Fare Bayul ku Yesus Kristus e Ir Kanawo’en nira Ayuwegdaed

Fare Bayul ku Yesus Kristus e ir kanawo’en nira ayuwegdaed ko fapi mo’owar nira yib ngalan e yafos rodaed. President Russell M. Nelson e mulwol nigeg ni nggu yibliynag fare Temple u Casper Wyoming ko fare duw nike thumur. Biney e yibliynag e rib thothup, ma rib gumud rogon. Biney e tomilang nag fan fapi temple nibay nibe ayuweg pifak Got u dakean fare Bayul rok’ fare Tathapeg.

Fapi stakes ko Temple u Casper Wyoming District e bay bang riy nib mu’un yuyang fapi kanawo’ riy ni’i yib fapi Gidii’en Got ko Tin Tomur e Rran ko napan e 1847 nge 1868. U mm’on ko fare yibliynag fare temple, gu sul nggu be’eg biyay fapi chep ni monga’agen e pi kanawo’ ney nib mu’un fare luul’ nikanog e Platte River ngay nib chuchugur nga Casper ni’i yib nga Salt Lake City. Biney e kanawo’ e ki’i mang kanawo’ ko ragag nge biyu’ e gidii’ ni kab kakarom. N’en ni gube sap ngay e pag ko 60,000 urngin fapi Gidii’en Got ko Tin Tomur e Rran ni milekag ko re pi kanawo’ ney.

Oren fapi pioneer e rabad ulan e wagon, machane 3,000 e yib u but’ ni yaed be pi’pi’ e chugum roraed u but’. Meruk e pi’in ni yib u but’ e mada’ nag faregi n’en nikan yibliynag ni ri buchu’uw e in yaed ni yim’. Fare ulung ku Willie nge Martin nrabad u but’ ko 1856, e ri kirban’ug ngoraed.

Kug be’ig e cheppin mornga’agen fare ulungi ku Willie nge Martin ko ngiyal’ ni tabab i kireb lanelang. Mug nang ni rib gel e gafgow nranod u fithik’ ko napan ni yaed be thum’ nga wuru’ farengi fare luul’ ni kanoeg Sweetwater River ngay, Martin’s Cove, Rocky Ridge, nge Rock Creek Hollow.

U Fithik’ e Yukoq, ke yib rok Albin Veselka

Dawrug un ngalan fare Temple u Casper u mm’on ko ngiyal’ nin yibliynag. Npan niggu wean ngalan fare foyer, me un owcheg ko bangi sassing nikan paint nag nga pa’ay nibay fithingan ni fare U Fithik’ e Yukoq. Garanang ni biney e painting e kan achay ni nge dag ya’an e gafgow nike buch. Napan ni gube yaliy ya’an, mug tafney nag, “Rib puluw ya’an e biney e painting; oran e gidii’ ni yib u but’ e dani gafgow nge pag rogon.” Maki yib e thamtham ngog ni biney e gowoed e yafos nibay e chiney. Bochingiyal’ ma woed ni gadaed bay u fithik’ e yokoq nge tane maguleng nge thilthilin e tomilang.

Heaven’s Portal, yib rok Jim Wilcox

Napan ni kug chal ngareb e paint, mug guy fithingan ni Heaven’s Portal, mug nang ni biney e paint ni kanoeg fithingan e “Devil’s Gate,” ngay nibay fare luul’ nu Sweetwater River ngay, e be yipfan e tin nike sunmiy Somoel ni rib fel’ ya’an, gathi kemus ni bay ya’an e pin’en ni gafgow fapi pioneer riy ko ngiyal’ nike yib e ayis.

Makug sap nga mm’on, u tomur ko fare tabel nifan e recommend, mu guy ya’an reb e painting ni ya’an fare Tathapeg. Biney e ri pi’ e falfalaen’ ngog ni rib gel. Biney e fayleng ni rib fel’ ya’an, e kuwoed ni kub sug e gafgow riy. Napan ni gadaedra sap ngak Yesus Kristus, ni’ir fare Tathapeg ko fayleng, rayag nira ayuwegdaed ko fapi yukoq nibe yib ngalan e yafos rodaed u dakean fare Bayul rok’ nib puluw ko rogon fare wo’en e Chitamangiy.

