Bikpela i Hariapim Wok Bilong Em.

Charles Dickens i bin kamapim stori buk bilong em we olgeta manmeri i save long en The Tale of Two Cities wantaim tingting olsem “Em i bin ol gutpela taim.” Long wanpela we, dispela em i tru long taim bilong yumi tete.

Yumi stap long taim nogut we “olgeta graun [i] i stap long hevi.” Woning bilong Presiden Russell M. Nelson i olsem, ol lain i bihainim Jisas Krais, long kamap ol lain bilong mekim bel isi em Elda Gary Stevenson i tok strong long em dispela moning. Dispela em i namba wan long kamapim yuniti, bel isi na hiling bilong ol “taim bilong hevi.”

Yumi stap tu insait long “ol gutpela taim tru,” em mi laik tok strong long en. Bikpela, long stat bilong Doktrin na ol Kavanen seksen 1, i tokaut long pulap bilong gospel “bai autim go long olgeta hap bilong dispela wol.” Bikpela i tru tumas hariapim wok bilong Em long taim bilong yumi. Yumi mas hamamas tru long dispela hariapim, we i bai kamap maski long dispela taim bilong salens. Yumi stap long de taim ol lain bilong bihainim Bikpela bai harim nek bilong Em na wanbel na bekim Em. Ol memba bilong Sios bilong Jisas Krais bilong ol Seint long Las de, husait i bihainim Seivia na ol lo bilong Em, i wok long painim as na bikpela bel isi bilong ol yet.

Long ol kain kain taim long histori bilong Sios, i bin gat bikpela namba bilong ol lain husait i bin kam insait long kavanen rot. Wanpela kain taim olsem i bin kamap namel bilong yia 1837 na 1850. Sampela bilong ol namba wan Aposel insait long Sios we Bikpela i bin kisim kam bek ken i bin sevim misin insait long United Kingdom. Ol dispela misin i bin mekim tausen i kam insait Sios, na long 1850 i bin gat planti ol memba bilong Sios i stap long United Kingdom na i no long United States. Long dispela taim, Bikpela i bin tokim ol Seints long bung long Utah. Planti manmeri i bin lusim kantri bilong ol, sampela i kisim dinau we i kam long Perpetual Emigrating Fund.

Mi laikim stori bilong bikpela namba bilong ol konvet husait i kam long Salt Lake Valley long England na long Wales long 1852. Namba wan Presidensi i bungim dispela grup long maus bilong Imigresen Kenon wantaim Band bilong Kepten Pitt. Dispela Deseret Nius i bin tok olsem “long ol dispela lain i [gat] ol susa na pikinini, wokabout, sindaun long sun, na kisim bagarap long weda, tasol ol i no kalabus; bel bilong ol pulap wantaim lait na i no hevi, i klia long amamas long pes bilong ol.

Taim ol “i abrusim Temple Blok, … tausen man, meri, na pikinini, i bin bung long kain kain hap bilong siti, long bung long dispela amamas welkam.” Presiden Brigham Young i bin toktok long ol: “Bikpela God bilong Israel i ken blesim yupela. … Mipela i bin beten long yupela planti taim; tausenpela beten i go antap bilong yupela, olgeta de, long Em husait i tokim mipela long bungim Israel, sevim pikinini bilong man long autim gospel, na redim ol long kam bek bilong Mesaia.”

Long dispela spirit bilong amamas taim, larim mi tokim olgeta nupela konvets na ol lain husait i kam bek gen long Sios bilong Bikpela olsem: Mipela i lavim yu; mipela i nidim yu; Bikpela i nidim yu Mipela bai no welkamim yupela wantaim ol ben i mas, tasol mipela i beten olsem ol blesing bilong heven bai kam long lukim ol wok progres long dispela kavanen rot i go long God Papa na Jisas Krais long selesel kingdom.

Em i klia olsem feit long Jisas Krais i wok long go bikpela long taim bilong yumi. Insait long Sios bilong Jisas Krais bilong ol Seint long Las de, namba bilong ol nupela lain i wok long go bikpela. Long 36pela mun i go pinis klostu 900,000 ol konvet i joinim Sios. Dispela ol konvet i mekim olsem 5 pesen bilong Sios membasip. Mipela i save welkamim ol nuipela memba wantaim bikpela amamas na amamas long rot yu bin susim.

