Be Buch e Chiney u Powchendaed

Pi walageg, ri gub falfalaen’ ngay ni gadaed bay u ta’abang. Ri gamed ba tu’uf romaed, gamaed be og nag e magar ngomed, nge gamaed be thamiy e tawa’ath ni bachan e fapi meybil romed.

President Russell M. Nelson e ke yoeg ko fare bin nike thumur e conference: Gimed be guy e n’en nibe be buch e chiney u powchendaed? Gube meybil ni ridamu fek owchem ko pin’en ni be buchbuch ko ngiyal’ ney! Somoel e riyul’ nibe ul’ul’nag e muruwel Rok’.”

Papay nag fare Muruwel Rok’. “Papaynag” e bugithin nib ga’fan. Be yipfan ni ngan papay nigey, papaynag, fa woed ni yibe tay marrin. Rogon payngin nibe ga’ e Galasia nge tonom rok’ Kristus, be buch e biney e chiney ni yibe papaynag rogon. Ni gadad gubin ni gadaed bang ko biney.

Napan e April 1834, u Kirtland, Ohio, fare Profet Joseph Smith e kunuy nga ta’abang fapi gidii’ ni bay fare priesthood ngalan fare na’un ko sukul, go napan e 14 feet square (4.3 m). Bo’or e pi nu’un ney nifan e sukul nrayag ni nge taw ngalan fare Conference Center. Joseph Smith e ga’ar, “Ri in e Priesthood e gabe guy ko re balayal’ ney, machane re Galasia ney e ra suguy yu Mariken u Lelo’och nge Yimuch—ra suguy e fayleng.”

Biney e prophecy e “be buch e chiney u powchendaed.” Fare Galasia ku Yesus Kristus ni fan ko Gidii’en Got ko Tin Tomur e Rran e be ga’ fapi members nge chonggin e tabinaew riy, fapi mission nge missionaries, fapi temple nge tigil’ e mo’olung, nge mu’un ko sukul ko seminary, institute, nge universities u dakean e fayleng.

Falfalaen’ gaed ngay ni gadaed bay e chiney u fayleng ni gadaed be guy e namba ko Galasia nibe ga’ i yean, nibe ga’ ulan gum’ircha’en nge yafos ko members. Gadad gidii’en pi gachalpen Yesus Kristus. Gadaed ma weliy e mich ni mornga’agen, nifan e Galasia Rok’, Kanawo’en, nge fare kanawo’en e m’ag Rok’. Gadaed e gidii’ Rok’, ma Ir e Tathapeg rodaed.

Ri guba’adag e n’en nike yoeg President Nelson ko biney “pilung ko ngiyal’ ney” ma gube og nag e magar ngak Somoel ko muruwel Rok’. Gube pi’ e athamgil ngodaed ni ngad sak’iy gaed ngalang ni gadaed e fapi gachalpen, ni ngad micheged nibe buch e pi prophecy ney, tin ni kakrom nge tin ni chiney.

Bay e gidii’ ni dabun ni bayi tolulnag, “Musap aray nge … mu sap aram,” ni woed rogon fare ngiyal’ ni’i moey fare Profet Joseph Smith. Ya, tiney e gidii’ e ri buchu’uw faraed ko biney e muruwel nib thothup. Kaga ma nang fapi thin rok’ Joseph Smith: “Dariy be’ nib kireb nrayog ni nge taleg e murwel ndabi buch; gafgownag e bay ni bayi gel marin … machane tin riyul’ rok Got e ra yan nga m’on dariy e tuntun riy, nib mangil, ma go’ ir, nge taw ko ngiyal’ ni ke thap ko gubin e naam, gubin e yafang, nge tha’ ko gubin e binaew, me rung’ag gubin e gidii’ nge taw ko ngiyal’ nike mudugil fan i muruliy tiroek’ Got, me ga’ar fare Jehovah ni Gubinfen e ke m’ay fare muruwel.”

