Ma Gadaed ma Non ni Morngaʼagen Kristus

Tomuren reb e muruwel nib palog, I gag nge le’engig, Lesa, e gubow ngalan reb e terminal ko airport ni nggu changag gow ko luk’ngun e nap—ngareb e rran—u mm’on ni nggu taw gow nga tabinaew. Napan ni gamow ba sak’iy ni gamaed be yean ko fare pa’i line ni rib n’uw, ma rayag ni nggu thamiyew e gidii’ ni be magarnag ni dabi taw ko gin nibay e skuki rok’ riy, gin ni yima guy mornga’agen e passport nge visa riy, nge security check.

Napan nigu taw gow ko gin nibay reb fapi custom officer riy ma gowoed e ni dar thamiy e gurgur fa murus nibe tay e gidii’ ulan fare singgil. Ma gowoed ni ba mashin, ni dani sap ngog, me thiy pa’ ko fapi babyor rog, me micheg nigeg e ya’ag e bay riy, me yean u fithik’ nibe pithig, me stamp nag fare passport rog nib ga’ lingan ni dil’iy nga but’.

Me mu’ me yean ko tirok’ Lesa e babyor. Ndar m’ug ban’an u ya’an owchen, nibe sap ngabut’ nibe tiyaen’ ko muruwel rok’, me yean u fithik’ fapi baybor ni rib salap riy, nibe sap ko mornga’agen fapi babyor nibay u p’owchen. Gin owchenmow ngay napan ni tal, me tinning loelgen ngalang, me sap ngak Lesa nrib fel’ e sap u owchen. Me sminmin, me stamp nag fare passport ku Lesa me fulweg nge pi’ ngak. Me sminmin le’engig ngak, me fek fapi babyor nikan sulweg ngak, me fingichiy.

“Mang e ke buch?” Ni kug fith nri guba’adag ni nggu nang.

Me dag Lesa ngog e n’en nike guy fare agent—buchi sassing nibay ya’an fare Tathapeg riy. Sana ke mul ulan e yoed rok’ Lesa ngalan fare passport rok. Irreray e ran’en nike pire’eg fare custom officer. Irreray e ran’en nike thilyeg rogon e sap u owchen.

Munguy nge Riyul’, rok Simon Dewey, magar ko altusfineart.com, © 2025, rayog ni ba use nag

Biney e sassing ni ya’an fare Tathapeg e ire ran’en nike pethnag gum’ircha’en e galichan’ey. Ke thilyeg owchen facha’ ke muguynag, nike m’ug ya’an nib fel’, fare ma’ang’ang, nge fare rogon e tomilang rok’ Yesus Kristus. Ga’angin e rofen nem nge boechingiyal’, ma guma tafney nag e ran’em ni buch, buchi ban’en ni bachichig machane basug ko falfalaen’ nge ma’ang’ang ni bachan fare tomilang nibe yib rok’ Kristus nga dakean pifak.

Gadaed e gidii’en e gidii’ nima leak Yesus Kristus, ma gadaed ma gay rogon i thapeg nge share nag e tomilang Rok’. Fithingan e Galasia e ir e mich rodaed ni “Yesus Kristus e ire fare malang ni ir e ba th’abi ga’ fan ko re def nem.” U dakean fapi profet ni kakrom nge fos e chiney, make motochiyel nag e Chitamangdaed nu Tharmiy ni ngad “motoyilgaed Ngak!” ma gadaed “baed ngakʼ Kristus.” “Weliy mornga’agen Kristus, gamaed be falfalaen’ rok’ Kristus, gamaed be machib ni morngaʼagen Kristus, [nge] gamaed be prophesy ni morngaʼagen Kristus.”

Gadaed ma machib nag ni Yesus Kristus e ir e Fak Got, ma napan e machib rok’ u fayleng, me machib nag Yesus fare gospel Rok’ me yarmiy rogon fare Galasia Rok’.

Gadaed ma micheg ni napan tomuren e yafos Rok’, me bayuliy Yesus fapi denen rodaed me gafgow ulan fargi milay’ u Gethsemane, min kuruth nag u dakean e kuruth, me foskoyam’.

Ma falfalaen’ daed ni cachan fare bayul nin miligach nag Yesus riy, kayag ni yira n’agfan min be’ech nagdaed ko pi denen rodaed ko napan ni gadaedra kalngaen’. Biney era pi’ e gapas ngodaed make fal’ag kanawo’en ni ngad suled ko gin ni bay Got riy ma gadaed thapeg e falfalaen’ nib polo’.

