Ngiyal’ ni Sulyarmen ko Gubin Pi’nen

Fare yarmiy ni tay Fare Galasia ku Yesus Kristus ni fan ko Gidii’en Got ko Tin Tomur e Rran e ke yib u tomuren e tin ni buch nib ga’ fan mab fel’. Bin somm’on ni buch e ke 10 ea duw ko faram u New York.

Nap’an e spring ko 1820, ma ba pagael ni fithingan Joseph Smith e yaen ni nga fithik e paen nib chugur ko tabinaw rok’ nifan ni nge meybil. Bay e duwer rok’ ni mornga’agen e thapeg ko ya’el rok’, mari ba’adag ni “nge nang ko bin bu’uw ko gubin [fapi galasia] e ba mat’aw, ni fan [ni nge] nang ko bin bu’uw ni nge ’un riy.” Joseph e ke pagaen’ Got ni nge fulweg e meybil rok’ nge powiy ir.

Wenig ni ngam ngaged ni meybil Joseph Smith ni gathi kemus ni nge nang e tin riyul’. Machane, ke meybil ni nge nang tin riyul’ ni fan ni nge rrin’ e tin mat’aw. Joseph i fith u fithik’ e mich ma ke dugiliy ni nge rin rogon e fulweg ni kan pii’ ngak’.

“Be [fulweg taban] e meybil nib [thothup] rok, Got ni Chitamangiy nge fare Fak, Yesus Kristus, e yibi m’ug ngak Joseph min ndag ngak ’urngin ban’en riy nge be’echnag’ (Acts 3:21) ni woed rogon nikan noeg ulan fare Bible. Ko biney e yi’iy, kad filed ni tomuren e yam’ ni tay fa tin nsomm’on e Apostles, Galasia rok Kristus nib be’ech e mathmit u fayleng.” Ba ga’ fan e Joseph Smith ni nge sulyarmen biyay fare machib, fare mat’awon, nge fapi m’ag nge gam’in ko fare Galasia ko fare Tathapeg.

Me yog Joseph ni ga’ar: “Mug guy L’agruw Ni’, nibe gal rama’enrow ma dariy’ thibngirow u ban’en, yow be sak’iy ngalang rog u daken e nifeng. Me non bagyow ngog, nike yip’ pa’ ngak bagyow, —Ireray Fakag nib T’uf rog. Motoyil Ngak!”

U dakean biney e yi’iy nge ku boech, me nang fan Joseph Smith ni Got nge Yesus Kristus e Yow ma nang ir ni ir rok’, ma thapeg rok’ e ba t’uf rorow, ma bay rorow e muruwel ni fan ngak’ ni nge rin’. Ma ki fil e tin nib ga’ fan ni mornga’agen rogon, nge tin nib flont ku fapicha’ ni muruwl ku Got—ma ku mornga’agen ni fare Chitimangiy nge fare Fak e Yow ma par ni l’agruw. Yesus Kristus i’Ir e Fak Got ni Fak ko ya’el nge Fak ko downgin Got.

Joseph Smith e ke machib nib riyul’ ni bay e downgin ku Yesus Kristus nge Chitimangiy nu Tharmiy. Ke ga’ar, “Bay e dowef fare Chitimangiy ni bay e yalach nge yil nib tabrogon e gidii’; ma ku arogon ko fare Fak; machane yu amrogon ko fare Kan Thothup ni dariy e dowef riy ko yalach nge yil, machane i’Ir bee’ nib Ya’el.”

Gube michmicheg ni fare yib ni tay fare Chitimangiy nge fare Fak ni ra m’ug gow ngak’ Yosef Smith e ke buch ni binem ea tabab fare “sulyarmen ko gubin ni kanoeg ni yib ko lingan gubin fapi profet ni yib iyaen ko tabolgnin e fayleng.”

Bin L’agrow ni buch nib fel’ ni ke yib nag fare sulyarmen nib mat’aw ko fare Galasia ku fare Tathapeg ni kan sulyarmen e fa ngiyal’ ni kan pilyeg thin ko fare Babiyor ku Mormon ni nge pii’ ko bo’or.

Ma kagmaed be micheg ni Joseph Smith e ni pii’ ngak fare tawa’ath nge fare gelngin ni yib rok Got ninge pilyeg fapi chep ni kakrom: fare Babyor ku Mormon—Kureb e M’ag Rok’ Yesus Kristus. … Biney e babyor e bay mornga’agen e michib rok Yesus Kristus riy ngak e gidii’ ko nam nu Mariken u tomuren ni Foskoyam’. [Fare Babyor ku Mormon] e be weliy fan e biney e yafos nge rogon e yalen rok Kristus, ni’ir e bay u lukungun e pin’ey nib ga’fan. Ni’ir e bchagil nga ta’abang ko fare Bible, fare Babyor ku Mormon e micheg ni gubin e gidii’ ma fak e Chitamangiy nibay u Tharmiy, nibay nike ngongliy ba tonom nifan ngodaed, ma fare Fak, Yesus Kristus, e kama non e daba’ ni woed ni kakrom.”

