“Mu Chuchgur Nigem Ngog”

Pi walageg nib t’uf rog, kug falfalaen’ ni un ngomed ko general conference ko Fare Galasia ku Yesus Kristus ni fan ko gidii’en rok’ ko Tin Tomur e Rran. Ireray e Galasia Rok. Gadad ba kunuy gad u na’un nge tabinaw u dakean pi nam ko fayleng u fithik e fithingan.

Gadad befek Fithngan u napan nikad bad nga lan gil’ilignun ko m’ag. Ir Fak ni faskoyam rok Got. Gadad bugi yafos, ni rayog ni ngad denen gad ma rayog ni ngad m’ad. Machane, u fithik e tu’ufeg Rok ngodad, ma piningdad fare Tathapeg ni ngad chuchugurgad Ngak.

Ba aray e pining Rok ngodad: “I yog ni susun ni ngad chuchgur gad Ngak me Ir era chuchgur ngodad; susun ni ngan gay e fithik e athamgil ma gadad ra pirieg Ngak, susn ni ngad fithed maran fulweg tabon ngodad, ma susun ni ngad tugtuguyed maran bing ngodad.”

Bay bochi ngiyal’ gadad ba chuchugur gad ngak Somoel ni Yesus Kristus. Machane, boechngiyal u deaken e yafos u fayleng, gadad ma thamiy thil Ngak nge ba adag ni Ir ma nang mang u lan e gumircha’dad nge t’uf rok ngodad.

Milwol rok Tathapeg ni bay e kanawo ni ngad thamiy pin’ey. Mu chuchugur Ngak u deaken tay u wun’um Ir. Mu Sap Ngak u deaken bi’eg fare scripture. Mu fith ko meybil nib yul’yul’ ngak’ Chitimangiy nu Tharmiy ni ngam thamiy nib chugur ko Fak nib T’uf Rok’.

Rib moem e rogon ni ngad lemniged mornga’agen binem. Ni ta’ab rogon ni ga ba rin ni fa’anra ga ba warwar boechngiyal ko fagar rom. Ga ra sap ko rogon ni rayog ni ba non ngak, ba falfalan’ rom ko milwol ni bay yib, nge ga ba rin gubin ban’en ni ayuwegen.

Napan ni ra buch bo’or e yay, ni ma buch nib n’uw napan, nira gel nag e m’ag nem, nge ga ba thamiy chuchugur u ngomew. Fa’an bo’or e ngiyal’ ra buch me dariy’ bee’ be non, nge aywueg ngomew ni ra mo’owaer nag e m’ag.

Yesus Kristus ba adag dad. Ir ma pii’ ngodad e kanawo’en nrayag ni ngad chuchugurgad ngak. Ni woed rogon e fagar, ni ga ba rin ni ta’ab rogon, u dakean e meybil ngak Chitamangmed nu Tharmiy u dakean fithingan Yesus Kristus, motoyil ko powi’iy, nge ayuweg boech cha’ Ngak. Ni ga ba thamiy fare tawa’ath ko ni ngam chuchugur gad Ngak.

Napan kug pagal, kug thamiy e falfalaen’ ko wub nib chuchugur ngak fare Tathapeg—nge fare wub Rok nibe chuchugur ngog—u fithik e pigpig nib mom niybe fol ko pi motochiyel. Napan ni kug pagal, ma kug thapeged fare sacrament ko mo’ulung ni balayal. Rayog ni nggu puguran ta’areb e nep’, ni 75 e duw kafram, ko ngiyal’ nem ni lumor nge garbeb. Gube puguran e thamey ko magal nge guwael ulan e chapel napan ni kug nang ni kug fol e motochiyl ni kug kunuy u ta’abong ko pi gidii’ nib Saint ni nge thapeg e sacrament, mug micheg ngak e Chitamangdad nu Tharmiy ni gubin e ngiyal’ me yib uran ngog e Fak nggu fol ko pi motochiyl Rok’

U tomuren fare mo’ulung ko binem e nep, ma kug yon’ed fare hymn ni “Paer Romad; Ko Bineye Balayal,” nge fapi thin ni dabgu pagtalin ni “O Tathapeg, mu paer rog e biney e balayal.”

Pi thin ney ke fek e thamey nib gaa’ ko Ya’el ngog, ni dariy’fan kug kemus e bitir. Kug thamiy e t’ufeg nge chugur rok Somoel ere balayal nem ufithik’ e gapasen ku fare Kan ni Thothup.

Bochi e duw tomuren ma kug adag ni nggu thamey ta’abrogon e thamtham ko tu’feg ko en Tathapeg nge chugur Rok ni kug thamiy napan e mo’olung ko sacrament u napan kab fal yangreg. Ere kug fol ko reb e motochiyel: Kug bi’eg fapi scripture.

