Oh Se kin Koasoaia Krais

Ni kaimwseklahn ehu hat pwukoah, ngehi oh ahi pwoud, Lesa, kohla ni airport o pwehn onopehng aht pahn pihrda—sounpihr en ninsorahn—pwe sen lella nihmwo. Ni aht mwekmwekid kohda ni lain reireio, se kak kehn me diren tohn laino wie pwunpwunod pwe re sehse ma re pahn kak iang pihrda, koaros daudawih passport oh visa, oh lau lel wasahn sikiuridy teko.

Se lella ni sdeisin ieu me emen pwolihs mihmi ie me mwomwen sohte mesen pwunodki soahng kan me wihwiawi nan perehu. E kereniengte, ni ah sohte kilengdo, ale nei daropwehko, kilang kileleio, kilkilang nan teh koaros en nei daropwehko, oh eri sdampihla nei passport o.

E uhd engelahng nein Lesa daropwehko. Sohte mwomwen mehkot, e itiekdi pah oh insenohki ah doadoahk, e kilkilang mwahu nan teh koaros, tetehk mwahu soahng koaros nan daropwehko. Se mwur pwuriamweiki ansou me e wiahkintehiu uhdi, sarada, oh kilenglahng Lesa ni kadek oh nsenamwahu. E sireilahng, oh sdampihla nein Lesa passport o oh kapwurehiong nah daropwehko. Ahi pwoudo pil sireilahng, ale nah daropwehko, oh rahnmwahuihala.

“Dahme ahpwte wiawio?” I idek.

Lesa ahpw kasalehiengie dahme liho kilangadahu—kisin card kis me kilel en Sounkomouro mih ie. E pwupwieisang nan ah kopwouo oh pwupwidieng nan nah passport o. Met iei me pwolihso kilangadahro. Met iei me wekidalahr mwomwen pohn mesehu.

Kalahngan oh Mehlel, sang Simon Dewey, kalahngankihong altusfineart.com, © 2025, doadoahngki mweimwei

Kisin kilelen wet en Sounkomouro sair mohngiong kan en meh riemen me sohte pesepene. E wekidalahr ara mwekid ohng emenemen, alehdi linganpe, manamanpe, oh kasansalpen Marain en Sises Krais. Erein rahno pwon oh pak kei mwuri, I kalapw katamanda rahno, me mwomwen sohte mwomwe oh kin kapingki lingan oh kalahnganki lipwalipw en Marain en Krais ohng sapwellimen Koht seri kan.

Kitail kin idawehn Sises Krais, oh kitail kin rapahki en alehdi oh ehuki Sapwellime marain. Met wehwehki me eden Mwomwohdiso iei kitail en onopki duwen “Sises Krais ah wia takain pwukekeimw.” Sangete soukohp en mahs oh soukohp en rahn pwukat, Samatail Nanleng poahngokiheng kitail en “Rong Ih!”oh en “kohdo rehn Krais.” “Se kin koasoaia Krais, se kin perenki Krais, se kin kalohngki Krais, [oh] se kin kohpada duwen Krais.”

Se kin padahngki me Sises Krais iei Sapwellimen Koht pwutak, oh erein Ah ketket sampah, Sises ketin padahngkiher Sapwellime rongamwahuo oh kauwadahr Sapwellime Mwomwohdiso.

Se kadehdeh me ni imwilahn Ah mour, Sises ketin tomwkihla dipatail kan ansou me E ketin wie lokolok nan Mwetuwel en Kedsemeni, kalohpwualahr pohn lohpwuo, oh mwuhr iasadahr.

Se perenki me pwehki Sapwellime meiroang en tomwo, kitail kak mwakelekelda sang oh alehdi mahkepen dipatail kan ni atail pahn koluhla. Met kin kiheng kitail meleilei kahrehieng atail pahn kak pwurala rehn Koht oh ahniki popohl unsek.

Se kohpada me pwehki Iasadahn Sises, mehla kaidehnte sohte imwi ahpw e wia kendake kesempwal ehu ong wenla mwowe. “Kitail koaros pahn iasada mwurin mehla. Met wehwehki me paliwar oh ngenen emen emen kitail pahn pwurpene oh momour kohkohlahte.”

Soukohp momour en atail mwehiet—me kin alehdi kaudiahl sang Koht pwehn padahkih oh kaweid kitail—kin kalapw wie luklukei kitail en kohdo rehn Krais. Irail kin sewesei kitail en poahsoanki atail mohngiong kan, salengatail kan, masatail kan en kilang Ih mwahu. Kitail kak kilang karasaras tohto me pid wekdekla oh kalaudla kan me pakairdahr sang Presedensi Keieu me kin dokehte Sises Krais. Ekei iangahki mepwukat:

• Koasoandi en sohla inda “Mwomwohdiso en Mormon” oh uhd wiliankihdi pwungin edehu, Mwomwohdiso en Sises Krais en Souleng en Imwin-rahn Akan.

• Kilel kapw kan en Krais me kakehr sansal nan imwen sarawi kan.