Ni gadaed e chongin e Galasia ku Fare Tathapeg ni kan sulyarmin, ma “Ba mich u wanʼmad ni Bible ni kan pilyeg ni ba matʼaw e thin rokʼ Gotma kub mich u wanʼmad ni Babiyor ku Mormon e be thin rokʼ Got.” Fare Babyor ku Mormon e kureb e mʼag ku Yesus Kristus, me micheg nib riyulʼ fare Baybal, me machib nag e tin riyulʼ nib matʼaw rogon mab felʼ ni ke palog ko fare Baybal.

Fare Galasia ku Yesus Kristus ni fan ko Gidiiʼen Got ko Tin Tomur e Rran e ma machib ni kan palog nag ko fare Fayleng fare Galasia nib Kakrom ni ke yarmiy fare Tathapeg, ni bay riy e matʼawon, machib, mʼag nge gamʼing. Ni ba yang ko fare sulyarmen ni kan machib morngaʼagen ko fapi rran nib tomur, ma profet nib kakrom nge apostols e kar piiʼed fare matawʼon ko fare priesthood nga dakean Yosef Smith mar piiʼed e kiys ko fare priesthood ngak. Biney e bin dalip e nʼen ni buch ni ke yib nag fare yarmin ko fare Galasia ku fare Tathapeg ni kan sulyarmen.

Ma pag mat’awon ko fare priesthood ni gachalpen Got e yad ra “be yip’ fan [Ir] nge rrin’ed e pi’nen udakaen fithingan.” “Kiys ko Priesthood e matʼwon ni nge powiy rogon ni ngan use nag fare priesthood ni fan ko fapi bitir ku Got.”

Ni powi’iy ko fare Chitamangiy nge fare Fak, fare John nima Tawfe ni foskoyam’ e sulweg, u 1829, yarmen fare tawfe ko ran ninge chuweg e denen. U ta’ab rogon e duw, Dalip nii’ ko fapi ragag nge la’agruwi Apostle—Peter, James, and John—e sulweg yarmen wo’en e apostle nge boech fapi kiy ko gelngin e priesthood.

Ke yaen nel i duw u tomurean ni kan yarmiy fare Galasia, u lan fare Temple nu Kirtland, ma Moses, Elias, nge Elijah e kar piiʼed fare mataʼwon nib tʼuf ni ngan ngongoliy e muruwel ku Got u lan e tin tomuer e rran.

Moses e yibi pii’ fapi kiy nifan e kunuy rok’ pi u Isreal.

Ke pii’ Elias fare gospel ku Abraham, ni bay riy fare sulyarmen ko fare m’ag ko Abraham.

Ke pii’ Elijah fapi kiy ko gelngin ni ngan m’ag nag, ni ma pii’ fare mataw’on ni ngan ngongoliy e gam’ing u dakean e fayleng ma ra buch ni tabrogon ni manechubog, ni boed rogon e nge uneg chongin e tabinaw nga ta’abang u lan e tha’ nib manechubog ni dabi mi’id u tomuren e yam’.

Nap’an Joseph Smith e ke pilyeg e thin ko fare Babyor ku Mormon, ma kan pii’ ngak’ e thogthog ni be yoeg ni bayni sulyarmen fare Galasia ku Yesus Kristus. Machane yoeg Somoel ngak Joseph ni dabi yarmiy e Galasia Rok’ nib. Machane, “u dakean fare tawa’ath ko yi’iy nge thogthog,” ma Somoel e ke dag ngak’ Joseph “fare rran … [ni] thingari yarmiy Galasia Rok’ [biyay,] u dakean e fayleng.”

Fare Galasia e kan yarmiy ni mat’aw rogon ni kemus u tomuren ni kan sulweg fare preisthood ma kan yoloey fare Babyor ku Mormon. Tin Somm’on e Babyor ku Mormon e kan pii’ ko March 26, 1830, ma fare Galasia e kan yarmiy ko April 6.

“Fare Galasia ku Yesus Kristus ni Fan ko Gidii’en Got ko Tin Tomur e Rran … e ir fare Galasia ko fare Tathapeg. Biney e Galasia e kan yuluy nag nib fel’ rogon nibay e en nib ga’ riy, ni’ir Yesus Kristus, nge fare Bayul Rok nge fare Foskoyam’ ni tay. Yesus Kristus e ke yarmiy biyay fapi Apostles rok ma ke pii’ ngoraed gelngin e priesthood. Me piningdaed ni gubin ningaed bad Ngak nge Galasia Rok, ningan thapeg e Kan ni Thothup, nge fapi gam’ing ko thap, nge falfalaen’ ni manemus.”

Fare m’ug ni tay fare Chitimangiy nge fare Fak ni kar m’ug gow ku Joseph Smith, nge fare pilyeg thin ko fare Babyor ku Mormon, nge fare sulyarmen ni tay fare mata’won nge fapi kiy ko fare priesthood e tinem e gubin nib th’abi ga’ fan ni fan ni ngan yarmiy fare Galasia ku fare Somoel ni kan sul yarmin ni ke yan 195 e duw kafaram ko daba’.