Muruwel rog e biney e duw, e kug un ko biney e muruwel Rok’ Somoel nibe papay i yean. Galasia e be dumow temple ni rib papay payngin, ni ngeyag ni nge yan fapi members nga ur liyoer gaed ulan e na’un rok’ fare Somoel. Bin migid ngay, muruwel ko tamachib e yead be kunuy fapi namba ko cheppen mornga’agen ngak fare Saaf ko Tachathowol nib Mangil, ni Yesus Kristus. Bin dalip ngay, sukul ko Galasia e yead be machibnag rogon ni “ngam gayed e chaʼaney i Yesus.”

Daba’ e bay 367 e temple nifan e Galasia ni boech e ki yibe fal’ag rogon, toey, fa kiy yibe ngongliy rogon. Mangfan e pin’ey ni yibe ngongliy rogon? Fare fulweg riy e bay ko gubin e temple: “Thothup ngak Somoel.” Fapi temple e ma bing wo’en fapi tawa’ath nib tolang nibe yib rok’ e Chitamangdaed nibay u Tharmiy nifan ngodaed. Pi walageg, gadaed be papaynag e thothup rodaed ni fa’an gadaed be par nib thothup, ni gadaed be liyoer ulan e na’un rok’ Somoel, ma gadaed be ngongliy fapi m’ag ngak Got nifadaed nga fan e pi gidii’ rodaed ni kakrom nibay u barba’ fare veil.

President Nelson e ga’ar: “Cham nibe yib rok’ mo’oniyan’ e be gel i yean nge gelngin, ni bo’or mit nib thilthil. Kari tu’uf e chiney ni nga un yean ngalan e temple ni gubin ngiyal’. Gube wenig nag ngomed ni ngam meybil gaed ngam sapgaed ko rogon ni gamed be fanay e ngiyal’ romed.” Ulan e na’un Rok’ e rayag ni ngad thamiyed Somoel nib thothup nge gapas Rok’.

Bin ba’aray e duw nike thumur, e yag ninggu yibliy fare Temple u Mendoza Argentina. Ko thin nigog, mug non nifan e thin rok’ Elder Melvin J. Ballard’s 1926 ni prophecy nag ni fare muruwel rok’ Somoel era buch nib sasaga’al u South America ko tabochingiyal’ riy, “ni woed ba ke gak’iy ni woed e oak nib sasaga’al nima tugul nike yib ko fare awoch ko akorn. Yig dabgu pos mug tugul ulan ta’areb e rran,” machane biyu’ era yib nge un ko Galasia, ma fare naam nu South America era mang “gelngin nib gel ko Galasia.” Biney e prophecy e karug guy nibe buch e chiney u powchendaed.

Mendoza, e ki’i moey ni buchi awoch ko akorn, ma chiney e ke mang farke gek’iy ko oak ni rib gel. Biney nibe ga’ e kube buch u dakean e naam nge boech e donguuch ko day.

Gadaed be guy ni Somoel e be papay nag e Muruwel Rok’ ulan fapi mission. Napan e 2024, 80,000 e fapi tamachib ni yaed be pigpig ko fapi mission ni 450. Ma 36 ko pi mission ney e bay nib be’ech. Bin ba’aray e duw nike thumur e fek fapi tamachib 308,000 e members ngalan e Galasia. Gathi kemus ni fare namba e be yo’or, ya kumus ko fare thothup ko mukunnag e be fek e gidii’ nge yib ngak Yesus Kristus nge fare gospel Rok’.

Gube tafney nag fare Apostles Brigham Young nge Heber C. Kimball ni napan e 1839 nranow ni yow fapi tamachib nag ngalan fapi Donguuch ko British. Yow m’ar; mar pigew e tabinaew rorow ni yaed m’ar ma yaed palog. Machane, ma dariyfan ni aram rogon ni yow be thamiy, ya ranow ngalan fare wagon ma napan ni yow be thumur i yean, me ga’ar Heber, “Sak’iy gow ngalang ngad fingichiyraed.” Miyow athamgil ngar sak’iy gow ngalang miyow tululnag, “Hurrah, hurrah nifan ngak Isreal.”

