Kesempwaliki Mour

E doulahte pil koasoia: “Ih aledier limpoak laud oh utuht sang peneinei kan en nan ai wardo. Udahn e wia mehkot laud ehu. [Ai] pisop oh presiden en Pwihn en Serepein Pwulopwul kan inenen sikila ara doadoahk en kasalehiong ie duwen limpok oh utuht. Ih kilangehr duwen doadoahk en Kauno kakahluwa ie oh ai peneinei. Ward me duwehte ahio iei peneinei ehu me koaros kin anahne, ahpw mehlel ong serepein pwulopwul me duwen ie.”

Serepein menet oh ah peneinei, oh peneinei kan en wardo, kasamwodohr kisin pwutak men nan Pepwuerio.

Preseden Russell M. Nelson kosoia, “Kilel en Sapwelimen Kauno Mwomwohdiso mehlel pahn kin ansou koaros mie koasoandih kan en pwarek Sapwelimen Koht serihkan [Pwarek ni limpoak-kadek] ong emen, duwehte me E wia.”

Ansou me serepein men me sohte pwopwoud kin diarada me e pahn nainekihda seri kiripw men, pwunod en roson mwahu, pwopwilahn palingehn, namenek, pwunod en palien mwohni, peidek kan duwen sukuhl, sohte koapwoaroapwoarki me pahn mie pwopwoud, oh kapahtou en ouraman ohla kan kak, nan ansou en medek oh kapahtou, kak kahluwala serepein men en alehda ahl kei me pahn wahdo medek laud oh koluhla.

Ni kosoi kan sang irair akan me lelohnger oh wewekier duwen medek oh koluhla sang arail iang kawehla liseian, menlau tamataman: Mendahte ma kitail sohte kak wekidala dahme nekier, Koht kak kamwahuila dahme nekier. Mahk kak kohdo sang ni Sapwellime tomwpen mahk sang ni omw pahn sohpeilahng Ih ki mohngiong en koluhla oh akitikitikla.

Lepin kosoi riau kin patehng duwen ipwidi en paliwar akan: iei mour oh mehn pilipil. Mour wia mehkot kesempwal ehu nan pilahn en Samatail o, oh sang ni Sapwellime kosondi kitail kin pereniki mour oh kesempwaliki mour; oh kitail kin kadkadaurete mour ansou me e mie. Kitail pil kin kesempwaliki duwen mehn pilipil—sewese en kakelaka mehn pilipil pwung kan me kamanaman sang rehn Koht me wahdo peren soutuk.

Ansou me lih oh ohl emen ah kin mihla nan ansou kesempwal ehu, sohpai mehn pilipil kesempwal ehu, atail kosondi kan, pehtail kan, atail mongiong kan—ni ngehn, ni paliwar, oh pali en mwohni—kak kapai irahda ira en kehn sapwelimen Sounkomouro limpok oh duwen President Henry B. Eyring ah kosoia, kihong ira wehwe ong ni palingenira, sang “dahme irail medewe me re kilangehr” ohng “dahme irail saikinte kak kilang.”

Preseden Dallin H. Oaks kosoia: “Atail mwekid ong koawehla liseian sohte poasondahsang marain me sansalehr duwen ansou me mour ehu ah tepida. E kohsang ni pein Atail lolokong me koaros seri en Koht anahne kohdo Sampah ki kahrepe kaselel ehu, oh aramas men o pahn sansalki mwohn pwukoaho oh pahn pil doudoulahte ong ni sohng kan me pahn kohdo mwowe.”

Mahsen en Kauno me pilada seri me saikinte ipwidi, ngihl me kohsang Presedensi Keieu oh Wahnpoaron Ehk-riemen o, sohte tikitikla oh kokohsangete rehn soukohp akan en mwehi kan koaros, kin kasansalehda ong dahme Kauno masaniong kitail en wia.

“Mwomwohdiso en Sises Krais en Sounleng en Imwin Rahn-akan kamehlele me mour en aramas wia mehkot sarawi. Ihme kahreda, Mwomwohdiso uhwong kawehla liseian oh kin kaweidki towehkan en dehr pwungki, wia, kangoange, pwain, de sewese aramas en kawehla liseian.

