Thapeg e Tawa’ath Rok’

Pi’ e tawa’ath e reb e yalen nibay ko gubin e naam, gidii’, nge millennia. Kab kakrom, ni gidii’ e ma pi’ e tawa’ath ni nge gel nag e tha’, dag e tu’ufeg nge magar, fan ko madnom ni woed e mabgol, birthday, nge holiday. Machane gidii’ e gathi kemus ni yigo yaed roraed e ngar pii’ed e tawa’ath ngoraed nike sunmiy Got. Boech e pin’ey, e woed fapi penguin nima pi’ e malang nib mat’ rama’en ngak e en nrayag ni nge le’engiy, bonobos (mit e chimpanzee) e yead ma pii’ wom’ngin e gek’iy ngak e pi tafagar roraed ni ngeyag ni nge gel nag e tha’ roraed.

Mang boech e tawa’ath ni kam pii’? Mu tafney nag bangiyal’ ni kam pire’eg—fa kam fal’eg—ba tawa’ath nirb fel’ ni fan be’ nrib tu’uf rom. Ri gam ma nang ni re tawa’ath nem e ir e n’en nri ba’adag e chan’ey ma ban’en ni yaedra cha’ariy. Mang e binem e tawa’ath? Fan e nina’ rom? Reb e fagar rom? fan ngak fakam? fan ngak e sensey rom? Fan ngak e tutuw rom? Mang e kam thamiy napan ni kam pire’eg e biney e tawa’ath? U rogon kam tafney nag e chan’ey napan nike bing fare tawa’ath? Ku woed, napan nike pii’ be’ reb e tawa’ath ngom nrib fel’, mang e kam thamiy napan nikam thapeg?

Napan ni medlip e duw rog, ni gube par ko galibthir rog u Arabia, bay reb e kachido ni kanoeg e Chitty Chitty Bang Bang ngay nrayag ni ngan guy ya’an. Biney e kachido e mornga’agen ba karo nib magik nrayag ni drive nag ir, yean u dakean e day, ma krayag ni nge changag. Gu ma nang ni u England e bay ya’an e pi karo ney ni woed ya’an Chitty Chitty Bang Bang, nri gu ba adag ni nggu fanay reb! Bay e giya riy nrayag ni ngam tel me poef poen fare karo! Yaen e chitamag ko chur nifan ko muruwel nga England mug fith ko rayag ni nge fek ban’en u rom ni fan ngog, ma rugog ngak nri guba’adag ni nge yag reb e pi karo nem ngon ni woed e Chitty Chitty Bang Bang.

Yib ko chur rok’ nifan e muruwel, ma dani fek fare karo. Kari kirbaen’ug ma kug tafney nag ni sana ke pagtilin. Machane 10 e rran nga tomuren e birthday rog, nibay ba tawa’ath, nikan upngiy nrib fel’ ya’an, nibe soen nigeg. Karug falfalaen’, ma gube gay rogon ni dabi gel e athap rog, mug bing fare tawa’ath mug guy fare karo. Karug falfalaen’ nrib gel mug yoer. Mug tel fare giya riy me peof peon, nri woed fare karo ko fare kachido! Ma rug pinning e magar riy ngak e chitamangig ko re tawa’ath ney nrib fel’. Rbo’or e duw nigu fafal ko re karo nem ma rug ayuweg nri bo’or e duw. Gube tafney nag ni chitamag e kari falfalaen’ ngay nike pi’ ere karo ney ngong ni kuwod rogon nikug falfalaen’ napan nigu thapeg.

Rayag ni ngad tafney niged ni fare pi’ e tawa’ath e bay dalip yang riy.

1. Fare pi’ fare tawa’ath, ni facha’ ni nge pi’ era mel’eg, me fal’ag rogon fare tawa’ath nifan facha’ nib tu’uf rok’. Biney e mu’un i tafney nag rogon i pi’ fare tawa’ath u fithik’ e tu’ufeg nge adag.

2. Fare fanay nge bing fare tawa’ath, napan nra fek facha’ fare tawa’ath ko en nike ngongliy rogon, ma wod ni yaedra fanay u fithik’ e falfalaen’, og nag e magar, u mm’on ni ngar bingedni, yaed e pithig e gaf riy mar binged ni ngar guyed ko mang fare tawa’ath.

3. Fin arame fini yib e gin ni th’abi ga’fan riy, fare thapeg fare tawa’ath. Thapeg e tawa’ath nikan pi’ u fithik’ e tu’ufeg e rib ga’fan ko bin ba’aray ni ngan bing. Ma ku woed, ni baga’fan ni ngan og nag e magar ngak e en nike ngongliy fare tawa’ath. Ra ngan thapeg ba tawa’ath u fithik’ e yul’yul’, gadaedra ayuweg ma gadaed fanay ni woed rogon ni kan pi’ ni fan, e en cha’en ni ke pi’.

