Bay e Toer ko Gin ni bay Got Riy

Pi walageg nib tu’uf rog, gub falfalaen’ ni nggu non ngomed daba’ ulan e mu’ulung ney, nib gaa’fan ko general conference. Be plubthir e changar rog. Kamagaer gaed ni gimed be nang fan u napan ni gube pii’ e milwol rog.

Gadad ba par ulan e ngiyal’ nibay yo’or e thilthil ulan fare Galasia ku Yesus Kristus ni Fan ko Gidiiʼen Got ko Tin Tomur e Rran. Gube sug ko falfalaen’ u napan ni nggu guy e mon’og ulan bo’or e mite e pi’nen.

Be athamgil lanin’ug nifan e gidii’ nib fel’ yangren rodad. Yad be pii’ bo’or e pigpig. Yad ba piryeged e gidii’ nib kakrom mar rin’ed e gam’ing u lane temple. Pi gidii’ nib fel’ yangren rodad e be pii’ e yo’or e babyor nifan e pigpig ko mission. Bin magid e pi gidii’ ney nib ‘ilal e ra manged e gachelpen nib fel rogon ku Yesus Kristus.

De n’ew napan ma kug mada’ e bitir ko bitir ko bitir nib ppin rog. Napan ni gube lemnag marunga’agen e pi magawon nira fek u yafos rok, ma gube thamey nib gaa’ e ba’adag ni nggu ayuweg ni nge fal’eg e mich ngak Yesus Kristus. Fasgad e gospel rok’ e baga’fan nifan e yafos rok’.

Ir, e ra feked e magawon, ni boed gadad gubin. Gadad gubin ma ra fek e m’ar, kirebean’, tin tagan ban’en, nge malog. Ireray e magawon ni ra gathaynag e adag rodad ngodad. Machane, pi gachalpen rok’ Yesus Kristus e bay reb e mit e toer rorad.

Napan ni gadaed ra fal’eg ngad folgad e m’ag rodad ngak Got, ma rayog ni ngad thapeged e toer ngey niba yib ngodad udakaen’ e Ya’el. Somoel e ke yoeg ngak Joseph Smith e toer rodad e ra “gaa’nag u pow’chen Got.” Mu lemnag e gapas ni gabe thamiy u napan ni bay e toer ko gin bay Got riy!

Napan ni gube yoeg ni marunga’agen e toer ko gin bay Got riy, ma gube yip’ fan ni bay e toer ko gin bay Got riy chiney! Gube yipfan ko meybil ni yimanang ni Chitamangdaed nibay u Tharmiy e be rung’agdaed, ni manang e tin nib tu’uf rodaed. Gube yipfan ko nangaen’ ni gadaed manang ni gadaed ba tu’uf Rok’ nib ga’ ko rogon ni gadaed manang, nima pi’ fapi angel ni nge yib ngodaed nge ngak e pi’in nib tu’uf rodaed. Gube yip’ fan ni bay e toer ni Ba’adag ni nge ayuweg dad ni ngad mon’og dad nib th’abi tolang.

Ere, uw rogon ni ngad thapeged toer ney? Somel e ke fulweg e biney e duwer ko pi thin ney: “Mu suguy ngorngorem … ko murnguy ngak gubin e pumo’on, … mag pag e tin nib machalbog ni nge suguy e leam rom; ma aram ni ran gel nigem u lan gil’il’ungun Got.”

Ireram e rogon! Ulan e thin rok’ Somoel, murnguy nge tin nib mangil me bing e wo’en ni ngad thapeged e toer nga gin bay Got riy! Brothers nge sisters, Rayog rodaed! Toer rodad e ra ga’ nag ko gin bay Got riy, chiney!

Ngad lemniged marunga’agen murnguy nge tin nib machalbog.

Bin somm’on, murunguy. L’agruw e duw kafaram, ma kug pinningdad, ni gadaed gachelpen nib fel rogon ku Yesus Kristus, ni ngad manged e tasunmiy ko gapas. Gube yoeg bayay e thin ni kugog kafram: “Damomuw e dabi thilyeg e tafeny. Damomuwe e de ayuweg bee’. Togopluw e darma fekey ko fulweg nib thothup.”

Murunguy nib riyul’ ngak gubin e gidii’ ir a pow rok e pi tasuniy ko gapas! Rib gaa’fan ni bay e murunguy rodad ulan e thin rodad, ufithik’ e gidii’ nge napan yigo gur. Gube pinning e magar ngorad e pi’in ni kar thapeged e fonow rog ulan e gum’ircha’rad. Machane rangad gaa’nag e rayog rodad.