“[Kauno] kin mweidohng mehkot en pweida ansou me:

• Liseiano kohsang ni nenek idihd de nenek nan pwungen peneinei, de

• Emen semen en roson mwahu kasawiadahr me mour en aramas liseiano kak ahneki kahpwal, de

• Emen semen en tohkte kadierekda me kisin serio ahneki soumwahu me sohte pahn kak momour mwurin ah ipwidi.

Keieu en Presedensi doulahte oh kosoia: “Kawehla liseian wia mwekid kesempwal ehu. [Mendahte nan irair apwal pwukat] e pahn petehk mwahu ma aramaso alehdier kamanaman sang ni kapakap” oh alehdier sawas sang mehteikan.

Sounpar silihsek samwalahro, sapwellimen Kauno soukohp akan kasaledahr kalohk ehu ong Sampah. Me iangahki lepin kosoi pwukat:

“Kiht se kalohngki me Koht ketkihda kosonned me manaman sarawi iei en wiahda mour nan pwungen ohl oh lih, me kapwopwoud ni pwung en kosonned ni duwen ohl oh lih pwopwoud.

“Se kalohngki me wiepe me mour en pohn sampah kin kepikipikda koasoandihsang powe. Se kamehlele kesempwalpen mour oh kesempwalpen sapwellimen Koht pilahn poatoapoat.”

Apwalih oh doarehla mour me saikinte ipwidi kaidehn kosondi ehu. E wia kosonned laud ehu me kamanaman lahr sang sapwellimen Kauno soukohp akan.

Ehu iren mahsen sang Presedend J. Reuben Clark Jr., me wia Presedensi Keieu, kawehwehda ni lingan duwen me pwulopwul kan rahn wet: “Me pwulopwul en Mwomwohdisoht men wia soahng kan me pid Ngehno; irail ngoangki esehla duwen rongamwahu wet, oh irail inengieng ni mehlel. Irail men esehla duwen dahme kitail kin kamehlele kan; irail men kakehlailihla arail kadehde kan duwen [me] mehlelo. Irail wia soun alehda, soun rapahki duwen mehlel o.” Kitail kalapw kosoia duwen pwoson oh mahk ohng neitail me pwulopwul kan, nan ihmwatail kan, oh ohng emenemen nan atail Pwihn en Lih kan oh tuhpenen pwihn en ohl kan, duwen kosonned mwakelekel en Kauno, sarawi en mour, oh epwelpen seri me saik ipwidi oh arail nohno kan.

Emen lih kesempwal intingihdo dahme e lelehng sounpar eisek samwa samwalahro: “Ni ahi sounpar 17,, I diarada mei liseianda ni ei sohte alehda utuht sang ahi kahso. Ih ahnekidar namenek oh kin totohror [ahpw] Ih sohte medewe iehn [kawehla]. Ih [ahneki] peneinei limpok ehu oh pil ai bishop, me Ih kin tuhwong Ong ni kaweid. I pirekekila rehn Koht. Ih onopiki pwuhk sarawi kan oh kapakapkier [oh] diaradahr kehlail rehn ai Sounkomouro oh ni wiepen koluhlao. Ih alehdier ai pasapeng [Ong ai kapakap kan] me Ih sohte kak kamahmki. E inenen kahpatou, ahpw Ih ese me Ih pahn kihla nei serepeino pwe en pwokpwokla, Ih kapakapki kehlail [oh kehndahr sapwellimen Sounkomour o limpok sang ni koluhla, I ese me Koht sapeng kapakap kan oh kakehlailih kitail.”

Pwopwoud limpoak ehu pwokasang nei serio oh padahkiehng duwen rongamwahuo. Ansou et e pwopwoudehr oh ahneki peneinei mwahu ehu.

Nan ansou kan, kahpwal laud oh pwunod kin iangedo epwelpen mour ehu.

Me keren pwopwoud pwulopwul ehu me ngehi oh Kathy kin poakpoake intingdo dene ira liseian.

