Kisakis Soutik Keieu Kesempwal: Tomwpen Sises Krais, Iasadahu, Kopwurupwurdohu

Pahr kei samwalahro, nan aht kilahs en nimenseng se kin wadlikihla ire kei nan Pwuhk Sarawi. I kin perenki wadek ire me mwotomwot kan. Met iangahki Sohn 11:35—ire tikitik me keieu mwotomwot nan pwuhk sarawi, lepin lokaiahte riau—“Sises Tentenihr.”

Ohngie met, pwehki Sises ah ketin tentenihrki lokolok oh popohl e kadehdehda duwen manaman kopwuriamwei me sansalda: sapwellimen Koht Iehros kesempwal ketido ni paliwar oh wehwehkihda sang ni uduk pwehn kak ieiang kitail oh kapai kitailda ansou koaros.

Ansou me kitail kin mwahieiki atail insensuwed de popohl, Sises Krais mwahngih soahng koaros. E kak ketin ket wasahu ansou me kitail udahn anahne kisakis soutik kesempwal kan: Tomwpen Sises Krais, Iasadahu, oh pil kopwurupwurdohu.

Mary oh Martha mwahieiki riara pwutak Lazarus, me melahro. Pwehki limpoak, Sises ketin pahtoula. E ketin kapwurehdo en Lazarus mour.

Sises mwahngiada Serusalem ni soutik en Pahsohpa. E ketin tentenihr, sohte kihpene Sapwellime aramas akan rasehng litok emen ah kin pwaindi nah pwurok kan. Rahnwet Sapwellime Tomwo ketkiheng kitail koapwoaroapwoar nan ansoun lokolok ohng dahme kakete pwarada.

Kaun en mwetin waino ketin tentenihr ansou me E ketin peki rehn Sapwellime lidu ko, mehnia me pahn kak kapatapatehng kitail nin duwen papahih riatail ohl oh lih akan, “Mie mehkot me I sapwungala oh sohte wiahiong ei mwetin waino?”

Mary kesihnen ni wasahn serdio mesen sengseng. Sises ketin idek, “Dahme ke sengisengki?” E mwahngih me “pilenmas kin kak kereker nipwong, ahpw peren kin leledo nimenseng.” Iasadahu wahdo kamarain ohng koaros.

Nan Pwuken Mormon mahsanih, ansou me loaloapwoat tohtohie ahr pahn kesihnenkihda Ih, popohl en Sises kin ketin unsekla. E ketin tentenihr.

“Oh e ahpw ale neirail kisin seri kan, wad emen, oh kapaiada irail, kapakapkin irail ong Sahmo.

“Oh ahnsou me e ketin wiaier met e ahpw pwurehng tentenihr.”

Met wia Ihster en Sises Krais: E kin ketin sapeng dahme loal nan atail mohngiong kan oh peidek en loalatail kan. E kin ketin limwihsang pilen masatail kan, ahpw kaidehn pilen mas en peren kan.

Ansou me pilen masatail keredi, kitail kin pekmahk ekeipak, sarohki. Ahpw pwehki Sises Krais ah ketin mwahngih medek en mour oh popohl kak kiheng kitail kehl me laudsang dahme kitail kakehng sang atail pahn mweidohng en mwahu de soh.

Nan South Amerika, emen pahpa mwahiei. Nah serepein tikitik, me wia kahrepen ah mour, mehla. E kolokol nah serio wie sengiseng kin inda “I pahn wia soahng koaros pwe ieng pilehu kilangedi”. I pil sengisengki.

Emen lih wie pilen mese wie kerekerki peren ni kasarawi en Tehnpas Sarawi en Puebla Mexico. Ah soaio kasalehda duwen pwoson oh tohnmetei. E inda, “Todos mis hijos estan aqui en el templo hoy”—“Nei seri koaros mih nan tehnpas sarawi wet rahnwet.” Dih kan me kohpene nan tehnpas en Kauno kin kakerehdi pilen mas sang ni popohl oh kalahngan.

Nan mahwen suwed kan kin kahrehieng peneinei oh mehn imperail kan kin koasoipene sohte mwahu nan pwungarail. Sengiseng tikitikilahr oh koapwoaroapwoar mihmiedahr. Ngilehu wie rerrer, emen lih nan kisin kousapw ehu inda, “Kempoakepahi, mwohn ai pahn kohla nan ai sousou, I men ken ese iawasa me ke pahn diar ie amw peneinei salongalahko.”

Pwopwoud masamwahu ehu katengtengpene nan tehnpas en Kauno. Ira koaros sounpar 70. Lih kamwohd kaselelo, e loaloapwoat awiawih leledo rahn wet. E mwur namenengki ah likou en kapwopwoudo ni mwohmw wet, ahpw ni mwohmw teio. Pilen mese kerekihdi popohl. Sapwellimen Koht inou kan kin pweida. Sapwellime inou kin wahdo kapai kan.