U lan e babyor ko Luke, kug be’eg mornga’agen bin dalip e rran tomur e Kruthnag nge u gil’ e gum’eyag, napan e pi tapigpig nib yul’yul’ kar yib, u fithik’ e t’uf nifan e Tathapeg, ni ngar gapgep nag e dowen. Napan ni kar yib, nira patgad ko fare malang nikan yil’oweg nge chuw ko fare tomb mar guyed ni fare dagur Rok e danimoy u rom.

L’agruw e angel ea kar ningew nagrad mangfan nikar rus gad, nibe ga’ar:

“Mangfan ni gimed be gay e pi’in nib fas u fithik e yam’?

“Ir e danimoy u roy, machane ba fas: mu pug’ngan’med u rogon ni non ngomed u napan nibay u Galilee,

“Ni ga’ar, Fare Pum’on ni fak e gidii ea yira pi’ nga pa’ e gidii nib kireb, maran kuruth nag, ma bin dalip e rran e ra fas ko yam’ biyay.”

U nep’ nem u kamnungeal’, ma la’agruw e gachelpen e kar ranow u buut iyib ko Jerusalem nga Emmaus, ma fare Somoel nib faskoyam’ e m’ag ngorow me ke ’un ngorowl ko wo’en.

Fare babyor ku Luke ea ke pagdad ni ngad ’uned ngorad e re balayal nem:

“Ma nap’an ni yow be weliy murung’agen, me chugur Yesus i yib ngorow ngu’u ranod i yan.

“Miyow guy, machane de poy rorow.

“Me ga’ar Yesus ngorow, Mang e gimew be weliy murung’agen ni fa’ani gimew be yib, ni gabmew be kireban’?

“Ma bagayow, ni Cleopas fithingan, e fith Yesus ni ga’ar, mog, kemus ni go’gur e ka ga bay u Jerusalem ndawor mu nang e n’en ni kan rin’ u rom ko fa in i rran ni ba’aray nike yan?”

Miyow weliy Ngak ea kirbaen rorow nike yim’ Yesus u napan nikar pagan’row ngay ni ir e mang Tabiyul ku yu Israel.

Dabisiy nibay e t’ufeg u laman Somoel u napan ni nike non ngak e gali gachalpen ney niyow be kirbaen’.

Napan ni kug yul’yul’ e be’eg, ni ke yib e thin ney ni ke gaweal nag e gum’irach’eg, ta’ab rogon ni ke buch napan kug e pagal:

“Miyad chugur i yib ko fare binaw ni ir e yad be sor i yan ngay, ma susun e dabi un Yesus ko matal ni aram e ka be yan.

“Machane miyow tal’eg ni be lungurow, mu par romow: ya ke chugur ni nge m’ay e biney e rran ma ere nge aw e lumor. Ma aram me un ngorow nga naun ni nge par rorow.”

Fare Tathapeg e fol ngorad ea re nap nem ni nge un nga naun ko fare gachalpen Rok. Me yan I ’un ngorow ko par nga tebel. Me fek e flowa, me pining e magaer riy ngak Got, me t’ar fare flowa, me pi’ ngorow. Ma gowa puf owcherow, miyow poy. Machane Me m’ay ngabang ndakur guyew.

Luke e yoloy ea thamtham ko gali gachalpen ney nib tawa’ath nifan ngodad: Me lungurow, “Gathi da thamiyew rodow ni bod ba nifiy ni be yik’ u ngorongordow ni fa’ani i welwelthin ngodow u daken e kanawo’ me weliy fan fapi thin nu babyor nib thothup ngodow?”

Fagali gachelpen e kar sulow nga Jerusalem nib papay ni ngar yogew ko fapi Apostle e nen nike buch rorow. Napan ni kar weliyew mang ni ke buch, me m’ug biyay fare Tathapeg.

Ke sak’iy Somol nga fithik’rad me “ga’ar ngorad, Nge yib e gapas ngomed.” Ke sul u daken fapi machib ni morngagaen e murwel Rok ni nge bayul nifan e denen ko pafak e Chitamangin Rok ma nge tha’ab e gaf ko yam’.

“Me ga’ar ngorad, Ba’aray e n’en ni kan yoloy, en ni Messiah e thingar ni gafgownag min faseg ko yam’ ko chirofen nra gaman e dalip ngay:

“Mu fithingan e ngan machibnag riy e thin rok Got ni murung’agen ni ngan kolngan’uy nga ni pi’ keruuy ko denen, me n’ag Got fan, ni thingar ni machib nag ngak urngin e pi nam, ni ngan tabab ngay u lan yu Jerusalem.

