“Ma Aram e Urngin e Girdi’ ni Yadra Nang ni Gimed Pi Gachalpeg”
Tu’ufeg rodaed ngak Got nge ngak pi fak e ir reb e mich nrib gel ni be dag ngak e fayleng ni rib riyul’ ni biney e ir fare Galasia rok’ fare Tathapeg.
Boech e duw kafram ma gamow yaen Sister Uchtdorf gu milekag nigew u southern Germany. Gu waruw u mm’on ko Easter, ma gamow pining reb e fagar, ni gathi reb e member ko Galasia, ni nge un ngomow ko mo’olung ko Madnom. Rib tu’uf ere fagar ney romow, ere rib moem ngomow ni nggu filew ngak e tin ni gamow be thamiy ni mornga’agen fare Tathapeg nge fare Galasia rok’ nge pong ni nge yibi guy! Yib ere fagar ney nge un ngomow ko mo’olung ko reb e branch nib chuchugur ngomaed.
Fa’anra kam pining reb e fagar ni nge un ngom ko missa ni’ir e bin somm’on yay, ma bay ni gamanang ko rogon ni kug thamiy ere kadbul nem ko Madnom. Gu ba’adag ni gubin ban’en ma nge yean ni rib fel’ rogon. Fagar romow e be’ ni rib tolang e sukul rok’, ma be’ nib gel e thothup rok’. Karug athapeg ni re mo’olung ney ko biney e branch era dag ngak ere fagar romow ney rogon fani fel’ e Galasia.
Biney e branch e yaed ma mada’ ulan ba singgil ulan e bin ni l’agruw thal ba nu’un ko kantin. Ra ngan yaen ngay, ma thingar gu feked e tatawo’ u tobgul ko fare nu’un, ni yira yean u fithik’ fare gin nib sug boen e falay riy ni rib fel’ boen ulan fare kantin.
Napan ni tabab fare mo’olung ko sakrament, mug lemnag e fagar rog ni irerray e somm’on rok’, ma kuguy ni bay boech ban’en nibe buch nibe karang e stuntun ngog. Woed, e ngiyal’ ni yibe yoen’ e tang, e dani woed lingan fare Tabernacle Choir. Bitir, ni dar miyaw nga butt’ e yibe rung’ag lamraed ulan fare sakrament. Pi’in nike non e kar gayed rogon gelngin nrayag roraed, machane gathi yaed ba salap ko numon u fithik’ e gidii’ ni yo’or. Ngiyal’ fare mo’olung ma gowoed be kireb rogog, ni gube athapeg ni fare Sunday School e fbel’ buchu’uw ko fare sakrament.
Ma dangay.
Kab kakadbul ma yugbe tafney nag ko mang e be tafney nag ere fagar romow ney ko mornga’agen e galasia nikug fekew ngay.
Tomuren, napan ni gamow be drive nga tabinaew, mug chal ni nggu non ngak e fagar romow. Gu ba’adag ni nggu weliy ngak ni biney e branch e rib ba’achichig ma gathi ribe dag gubin fal’ngin e Galasia ni ga’angain. Machane u mm’on niyag ni nggu non, me non.
“Rib mangil fare mo’olung,” nike yoeg.
Dakugnang ko mang e nggog.
Maki ul’ul’, “ke gin owcheg ngay ko rogon nibe ayuweg fapi gidii’ raed ulan e galasia rom. Gara guy nira bagyaed mab thilthil rogon e gin nike yib riy, machane gara nang ni yaed be tu’ufeg raed ni rib fel’ rogon. Irreray rogon nikug tafney nag ni ba’adag Kristus rogon e Galasia rok’ ninge par.”
Ere, gu papay nigeg nggu kalngaen’ ko ngongol ko ogtharan nikug tay. Rigu ba’adag ni ngari fel’ fare mo’olung ni ngeyag ni nge gin owchen e fagar rog ngay. Ma n’en nibay ko biney e branch e fare tu’ufeg nib thothup mab polo’, gol, nge gumaen’, nge murnguy ni rib gel.