Thapeg e tawa’ath e ban’en nib fel’ ni yima rrin’ ni darma mus rogon u roy ko napan ni yira bing fare tawa’ath. Ra ngan thapeg era gel nag e tha’ nge gum’ircha’en facha’ nike pi’ fare tawa’ath nge facha’ nike ngongliy fare tawa’ath. Gura tafney nag fare karo e wod nibe yib e tafney ngog nrib fel’, thamiy rog ngak e chitmangig nge tu’ufeg rok’ ngog, napan ni pi’ fare tawa’ath ngog ko karo.

Chitamangdaed nu Tharmiy e ri bo’or e tawa’ath nibay rok’ ko tomilang nge riyul’ ni nge pi’ ngodaed, nifan ngak pifak. Ma yib ko en ni Ga’ nibe pi’ ni gowoed ba lul’ ulan e luway nibe yib u gum’richa’en, “Ya urngin e tin ni bfel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’ ni be gal ram’en u lanelang.” Ko m’ag rodaed ngak e Chitamangiy, I’ir e facha’ nibe Pi’ ma gadaed e gadaed be thapeg.

Dabiyag ni ngad thapaged ni fa’anra demoy ko fare bin th’abi fel’ e tawa’ath ko Chitamangiy, ni’ir e fare Saf nifak, ni’ir e Fak, ni’ir Yesus Kristus. Gubin fapi tawa’ath rok’ e Chitamangiy e ma buch u dakean fare Tathapeg ni bachan e og nag ir u Gethsemane nge dakean fare kuruth, nge fare foskoyam’ ni tay. Yesus Kristus, ni’ir e Tabiyul rodaed nib sug ko murnguy, e ir fare tawa’ath ni tomilang rok’ e Chitamangiy. “Machane dakean fare tawaʼath ni aram Fak e ke falʼeg Got rebo kanawoʼ riy [nifan ngodaed] nib felʼ.”

Guba’adag ni nggu non ni mornga’agen reb e tawa’ath nifan urngin ko tin nriyul’ ni manemus nrayag ni nge ayuwegdaed ngad thapegned urgin e pin’en ni ba’adag e Chitamangiy ni nge tawa’ath nagdaed riy—ba tawa’ath ko llowaen’, ni napan gadaed ra fanay ni ngan thapeg u fthik’ gum’ircha’endaed demturug u rogon e yafos rodaed nib momaw’ nge pi duwer rodaed ni danur fulweg taban: Ma aram nri gadaed e riyul’ ni pifak Got. Biney e riyul’ e rib falel’! Mab fel! Ma biney e gathi kemus ni fan e thin.

Tafney nag ni ireray e somm’on ni kam rung’ag mornga’agen e biney! Riyul’ ni gur e fak ni bpin ni rigab tu’uf Rok’. Riyul’ ni gur e fak ni pumo’on ni rigab tu’uf Rok’. Ma fare pa’i kanawo’ ni gabay riy e wo’en e falfalaen’. Ko tu’ufeg rok’ ni ma nang gubin ban’en, ma nangem u mm’on nin pi’em nga fayleng, nge pin’en nibe buchbuch rom u fayleng, ma gubin e rran ma bay fam nike dugliy u fithik’ e murnguy. Nge Oh, bay nri be athapeg ni ngam sul Ngak ra borran, ni ngam thapeg ga’angin fapi tawa’ath Rok’ ni rib falel’ni ngam un ngak ko fare yafos ni dariy n’umngin napan manemus.

Gathi ngan fith ko ba riyul’ e biney e tawa’ath fa dangay machane ngan guy ko rayag ni ngad peri’egned min thapeg. Biney e tawa’ath e kan mu’ i pi’ ngodead nike yib rok’ e Chitamangiy. Pilwon e biney e tawa’ath ndariy n’umngin napan memus e ke mu’ fare Tathapeg i pi’ pilwon. Machane fa’anra kam mu’ i fil mornga’gen e biney, makam mu’ i yoeg, nge makam mu’ i yoen’ tingin, ma sana fare gelngin nib fel’ nge fare gapas riy e dakmur thamiy.

Fa’anra biney e tawa’ath ko nang fan—nge gubin fal’ngin, gapas, nge athap nibe yib rok’—e dabin fanay, fa ni bing, fa ni thapeg, ma gowoed e m’ay fan e biney! Facha’ nike pi’ fare tawa’ath era kirbaen’! “Dani mangil ni kan pi’ e tawa’ath ngak bee’, ma dabi fek fare tawa’ath? “Facha’ e dabun fare tawa’ath nikan pi’ ngak, ma ku dani falfalen’ ngak e cha’an nike pi’ fare tawa’ath.”

Gube pinngem ni ngam thapeg ni irerray e somm’on riy fa bagel gelngin ko somm’on, ni ngan nang nib ga’fan ni gur e riyul’ ni fak Got ni ri gab tu’uf Rok’. Thingar mu fulweg fare gaf riy nge woed somm’on, gustuy fare babyor riy, bing fare kahol, mag tabab i thapeg u fithik’ e sobut’aen’, ni biney e ba def nib riyul’ ni ngan nang fan. Fare Kan ni Thothup e rayag ni nge micheg nag u gum’richa’em ni gur e riyul’ ni fak e en ni Ga’.

