Tiepene Lap
Koapwoaroapwoar Mwohn Sihlang en Koht
Kapokon lap en Epreil 2025
11:59

Eimah Mwohn Sihlang en Koht

Sang Preseden Russell M. Nelson

Preseden en Mwomwohdiso en Sises Krais en Souleng en Imwin-rahn akan

Ni atail ngoangki audehki atail mour kan en ahnki limpoak mehlel oh wiewia mwahu, atail eimah en kerenlahng Koht pahn laudla.

Riei souleng kan, I kapingki ei kak padahk ong kumwail nan tiepene lap en rahn wet. I solahr kak kilang wasa mwahu. Kalahngan en amwail wehwehki ei pahn kihwei ei mahsen.

Kitail mihmi nan irair kesempwal ehu nan Mwomwohdiso en Sises Krais en Souleng en Imwin-rahn akan. I inenen direkihla popohl ni ei kilkilang keirda kan nan wasa tohto.

Me pwulopwul kan me keieu sairie. Irail kin wihwia lapalahn sahpis. Irail kin raprapahki arail peneinei kan oh kin wia doadoahk en tiahk sarawi kan nan tehnpas sarawi. Diren mwahnakapw oh peinakapw kan kihkihlong neirail darepwehn misin. Dih me kohkohda kan wiekekeirda nan arail mehlel en idawehn Sises Krais.

Preseden Nelson iangahki nein nah seri-seri serepein.

Me keren I tuhwengdi emen nein nei seri sin serepein pwelel. Ni ei kasawih kasongsong kan me e pahn lelehng nan ah mour, I pehmada ineng laud ehu ien sewese kairada ah pwoson Sises Krais. Momourki Sapwellime rongamwahuo kesempwalehng ah peren en mwuhr.

E rasehng emen emen kitail, me pahn kin sohpai kasongsong kan. Kitail koaros pahn kehn soumwahu, insensuwed, kasongosong, oh salongala. Kasongsong pwukat kak kiheng kitail peikasal. Ahpw, sounpapahn Sises Krais kan kin ahneki soangsoangen eimah.

Ansou me kitail wiahda oh kolokol inou kan rehn Koht, kitail kak ahniki eimah me ipwikihdi Ngehno. Kauno pahngoakiheng Soukohp Joseph Smith me atail eimah kak “lalaudla mwohn sihlang en Koht.” Medewe kansenamwahupen ahnki eimah mwohn sihlang en Koht!

Ni ansou me I kin kosoia kopwoaroapwoar mwohn Koht, I kosokosoia duwen ahnki koapwoaroapwoar ni ei pahn kohkolahng Koht ansou et! I koasoakoasoaia kapakap ni pwoson me Sahm Nanleng pahn karongeikitail, me E pahn ketin mwangih atail anahn laud sang uwen atail ese. I koasokoasoia kitail en ahniki pwoson me E ketin poakohng kitail laud sang me kitail ese, me E kin ketin kadaredohng kitail tohnleng irail en kin ieiang kitail oh irail kan me kitail kin poakohng. I koskosoia me ahnki eimah iei me E ketin kupwurki en sewese emen emen kitail en lellahng wasa me keieu ileile.

Eri, ia mwomwen atail kin kairada eimah? Kauno sapeng peidek wet ni mahsen pwukat: “Mweidehng pein komwi … en direkihla limpoak mehlel ong aramas koaros, … oh mweidehng wiewia mwahu en kalinganahda omwi madamadau kan kokohlahte; eri amw koapwoaroapwoar pahn kehlaila mwohn sihlang en Koht.”

Ih kihen mwo! Nan Sapwellimen Kauno mahsen kan, limpoak mehlel oh wiewia mwahu kin kairada eimah mwohn Koht! Riei ohl oh lih akan, kitail kakehng met! Atail eimah udahn kak kehlailda mwohn sihlang en Koht, ansou wet!

Kitail medewe limpoak mehlel oh wiewia mwahu.