Biney e Mich e Bay Nrayag nira Garar u dakean e Fayleng
Pi walageg, pi tafagar rog, rib tu’uf Fare Galasia Ku Yesus Kristus ni Fan ko Gidiiʼen Got ko Tin Tomur e Rran rog. I ir e bin nriyul’ fare Galasia rok’ fare Tathapeg nibay e chiney, ma bay nibe machib nag mornga’agen fare sulyarmen ko fare gospel ku Yesus Kristus. Fare gelngin e priesthood nge mat’won e bay rodaed e chiney. Yesus Kristus e ir e bay ni’i gagiyegnag e Galasia rok, u dakean e tapigpig rok’ nike mel’eg maki pi’ mat’won, ko profet nibay nib fos, nib mu’un President Russell M. Nelson ngay. Fare Tathapeg e ke pii’ ngak fapi Gidii’en Got ko Tin Tomur e Rran ba muruwel ni ngar kunuyead pifak Got miyaed ngongliy rogon e fayleng nifan fare bin L’agruw e Wub rok’ fare Tathapeg. Gube micheg ni gubin e pin’ey e bay nib riyul’.
Machane rib ga’fan ni ngad ted u wun’daed ni n’en nima thamiy e gidii’ nib be’ech ngalan e Galasia rok’ Yesus Kristus, e gathi mornga’agen mat’won e priesthood fa fapi gam’ing fa mornga’agen e mukun rok’ piyu Isreal. N’en nib ga’ ni yaedra guy, ni’ir e bin th’abi ga’fan, e rogon ni yaedra thamiy napan ni yaed bay rodaed nge rogon ni gadaed be ayuwegdaed.
“T’ufeg bigimed ngak bigimed,” nike yoeg Yesus. “Ma aram e urngin e girdi’ ni yad ra nang ni gimed pi gachalpeg.” Baga’, ni bin somm’on e mich ko gidii’ nib be’ech ko mornga’agen Yesus Kristus e ma yib ko rogon e pin’en nike thamiy u fithik’ fapi gachalpen Yesus Kristus.
Fare Tathapeg e ke yoeg nike sulweg yarmen e Galasia rok’ ni ngeyag “ni mich … e garar u dakean e fayelng.” Aramfan, napan nra yib e gidii’ nge un ngodaed ko mo’olung ko Galasia, ma ba’adag fare Tathapeg ni ngar chuw gaed nikar suggaed ko mich Ngak! Fare tu’ufeg nike nira thamiy fapi fagar rodaed era chuchugur nagread ngak Yesus Kristus! Irreray e n’en nrib tu’uf ni ngad rrin’ed ko gubin ngiyal’ nikad mada’gaed.
Pi’in nibe gay rogon ninge ga’nag e mich rok’ ngak Kristus fa chugur nag ir ngak e Chitamangiy nu Tharmiy e susun nira thamiy e gapas ulan Fare Galasia rok’ Yesus Kristus ni fan ko Gidii’en Got ko Tin Tomur e Rran. Pinningraed ngalan e mo’olung rodaed e woed fani moem ni woed rogon ni yibe pinningraed ngalan e tabinaew rodaed.
Rogon ni yibe Tafneynag nge rogon nira Buch
Chiney, kugnang ni gube weliy rogon ni yibe tafney nag. Fin ri’in yay ulan e biney e yafos, e rayag ni nge buch ban’en rodaed ni arogon. Nge fani “mada’ ko ngiyal’ ko fare rran nib polo’” ma ngiyal’ ney e ra’i par nibay thilin ni yibe tafneynag nge rogon nra buch. Ere, mang e susun ni ngad rrin’ed ni fa’anra fare Galasia e dar thamiy e biney? Napan, demuturug rogon, ni fare ward rodaed e dar dag e biney e mich fa tu’ufeg nib polo’? Fa gowoed e dar thamiyed ni dan manged bang ko fare uleng?
Reb e ban’en ni susun nrayag ni ngad rrin’ed e daba talgaed ko gay rogon!
Fare title page ko fare Babyor ku Mormon e mu’un e bin ba’aray nikan tay chiylan ngodaed: “Ere chiney e, fa’anra bay e tagan,” nibe ga’ar, “ma bogi oloboch ko gidii’; ere, dab ni gay thibngin e tirok’ Got.”
Rayag ni baka babyor—fa galasia fa be’—e bay “thibngin” fa “tagan” maki ul’ul’ nge mang bang ko muruwel rok’ Got?