Ni Boyd K. Packer ah pwulopwulo e esehla kasukuhl mwahu ehu sang ni ah kin pwukoahki pwarek liohdi men. Liho kosoiahda mehkot ehu me kamedekehng me ah pwoudo kosoia mwohn ah mehlahu me e sapwungki. Aksidend soh kesikpehiu wiawi kahrehieng ah pwoudo ah mehla rahno. “Sounpareh limeisek,” liohdio mwahieidi indinda, “I kin mihmihki nan ehl medmedewe ah lokaia me e lahsin indahko ih ngalngalis kilin ewehu inda, udahn laumwoahmw.”

Ihster en Sises Krais seweseie I en kamwahuiala, wehwehkihla, kapwungala nan pwungat, nan mour wet oh nan sapwen ngehn. Sises kamwahuiala insensuwed; He kahrehda ah mie mahk. E kak kapitasang kitail oh mehteikan sang soahng kan me kitail oh irail inda oh wiahier pwehn kihkitailpene.

Ihster en Sises Krais kiheng kitail pepehm en mweimwei sang rehn Koht. Sampah wet kin kosoiahieng kitail me kitail nohn reirei, nohn mwotomwot, nohn tehlap, nohn tehtik—pweipwei, masamwahu, de kin itar ni pali ngehn. Sang ni wekilahn palingehn rehn Sises Krais, kitail kak pitsang soangen pepehm en kaluwet pwutak.

Sang ni popohl en Ihster, kitail koulki, “Mehla lohdier; aramas saledeklahr. Krais ketin pweidahr.” Iasadahn Krais kapitasang kitail mehla, sang ansoun ahnki luwet oh sohte unsek en paliwar kan. Tomwpen Sises Krais pil kapwurehdo ngehno. E ketin kakerehdi inta nan pwoaren kili koaros, sengisengkihla inta, pwehn kapitasang kitail dihp oh uhpene. E ketin kihkitailpene, wiahla ehu oh sarawihla, ohng emenemen oh Koht. Ni soahng koaros, Sises Krais kapwurehdo—kaidehnte dahme wiawiher ahpw dahme kak wiawi.

Sapwellimen Sises mour oh marain kadehdehda sapwellimen Koht limpoak ohng Sapwellime seri kan. Pwehki Koht Sahm poakehng Sapwellime seri koaros sounpar koaros oh wasa koaros, kitail kak diar Sapwellime luhk en kohdo diarada meleilei oh popohl Reh ni soangsoangen mwekid oh tiahk kei. Sohte lipilipil wasa, sohte lipilipil ansou, sohte lipilipil ihs kitail, kitail kak kasalehda duwen serien en Soun Kepikipikohte. Ni soangen ngehnohte, souleng en Islam, Judaism, oh Christianity kin ehuki poadoapoad en Pahpa Abraham oh inou me dokehng mehn Isip en mahsoko.

Pahpa Abraham kohdo Isip oh kapaida.

Sosep, me netila nan Isip, ese en Parao ouramano me wewehki sounpar isuh diren mwonge oh sounpar isuh mwuri lehk lapalap. Sosep kapitala ah peneinei oh nah aramasko. Sosep senginsengkihla ansou me e wehwehkihda sapwellimen Koht koasoandi lapo, wasa me soahng koaros pwungpene ie ohng irail me kin kolokol arail inou kan.

Moses, tikida nan Isip nan imwen Parao, alehdi oh mwuhr kapwurehdo kih en kihpene sapwellimen Koht seri kan.

Kapwaiada kokohp, Sosep, Mary, oh seri pwelel Sises pitila nan Isip. Nan Cairo, emen mehn Muslim me poadedi ahpw kosoia: “Pwihn en Quran padahki me Sosep, Mary, oh seri Sises pitila oh sarawihla nan sapweio. Nan sapweio, Sises ni ah wia sin seri e kang kanat mwenge, tepda alu, oh tepda esehla lokaia. Nan sapweie, se kamehlele me tuhke kan mwotoudi pwehn kiheng Ih oh Ah peneinei wahn tuhke. Ah mwekid kapaiada nait aramas kan oh sapwato.”

Sapwellimen Koht pilahn en mour wet oh saledek en pilipil en mour wet kiheng kitail ansou mwahu en esehla sang dahme kitail kin pein lelehng. Ekei kasukuhl en mour mwahu kin kohdo sang soahng kan me kitail sohte kin pilada. Ni limpoak, Sises Krais ketdihdo pahnangin oh ketdahla pohnangin soahng koaros. E ketin kepinga mwekid sarawi me kitail kin wia oh perenki, kadek ni sohte ketingpe, pwosonki koluhla oh mahk. Oh E ketin tentenihrki lokolok laud en apwal me kitail kin lelehng, lemei, sapahrek—me kalapw kohsang ni en aramas pilipil—duwehte Koht en nanleng ah sapwellimanki audepen nanleng kan.