U lan fare M’ag nib Kakrom, ma pilyeg Daniel ba likay ni mornga’agen ba malang ni yira ker ko burey ni dariy e pa’ ma bayi sug gubin yang u dakean e fayleng. Ke yan ta’areb e duw u tomuren ni yarmiy fare Galasia, ma fare Somoel e ke yoeg ngak’ ni fapi kiy ko fare gililungun ku Got “e kan pii’ ko gidii’ nga daken e fayleng” ma fare “gospel [ku Yesus Kristus e ra] yan nga wan nga gubin yang u fayleng, ni woed rogon fare malang ni kan ker ko fare burey ni dariy e pa’.”

Gube micheg: Be mugu’uliy Somoel e michmich Rok’. Fare Galasia ku fare Tathapeg ni kan sulyarmin e yibe fal’eg u gubin yang u fayleng ma ba talin ni Got ra ngongoliy ni fan ni nge “kunuy gubin u ta’abang ku Kristus, ni yow l’agrow e bay u tharmiy, nge bay u daken e fayleng; ku arrogon ngak’.”

Fare muruwl ku Somoel ko tin tomur e rran, “e muruwel nib ga’ fan ko fapi gidii’ ku Got ko gubin e mfen; binem e ban’en ni fapi profet, fapi priest nge fapi pilung e kar pired nib falflaen; kar sap gaed nga tomur nib falflaen ko fare rrn ni gamaed ma paer; ma be yik ko falfalaen nu tharmiy ni kar tang gaed kar yoloeyed ko biney ni rran rodaed. ”

U lane biney e mfen nib tomur mab ga’, “ba m’ag nib polo’ mab flont, ma ba m’ag u ta’abang ko mfen, nge pi kiy, nge gelngiy, nge gililungun ni bay riy, ma bay ni yi’iy nag ni tabab ko fapi rran ko Adam nge yani mada’ ko biney e rran. Ma gathi kemus ni biney, machane tinem ni daworni yi’iy nag u tomuren ni kan sunmiy fare fayleng … ma bay ni yi’iy nag … u lane biney, fare mfen ni bay gubin riy.”

Ke weliy fare Profet i Joseph, “Gubin e gam’ing nge muruwel nib t’uf ko fare Priesthood, u rogon e thin nge motochiyel ko fare Gubinfen u lan urngin fapi mfen, ma bay ni thapeg u lan e bin tomur e mfen, … ni ra yib nag fare sulyarmin ni weliy fare lungun gubin fapi Profet nib Thothup.”

Kug guy rogon ni nggu weliy pi thin nib th’abi ga’ fan ko fare “Mulwol nib Fel” nib moem ni ngan nang fan ni gubin e gidii’ u gubin yang u fayleng e rayog ni nge thapeg—ni fare mulwol ni fare Somoel i Yesus Krisus e ke sulweg e gospel nge galasia Rok’ ko tin tomur e rran.

Gu be pining ngak gubin e gidii’ ni ngar filed ngar sikeng niged biney e mulwol. Gu be micheg ni gubin’ e gidii “pi gidii’ nira meybil me fil mornga’agen fapi mulwol ko fare Sulyarmen me rrin’ ni woed rogon fare mich e ran tawa’ath nagraed ni ngeyag ngoraed e biroraed e mich mafan e biney e nge fal’agin rogon fare fayleng ko fare bin Migid e Wub ni micheg fare Somoel nge fare Tathapeg, Yesus Kristus.” Nap’an ni ngam meybil ni fan ni ngam thapeg ngam ngongoliy e fulweg ku Got, ni boed rogon e Yosef Smith, ma ra ga’ gelingin ni ngam nang fan ngam ngongoliy e mich nu tharmiy nem.

Gube pi e mich rog ni Got, fare Chitimangiy ni Gubinfen, ir e Chitmangdad. Gu be micheg ni Yesus Kistus e Fak Chitimangiy nib T’uf Rok’ nge Kemus ni Ke Gargaleg. I Ir e Tabiyul rodaed nge Tathapegdad.

Nge gu be micheg ni Chitamangiy nge fare fak era mʼug gow ngak fare pagal Joseph Smith, ni irerram rogon me tabab biyay fare gospel rokʼ fare Tathapeg ko tin tomur e rran. Fare Babyor ku Mormon e kureb e m’ag ko Yesus Kristus ma bay riy’ fapi thin ku Got. Rayog ni ngan pireg u dakean e fayleng mata’awon ko fare priesthood nge mata’awon ni ngan ngongoliy Fithingan. Ma Fare Galasia ku Yesus Kristus ni Fan ko Gidii’en Got ko Tin Tomur e Rran e fare Galasia rok Kristus nib Be’ech nike sulyarmen. Gube pii’ e m’ag rog nib riyul’ gubin e pi thin ney u dakan fithngan fithingan fare Somoel nib Thothup Yesus Kristus, amen.