I gag, fare foyer e gin th’abi fel’ ko gin ninge fal’ag rogoy riy nifan fapi gam’ing ni yima rrin’ ulan e temple ni ngeyag nin thapeg e gam’ing ko wo’en e thap, min un ko fapi m’ag nib thothup, ni ngeyag ni ngan thapeg fapi tawa’ath nima yib ko fare Bayul rok’ fare Tathapeg. Fare tonom rok’ e Chitamangiy e ma yaen u rogon fare ayuw nibe yib u dakean fare bayul rok’ fare Tathapeg.

Pin’en ni buch rok’ fapi pioneer e ke bing wo’en ngak fapi Gidii’en Got ko Tin Tomur e Rran boech e chep nge yalen nib thothup nifan ngoraed. Boech e gidii’, e tabab i milekag ni bo’or e duw ngay u tomuren nin tuluuf raed u Missouri nge Nauvoo. Boech i yaed, e tabab u tomuren ni yoeg President Brigham Young mornga’agen e pii’ e chugum u but’, ni biney e fan ni nge sobut’nag puluwan e wub roraed. Wub u but’ e ba sobut’ pilwon ko wub u wagon nge garbaw.

Reb e tamachib u England, Millen Atwood, e yoeg ni napan nin noeg mornga’agen e biney e wub u but’, “ma gowoed bangi nifiy ni urfiy e paan nib mlik, ma fapi gum’ircha’en fapi Saint e ri sug ko falfalaen’ ni rib gel.” Bo’or i yaed ni “meybil me balyagnag e abich rok’ reb e rran nge reb, reb e nap nge reb, ni ngeyag nra uned ko pi walagenraed u dakean [fare] burey.”

Oran fapi Saints ni yib u but’ e gafgow machane dariy ban’en ni buch roraed ni rib alamrin. Machane l’agruw i ulung ni yib u but’, fare ulung ku Willie nge Martin, era gafgowgaed ko mik’iy, gafgow gaed ko garbeb, nge oren ni yaed e yim’.

Oren e pi giddi’en e milekag ney rabad u Liverpool, England, ko May 1856, ulan l’agruw i barkow. Rtaw gaed ko fagin ni yibe tabab riy u Iowa City ko June nge July. Darifan rogon e yayawol riy, gali ulung ney era chuwgaed u Salt Lake Valley ni kar sasaga’algaed ko yifan nike thil.

Yibi nang President Brigham Young ke fil mornga’agen e gali ulung ney ko napan e October 4, ko 1856. Bin migid e rran ngay me sak’iy u powchen fapi Saints u Salt Lake City me ga’ar, “Oran fapi walagdaed e yaed bay u daken fa yungi ted ni yaed be yib u but’, … ma thingarda fekedraed ngaray; thingarda pii’ed e ayuw ngoraed … u mm’on nike thil e yifang.”

Ke fith ngak fapi bisof ni ngar pi’ed 60 e mule, 12 e wagon, nge 12 ton (10,886 kg) e flour me yoeg, “Marod ngam feked e pi gidii’ ney u dakean e pi ted ney.”

Urngin e pi pioneer ney ko fare ulung ku Willie nge Martin e go napan e 1,100. Gonapan 200 e pi Saint ney e ram’ad ko napan e biney e milekag. Susun ni fa’an a pag rogon e ngiyal’ riy, ma oran e pi gidii’ ney era yim’.

Yiko’ ko winter e tabab l’agruw e wik u tomuren ni chuw e pi gidii’ ney u Salt Lake City. Mornga’agen e gidii’ ko gali ulung ney ku Willie nge Martin e ni yoloey mornga’agen raed nge rogon e pi gafgow ni buch roraed u tomuren fare yikoq ni buch. Pi chep ney e kabay mornga’agen e falfalaen’ roraed napan nra guyed e ayuw ni yibi taw ngoraed.

Weliy mornga’agen e ngiyal’ nra tawgaed, Mary Hurren e ga’ar, “Lu’ nibe map u owchen fapi mo’on, ma fapi bitir era churu’ gaed ko falfalaen’. Tomuren ni sul e falfalaen’ roraed ngoraed, mi yaed gubin nra garbug gaed nga but’ ngar og niged e magar ngak Got.”

