Wauneki me Sarawi Kan

Nan pwuken Eksodus, kitail iangih Moses nan ah seiseilokseli ni pengepengen Nahna Sainai ni ah pwilikihdi ah kediropw kan—soahng ehu me kitail koaros en men wia—pwe en kilang kisin tuhke me mwpumpwul ahpw sohte roangala. Ni eh keikeilahng tuhkehu, “Koht ahpw mahsen sang nan tuhkehu, mahsanih, Moses, Moses. E ahpw sapeng, patohwan, Iet ngehi, maing. Oh [Koht] mahsanihong, … kihsang ahmw suht kan, pwe wasa me ke keskesihnenieh me sarawi.” Ni eh direkihla wahu lap, karakarahk, oh kopwuriamwei, Moses kihsang ah suhtko oh kaunopada en rong mahsen en Kauno oh esehda kupwure.

Kasansalda sarawi en nan nahnao iei mehkot waun lap ehu, me kasalehieng Moses duweh sarawio, oh ni mehlel, e wia ehu kahrehpen ah wekisang ah wia soun epwel mahn oh wiahla soukohp wad emen, kahrehieng ah uhd kin weid nan elen mour kapw. Ni soangen mwohmwohte, emen emen kitail kak kailehda atail kin idawehn Ih sang ni atail pahn kin mweidehng wahu en wia mehkot me sarawi nan atail momour en pali ngehn.

Lepin lokaia wahu tepsang ni lepin lokaia en Latin revereri, me wehwehki “kesihnenki pwuriamwei en mehkot.” Ong ni rongamwahuo, kawehwe wet pil pidada atail pepehm oh madamadau en kalahngan, limpoak, oh kaping. Soangen pepehm oh madamadau pwukat ong me sarawi kan sang irail akan me karakarahk oh loaloapwoat ohng Koht oh Sises Krais kin kalaudehla popohl ni palingenirail.

Wahu ong soahng sarawi kan me wia kasalehpe lap en duwen palingenitail; e kin iang pwilisang atail kin karanih mehkot me sarawi oh kin kasalehda atail limpoak oh uwen atail kerenieng de dohsang Samatail Nanleng oh atail Sounkomour, Sises Krais. E pil iang wia mehkot me keioun kesempwal oh ile me palingenitail kin lelehng. Soangen pepehm wet kin kauhweng atail madamadau, loaletail, oh atail mour ohng Koht. Ni mehlel, wahu sohte wiahte kisehn momour en palingehn; ih me wia pwurie—poahsoan ehu me momour en pali ngehn kin kokouda powe, oh pouse kitail ong me sarawi, duwehte me serihkan ahr kin padahkiheng kitail ni arail kin koulki me, “Ni arail kin ahneki wahu, nan loalerail, re ese me Sahm Nanleng oh Sises Krais kin karanih irail.”

Ni atail wia soun idawehn Sises Krais, kitail alehier luhk en katikada kisakis en wahu nan atail mour pwe en kak kaloalehla nanpwungen kitail oh Koht oh Sapwellime Iehros Sises Krais, oh pil ni ansouohte kakehlaka palingenitail. Ma mie soangen pepehm wet nan loaletail, atail popohl oh peren udahn pahn laudla, oh e pahn sohla nohn dewen pahtou oh nsensuwed loaletail. Kitail anahne taman me kasalehda wahu ohng mwekid sarawi kan kin wahdo wehwepe laud ohng dahme kitail kin wia rahn koaros oh kakehlaka atail pepehm en kalahngan—kin kahrehieng atail pwuriamweiki, wauneki, oh poakehng me wahu oh mwakelekel kan.

Ihme kamwaroso, kitail mih nan ansou ehu me dindiralla aramas me solahr kin nohn kasalehda wahu ohng soahng sarawi kan. Ni mehlel, sampah kin kalapw utung me kin laumwoahmw kan, oh kasalepe kin mih nan mehn wadawad kan, nan kasdo kan, de pil nan interned. Sohralahn wahu ong me sarawi kan kin kahrehda atail kin sohte katapanki de kesempwalki mwomwetail, me kakete kahrehieng ehu dih en sohla katapanki mehkot, oh kahrehieng dien mwuhro ah mihla nan pahtou.

Laumwoahmw pil kak kadohwan kitail sang kapai en inou kan me kitail wiahda rehn Koht oh kahrehieng atail sohla kin nohn kehn kesempwalpen atail pilipil kan mwohn Koht. Pwehki met, kitail pahn kakete insenohki pein atail nsenamwahu; koadoahkehte ketihnepen insenen paliwaratail; oh lel wasa suwed kahrehda kitail pahn kin uhd ahneki kailok ong me sarawi kan, pil iangahki Koht, oh pil iangahki atail wia sapwellimen Samatail Nanleng serihkan. Atail kin mwamwahliki me sarawi kan kin sewesei en imwintihtio ah doadoahk en kapingahda elen kaudiahl me inenen kesempwal ong mour en palingenitail nan rahn pwukat.