Dispela ol 900,000 konvet insait long 36-pela mun i go pinis i abrusim totol membasip bilong Sios long 110 aniveseri bilong en long 1940, we i bin gat 860,000 membas. Dispela i bin yia we Eldas Jeffrey R. Holland, Dieter F. Uchtdorf, na mi i bin bon.

Dispela ol gutpela konvets i kam long kain kain hap bilong dispela wol. Long fespela six mun bilong dispela yia, ol nuipela lain i kam joinim Sios i go antap moa long 20-pela pesen long yia i go pinis long Europe, Afrika, Asia, long Pasifik, na Latin Amerika. Long North Amerika mipela i lukim 17 pesen i go antap. Wok bilong Bikpela i wok long go het long ol pawaful we. Dispela ol namba i wok long go antap i soim ples klia olsem gospel i tasim bel na wok long senisim ol laip long olgeta hap.

Long de bilong yumi, dispela ol konvet i no moa wok long bung long wanpela namel hap. Bikos long feit na konsekresen bilong ol memba bilong Sios, ol risos i stap nau long sapotim kongregasen, wantaim ol bilding bilong ol sapels na temple, long olgeta hap long wol. Wantaim ol prishud ki na ol risos i stap, ol seiving odinens i stap nau long olgeta hap bilong dispela graun.

Maski yumi stap long wainem hap, ol nau memba i nid long welkamim ol handet tausen ol nuipela memba wankain olsem mipela i bin wokim long ol English na Welsh Seint olsem mi bin toktok pastaim. Mi laikim toktok bilong Elda Gerrit W. Gong long dispela sesen we em i tisim yumi olsem nogat man o meri mas sindaun em yet long sait bilong tingting o spirit.

Sekred wok bilong yumi em long laikim na welkamim nupela na ol membas husait i wok long kam bek gen. Taim Bikpela i hariapim wok bilong Em, yumi mas lavim, lukautim, na sevim ol narapela husait i kisim gospel bilong Em. Yumi ken halivim long bildim wanpela Saion pipol, we yumi stap long en wantaim “wanpela bel na wanpela tingting, na [stap] long stretpela pasin.” Long kamap wanpela wantaim Bikpela, yumi mas kamap wanpela bipo long Bikpela. Olgeta memba, maski long wanem deit yumi baptais long en yumi i gat wok bilong welkamim ol narapela.

Kaunsel bilong mi long ol memba bilong Sios em long holim han bilong ol dispela lain husait i kisim gospel bilong Jisas Krais.

Presiden Gordon B. Hincley tisim mipela wanpela nupela nid bilong konvet “em wanpela poro, wanpela risposibiliti, na lukautim wantaim ‘gutpela tok bilong God’ (Moronai 6:4).” Yui stap namel long ol poro husat i ken tokim dispela ol nupela konvet olsem ol bilong na i no ol ges. Yumi i ken halivim ol long save olsem ol i disapels bilong Jisas Krais husait i ken minista long ol narapela na i kisim koling long sev. Ol yangpela konvet i mas tingting long sevim ful-taim misin. Olgeta i mas wok strong long stap olsem Krais long laip.

Planti i save joinim Sios wantaim bikpela sakrifais bilong ol yet na i nidim lav na sapot bilong ol wan Lotu bilong ol.

Long yu husait i nupela o i kam bek gen long feit, i gat ol salens yu bai fesim. Yu mas gat pasin bilong wet long yu yet. Ol misinari i lainim yu ol impoten doktrin na toktok klia long ol kavanen na odinens bilong kingdom, we i stap long ol skripsa na insait long Preach My Gospel.

Kisim ol odinens na ol kavanen na bihainim lo emi bikpela samting tru. Bihainim ol kavanen bilong eksaltesen. Gospel i makim eksaltesen i kamap, we yu mas makim na bihainim ol sekred kavanen wantaim God. Tasol long baptais, konfemesen, na givim Melkisedek Prishud long ol man, ol kavanen we yumi save go insait i save kamap insait long tempel. Long ol dai lain, wanwan bilong ol dispela seiving odinens i save kamap insait long temple. Bihainim dispela, redim yu yet long temple i mas wanpela gol bilong yu nau yet.

Yu bai pilim long sompela taim olsem save bilong yu i no inap. Save bilong gospel em i wanpela bikpela blesing bilong olgeta taim, tasol em i no odinens bilong seivim yu. Gospel em i tes bilong save. Tasol, olsem Presiden Nelson i tok promis, “taim yu beten na stadim Buk Momon olgeta de, yu bai mekim ol gutpela disisen —olgeta de. … Taim yu tingim wanem yu stadim, ol windo bilong heven bai op, na yu bai kisim ol ansa long ol askim bilong yu na daireksen bilong laip bilong yu.”