L’agruw e rran nga tomurren, fare ulung ku Willie e thingar milekag gaed ko gin ni th’abi momaw’ ko fare pi’i kanawo’, ni ngar ranoed u Rocky Ridge, u fithik’ e yukoq ko ayis. Tin ni tomur i yaed e danra tawgaed nge mada’ ko 5:00 ko bin ni kakadbul e rran. Ragag nge dalip i yaed e yim’ min k’eyagraed u kanawo’.

Napan e November 7, fare ulung ku Willie e kar chugurgaed nga Salt Lake Valley, machane re kadbul nem, bay dalip e gidii’ ni yim’. L’agruw e rran nga tomuren, fani yib i mada’ fare ulung ku Willie nga Salt Lake, ko gin nin fingichiy raed riy min pinningraed ngalan e nu’un rok’ fapi Saints.

Ko roffen nem, birok Martin e ulung e kiyaed bay ni 325 miles (523 km) nga orel, ni yaed be ul’ul’ ni yaed be gafgow ko garbeb nge ggan ni dakuriy. In e rran e rran nga mm’on riy, miyaed yib ngar thum’ gead nga wuru’ farengi luul’ nu Sweetwater RIver ngay ni kanoeg fithingan e chiney ni Martin’s Cove, ni yaed be athapeg ni ngar pire’eged e ayuw. Me reb fapi pioneer e ga’ar, “Biney e tha’abi gel e momaw’ riy ko thum’ nga wuru’ fare luul’ ko biney e milekag.” Boech e pi gidii’ ney ni yib ngabi pii’ e ayuw—ni woed e thingtuw rog, David Patten Kimball, ni 17 e duw rok, nge pi tafagar rok, “George W. Grant, Allen Huntington, Stephen Taylor, nge Ira Nebeker—nra pired u fithik e gi luul’ ney ni rib gerbeb,” ni yaed be pi’ e ayuw ngak fapi gidii’ ni ngar thum’ gaed nga barba’.

Biney ni bo’or e gidii’ ni manang mornga’agen, nge chag ko tin ni kug fil ni mornga’agen fapi gidii’ nin ayuweg, e kug guy ni yaed gubin ma yaed be leak wo’en fare profet ni yaed be pi’ e ayuw ngak fapi Saints nikar gafgow gaed. Gubin fapi gidii’ nranoed ngar pii’ed e ayuw, e bugi gidii’ ni rib chagnag.

Fil mornga’agraed, e be fil ngog ni bay e tafney roraed ko tin nib manechubog ban’en ni gathi kemus nifan e chiney ban’en. John nge Maria Linford nge pifakrow ni dalip e pagal e yaed mu’un ko fare ulung ku Willie. John e yim’ boech e awa u mm’on ni tay gidii’en e ayuw. Yoeg ngak Maria ni kari falfalaen’ ni kartaw gaed ko fare milekag. “Dabgu thap nga Salt Lake,“ ni ke yoeg, “machane gur nge pi pagael rodow e ra thap, ma dani kalngan’ug ko gubin e pin’en ni kad dared u fithik fa’anra rayog ni nge pilal’ faak dow mar chugliyed e tabinaew rodaed u Zion.”

President James E. Faust e yoeg e tin ba’aray e thin nrib mangil: “U fithik’ e athamgil ni tay fapi pioneer, kad filed e riyul’. Gadaed ni thingari yaen u fithik e nifiy, ma fapi n’en nibay ni dani ga’fan ulan e yafos roraed e rayag ni yira chuweg min tomilang nag e mich rodaed, ta’areb nag min gelnag. Bay e gafgow, mo’owar, nge kirbaen’ nima yib ngak e gidii’ ni gubin, ni kab mu’un e gidii’ ngay nima gay rogon e mat’aw nge rogon e mich. Machane tiney e kabang ni’ir e wo’en ni ngan mada’nag Got.”

U dakean fare Bayul nge fare Bayuliynag, fare Tathapeg e “chuwegey ko yamʼ, ni bachan e ire yog ni chuweg ir ko yamʼ“ nifan ko gidii“ ni gubin. Piʼin nike kalngaenʼ ko pi denen, Ke “fek nga mab sug ko murnguy ngakʼ e gidiiʼ, make sakʼiy nga thilraed e justice.”