Napan ni gara nang mag fanay e biney nib riyul’ ngalan gum’ircha’em mag thamiy gelngin e gapas riy, mara thil rogon e sap rom ko yafos rom! Ma rayag ni ngam thamiy fare tu’ufeg Rok’, motoyil nga laman, nge poey rogon fapi ayuw nibe yib Rok’, ndemuturug rogon e pin’en nibe buch, fa dar buch, ulan e yafos rom. Rayog ni ngam mel’eg ko rogon nrayag ni ngam guyem nge boech e gidii’. Ma fapi m’ag rom ngak fare Tathapeg e yira gelnag, ma u dakean e biney e tawa’ath, mara ayuwegem ngam guy e fel’, nge athap.

Wenig, rayag ni ngam meybil nag ngam nang ulan gum’ircha’em ko gabe thapeg e biney e llowaen’? Wenig ngom rayag ni ngam fanay e biney e tawa’ath? Rayag ni ngam gay rogon, u mat’wom nrib gel, ko somm’on ni um rrin’—ma fa’an gara rrin’ ma yira lukuyem ko boech e tawa’ath nikab mu’un ngay?

Rayag ni gabe tafney nag, “Mang e ba tu’uf ni nggu rrin’ ni geyog e biney e tawa’ath ngog rok’ Got?” Woed, sana, dariy. Biney e ba tawa’ath nibe yib rok’ facha’ nibe Pi’. Biney nib riyul’. Mpag nge yidor. I gur e bitir Rok’. Ni gab tu’uf Ngak. Damu lemnag nge pag rogon. Damu taleg i thapeg e biney e tawa’ath ko tafney rom ni ga be lemnag ni dariyfam. Ba’aray e riyul’, dariy bigdaed “nib fel’ ni nge thapeg”—gubin fapi tawa’ath rok’ e Chitamangiy ma karimus ni u dakean e murnguy rok’, nge garathia ko fare Messiah nib Thothup e rayag ni ngan thapeg, machane uw n’umngin i napan ni nge soen nag fapi bitir Rok’ ni ngar thapeged! Ma napan, ni bay ni be’ech nag e nangfan nike yib ngom, ma falfalfaen’um mag og nag e magar ngak e En nike pi’ fare tawa’ath.

Napan nigu pire’eg e mich rog ko napan ni 20 e duw rog, ma gubin ngiyal’ ni guma od ni gumanang ni gag e riyul’ ni fak Got ni pumo’on. Gubin ngiyal’ ni gura tafney nag e biney e tawa’ath, ma aram gelngin ni gumanang ko gag mini’ ma gumanang ni yibe tu’ufegneg. Boech ban’en nike ayuwegeg nike ga’nag e llowean’ rog e fapi thin ko chep nib thothup, fare patriarchal blessing rog, liyoer u temple, pigpig ngak e gidii’, og nag e magar, nge meybil ni yigo Chitamangig e manang mornga’agen. Guma tafney nag e pi gafgow rog, amith, nge kirbean’ rog nrayag ni ngan thilyeg ni fa’anra gumanang mornga’agen e biney nib riyul’.

Moroni ni yoeg “nggu chiyliy ngomed e pi tawaʼath nibe yib rok’ Got,” machane “nggu chiyliy ngomed ni ngam baed ngakʼ Kristus, magmed lʼeag paʼmed ko gubin e tawaʼath nib mangil.” Rayag ni ngamub ngak Kristus nib pagaen’um ngay ni gara thapeg fare tawa’ath Rok’ ko falfalaen’-gapas, athap, tomilang, yul’yul’, thogthog, llowaen’, nge gonop—ni gabe sap ngalang, nib mab pa’am ma rayag ni ngam thapeg. Rayag ni ngam thapeg e pi tawa’ath ney ni bachan e gur e bay e yuluuy ko llowaen’ rom ni gur e fak ni bpin ni gab tu’uf rok’ Got, ni gur e fak ni pumo’on ni gab tu’uf rok’ Got, make pi’ ngom fare bin th’abi polo’ e tawa’ath u dakean fare Fak nib thothup ni nge bayuliyem, n’agfan rom, me yibliyem.

I gur e bitir nifak Got. Biney e gathi kemus ni btang ni gadaed ma yoen’ tingin. Wenig rayag ni ngam fanay, mag bing, mag thapeg e biney e tawa’ath ko llowaen’ nibe yib Rok’? Rayag ni ngam cha’ariy ni rib gel e biney? Thapaeg biyay e biney e tawa’ath, fa ireray e somm’o riy ni ngam thapeg, mag pag ni nge thilyeg gubin yang ulan e yafos rom. Ri irerray e kanawo’en nrib fel’ nike fal’ag rogon Got nifan ngom u dakean fare tawa’ath ko fare Fak. Ere gidiiʼ e bay ni nge yog e falfalaenʼ ngoraed! U dakean fithngan Yesus Kristus, amen.