Fare damomuw ni bay e daba’ ulan e thin rodad nge ulan e social media ir bana’ab. Fapi thin nib kireb e mang e talin ko mael. Togopluw e ma tileg fare Kan ni Thothup ni nge paer rodaed ni gubin e rran.

Gadad ni pigachalpen Yesus Kristus, ma thingarda gayed kanawo’en e tasunmiy ko gapas. Napan ni murunguy e ra mang e yang ko rogdaed, ma gadad ra pag rogdaed ni ngad achigchig niged bee’ ufithik’ e pi thin. Gadad ra tal’eg e pufthin ngak bee’. Gadad ra thapeg e murunguy nifan urngin e gidii’. Ba gaa’fan e murunguy ngak gubin e gidii’ nifan e mon’og rodad. Murugnuy e dayif ku bee’ nib thothup.

Wenig gaed ngak e Chitamangdaed nibay u Tharmiy ni nge suguy gum’ircha’endaed ko tu’ufeg—nrib ga’ ngak e pi’in nib momaw’ rogon ni ngan tu’ufeg—tu’ufeg e ir reb e tawa’ath nike yib rok’ e Chitamangdaed nu Tharmiy nifan ngak e pi’in nib yul’yul’ nibe leak Yesus Kristus. Fare Tathapeged dad i’ir fare Pilung ko Gapas. Ba t’uf ni ngad manged e talin Rok’ nifan e gapas.

Ere chiney, ngad doeged marunga’agen e tin nib machalbog. Somoel e be yoeg ngodad ni dabda tal’eg ni ngad lemnag e tin nib machalbog. Mu lemnag marunga’agen e gelngin ni ngam thapeged ko lem nib mangil ni demitrug, ni napan ni ngam gaa’niged binem ko e tin nib machalbog. Tin nib machalbog e ma gaa’nag gubin e pi’nen me pii’ ngodad e falfalaen’! Ya bay u barba’ i pa’ay, mu lemnag mang e ra buch u napan ni ngam tay e tin nib machalbog ko lemnag ni dabi mangil, fa lemnag ni damomuw, fa lemang ni kirbaen’. Tin nib machalbog e ra chuweg tinem e lemnag. Tin nib machalbog e ra chuwehg e lemnag ni m’agaen’, ni kireb e lemnag.

Pi walageg, napan ni nge kireb fare fayleng, ma thingarda manged machalbog. Tafney, thin, nge ngongol rodad e thingari mangnib machalbog me sug ko t’uf rok’ Kristus ngak urngin e gidii’. Bay e ngiyal’ ney nib mangil u p’oewchen dad ni ngad manged e gidii’ nib t’uf rok’ Got ni ngad manged.

Liyor ulan e na’un rok’ Somoel e ma gaa’ nag e rogdad nifan e murunguy nge tin nib machalbog. Ere, ngiyal’ ulan e temple e ma gaa’ nag e toer rodad u p’oewchen Somoel. Ngiyal’ nib bo’or ulan e temple e ma ayuwegdad ni ngad fal’eged rogdaed ko fare Bin L’agruw e Wub rok’ Somoel rodad, i Yesus Kristus. Dabda nanged e rran fa hour napan ni ra sul. Machane guma nang ni fare Somoel e be pinningeg ni nggu t’aer midlen dad ni ngad fal’eg rogdad nifan “rran nib gaa’ mab gel e gafgow riy.”

Napan ni ngad guyed rogon ni ngad thapeged e murunguy nge tin nib machalbog ulan e yafos rodad, ma toer rodad ko gin ni bay Got riy e bayi gaa’ nag. Gube pinning med ni ngam feked rogon ni rayog ni ngam gaa’ niged e toer romed ko gin ni bay Somoel riy. Ma arame, napan ni ngad dared nga Chitimangdad nu Tharmey nib gaa’ e toer rodad, ma gadad ra sug ko falfalaen’, ma mich rodad ko Yesus Kristus e bayi gaa’nag. Gadad ra thapeg gelngiy ko ya’el nib gel ko gubin e lem rodad.

Gamaed be pining e magar ngak fare Somoel nifan e toey nib papay ko fapi temple ulan bochi duw faram. Utan pa’, daba’ ma Gamaed be falfalaen’ ni nggu weliyed e tin ba’aray e temple ni ngan toey ko yungin ni ba’aray:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Filippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Gube micheg ni Yesus Kristus, fare Tabiyul ku Israel, ma gagiyeg nag biney, e Galasia Rok’. Ba fal’eg rogon ni nge yib bayay. Ngad fal’eged rogdaed ni boed rogon ni ngad thapeged Ir. Gube meybil nag pin’ey u dakean fithingan Yesus Kristus, amen.