Gadaed ma prophesy nag ni bachan e Foskoyam’ ni tay Yesus, yam’ e gathi irreray e tomur riy ko yean nga mm’on. “Gadaed gubin ma gadaedra foskoyam’ u tomuren nikad m’ad. Biney e be yipfan ni gubin e gidii’ mara sul e ya’al nge dogur rok’ nga ta’abang me par nib fos ni manemus.”

Fapi profet nib fos ko pi rran rodaed—nima thapeg fapi thogthog ni yib rok’ Got ni nge fanow me powi’iydaed—e yaed be piningdaed ni ngad bad ngak Kristus. Yaed be ayuwegdaed ni nge sap gum’ircha’endaed, teldaed, nge owchdaed Ngak. Rayag ni ngad suled u dakean fapi wo’en nike mulwol nag fare Bin Somm’on e Presidency nikar ngongliyed rogon nibe powi’iydaed ngak Yesus Kristus. Boech e pin’ey e mu’un:

• Fare duugliy ni dabkunog fithingan ni “Galasia ku Mormon” min non’ loen ko fare bin ni mat’aw i fithingan, Fare Galasia ku Yesus Kristus ni fan ko gidii’en Got ko Tin Tomur e Rran.

• Fare bin be’ech nibay e chiney, ko fare theme nibe thogthog nag mornga’agen Kristus ulan fapi nu’un ko mo’olung.

• Fare theme ko Young Women nge Aaronic Priesthood quorum nge musik nib sor fan ngak Yesus Kristus, ni woed far “Gachalpen Kristus” nge “Musap ngak Kristus.”

• Mornga’agen fare Bayul nge fare Foskoyam’ ni tay Yesus Kristus ni’ir e bay ni th’abi ga’fan ko ma’ang’ang ni buch u fayleng.

• Madnom nag fare ngiyal’ ne Easter ni gubin ngiyal’ ma gathi kemus ni ngiyal’ ko holiday, nib sor fan ngak Yesus Kristus.

• Napan nin thilyeg ya’an fare logo ko Galasia rok’ Yesus Kristus nge fare pow nibe dag ya’an.

Chuchugur gaed ngay ngad guyed mornga’agen e pin’ey. Bin somm’on, fare pow ko Galasia.

Napan e 2020, President Russell M. Nelson e thilyeg ya’an fare logo ko Galasia. Biney e pow e be dag fare n’en nib riyul’ ni Kristus e bay u lukngun e Galasia Rok’ ma susun ni nge par nibay u lukngun e yafos rodaed. Chiney e gadaed ma guy e biney e pow ko temple recommend, ma website ko Galasia nge fapi magazines, bay ko ya’an fare app ko Gospel Library, ma kubay ko tag ko salthaw nib members ko Galasia nibay ko armed forces. Biney e pow e kab mu’un fithingan e Galasia ngay nibay ko malang, me pugurandad ni Yesus Kristus ir e dayif nib gaa’, me dag ura’ u Cambodia nge ulan bin 145 reb e pi thin.

Lukngun ere pow nem e Bertel Thorvaldsen e ngongliy ni’ir e be’ nima ngongliy ya’an e malang nifan ko Kristain ba statchu, nike mang bang ko Galasia marayag ni ngam pire’eg ulan fapi visitor’s center nge but’ ko temple u dakean e fayleng. Pow riy ko Galasia e be yipfan ni Kristus e susun ni nge par ni’ir e bay u lukngun e pin’en ni gadaed be rrin’. Ku woed, rogon nibe dag pa’ fare Tathapeg nibe michmicheg nira ayuweg e pin’in nira yib Ngak. Biney e pow e be yipfan fare tu’ufeg rok’ fare Tathapeg ni’ir Yesus Kristus nge fare poguran ni Kristus e bay nib fos.

Guma fith, ya guba’adag ni nggu nang e pi tabinaew nge pi tafagar ko mang reb e ban’en ni yaed ba’adag ko biney e pow nifan e Galasia. Ma gin owcheg ngay, ni bo’or e gidii’ ni dani nang mornga’agen fan e pin’en nibay ko biney. Yesus Kristus e bay nib sak’iy utan ba ark. Biney e be yipfan fare foskoyam’ ni yib fare Tathapeg riy u tan fare malang ko yam’. Ri gadaed ma madnom nag fare foskoyam’, Kristus nib fos, nikab mu’un fare pow ko Galasia ngay nibay ni yima fanay.

