Ba’adag e Yafos

Ke ul’ul: “Kug thapeg bo’or e adag nge ayuw rorad e tabinaw ko ward. Ireray nib bo’or. Bisof [rog] nge president ko Young Women e kar digew ko urngin e t’ufeg nge adag rorow ko girdi’. … Kug guy e pa’ Somoel …nike powi’iy nigeg nge tabinaw rog. … E ward woed e ward rog ireray e tabinaw gubin e bee’ ni ba t’uf, ni rib ga’fan e ppin nib yangren ulan e banen woed nigeg.”

Ir nge tabinaw rok nge tabinaw ko ward kar manged a falfalaen’ gad napan nike gargelen e bitir ni mo’on u February.

President Russell M. Nelson ni ke yoeg, “Galasia rok Somoel e gubin ngiyal’ mab yiram … dugliy ko mini’ e nge pigpig ngak reb fapi bitir rok Got … [pii’ e ayuw u fithik’ e murnguy nib sumunguy] ngak ta’areb e bee’, woed ni Ke rrin’.”

Napan e ppin ni dariy’ e mo’on ba fil nike diyaen, gafgow ko dowef, cham ko ya’el, taamara’, magaafaen’ ko salpiy, duwer, de nang mornga’agen e mabgol, nge kirbaen’ bachane ke chuw e tin nib ba’adag e rayog, ulanngin e ngiyal’ ko amiith nge balyangan’, nira powi’iy e ppin nga wo’en nibay e amiith nib gaa’ nge gafgow.

Pich’an ni yadbe matal e chiney ni’ur thamiyed e amith makar kalngan’gad ni k’ur buchbuch niged e bitir u yol, wenig mu tay u wum’um: Dabi thilyeg e pi’nen ni ke buch, Got e rayog ni nge golnag e pi’nen ni ke buch. N’aagfan rayog ni nge yib ufithik’ e ma’ang’ang ko bayul ni wurengaen’ napan ni ngam chel Ngak udakaen e gum’ircha’en nib sobut’aen’ nge kalngan’uy.

La’agruw e thin ni ba tayfan ngak e fasgad u feyleng: yafos nge mel’eg. Yafos rodad e yang nib gaa’fan nifan e wo’en nib polo’ rok’ e Chitimangiy, nge udakaen e thin Rok’ gada ba’adag nge thapeged e yafos; nge gadad ma damiiteeg e yafos; nge gadad ma mel’eg e yafos thingari yul’yul’ tomuren be tabab. Me gadad ba’adagdad e tawa’ath ko mel’eg, nge ayuw gelnag e mel’eg—nib mat’aw ni Got ba’adag ni thapeg e falfalaen’ nib manemus.

Napan e ppin nge mo’on ni ni bay e mel’eg nib mo’omaw rorow, thin romad, pa’ romad, gumircha’mad—nifan e tin ko ya’el, ganop, nge ko salpiy—ra yebliy nag ni yow ra thameyew e t’uf rok’ Tathapeg, ni President Henry B. Eyring nike yoeg, bay yib e gel nag e owch rad nib thothup ko “e pi’nen ni yad be guyed” nga “pi’nen ni dabiyog ni ngar guyed.”

President Dallin H. Oaks nike yoeg: “Thamey rodad mornga’agen e lii’ e bitir de buch udakaen e ganop ko e ngiyal’ nira tabab e yafos. … Me buch udakaen e ganop ni … gubin e bitir ku Got nib ya’el thingari yib nga feyleng neyni fan ko e fan nib fel’ngin, nge cha’nem nike fas umon ni ke diyean nag nge nira buch ni manechubog.”

Thin rok Somoel mornga’agen e bitir ni dabi gargelen, nike pii’ u fithik’ bin Somm’on e Presidency nge Ulung ko fare Ragag nge L’agruw pi Apostle, de thilyeg nge ma ta’abrogon nag e pi profet ni kakrom, me pi nanged fan ko mang fare Somoel ni ke fith nagdad.

“Fare Galasia ku Yesus Kristus ni fan ko Gidii’ ko Tin Tomur e Rran ya mich u wunraed e yafos ir e thothup. Ere, fare Galasia e dabun e mili’ bitir ndemuturug ko fan ngom fa fan e gidii’ ni yo’or, ma kan mulwol nag ko gidii’en e galasia ni dabra uned ko biney, e ngongol, fa ni fanay, fa ni pi’ pilwon, fan li’ e bitir.