Pahpao intingiada: “[Ansou me ai pwoudo mihmi] Nan wihk 10 en ah liseiano se diarada me nait serio mihmi ni kahpwal en soumwahu genetic condition of trisomy 21, me kin dehdeki Douwn Syndrome. Se ahnekidahr pwunod sang rehn irail semen kan oh medewedahr sehn kawehla aht liseiano. Mwurin wihk kei mwuri se diaradahr me nait serio pahn anahne songesongen koadoahkpen mongiong kei Nan pahr keieu en ah momour. Nan irair wet ni aht kin wie kapakap ki sawas, se kehndahr duwen Ngehno ah kihong kiht insenamwahu. Se alehdier kaudiahl oh wehwe me nait serepeino wia seri kesempwal emen rehn Sahm Nanleng oh inengiong en mih Nan aht peneinei oh kohdo pohn Sampah.”

An seriet nohnou intingihdi: “[Se] inenen pwuriamweila, pweipweikihda, oh pwuriamweikihla rohng wet. … Ansou me Ih mihmiki wihk 14 ki Nan liseian, se diaradahr me nait seri o ahneki diren soumwahu en mongiong, ehu me pahn kakete elehiong mehla. Se kin tuhwong diren toahkte oh soun sawas teikan sangete ni ai wihk 10–18. Ni ehu ehu en aht appointment kan, irail kin kalapw idek reht ma se men kokohlate mwowe de sehn kawehla aht liseiano. Sounkomour o kamwahuila ai mongiong oh kihong ie meleilei oh peren duwen nait serio. [Sahm Nanleng] kin kasalehiong nan ansou kan koaros me mie Sapwelime pilahn ohngie [oh] Ih kopworopworiki Ih.”

Ira kasamwohdo ni peren niera serepein pwelelo wihk ehu samwalahro rahnwet. E wia neirail serepein oh irail wiahla kisehn ih.

Pwoson oh kehlail wia kisehn tohn dodohk kei en Sises Krais.

Nan sounpar kan, I ahneki ansou mwahu kei en tuhwong irail akan me lemedahr en pwuredohr pohn ahl en inouo oh ong arail prihsduhd oh kapai kan en tehnpas sarawi, mwurin sounpar tohto kei mwurinte arail kesehla neitail doaropwehn wia towe mehlel kei en mwomwohdiso.

Ehu kapokon o, Ih pahn weliandi Keieu en Presedensi oh tuhwong ohla emen Ong ni kapwurupwurdohn nah prihstuhd oh kapai kan en tehnpas sarawi.

Mwurin ah kopwopwoud Nan tehnpas sarawi, oh mwurin ah nainekidahr seri silimen, ohlo sohte kin mehlel Ong ah pwoud oh ah inouo sarawi kan. Lih emen me sohte pwopwoud liseiandahr oh men kawehla.

An ohlo pwoudo peki rehn liho en dehr kawehla oh e pahn inoukiong ih me e pahn apwaliada serio, ansou me e pahn ipwidi, duwehte pein nah seri.

Lih sohte pwopwoud menet eri pwungkidahr me e sohte pahn kawehla ah liseiano.

Met e sounparehr eisek. Sister menet me mih mwohni poakohng kisin pwutako duwehte pein nah oh padahkiong duwen an ah pwoudo ineng en kamwahula oh en poakohng oh apwalih Ih oh ah peneinei. Pahpao sengiseng ansou me e kosoi o.

Ia mwomwen lih mwahu menet en Koht ah kak ale seri men wiahkila pein nah me pahn kin katakatamankiong Ih duwen sohte mehlel en ah pwoud Nan rahn koaros? Ia mwomwe? Pwehki e diarada kehlail rehn Sises Krais oh e kamelele mour, me inenen sarawi. E ese me serio wia sapwellimen Koht seri men, me mwakelekel oh sohte dipe.

Riei Souleng ko, tikitiklahn limpok Ong seri kan me saik ipwidi Nan Sampah wiahlar mehkot laud ehu. Koht kin pereniki mour. Sapwelime dodohk oh Sapwelime lingan en wahdo mour oh mour soutuk rehn Sapwelime seri kan. Ni atail wia werek en Sises Krais, kitail kin pereniki mour. “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” Kitail ehukiwei atail limpok ong irail kan me inenen anahnei kitail. Ih kasalehwei ai limpok ong uhk oh sapwelimen Sahm Nanleng limpok ong Sapwelime seri kan me kokohdo Sampah. Ni mwaren Sises Krais, ahmen.