Keieu, limpoak mehlel. Sounpar riau samwalahro, I kepwukoahkin kitail, sang nin duwen inou en soun idawehn Sises Krais kei, en wia soun kameleilei. I kapwurehieng dahme I indahiero: “Lingeringer sohte kin idingehng emen en wia me pwung. Lemei sohte kak kakairada emen. Uhpene sohte kak elehda pasapeng en kamarain ong kahpwal kan.”

Limpoak mehlel ohng aramas koaros wia mehn kasansal en soun kameleilei kan! E inenen kesempwal kitail en ahnki limpoak mehlel nan atail wehwepene kan, mwohn weipokon de wasa rir. I kalahnganki ohng kumwail me kolokol nan mohngiong ei kaweid en mwowehu. Ahpw kitail kak wia mwahusang met.

Mahwen mwohn weipokon rahn pwukat oh nan interned inenen kapwunod. Lokaia kamedek kan kak kamedekehla emen aramas. Uhpene kin katangahsang Ngehn Sarawi en wia iengatail.

Nin duwen sounpapahn Sises Krais kei, kitail anahne wia soun kameleilei. Nin duwen limpoak mehlel ah kin wiahla kisehn atail mour, kitail sohla pahn men kawehla mehteikan. Kitail pahn uhdihsang kadeik mehteikan. Kitail pahn ahnki limpoak mehlel ohng aramas koaros. Limpoak mehlel ohng aramas koaros kin kesempwal ohng atail kekeirda. Limpoak mehlel iei poahsoan en atail mwekid mwahu.

Kitail peki rehn Samatail Nanleng en ketin audekihda atail mohngiong kan ki limpoak unsek—ahpw mehlel irail kan me kitail kin apwal en poakohng kan—pwehki limpoak unsek kisakis ehu me sang rehn Samatail Nanleng ong werek en Sises Krais mehlel kan. Sounkomouro me wia Kaun en Meleilei. Kitail wia Sapwellime dipwisou en doadoahk en kameleilei kei.

Met, kitail uhd kosoia wiewia mwahu. Kauno mahsaniheng kitail en kamwahuihla atail madamadaukokohlahte iangahki wiewia mwahu. Medewe amw pahn kehlailau nan madamadau mwahu koros ni amw pahn kin kalaudehki wiewia mwahu. Wiewia mwahu kin kahrehda soahng koaros en mwahula oh kaperen! Oh pil ehu, medewe dahme pahn wiawi ni ansou me ke kapataieng wiewia mwahu ong madamadau samin, lemei, de kapwunod. Wiewia mwahu pahn kihsang soangen madamadau pwuko. Wiewia mwahu pahn kihsang dahme ke perki, madamadau kepingiping kan.

Riei ohl oh lih akan, pwehki sampah ah kin kakairada suwed, kitail anahne nantihlahte kairada mwakelekel. Atail madamadau, kosoi, oh mwekid kan anahne en mih ni wiewia pwung oh audaudki limpoak mwakelekel en Sises Krais ohng aramas koaors. Atail ansou mwahu iei en wiahla aramas me Koht kupwurki kitail en wiahla.

Kaudek nan tehnpas en Kauno kin kalaudehla atail men ahnki limpoak mehlel oh wiewia mwahu koaros. Mehlel, ansou en nan tehnpas sarawi kin kalaudehla atail eimah mwohn sihlang en Kauno. Kalaudehla ansou nan tehnpas sarawi pahn sewesei kitail en kaunopehng Ketdo Keriau en atail Sounkomouro, Sises Krais. Kitail sohte wehwehki rahn de awa me E pahn ketdo. Ahpw I ese me Kauno kin kapehmihengie ien kangoangehkin kitail en kaunopehng “rahn lapalap oh kamasepwehko.”