Tafnayed e chiney ko rogon fani ga’fan e Easter. Ko reb e mulwol ni yib ko fare Bin Somm’on e Presidency ni mornga’agen e Easter, kanog ngodaed ni ngad “madnom niged fare Foskoyam’ ni tay Tathapeg rodad nib fos ni ngan ni fil fapi machib rok’ min fulweg rogon e yalen e Easter nge polo’, nrib ga’ ni ulan e tabinaew rodaed.” Kan pi’, e athamgil ngodaed ni ngad madnom niged e Easter ni nge polo’ mab tolang.

Ri guba’adag e thogthog nifan e Easter nge rogon e athamgil rom ni gabe gay rogon ni ngam tay e Easter niba rran nib thothup. Mu’un fare mo’olung ko sakrament ngay nikemus ni ta’areb e awa ko roffen ni Madnomn ko Easter, nge ku boech ban’en nrayag ni ngan rrin’ e woed fare devotional ko ward fa stake nge buch e gosgos nifan e Palm Sunday nge ku boech u napan fare Wik nib Thothup. Boech e pin’ey ni ngan tay u wun’uy e woed e gosgos nifan e bitir nge fal’yangren e tang u fithik’. Boech e gidii’ e ke bing e mab rok’ ngak boech e members nifan ngak “Kristus nib Fos” nge pi tafagar nikar uned ko ulung nikar uned ko tin nu community ban’en nifan e Easter.

Tiney e gosgos e woed fapi gidii’ ni pire’ ulan fare binaew nu Jerusalem ni ta’areb lamraed nra tolulgaed ko falfalaen’ napan ni yib fare Tathapeg. Make m’ug nrib fel’ nikam uned kam liyoer gaed ko fare mulwol nike yib ko Bin Somm’on e Presidency ni ngan tayfan e biney e rran ni th’abi ga’fan ulan e tabinaew rom.

Michuwun’ug ngay ni tayfan e biney ulan e tabinaew nifan e Easter e kari mon’og nib gel. L’agruw e duw kafram, kug weliy mornga’agen e tabinaew rog ni nggu mon’og niged i tayed fan e Easter. Biney, e kaga mad be gay rogon. Gubin ngiyal’ ma gamaed ma abich u ta’abag ko fare rran ko Madnom nifan e Easter, abich nifan e kadbul, nge gay e fakanimen, e kagmad ma rrin’. Machane, uneg bang ngay nib thothup nibay Yesus Kristus nge fare Bayul rok’ riy ko fare madnom romaed e woed nike fal’ag rogon e thathabil riy nifan e madnom nag e pi rran ney ni rib ga’fa mab thothup.

Biney e duw e ke gaman dalip e duw ngay nikug ted Kristus ni’ir e bay u lukngun e Easter romaed. Woed fare nativity ko Kristmas, Easter nifan e tabinaew romaed e woed ni gamad ma chung nga maaden, be’eged fapi chep nib thothup ulan fare Bin Be’ech e M’ag nge fare Babyor ku Mormon, musik, sassing nifan e Easter, yuwan e palm—nge boech e wagagay. Pi bitir nge bitir ko bitir be bi’eged nge yoeged e liyor ko Palm Sunday ni “Hosanna … I Got e nge ayuweg e en ni ir e ke yib ni owchen Somol; Hosanna Ke sorok Got!” nge Ireray Yesus … bee’ nu Galilee” yow nib mangil ni woed “Ma nge yib e gapas nga fayleng ngak e pi’in yad bfel’ u wan’ Got” u ngiyal’ ko Christmas.

Chiney gamad ma fanay boech e nunuwnag nib thilthil rogon. Somm’on e imoy nikemus nib sug ko usangi nge fakanimen nifan e Easter make chiney maku uniged Kristus u fithik’ nge sassing ni ya’an fare malang ko yam’, nge ya’an fare Tathapeg ni yibi m’ug ko farengi milaey’ u wuru’ fare gin ni bay e malang ko yam’ riy, nge ya’an fare Tathapeg ni yibe m’ug ngak fapi Nephites. Ma kagmad be gay rogon ni nggu ted ni ngiyal’ ne Easter e gubin ngiyal’ ma gathi kemus ni ta’ab rran. Gamaed be gay rogon e yib ngak, tafneynag, madnom nag fare Madnom ko Palm nge fare rran nib Mangil ko Biyarnis nge fare n’en ni buch ulan fare Wik nib Thothup.