Faʼanra dariy fare Bayul, ma dabiyag ni ngad ayuweged daed ko denen nge yamʼ. Woed ni denen e kabang ni rib gaʼfan ko lumel nibe yib ngodaed, ngongol ko togopluw e ma yib u dakean e kireb, melʼeg e tin ni dani matʼaw, kireb nibe rrinʼ e gidiiʼ, nge tin ndabiyag ni ngad thilyegned.

Machibnag fare Gospel Rog ba fil nag: “Napan ni gadaed ra taga’ ko Yesus Kristus nge Bayul Rok’, ma rayag nra ayuwegdaed ko pi mo’owar rodaed, nge gubin mit e m’ar, nge amith. Ma rayag nran suguy daed ko falfalaen’, gapas, nge cham ningan taleg. Gubin ban’en ko yafos e rayog ni ngan fal’eg u dakean fare Bayul rok Yesus Kristus.”

Napan e biney e Easter, sap rodaed e nge par nib sap ngak fare Tathapeg nge fare bayul rok. Fare Bayul e ma pii’ e athap nge tomilang ko ngiyal’ ni woed nib lumor. President Gordon B. Hinckley e yoeg, “Napan nibay nib niguy rogon e fayleng, … [ma] dariy ban’en … ngay nib fel’, fa magik, fa bagel ko biney e murnguy nike rrin’.”

Nggog dalip ban’en nibay rogon ko rran rodaed e dabay.

Bin somm’on, dabda fekyathin gaed ko pi n’en nrayag ni ngad rrin’ed ni ngad pii’ed e ayuw ngak boech e gidii’ ko tin ni yaed be gafgow riy fa tin nib tu’uf roraed nib thothup.

Bin l’agruw, mu fanay fare Bayul rok’ fare Tathapeg. Gadaed gubin ni thingarda daged ma gadaed thamiy e falfalean’ ni ku woed e ngiyal’ nibe yib e gafgow ngodaed. Athap rodaed e ngad pired ni gadaed bay u barba’ fare kanawo’ ko gin nibay e tomilang riy. Kug guy e en ni gamow, i Mary, nike rrin’ e biney ni gubin ngiyal’ ulan e yafos rok. Gube pinning e magar ngak ko falfalaen’ rok, ni demuturug e pi gafgow ni gamow be yean u fithik’.

Bin dalip e mulwol rog e ngad ted bangiyal’ ni ngad tafneyed fare Bayul rok fare Tathapeg. Bo’or kanawo’en nrayag ni ngad rrin’ed e biney. Machane, un ko fare mo’olung ko sakrament nge fek fare sakrament e ribay ni rib ga’fan.

Ni kab ta’ab rogon ngay ko fare yean nga temple ko urngin yay nrayag. Fare temple e rayag ni nge ul’ul’ nge pugorran ngodaed fare Bayul rok fare Tathapeg nge pin’en nrayag ni nge rrin’. Ma, krayag, ni yean nga temple e ra ayuwegdaed ngad ayuweged fapi gidii’ rodaed nikar m’ad fa fapi gidii’ rodaed ni kab kakurom.

President Russell M. Nelson, ko bin tomur e conference, e weliy ere yalen ney me uneg ngay, “fapi tawa’ath ko [Temple] … e be pi’ ba ayuw ngak fapi gidii’ ni yaed e yaedra fal’ag rogon fare fayleng ko fare bin ni Migid e Wub rok Somoel!”

Susun ni dabda pagtalined fapi gafgow ni tay fapi mfen nibay nib mm’on rodaed, machane t’ufeg rodaed, nge adag rodaed, nge liyoer rodaed e susun ni nge par ni fare Tathapeg e bay u luk’ngun nge fare Bayul rok. Gube micheg ni fare kiy ko fare wo’en e tonom rok e Chitamangiy ko falfalaen’ e yib rok’ fare Tathapeg, ni’ir Yesus Kristus. Bay nib fos ma be gagiyeg nag e Galasia rok’. Fare Bayul ku Yesus Kristus e ir kanawo’en nra pagded u kalbus ko pi mo’owar nra yib ngalan e yafos rodaed. U dakean fithngan Yesus Kristus, amen.