“Ma gimed e mich ko pin’ey.”

Woed rogon e pi gachelpen nib t’uf rok, urngin e fak ku Chitimangiy nu Tharimy e rayog ni nge mel’eg ni ngar yib u fithik’ e garog ko tawfe nima manged e m’ag ku Tathapeg nge pi’in me ayuweg e gidii’ ni ba t’uf e ayuw u fithik’ e yafos rodad. Biney e micheg ni ke mo’omaw nag ni bachane e profet Alma u lan fare Babyor ku Mormon ni ke rrin’ u charen Fapi Raen ku Mormon:

“Bachan e gimed baʼadag ni ngam baed ko ulung rokʼ Got, ma noeg ni gimed e gidiiʼ rokʼ, mab mʼagaenʼmed ngay ni ngam ayuweged gimed, ni nge yog ni ngam baʼud gaed;

“Arragon, mab mʼagaenʼmed ngay ni nge kirbaenʼmed ngakʼ e piʼin nibe kirbaenʼ; arragon, mi gimed falʼeg laniyaenʼ e piʼin nib tʼuf rokʼ ni ngan falʼeg laniyaenʼ, ma ngam pired ni gimed e pi mich rokʼ Got ni gubin e ngiyalʼ ngo fithikʼ gubin banʼen, nge gubin yangs … , nge yaeni madaʼ ko ngiyalʼ ni kam mʼaed, ni nge yog ni bayuliymed Got, … ni nge yog ngomed e yafos ni gubinfen.”

Napan gimed ba yul’yul’ nag gali micheg ney, gara naged fare Somoel ni ra fulweg e pi micheg Rok’ ni yaeni aw ni ta’areb gow ulan e pigpig romed, ni’ir ra ba’ud u wun’med. Ga ra nang fare Tathapeg, nge fithik’ e ngiyal’ e gamed ra manged woed Ir ma “ngam machalbog gaed rok’.” U dakaen e ayuw ngak e bee’ ni fan ko fare Tathapeg, gamed nira sapgad ni ngam chuchugur gad Ngak.

Boech i gimed nibay picha’an nib t’uf romed nib malog ko fare kanawo ko yafos nib manemus. Kam lemnag ko mang e ngam rrin ni ngam sulwegrad. Rayog ni ngam pagaen’um ngak Somoel ni nge chuchgur ngorad napan ni gabe pigpig Ngak u fithik e michaen’.

Gabe pug’an’um ko fare michmicheg nitay Somoel ngak Joseph Smith nge Sidney Rigdon napan kar chuwgow ko tabinaew rorow niyow be pigpig Ngak: “Pi fagar rog ni Sidney nge Joseph, gothon e tabinaew romew e kab fal rogon; yad bay u tan pa’ag, ma nggu rrin e tin nib mangil ngog; ya bayrog gubin e gelngiy.”

Napan ni gabe m’ag e mad’ad ko picha’nib t’uf ban’en rorad, gelngin e Somoel era aywegem. Pa’ Rok e be kiyag ni wad gur ni ngan ayweg min tawa’ath nag pifak e Chitmangmad nu Tharmiy.

Urngin e tapigpig nib yul’yul’ rok’ Yesus Kristus nira thapeged e fonow Rok’ ko fare Kan Thothup u napan ni yad ra yibliy ra pigpig gaed reb e bee’ nifan Ngak’. Arame yad ra thamiy e t’uf Rok min pat ko falfalaen’ ko ngiyal niybe chuchgur Ngak’.

I gag reb e micheg ni fan e Fas ko Yam rok fare Somoel niwoed rogon ni gu bay u rom ko re balayal nem rok pi gachalpen u lane na’un ko fare kanawo nga Emmaus. Gube pi’ e m’ag ni Got be fos.

Ireray bin riyul’ e Galasia Rok—fare Galasia ku Yesus Kristus. Bay da rrin, ko fare Rran ko Pufthin, ni gadaed ra sakiy u p’oewchen fare Tathapeg. Ra mang e ngiyal’ nibay e falfalaen’ nib gaa’ nifan e pi’in, u lan e yafos ney, ni kar chuchugur gad Ngak u lan e pigpig Rok’ nge me soen u fithik’ e falfalaen’ ni ngar motoyil biney e thin ni: “Ri gab manigil, ye gur reb e tapigpig ni gab fel’ ma gab yul’yul’.”

Gube micheg e ren’ey ni Gag e m’ag ko fare Tathapeg ni ke faskoyam’ nge Tabiyul rodaed, u dakean fithngan Yesus Kristus, amen.