Fan e Easter e ngad tayedfan fare miligach ni tay Yesus Kristus me falfalaen’uy ko fare Foskoyam’ ni tay. Be kirbaen’daed napan ni gadaedra tafney nag fare Tathapeg ni gafgow ulan fagi milaey’ nge dakean fare Kuruth, machane falfalaen’ gum’ircha’endaed napan ni bayda tafnayed fare malang ko yam’ nike chuw riy ma fare tharmiy e ke yoeg, “Ke Fos ko Yam’!”

De n’uw napan fare Bin Somm’on e Presidency ke pii’ athamgil ngodad ni ngad sap nga “mm’on ko fare Easter nge fare Foskoyam’ ni tay Yesus Kristus—ni’ir e th’abi fel’ ko gubin e thin ngak e gidii’ nibe dag fani ga’fan e biney e ngiyal’. Be yo’or e thin u fithik’ e gidii’ ni Kristian nima fil mornga’agen e Got ni yaed be tafney nag ni fare Foskoyam’ e woed ba pow ma ba fanethin, machane gadaed e michuwun’udaed ni “fare Foskoyam’ e be yipfan ni gubin e gidii’ ni’i moy nib fos era foskoyam’, ma fare Foskoyam’ e bay nrib riyul’.” “Rogon nma yim’ urngin e girdi’ ni bochan e yad ta’ab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar ta’ab girdi’gad Kristus.” Yesus Kristus era chuwegey ko yam’ nifan gubin e gidii’ nib fos.

Ri gadaed be falfalaen’ ko fare murunguy rok’ Yesus nibe pi’ ngodaed. Magdaed fanay e thin rok’ ni “rogon nib th’abi t’uf rok be’ e pi tafager rok e nge pi’ e pogofan rok ni fan ngorad.”

C. S. Lewis e yoeg ni fa’anra ngan “machib nag ni woed rogon e Kristian nibe yip’fan ko [fapi Apostle] ma somm’on e ngan machib nag mornga’agen fare Foskoyam’. … Fare Foskoyam’ e ir e bin th’abi ga’ mornga’agen ko Kristian nikan report nag ko fare Acts. Fare Foskoyam’, nge tin nike yib u tomuren, e ir fare ‘gospel’ fa fare thin nib fel’ nike pi’ fapi Kristian.”

Gube yoeg e pi thin ney ni “machane bay e foskoyamʼ, … ere yamʼ e dakuriy gelingin, ma fare gafgow ni yamʼ e ke mʼay ni bachan Kristus.”

Gube museg e thin rog, ni gube micheg ni pi’inra fanay fare mulwol ko profet rodaed nibay nib fos nge fagli counselor rok’ ni nge gay rogon ni nge madnom nag fare fan e Easter era patag ni tha’ rok’ ngak Yesus Kristus era ga’ me gel.

In e rran kafram, kug fil mornga’agen reb e titaw nike weliy fare yat ni mornga’agen e Easter ngak reb e bitir nifak fak ni aningeg e duw rok’ nibe yus nag ban’en ni woed ya’an e malang ko yam’, fare malang ni rungrung nag fagi mab, Yesus, Mary, fapi gachalpen, nge ba engel. Chi pagal ney e ri motoyil ko titaw rok’ nibe weliy mornga’agen ere magawon ney, nibe ning me bing fare malang nifan ko yam’, nge ya’an fare milaey’ ni buch fare Foskoyam’ riy. Ma fachi pagal e sul u dakean fare yaat nibe weliy nrib fel’ rogon ngak gali galibthir nibe yean pa’ u ya’an. Tomuren e biney, min fith ngak ko mangfan nibay e Easter. Me sap fachi pagal ngalang me fulweg ni woed e thin ko bitir, “Bachan Ir fos.”

Nggu uneg e mich rog nge un ngak—ni michuwaen’ romow nge fapi angel nge fapi profet—nibay nib fos make foskoyam’, ko pin’ey ni gube micheg u dakean fithngan Yesus Kristus, amen.