Wehwehpen oh kesempwalpen wauneki mehkot me sarawi inenen sansal nan pwuhk sarawi kan. Ehu wasa nan Tepin Padahk oh Inou kan ekis kasalehda me wauneki Samatail Nanleng oh Sapwellime Iehros Sises Krais wia mwohmw ehu me anahnepe ong irail akan me pahn sohsohkihdi wein selestiel.

Nan mwomwohdisoht kitail kin wia uwen atail kak koaros en kesempwalki oh wauneki Sahmo oh Naho, pil lella nan Mahlen de Kasalepera kan. Kaweid en Ngehn sarawio iei ehu ehu pali me inenen kesempwal ni atail kin pilada mwomwen kasalepera kan pahn kin sansalda duwara sarawi, loalara, oh mwohmwara me Sahmo oh Naho sapwellimanki. Kitail kin wia ni keneinei pwe kitail en dehr kasalehda mehkot me pahn kapirakih kitail sang dahme keioun kesempwal, me iei Samatail Nanleng oh Sapwellime Iehros Sises Krais oh Sapwellimara padahk kan, pil lella duwen atail kin doadoahngki wiepe kapw kan nan pelien technology, me rasehng artificial intelligence (AI), ni atail kin wiahda kilel de kasalepera kan.

Soangen wiepehute pil kin wiawi ohng soahng koaros me kin kohda nan en Mwomwohdisoht wasahn kasaleh kan. Padahk koaros, pwuhk koaros, pwuken kaweid koaros, oh iren kairoir koaros kin wiawihda ni keneinei oh alehdi kamanaman pahn kaweid en Ngehno pwe kitail en kak kolokol wahupen mwohmw oh mwakelel en rongamwahu en Sises Krais. Nan ah padahk ong me pwulopwul kan en nan Mwomwohdisoht, Elder David A. Bednar padahki, “Ma kitail men wiahda pilipil pwung nan wasa kan me pelien palingehn oh pelien technology kin tuhpene ie, Souleng en Imwin-rahn akan pahn kin anahne kapakap ni karakarahk oh (1) kilangada lepin padahk kan me kak kaweid arail doadoahngki artificial intelligence oh (2) nantiheng ni mehlel alehdi Ngehn Sarawio oh kisakis en kaudiahl.”

Rieiko, mendahte uhwen mwahu pelien technology wiahla, e udahn sohte kak kasalehda pwuriamwei, wahu, oh lingan me kin dierek nan soangen wahu me kin kohsang ni manaman en Ngehn Sarawi. Nin duwen atail wia sapwellimen Sises Krais kan, kitail anahne kanaiehng pwe pwukepwuk en nan pwungen kitail oh Koht oh Sapwellimehu en dehr luwetalla pwehki atail pahn kin doadoahngki mehkot de kilel akan me kin sang AI ni sapwung. Kitail anahne tamataman me atail kin likih technology rahn pwukat de ehu “pehn uduk” sohte pahn kin itar oh wia mehn laumwoahmw ong kaweid, kamarain, oh kadehde me kin alahldi sangete ni manaman en Ngehn Sarawi. Nin Nihpai ah kalohki, “O Kaun, I kin likih komwi, oh I pahn likih komwi kohkohlahte. I sohte pahn kiheng ahi likilik rehn kehl en aramas.”

Nan ehu kaudiahlo, Sosep Smith alehdi kaweid me nda me tehnpas sarawi kan me pahn kokouda ong Kauno pahn wia wasahn wahu ong Ih. Nan ah kalkalohk kohdo, atail soukohp, Preseden Russell M. Nelson, kin kangoangehkinkitail ni ngidingid atail kaudok nan tehnpas sarawi en kin wiawi ni wahu. Nan tehnpas en Kauno, kitail padahkada mwomwen atail pahn pidelong rehn Sahmo oh Naho. I kin wiahki mehn kasukuhl mwahu oh e pil kin sairie me ni atail pidelong nan tehnpas sarawi oh kaunop kitailda pwe kitail en iang wia tiahk sarawi kan iei me kitail kin tepki kihsang atail suht oh likawiada likou pwetepwet. Pil duwehte Moses, ma kitail pahn medemedewe mwahu, ma kitail kak kilang me atail kin pwilikihdi atail kediropw en sampah wia tepin atail kin kak kolahng nan wasa sarawi pwehn kawek kitail ohng me sarawi oh mwakelekel kan.