“Fare [Somoel] nira thilyeg biney … napan:

• Rape nag be’ me gargel, fa denen ulan e tabinaw, fa

• Fa ke yog e togta ni yafos ko fare mitin e bani ni nge yim’, fa

• Ke yog e togta ni fare tir ulan e yin e bay e m’ar rok ni rib alamrin ma dabyag ni nge fos ko ngiyal’ ni ngan gargel nag.”

Me yul’yul’ Bin Somm’on e Presidency: “Mili’ bitir e thabi ga’ e pi’nen nib ubchiya’. [Me ulan e pi’nen ni de buch yo’or yay] thingari lemnag bin’ey kemus tomuren e bee’ thingari mel’eg biney ni ke thapeg e fulweg ko meybil rok’” nge non ngak boch reb e gidii’.

Guyey e duw faram, fare profet rok Somoel nike yoeg e wureg e thin ngak e feylang. Binem ni tay e bu’un e thin ney:

“Gamad … be yog e re bbugi thin ney ni Got e ke motochiyel nag ni fapi gelingin ni yima sunumiy e bitir riy nib thothup e karimus nra buch u thilin e pumoʼon nge bpin, rogon e motochiyel ko mabgol ni wod e figirngiy nge leʼngiy.

“Gamaed be yoeg e rogon ni ngad sunmiy e yafos u fayleng ir thothup. Gamaed be micheg ni ngan paer ni yib be’ech ko biney e yafos e irr e ba’ag fan ko tonom rok’ Got.”

Machathowol nge damiiteeg e yafos umon nira gargelen ir gathi e lem nag ko politics. Ireray e motochiyl ko yafos ni ke yog Somoel udakaen e pi profet Rok’.

E milwol ko President J. Reuben Clark Jr., ni ke pigpig ulan Bin Somm’on e Presidency, nike weliy nib fel’ rogon mornga’agen e pi’in nib yangren daba’: “Fapi gidii’ nib fel’ yangren niba balig nag nifan e tin ko Ya’el, yad ba’adag ni ngar fil’ed e gospel, nge yad ba’adag gubin, ndar ngochngoch binem. Yad ba’adag ni ngar nanged mornga’agen … e tafney rodad; yad ba’adag ni ngar thapeged e mich nifan e tin riyul’. Yad ma … fith ngak, e gidii niba dap ko tin riyul.” Gadad gubin bat’uf ni ngad non’ed u fithik e mich nge wurengaen’ ulan e pi’in nib yangren, ulan a na’un rodad, nge u gadad gubin, nge ulan e mu’ulung ko Relief Society nge elders quorum mornga’agen e motochiyl rok’ Somoel ko falan e dowef, e gaa’fan ko yafos, nge ayuw ngak e bitir dawo’ ni nge gargelen nge pi chitinin.

E ppin nike yol ngog mornga’agen e pi’nen ni ke buch ngak ni kafram: “Napan nib 17-e-duw-rog … , mug pat ngay nigub diyean ma dariy buchuw e ayuw ko pumo’on rog. Kug tamra’ nge yigo gag [machane dabgu] lemnag mornga’agen [e lii e bitir]. … Bay [e] tabinaw rog nib t’uf rog nge bisof rog, ni kug mada’ ngak bo’or nifan e fonow. … Kug chel ngak Got. Kug bi’eg fare scriptures … nge meybil [nge] pir’eg e gelngin udakaen e Tathapeg rog nge wo’en ko kalngan’uy. … Kug thapeg e fulweg [nifan e meybil rog] ni dabgu fek e yathin. … Me pii’ kirbaen’ u gum’ircha’eg, machane kug nang thingari poef nag e fakag nib ppin. … Kug meybil nifan e athamgil [nge] kug thamey e murunguy rok’ Got nib gel ufithik’ e kalngan’uy, guma nang ni Got … me fulweg e meybil nge gelnagdad.”

E pum’on nge ppin ni poef nag e bitir nib ppin, nge machib nag e gopel ngak. Daba’ ni ke mabgol nge bay e tabinaw rok’.

Bay ngiyal, ra yib e dannang nib mo’maaw napan ni ra dammiitteg e yafos.

Ma fagilicha’ ni’ur yol gow ngomow Kathy ko mornga’agen e bitir ni bay ii yib ngorow.

Fare chitimang nike yoloy: “[Napan e ppin rog] nike diyaen naag tomruen ragag e pi wiik kug filew e bitir rogmow ni bay e m’ar ni trisomy 21, nibe kanoeg Down syndrome. Kug thamey e gelngin … ngak fapi doctor ni nggu lemnag mornga’agen e lii’ e bitir. Ya tomuren la’agruw e wiik kug filew … e bitir ney ni dab gargelen … bat’uf bochi e pi surgery ulan bin somm’on e yafos rok. Ufithik e ngiyal ney kug meybil nib ga’ nifan e a ayuw nib thothup … Kug thamew e gapas ni ke pii’ ngodad fare Ya’el. Kug thapegew e yi’iy nge nangfan ni e bitir nib ppin romow ni’ir e bitir ni fel’ mangil rok Chitamangiy nu tharmiy nge ba’adag nib gel ni nge un e tabinaw rog nge yib nga feyleng.”