• Oaralap oh koul kan ong peinakapw oh mwahnakapw kan poahsoanki Sises Krais, me duwehte “Disciple of Christ” oh “Look unto Christ.”

• Kasansal laud duwen Tomwo oh Iasadahn Sises Krais me wia kemwekid lingan kei nan poadoapoad en sampah.

• Kawahupen rahk en Ihster ni ah wia sihsen ehu oh kaidehnte rahn kesempwal ehu, me kesempwalpehu iei Sises Krais.

• Kapehsehpen kilel me wia kasalehpen Mwomwohdiso en Sises Krais oh dahme e wiliandi.

Kitail tehk ni pisetik ekei lipwehkan. Keieu, kasansalpen Mwomwohdiso wet.

Nan pahr 2020, Preseden Russell M. Nelson kapehsehda kilel kapw ehu en wia kasalehpen Mwomwohdiso wet. Kasansal wet kasalehda pwuhng me Krais wia poahsoan en Sapwellime Mwomwohdiso oh anahne wia poahsoan en atail mour kan. Met kitail kilangehr kasansal wet pohn kisin likoun mweimwei en tehnpas sarawi kan, nan wepsaid oh makesihn kan en Mwomwohdisoht, kilel me mih ni Gospel Library app, oh iangahki ID en sounpei kan me wia tohn Mwomwohdisoht. Kilel wet iangahki eden Mwomwohdisoht me mih nan pwukekeimw ehu, me wia katamanpen me Sises Krais iei takain pwukekeimw, me sansal wasaht ni Lokaiahn Cambodia oh ni soangen lokaia 145 kei.

Poahsoan en kasansal wet weliandi sansal takai en Christus me Albert Bertel Thorvaldsen paradahu, me wiahla kisehn Mwomwohdisoht oh kin mih ni wasahn mweimweit kan oh likin tehnpas sarawi kan nan sampah. Kesempwalpen met ni kasansalpen Mwomwohdisoht kin kasalehda me Krais anahne wia poahsoan en soahng koaros me kitail kin wia. Me rasehng, limen Krais ah kin kapahwei pwehn kasalehda Sapwellime inou en pwoalehdi koaros me pahn kohdo Reh. Kasansal wet wia kilel en limpoak en Sounkomour Sises Krais oh wia ketemenpen Krais me ieiaso.

Sang ahi men esehda, I idek rehn peneinei oh kempoakepahi tohto duwen ire kesempwal ehu me pid kasansal en Mwomwohdisoht. Ni ahi kompwuriaweiki, me tohto sahn oaritik sarawi me e kin kasalehda. Sises Krais kesihnen pahn wenihmwen sousouo. Met wia weliepen Sounkomour iasadahro ah ketieisang nan sousouo. Kitail kin mehlelieng kawawih Krais ieias, me iasadahro, ni atail doadoahngki kasansal en Mwomwohdisoht.

Met kitail uhd tehk mwahu kesempwalpen Ihster. Nan mahsen kan me Presedensi Keieu ahpwte kihda me pid Ihster, re kangoange kitail en “kawauwih Iasadahn Sounkomour ieiaso ni atail pahn onopki Sapwellime padahk kan oh sewese tapihada tiahk en Ihster nan atail wasa kan koaros, mehlel nan atail peneinei kan.” Ni mwotomwot, re kangoangehkin kitail en kalaudehla oh kasarawihla kawahupen Ihster.

I kapingki kaudiahl me pid duwen Ihster oh I perenki amwail doadoahk laud pwehn wiahda Ihster en wia ansou sarawi oh kesempwal ehu. Pwehn kapatahieng awa-ehu en mihting en kamadipw sarawi en Rahn Sarawi en Ihster, karasaras teikan en kemwekid kan iangahki sarawi en ward oh stake kan oh kemwekid kan ni Rahn Sarawi en Rahmwus pil iangahki kemwekid kan erein Wihk Sarawio. Mehn kataman pwukat iangahki kemwekid en seri kan oh pwihn pwulopwul kan oh kin kalapw patehng pwihn en koul kan sang mwomwohdiso teikan. Ekei kin wie kamadipw en “Krais Ieias” rehn towe kan oh kempoakeparail kan oh patehngehr nan kemwekid kan en Ihster rehn tohn mwomwohdiso teikan nan arail kousahpw kan.

Kemwekid pwukat kin wia kairoir en pokono nan kahnihmw en Serusalem ansou me irail kokoulpene pwe irail en kin kepinga Sounkomouro ansou me E ketket kohdo. Me pahrekehng iei repwoht en amwail wiewia luhk me sang Presedensi Keieu en kaudokpene rehn amwail peneinei kan pwehn kawauwih rahn en kommoal keieu kesempwal wet.