Na tu, long wanwan yia Sios kurikulum i save senis senis long ol Sande miting we i save karamapim Olpela Testamen, Nuipela Testamen, Buk Mormon, na Doktrin na ol Kavanen. Long sampela taim bihain, bai yu pilim strong taim save bilong yu long gospel i gro. Stadim skripsa olgeta de bai blesim na bai mekim laip bilong yu kamap gutpela we senis bilong yu bai kamap moa long gospel bilong Jisas Krais.

Lainim puia doktrin bilong Jisas Krais em i wanpela wok bilong laiptaim, long save moa long doktrin na stap olsem Krais i bin stap. Ol bikpela kavanen i save givim mak we yumi kolim kavanen rot. Presiden Nelson i bin strong long tisim ol dispela ol prinsipol Olgeta memba, moa yet ol nupela na ol husait i kam bek gen, bai kisim blesing long stadi na kisim ol tok profet bilong em long ol kavanen na kavanen rot.

Sapos yu setim wanpela mak long kisim gut wanwan kavanen bilong eksaltesen, yu bai stap long rot i go long selesel kingdom Ol temple na ol odinens bilong temple i mas kamap bikpela samting long yumi. Planti ol kavanen i stap long yumi wanwan. Wanpela kavanen, marit oltaim oltaim, i bilong bungim strong bilong yu wantaim wanpela poro bilong yu. Mak bilong yumi i mas painim dispela oltaim oltaim poro.

Tasol, noken wari sapos dispela marit oltaim oltaim i no kamap long dispela taim. Ol profet i bin tisim olsem nogat blesing bai holim bek long ol feitful membas husait i bihainim ol lo. Wanpela Buk Mormom profet, King Benjamin, i tok naispela tru: “Ol husait i bihainim ol lo bilong God … i gat blesing bilong olgeta samting, … na sapos ol … [i] stap feitpul i go long pinis … ol bai stap wantaim God long hap bilong amamas we i nogat pinis bilong en. ”

Yu bai painim, sapos yu no bin painim aut yet, olsem olgeta ol memba i no stretpela lain. Doktrin i stap ples klia i mekim klia olsem long laip bilong yumi long dispela graun, yumi bai mekim ol rong. Yumi stap long wanpela graun we i no stretpela na nogut, i no selesel wol. Dispela laip i taim bilong traim, wantaim planti sans long senis na strongim yumi yet.

Yumi olgeta i save pilim olsem yumi no inap taim yumi wok long traim long kamap olsem Jisas Krais. Atonmen bilong Em i larim yumi long tanim bel olgeta de taim yumi pundaun. Olsem Nifai, narapela Buk Mormon profet, i tok: “[Yumi] mas i go pas wantaim strongpela tingting long Krais, i mas gat hop we i lait bikpela tru, na lav bilong God na olgeta manmeri. Long wanem, sapos yupela i go het, kaikai bikpela tru ol toktok bilong Krais, na i stap strong i go i nap long arere, lukim, Papa i tok olsem: Yupela bai kisim laip oltaim oltaim.”

Na taim yumi sklelim ol salens bilong de bilong yumi, yumi mas tingim olsem Seivia, long ministri bilong Em long dispela graun, i bin stap tu long taim nogut na taim bilong bikpela ol bagarap. Tingting strong bilong Em i no stap long politiks salens bilong de; em bin i stap long mekim ol Seints i kamap gut.

Bihainim Seivia na doktrin bilong Em na ol tising i no bin isi long dispela wol we kainkain samting i wok long kamap. Em i no bin isi long Seivia long ples graun long taim bilong em, em i no bin isi long ol lida bilong yumi i kam pas na ol memba, na em i no isi long yumi. Gutpela tru, ol profet i stap laip i givim gaidens yumi nidim tumas long dispela de. President Dallin H. Oaks bai go hetim dispela legesi i pulap long pawa bilong spirit.

Mi testifai olsem doktrin bilong Sios bilong Jisas Krais i oltaim oltaim na i tru. Mi berim strongpela na trupela witnes olsem Jisas Krais i stap, na bikos long Atonmen bilong Em, yumi ken kamap wanpela wantaim Em. Insait long sekred nem bilong Jisas Krais, amen.