Fulweg rog e, ri arrogon!
Ere, gayed roogn ni ngiyal’ ni gaded be rrin’ e muruwel rok’ Somoel, athamgil gaed nga’i guman’daed ngogdaed. Ra bagdaed ma be gay rogon nrayag rok’, ma gadaed gubin ni gadaed be taga’ ngak fare Tathapeg ninge ayuwegdaed. Biney e bay nib riyul’ nifan ngodaed, ma kubay nib riyul’ nifan gul’il’ungun Got u fayleng.
Somoel e ke pinningdaed ni gathi kemus ni ngan un ko gul’il’ungun machane ngan un i toey rogon. Got ni tafney nag bugi gidii’ ni “ta’areb gumircha’en nge lanin’uy.” Ra nge ta’areb gum’ircha’ey, ma thingari polo’ gum’ircha’endad, ni biney e rib tu’uf ni nge thil gum’ircha’ey nib gel.
Machane biney e dar yipfan ni nge thil gum’ircha’eg ni nge ta’ab rogon ko boech e gidii’. Fa nge thil gum’ircha’em ni nge woed gag. Be yipfan ni ngad thilyeged gum’ircha’endaed nge ta’areb rogon ngak fare Tathapeg.
Fa’anra dawda tawgaed ngaram, mutay u wun’um: un e ayuw rok’ Somoel, e woed ni dariy ban’en ni dabiyag rogon rodaed.
Mang Bang riy nge Mu’un Ngay
Fa’anra gabe thamiy ni damur mang bang riy fa mu’un ngay, wenig munang ni gathi yigogur. Gathi gadaed gubin nike buch e biney rodaed ni gadaed be thamiy nikemus ni yigogadaed rodaed ulan fare singgil? Ke buch e biney rog ni gathi ta’abiyay. Napan ni 11 e duw rog, gathon e tabinaew rog e ni tulufmad ni nggu chuwgaed u tabinaew romaed nggu wared nga biyang nib thil. Gubin ban’en ko giney e ba thil ko gin ni ug moey riy somm’on. Ma rib magagiyel ni rogon lingan e thin rog e ba thil rogon ko tinem e bitir ko rogon ni yaed ma noen. Boechingiyal’ ni kari tu’uf reb e fagar ngog fa bang ni nggu mang bang riy, ku thamiy e kirbaen’ nge yigogag rog.
U roey u fayleng, tin ni gadaed ma guy nib thilthil—woed e ulung nag e gidii’ nib thilthil—e be buch ni bachan: rogon ya’araed nib thil, gin nikan gargelegraed riy, thin roraed, maad roraed, yalen roraed, nge ku boech ban’en. Machane “Got e darma turguy ban’en nrogon nma turguy e girdi’ ban’en. Girdi’ e yad ma guy be’ u wuru’ i downgin, mi Gag e gu ma changar ko gum’ircha’.”
Ya rogon nima sap ngay, ya bay bathal ni’ir e bay nga m’on ko boech ni’ir fare: bitir rok’ Got. Ni gadaed gubin ma gadaed bang riy.
Moem ni ngan par u fithik’ e gidii’ ni woed nib chuchugur ya’adaed, fa numan rodaed nib chuchugur rogon, fa leam ni woed rogdaed. Bay bang nifan e biney.
Machane ulan e Galasia rok’ fare Tathapeg, gadaed ma kunuy pifak Got nga ta’abang ni yaed be gay e tin ni riyul’. Gathi rogon ya’adaed, fa rogon e leam rodaed ko tin nifan e am, fa yalen rodaed, fa gin ni kad bad riy e be fekdaed nga ta’abang. Gathi gin nikad bad riy ni ta’abrogon e ir e be kunuydaed nga ta’abang. Bachan e gak rodaed nga ta’abang, tu’ufeg rodaed ngak Got nge buguliyiror rodaed, nge michmich rodaed nga Yesus Kristus nge fare gospel rok’ nikan fulweg yarmen. Gadaed e “michaen’dad ngak’ Kristus.”