Ni atail ngoangki audehki atail mour kan en ahnki limpoak mehlel oh wiewia mwahu, atail eimah en kerenlahng Koht pahn laudla. I lukei kumwail en nantiheng kekeirda nan amwail koapwoaroapwoar mwohn sihlang en Kauno. Mwuri, ni atail kerenlahng Samatail Nanleng pwehki kekeirdahn eimah, kitail pahn audaudki popohl laud, oh atail pwoson Sises Krais pahn laudla. Kitail pahn tepda kehn manaman en ngehno me kin kalaudehla atail koapwoaroapwoar kan.

Se kapingkiheng Kauno uwen mwadang en kokoudahn tehnpas sarawi kan nan pahr ahpwte nek kan. Pahn Sapwellime kaweid, rahnwet se pakairki koasoandi kan en kawada tehnpas sarawi nan wasa pwukat:

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

I kadehdeh me Sises Krais, Soundoar en Isreal, kin kaunda, Sapwellime Mwomwohdisoht. E ketin kaukaunop pwehn pwurodo. Kitail en pil duwehte me kaukaunop en kasamwoh Ih. Iei met me I kapakapki ni mwaren Sises Krais, ahmen.

Ire kan

  1. Kisin takai me soukohp Daniel kilang nan ah ouraman pid mwomwohdiso en imwin rahno me pahn kokohwei mwewe oh pahn audehla sampah (kilang Daniel 2:31–45; Doctrine and Covenants 65:2).

  2. Doctrine and Covenants 121:45.

  3. “I pahn kaunopehng kumwail ahlo. I pahn ket ni palimaun oh ni palimeing, oh Ngeni pahn ket nan mohngiongimwail, oh nei tohnleng kan pahn kapil kumwailpene, pwehn pwek kumwailda” (Doctrine and Covenants 84:88).

  4. Doctrine and Covenants 121:45ire kesempwal kapatapatehng; pil kilang ire 46

  5. Russell M. Nelson, “Anahnepen Soun Kameleile,” Liahona, May 2023, 98.

  6. Pilada akamaieng mehteikan iei pilada ken sohte idawehn kaweid en Ngehn Sarawio.

  7. Kitail en ahnki limpoak mehlel “ohng aramas koaros, oh irail Souleng kan en Kauno” (Doctrine and Covenants 121:45).

  8. Met wehwehki kapakap kehlail “sang nan mohngiong unsek” (Moroni 7:48).

  9. Kilang Moronai 7:48.

  10. Kilang Aiseia 9:6.

  11. Joseph Smith padahngki, “Ma [kitail] men kohla wasa me Koht ketket ie, [kitail] pahn anahne duwehla Koht, de kolokol padahk kan me Koht ketin kolokol” (Teachings of Presidents of the Church: Joseph Smith [2007], 72). Duwehtehte, Wahnpoaron Pohl kasalehda me kitail anahne “eimah oh keiong mpen mwoalen Koht, wasahn ale kalahngan. Iei wasao me kitail pahn ale kalahngan ie, mehn sewesei kitail ni ahnsoun atail anahn laud kan” (Ipru 4:16).

  12. Kilang Madiu 24:36–37.

  13. Malakai 4:5; pil kilang Sepanaia 1:14–18.

  14. Kauno mahsaniheng kitail en “tamataman pwoson, wiewia mwahu, marain, uhtohr, kanengamah, kadek, duwehla koht, limpoak mehlel, karakarahk, [oh] ngoangki” (Doctrine and Covenants 4:6). Ansou me kitail wia met, atail eimah pahn keirda, oh mwuhr, sang ni pein Sapwellime mahsen, ansou me kitail peki, kitail pahn ale. Oh ansou me kitail letelet, e pahn ritdahng kitail. (Kilang Doctrine and Covenants 4:7.)

  15. Kitail en pil lelehng dahme nein Nanmwarki Benjamin aramas kan wiahier: “Irail ahpw direkihla peren, oh alehdi mahkpen diparail akan, oh alehdi popohl nan madamadau, pwehki arail pwoson Sises Krais” (Mosaia 4:3).