Ehu ehu rahk en Ihster me kadehdehda duwen ngenen kairekehdi oh ehupene wia kisehn koasoandi sarawi en tomwo, iasadahu, oh kopwurupwurdohu pwehki Sises Krais. Ehupene sarawi oh kasansal sohte kin wiawi mwahl. Rahn Sarawi en Rahmwus, Wihk Sarawi, oh Ihster kawahuih Tomwo oh Iasadahn Krais. Ohng rahnet, Epreil 6 kitail kin kataman kokouda oh koasoandi en Mwomwohdiso en Sises Krais en Souleng en Imwin-rahn Akan. Kopwururpwurdohu wia kahrepen atail kohpene Rahn Sarawi keieu en Epreil koaros ni tiepene lap.

Kopwurupwurdohu pil wiawi pwehki sang iasadahn Sises Krais, Moses, Elias, Oh Elijah ah kapwurehdo kih kan en prihsduhd oh mweimwei ni kasarawi kapw en Tehnpas Sarawi en Kirtland ni Rahn Sarawi en Ihster, 1836. Ni koasoandihn rahno kohdo lel ni kopwurupwurdohn Mwomwohdiso en Sises Krais kahrehieng mweimwei en Koht oh kapai kan ah kihpene Sapwellime seri kan, kaunopehng Sapwellime seri kan en pwurala Reh, oh kihpene peneinei kan kohkohlahte. Kopwurupwurdohn rahno kapwaiada kokohpo sang pali en Ihster oh Pahsopa koaros.

Iangahki Tehnpas Sarawi en Kirtland, I ahpwte pwarek wasa sarawi kan nan Ohio wasa me Soukohp Joseph oh ekei me kilang kasansal en Koht Sahm oh Nah, Sises Krais. Soukohp Joseph kilangada ia mwomwen nanleng. Nanleng, Sahm Nanleng, iangahki Sises Krais, “kapitala doadoahk koaros meh ketikiher” sang ni wehi lingan ehu. Ihte me sohte iang iei irail me inengieng “sapwungki Iehroso mwurinte Sahmo ah kadaredohng kitail ih.”

Sangete ni Ah tapiada sapwellime doadoahk nan mour wet, Sises ketin kasalehda Sapwellime misin pwehn kapaikitailda ong ehu ehu kapai koaros me kitail pahn ale—ansou koaros, wasa koaros, oh ni soahng koaros. Mwurin kaisihsolki rahn 40, Sises ketila ni sinakokehu oh wadek, “Ngenen Kauno ketier rehi, e ketin keiehdier pwe I en kapahrengkihong me semwehmwe kan rongamwahu; E ketin poaroneiedohr pwe I en lohkihong me sensel kan ar saledek, oh ong me maskun kan ar kakehr kilangada wasa, oh pwe I en kasaledekala irail kan me mihmi nan apwal .”

Me semwehmwe, insensuwed, sensel, maskun, apwal—emenemen kitail met.

Pwuken Aiseia kadokehlahte inoupen Mesaiahu me pid koapwoaroapwoar, kapitasang, kasikpe: “I en kihong irail kan me kin insensuwed nan Saion, … peren oh insenamwahu kaidehn pahtou, re en pereperen kokoulki koulen kaping ahpw kaidehn koulen kadepwidepw, kapikapingahki Koht wiepen nin lime kan.”

Eri, kiht wie werwerki, “Serusalem kin ngisingiski oh pereperenki soahng kan me Kauno, ketin wiahiongehr; Koht ketin kalinganahkilahr Serusalem lingan en komour oh roson en powehdi.”

Ehu ehu ansoun en Ihster, kitail kin kawauih, nin duwen kansansal ehu, kisakis soutik me keieu laud pwehki Sises Krais; Sapwellime Tomwo; Sapwellime (oh inou kan en atail) Iasadahu; Kopwurupwurdohn Sapwellime Mwomwohdiso en imwin-rahno me iangahki kih kan en prihsduhd oh mweimwei en kapaida sapwellimen Koht seri kan. Kitail kin kapingahki sapwellime lingan komour kan oh roson en powehdi. Kitail kin werikihda, “Ohsahna ong Koht oh Sihmpwulo!”

“Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

Emenemen kitail en diarasang rehn Sises Krais duwen sapwellime tomwo, isadahu, oh kopwurupwurdohu—meleilei, wiahla, oh patehngala—me iei ihme pahn mehlel erein oh popohl, peren oh kohkohlahte, me I kapakapki ni Sapwellime mwahr sarawi, Sises Krais, ahmen.