Rieiko, kitail sohte anahne iang doudahla nan kadoken nahna, duwehte me Moses wiahu, pwe kitail en esehla wahu ong mehkot me sarawi oh wihwia kan en atail kaudok ong kauno en kehlailla oh loalla. Ni karasepe, kitail kak diar wahu ni atail kin silehdi imwatail kan sang kaweid en sampah kan. Met kak pweida ni atail pahn kapakap ni mehlel oh karakarahk mwohn Sahm Nanleng ni mwaren Sises Krais oh nantiheng esehla Sounkomouro ni atail kin poadidieng kasukuhlki mahsen en Koht me mih nan pwuhk sarawi kan oh padahk en soukohp akan. Oh mehn kapatapat, soangen wekidek en palingehn wet kak wiawi ni atail kin nantiheng en kapwaida inou kan me kitail wiahieng Kauno ni atail pahn kin peik ong Sapwellime kosonned akan. Wiewia pwukat kin kak elehieng meleilei oh kamwekelehdi loaletail. NI atail pahn kin nantiheng wiewia mehpwukat, e pahn sewese wekidek imwatail kan en wiahla imwen keiru ong palingenitail—wasa me pwoson kak keirda oh Ngehno kin ketket ie, duwehte dahme wiawi ong Moses nan nahnao.

Kitail pil kak ahneki soangen wekidekla en palingehn wet ni atail pahn kin nantiheng patehng sarawi kan en Mwomwohdisoht, me pil iangahki atail pahn kin wekidehng Kauno loaletail kan ni atail pahn kin mehlelki atail kin koulki koul en sarawi kan. Atail kin pwilikihdi—duwehte Moses—sang kediropw en sampah kan, ni mehlel neitail sehl kan de pil mehkot me sohte pahrekehng ansou sarawio, kin sewesei kitail en kak medemedewe atail pahn kin ale kamadipw sarawio, atail madamadau oh loaletail en kin uhlahng Sounkomouro oh Sapwellime meirong en tomwo oh pil medemedewe pein atail inou sarawi kan. Soangen mehlelehng kamadipw sarawio wet pahn wiahda ansou en medemedewehki Sounkomouro me wahun oh Sapado pahn wahdo popohl oh atail mour pahn wekidekla.

Ni imwilahu, kitail kak kilang wekila en palingehn wet sang atail kin ideidawehn Sounkomouro ni atail pahn kin poaden kaudok nan dolen tehnpas en Kauno—atail tehnpas sarawi kan—oh nantiheng momour ni koapwoaroapwoar en inouo, ni mehlel ansou me kitail kin lelehng kahpwal kan en mour wet.

Ngehi oh ai pwoud pil pein lelehngehr ekei ansou sarawi en nahnao ni wahu ni aht kin songosong en momourki padahk pwukat nan aht mour, me elehda wekidekla mehlel nan aht mour en ideidawehn ih. I tamatamante duwehtehte me aio mwo, ahi wie alialu nan pwungen sousou ko mwohn seridi en nait seri keriemen me mehlahte mwurin ah neitikdio, erein ahi pwoud wie mihmihte nan imwenwinio. I tamanda ei kapakapki ineng oh wahu ohng Koht, pekipeki sawas en powehdi kahpwal en kasongosong. Nan ansouohte, pepehm ehu kohdo me inenen kehlail oh dehde nan mohngiongi: Me soang koaros pahn mwamwahute nan aht mour ma ngehi oh ai pwoud pahn doudoulahte, kolokolete popohlo me kin kohsang atail kin momourki rongamwahu en Sises Krais. Soangen kahpwal oh pahtou mwomwen sohte imwi nan ansouo, e uhd wiahla ansou wahu oh sarawi, ansou kesempwal ehu me sewesehier kakehlaka aht pwoson oh kahrehieng aht kin pwuriamweiki inou sarawi kan me se wiahieng Kauno oh Sapwellime inou ong ie oh ahi peneinei.

Rieiko, wauneki mehkot me sarawi kin kahrehda kaping mehlel, kalaudehla peren mehlel, kaweid atail madamadau ong kaudiahl, oh kin kalaudehla popohl nan atail mour kan. E kin kasokehdi nehtail kan pohn pwehl sarawi oh kauhwong Koht loaletail.

I kadehdehda me ni atail pahn nantiheng soangen mwohmw wet nan atail mour en ehu ehu rahn, kitail pahn karakarahkala, kalaudehla atail wehwehki kupwuren Koht ong kitail, oh kakehlakahla atail koapwoaroapwoarki inou sarawi kan me kitail wiahiengehr Kauno. I kadehdehda me ni atail pahn kasamwoh kisakis en wauneki soahng sarawi kan—sohte lipilipil ma kitail mih nan dolen tehnpas en Kauno, nan imwen sarawi, de nan imwatail kan—kitail pahn direkihla wahu oh pwuriamwei lap ni atail pahn diar oh kehn limpoak unsek en Samatail Nanleng oh Sises Krais. I kadehdehki mehlel ni wahu mehpwukat ni mwahr sarawi en Sounkomour oh Soundoar, Sises Krais, ahmen.