seivia, na wokabaut long rot bilong Em, wanpela step long wanpela taim. Taim yumi mekim dispela, wantaim strongpela tingting na wantaim bilip, yumi rausim ol rop bilong ol pasin kranki na asua na isi isi yumi kamap klin, inap long dispela gutpela de we bai yumi kamap gutpela olgeta insait long Em.
Ol blesing i stap klostu long yumi. Ol promis i stap pinis. Dua i op bikpela. Em i sois bilong yumi long go insait na stat.
Long stat i bai liklik. Tasol em i orait.
Long ol hap we bilip i no strong, stat wantaim hop long Krais Jisas na pawa bilong Em long klinim na mekim i kamap klin.
Papa bilong yumi i askim yumi long go klostu long dispela salens bilong bilip na kamap disaipel i no olsem ol turis tasol olsem ol bilipman husait i bilip wantaim olgeta bel, husait i lusim Babilon na putim bel, tingting, na wokabaut i go long Saion.
Yumi save olsem ol hatwok bilong yumi tasol i no inap mekim yumi kamap selesel. Tasol ol i ken mekim yumi stap loyal na bihainim Jisas Krais, na Em Em i ken mekim yumi kamap selestial.
Bikos long Seivia bilong yumi, i no gat wanpela samting olsem nogat win stori. Sapos yumi putim hop na bilip bilong yumi long Em, win bilong yumi i tru bai stap. Em i tok promis long yumi long kisim strong bilong Em, pawa bilong Em, na planti marimari bilong Em. Step long step, liklik liklik, bai yumi gro klostu moa long dispela bikpela na gutpela de we bai yumi stap wantaim Em na ol lain yumi laikim long glori i stap oltaim oltaim.
Long kamap long hap, yumi mas mekim wok bilong yumi tete na long olgeta de. Mipela i amamas long ol step mipela i bin mekim aste, tasol mipela mas noken stop long dispela. Na mipela i save olsem mipela i gat longpela rot yet long go tasol mipela i no bai larim dispela i daunim mipela.
Dispela em i as bilong husait em yumi—olsem ol lain bihainim Krais.
Mi askim na blesim olgeta memba bilong Sios long trastim Sevia inap long ol i ken wok, wantaim pasin bilong wet na wok strong long mekim hap wok bilong yu wantaim olgeta bel bilong yu—olsem amamas bilong yu i pulap na, wanpela de, bai yu kisim olgeta samting Papa i gat. Long dispela mi berim witnes long nem bilong Jisas Krais, amen.