Kug guy e biney e falfalaen’ ko muruwel rok’ Somoel u fithik’ fapi gidii’ u Lima, Peru, napan nigu mada’nag fapi tamachib ko fare missionary training center nge fapi mission u Lima. Rib falel’ ya’an! Kug guy ni fare muruwel ni yibe papaynag e be buch e chiney u powchendaed. Chiney ma bay medlup e mission ulan e city u Lima.

Tomuren e mo’olung romaed, ma fapi tamachib e ra gin niged gag. Nra sak’iy gaed ngalang mi yaed yeog, “Hurrah nifan ngak Isreal.” Ri dariy bi’id ni gura pagtalin e biney; karug athapeg ni gamed bay u rom e roffen nem. M’oneged u wun’med e pi tamachib ney nikar paged e “tin nu fayleng ban’en” ni ngeyag nira pigpig gaed ngak Somoel miyad pi’ e ayuw ko fare wub rok’ ni yibe papaynag.

Gamaed be guy ni Somoel e be pi’ e ayuw ko sukul nifabn fapi members, nikab mu’un fapi gidii’ ni gathi gidii’en e galasia ngay, nge fayleng. Ta’areb e ban’en nib thil ko Galasia rodaed e fare ayuw ni yima pi’ nifan e sukul. Somoel e motochiyel nag napan nin Fulweg yarmen e Galasia ni ngan “gay wo’en e fil rogon, nib mu’un e mich ngay.” Biney e be buch e chiney nrib mu’un fare bugithin ngay ni “hurrah.”

Chiney ma bay 800,000 e student nibe un ko seminary nge institute, ni irreray e ngiyal’ ni kari yo’or e bitir nibe un ko sukul ko Galasia. Fapi fal’yangren rodead e yaed ma mukun nga ta’abang nib thilthil ngiyal’, boech e kakadbul, ngiyal’ ni kabay e yaal’ u lang, nge ngiyal’ nike mithig yaal’, nge sukul u tabinaew. Yaed e bugi gidii’ nib gel mab yul’yul’, ni yaed be pi’ gelingraed ma yaed be machib u ta’abang ko mornga’agen Yesus Kristus, ma yaed be leak, ma yaed be micheg mornga’agen fare Fak Got.

Bay reb e devotional nigu non riy ngak fapi student ko seminary nge institute ulan be arena nib sug e galibthir roraed riy u Universtiy u Utah. Wub roraed e be m’ug ni yaed ba’adag ni ngar nanged mi yaed laek wo’en Yesus Kristus. Mulwol rog ngak fapi student e rib tomilang: Mpi’ e ngiyal’ ngak Somoel nib ta’abrogon. Gu mulwolnag ngoraed ni ngar thathabil niged e sukul roraed u fithik’ e yul’yul’, tini yaed be fil nib tolang mornga’agen, nge fil mornga’agen fare “Fak Got nib Fos.”

Gu fith ngoraed era n’en ni nggu fith e dab’:Demuturug ko ran’en nibay ko Nn’en ni Ngam Rrin’” e daba’, ngkum pi’ e ngiyal’ nta’areb rogon, gathi fa’anra bay e ngiyal’ rom, ngak Somoel ni ngam fil mornga’agen, ko yigogur rom, fa lane e tabinaew rom min fare Moy, Mu Leked, meybil, fapi pigpig rom ko Galasia, ministering, fek fare sakrament, liyoer ulan e temple nge tafney nag e tirok’ Got ban’en. Somoel nge fare Tathapeg e raga’ar gow, “Mi gimed folwok rog … mi gimed pir’eg e toffan.” Mu fanay e thin Rok’. Mag pi’ ngak e ngiyal’ nib ta’ab rogon ko tirom ban’en.