Mukun ni gadaed be gay e gathi gubin e gidii’ mange sak’iy nga ta’abangiban’en; machane gubin e gidii’ mange sap nga ta’abangiban’en—ngak Yesus Kristus. Gathi bachan e gin ni’ud moeyed riy machane ko gin ni gadaed be sor ngay, ni gathi bachan rogon ni’ud moeyed machane ko rogon ni ngad manged.
Irreray fan mornga’agen e Galasia rok’ Kristus nib riyul’.
Ta’areb e Dogur
Fa’anra ba tu’uf Got rom, fa’anra gaba’dag ni ngam nang mornga’agen maga leak fare Fak, ma arram nigab mu’un ngay. Fa’an gara gay rogon ni ngam ayuweg fapi motochiyel rok’ fare Tathapeg—dariyfan ni gathi gubin ngiyal’ ma gab polo’—ma arram ni gur e gam mang bang riy ko Fare Galasia rok Yesus Kristus ni fan ko gidii’en ko Tin Tomur e Rran.
Ma fa’anra bay ni gur e gab thil ko pi’in nibay u to’obem? Biney e dar yipfan ni demoy ko bang e giney—be yipfan ni rayag ni ngam mang bang e dogur rok’ Kristus. Gubin mab tu’uf ko fare dogur rok’ Kristus. Teley e rayag ni nge rung’ag bugi ban’en ndabiyag ni nge guy owchey. Tuguni ey e rayag ni nge rrin’ bugi ban’en ndabiyag ko pa’ay ni nge rrin’.
Biney e gathi be yipfan ni ngam thilyeg e gidii’ ni ngar boeded gur. Machane biney e be yipfan nibay ban’en nrayag ni ngam un ngay ko ayuw—ma kube yipfan nibay ban’en nrayag ni ngam fil rogon.
Ta’areb Lamraed
Gubin e general conference, kan tawa’ath nagdaed ko tang nibe yib ko fapi choir ni yaed ba salap ko tang. Garam motoyil nib fel’ rogon ma gara rung’ag ni gathi gubin fapi gidii’en e tang ni yaed be yoen’ e tang u ta’abang. Boechingiyal’ ma bay reb e ulung nibe yoen’ bang riy, nge reb. Machane u ta’abang ma rib fel’ lingan, ma rib ta’areb lamraed. Gubin fapi choir ma bay e muruwel roraed nib ta’abang rogon: ni ngar oged e magar ngak Got min chubiy gum’ircha’endaed ngalang nge yib Ngak. Ra bagyaed ma thingari tay laniyaen’ nge gum’ircha’en ko fan e biney. Ma napan ni yaedra rrin’ ni aray rogon, ma gowoed ni rib ta’areb lamraed.
Fa’anra gathi gur reb e member ko Fare Galasia rok Yesus Kristus ni Fan ko Gidii’en Got ko Tin Tomur e Rran, gamaed be piningem ni ngam un ngomaed ko falfalaen’ ngak fare Tathapeg “tang ko tu’ufeg nge bayul.” Gamed ba t’uf romaed. Ga ba adag med. Galasia era fal’ rogon ko ayuw ni gamedra pigpig riy nagk Somoel nge pifak.
Fa’anra kam mu’ i dag rogon, u dakean e tawfe, m’ag nikam ngongliy ngak Got, ni gimed baʼadag ni ngam “baed ko ulung rokʼ Got, ma noeg ni gimed e gidiiʼ rokʼ, kamagar gaed ko ayuw romed nifan e biney e muruwel ni rib ga’fan ma rib thothup nge fal’ag rogon fare Galasia rok’ Yesus Kristus ko rogon ni ba’adag fare Tathapeg.
Woed rogon nikug fil ko fare fagar rog u Germnay, tu’ufeg rodaed ngak Got nge ngak pifak e ir reb e mich nrib gel nibe dag ngak e fayleng ni rib riyul’ ni biney e ir fare Galasia rok’ fare Tathapeg.
Falaen’ Got ngodaed me ayuwegdaed nga’i gamaen’daed ni gadaed be ul’ul’ i gay rogon ni ngad boded fare Tathapeg, Tabayul, nge Masta nike pii’ ngodaed—ni ngeyag ni gubin e gidii’ me nang ni gadaed e pi gachalpen. U dakean fithngan Yesus Kristus nib thothup, amen.