Fare chitining ko tir nike yoloy: “[Gamow] ni kar gin, me kar balyangmow, nge me gafgow nag ngomow bachane e ganop ney. … Napan ni kuug diyaen naag tomruen 14 e pi wiik, kug filew e bitir rogmow ni bay bochi e pi m’ar ko gum’ircha’en, nge ta’areb e rayog ni nge lii’en. Kug mada’ bo’or e pi toogtaa nge reb e bee’ ni cheag ko 10 mada ko 18 pi wiik ko diyean. … Ulan gubin e mu’ulung, yad ma fith ngomow fa’an gube adag ni nggu yul’yul’ e diyean ney fa lii’ e bitir. … Fare Tathapeg nike gol nag e gum’ircha’eg nge pi ngog e gapas nge burburteal mornga’agen e bitir nib ppin romow. … [Chitamangiy nu Tharmiy] nike dag ngog bayay ngo babay ni bay e wo’en nib fmachalbog nifan ngog [nge] gube pagaen’ Ngak.”

Yad ba falfalan’ row ni bay e bitir nib ppin rorow ta’areb e wiik kafram. Ir e mang ngorad maka’ir e mang ngak ko manemus.

Mich nib gel nge ba fel’ athamgil e yow ir e pow rok e gachelpen ku Yesus Kristus.

Ufithik’e pi duw, Kug mada’ nag e pi mo’on nge ppin ni kar guyed rogon me sul nga wo’en ko michmicheg nge pi tawa’ath ko priesthood nge temple tomur bo’or e pi duw kar chuw e membership rorad.

Ulan ta’areb e ngiyal’, bat’uf ni nggu interview nag e pumo’on nifan e Bin Somm’on e Presidency ere rayog ni nge fulweg e tawa’ath ko priesthood nge temple ngak.

Tomuren e mabgol rok ulan e temple nib thothup, nge tomuren nike fakew dalip e bitir nib fel’ rogon, e pumo’on ni dani yul’yul’ ko mabgol nge ppin rok nge pi micheg nib thothup. Fare ppin ni de mabgol ni ke diyean naag nge ke ba’adag ni nge lii’ e bitir.

Ppin rok’ nib mangil e wenig nag e ppin ney ni nge fak e bitir nge nike micheg ir ra tugul e bitir napan ni ke gargelen, ni woed ir e bitir rok’.

Ppin ney ni de mabgol nike lemnag nge yoeg ni dabi taleg e diyean.

Nike buch 10 e duw. Fare Ppin ney nib sobut’aen nibe paer nga p’oewcheg nike t’ufen e pagan ni woed reb e bitir rok nge weliy ngog marunga’agen e ngongol rok e figirngiy ni nge fulweg e oloboch nge irma t’ufen nge ayuwegen nge tabinaw. Fare chitimagiy ni’i yoer napan ni non bppin.

Urogon e ppin rok’ got nib fel’ e rayog ni nge thapeg e bitir ni woed e bitir rok bachane ir ma puguran ngak e ngiyal’ e pumo’on dani yul’yul’ ko mabgol Uw rogon? Bachane ni ke thapeg e gelngin udakaen Yesus Kristus nge bay mich rok’ nifan e yafos nib thothup, e yafos nib thothup. Irma nang e bitir ni dabi gargelen ir e fak Got, ni dariy tapgin nge nib machalbog.

Pi walageg nib tu’uf rog, ni achigchig nag e t’uf nifan e bitir dawo’ ni ngar gargelengad ulangab e feyleng ir gathi mangil. Got ma ba’adag e yafos. Ireray e muruwel’ rok’ nge fel’ngin Rok’ ni nge mugu’uliy e fas ko yam’ nge yafas nib manemus ni fa’an e gidii’. Gadad ni pigachalpen Yesus Kristus, thingarda ba’adag e yafos. “Fa’anra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” Gube athap ni ngad pii’ed e t’ufeg ngak e gidii’ ni bat’uf nib gaa’. Gube pii’ e tu’ufeg rog ngomed nge tu’ufen Chitamangdad nu tharmiy ni fan e bitir rok’ ni ra yib nga feyleng. U dakean fithngan Yesus Kristus, amen.