President Nelson e yoeg: “Gube wenig nag ngomed ni ngam piged Got ni nge gagiyeg nag e yafos romed. Mu piiʼ boch e taym rom ngak. Ya napʼan ni gara rrinʼ, mu guy ko mang era buch ko tin ni matʼaw e mithmith rom nib thothup.”

Gamaed be guy e biney e mithmith uan fapi seminary, institute, nge universitites nifan e Galasia. Ko yungi n’ey, Somoel e ir e bay u fithik’ ni th’abi ga’fan. Ere susun ni’ir e nge par nibay u lukungun e yafos rodaed.

Bang ni kabe dag nibe ga’ e sukul ko Galasia riy e fare BYU–Pathway Worldwide. U dakean e fayleng, un ko mit ney e sukul e ke pag e 75,000 ma kube ga’ i yean. Orani yaed e fapi members ko galasia, ma 1/3 e bay u Africa. Pathway e ir kanawo’en e sukul. Mu’ nag e sukul riy e kanawo’en i patag e muruwel, ma patag e muruwel efare yafos rom nibe mora mon’og nag e yafos rom, tabinaew rom nge kanawo’en i pigpig ngak Someol.

Napan ni gube mada’nag fapi tiyugang’ ko stake u Uganda, mug fil ni ga’angin fare stake presidency e yaen be un ko sukul u BYU–Pathway. Fare gelngin ni kad fal’aged rogondaed ko tin nib thothup nge tin nib tu’uf ban’en, e rayag ni nge sabthiy fapi lumel nibe yib rok’ mo’oniyan’. Kaga manang fapi thin rok’ Peter: “Ya mo’onyan’ ni ir e to’ogor romed e yugu be yan ni bod ba layon ni be tolul, ni be gay be’ ni nge longuy.”

Ma kugu manang ni demturug rogon e biney e gospel nrib fel’, kubay e gidii’ ni kube gafgow, ma kube mo’owar e mich roraed, tafney roraed, nge duwer ni gowod ni dawri yib e fulweg riy. Pi walageg, Yesus Kristus e ir fare fuwleg riy. Mu tabab Ngak. Mu sap ko rogon nibe ayuwegnem ulan e yafos rom. Motoyil Ngak. “Dabi magafan’med ma dabi wagagey lanin’med,” ni yoeg ngak fapi gachalpen ko fare in i awa nga tomuren u mm’on u Gethsemane, u mm’on ni fek fare kuruth rok’ ulan fare pi’i kanawo’ u Jerusalem, u mm’on u Golgotha, ni irreram e gin ni yini mu’ nag fare miligach riy, ni karimus Ni’ir, ni Fak Got, e rayag ni nge rrin’.

Manang nibay nibe nangfan. Ke fek nga dakean urngin mit e pi denen rodaed, kireb rodaed, gafgow rodaed, nge urngin e pi rran ni rib gel e gafgow riy ni ngeyag ngeyag ni ngad pired rok e Chitamangdaed nu Tharmiy biyay rok’ ni manemus. Ya ke ga’ar, “Mu sap ngog ko gubin e tafney rom; ma dabi waerwar an’um, ma dam murus.” Mich ngak Yesus Kristus e rayag ni nge chibiyem ngalang me gol nag e yafos rom. Pagan’um Ngak mrayag ni ngam papaynag e wub rom nga “longbiyeg nga lan ngorngoren.”

Kngug waen u dakean e thin rok’ e profet rorded nib fos: “Gimed be guy e n’en nibe buch e chiney u powchendaed? Gube meybil ni ridamu fek owchem ko pin’en ni be buchbuch ko ngiyal’ ney! Somoel e riyul’ nibe ul’ul’nag e muruwel Rok’.” Gube athapeg ni gadaed pi gachelpan e ngad tolul niged, “Hurrah nifan ko Isreal,” ni gadaed be fal’ag rogon ko fare wub rok’ fare Somoel ni Tathapeg rodaed. U dakean fithngan Yesus Kristus, amen.