I kamehlele me kaudokpene nan peneinei nan ansoun Ihster inenen kekeirda mehlel. Sounpar riau samwalahro, I padahki duwen en aht peneinei koasoandi en kamwahuihala mwomwen aht kin kawauih Ihster. Ni mehlel, e wie mwamwahula. Se kin kalapw perenki mwengehn Ihster en Rahn Sarawi kan, pahsked en Ihster kan, oh repen kitohr en Ihster, oh e duduwehte lel met. Ahpw, kapatahieng soahng sarawi kan me kin uhlahngete Sises Krais oh Sapwellime Tomwo ohng aht kowouo wahdoh pahrek mwahu ohng aht kin kawauwih rahn sarawi kesempwal pwukat koaros.

Pahret pahn wia kesiluh en aht mweidehng Ihster en poahsoanki-Krais. Me rasehng soaipen Sises Krais ni Krismas, Rahn en Ihster nan ahi peneinei kin iangahki koasduhm, wadawad en iren pwuhk sarawi sang nan Kadehde Kapw oh Pwuken Mormon, koul, kilel en Ihster kan, tehn paini kan—oh ekis liseliping, ma I udahn mehmehlel. Serihkan oh serihlap kan wadwadek oh kapwkapwurehiong kaping kan en Rahn Sarawi en Rahmwus “Kaping … Koht en ketin kupwuramwahwih me ketiket kohdo ni mwaren Kauno! Kaping ong Koht!” oh “Soukohp Siseso met … mehn Kalili” me uwen kesempwal duwehte “mwehi kapohl nin sampah ong aramas akan me e kin ketin kupwuramwahwih” ni ansoun Krismas

Met se pil kin pereperenki soangsoangen mehn kalingan kei. Dahme mahs pid ihte rapit oh kutohr en Ihster kan met pahreklahr pwehki Christus oh kilel kan en sousou tehno, Sounkomour iasadahro me pwarada nan Mwetuwelo likin sousouo, oh en Sounkomouro ah pwarehng mehn Nihpai ko. Se pil songosong wiahda Ihster en wia rahk ehu kaidehnte rahn ehu. Kitail songosong en kalaudehsang koaskoasoiahte, medmedewehte, oh kawauwihte Rahn Sarawi en Rahmwus oh Alem Sarawi oh kemwekid sarawi kan me kin wiawi nan erein Wihk Sarawio.

Ihster kahrehieng kitail en wauneki meiroang en tomwpen Sises Krais oh kaperenpen Sapwellime Iasadahu. Atail mohngiong kin toutou ni atail kin medewe lokolok en Sounkomouro nan Mwetuwelo oh pohn Kalpwerio, ahpw atail mohngiong kan kin peren ni atail kilang me sousouo sohte towe oh koasoandi en nanleng me, “E ketin iasadahr!”

Presedensi Keieu ahpwte kangoangehkin kitail en “kaskasik Ihster oh Iasadahn Sises Krais—me keieu lingan nan mahsen koaros ong aramas akan” wia kahrepe laud nan mwei wet. E sansal me soun onop en Krais kan kilang Iasadahu ni mwohmw en karasaras ehu oh kasansal ehu, se men kasalehda me atail padahk iei “Iasada wehwehki me koaros me momour pahn iasada, oh Iasadahu udahn mehlel.” “Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.” Sises Krais ketin kamweidkihpeseng selin mehla ohng koaros me momour.

Meid kopwuriamwei ohng kitail ni atail kesihnenki kalahngan me Sises ketkiheng kitail. Kitail kolokol Sapwellime mahsen kan me “Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.”

C. S. Lewis koasoia me “kalohk en pelien lamalan wehwehki [ohng Wahnpoaron ko] en kalohngki Iasadahu. … Iasadahu me wia poahsoanpen oaralap en padahk koaros duwen Krais me intingdier nan Wiewia kan. Iasadahu, oh kiseh kan, me wia ‘rongamwahu’ de rohng me mwahu me soun kamehlele kan en Krais wahdo.”

I kadehdeki me “mie iasada, … sousou sohte kak powehdi, oh Krais powehdier tehtehn meninkau en mehla.”

Ni kaimwsekla, I kadehde me koaros me alehda luhk kan me sang atail soukohp ieiaso oh nah sounsawas kan en kalaudehla arail inengieng kawauwih kemwekid sarawi kan me Ihster wiliandi pahn diar arail ehuieng Sises Krais pahn keirda oh kehlailla.

Rahn kei samwalahro, I esehda duwen nohno kahlap emen me soaiahda duwen Ihster ohng nein nah seri-pwutak-sounpar pahiu ni ah kin doahdoahngki kilel en sousouo, oh takai me ritingala sousouo, Sises, Mary, tohn padahk kan, oh tohnglengo. Kisin pwutako kilang oh rong mwahu ah nohno kahlapo ah ehuki duwen seridi, ritila oh ritidahn sousouo, oh kasansal en mwetuwel en Iasadahu. E pilehu kapwurehieng soaio ni ah koasoi rehn ah pahpa nohno indinda soahng koaros ni ah kamwakid seli kilel ko. Mwurin mwo, peidek kohieng ma e ese dahme kahrehda miehki Ihster. Kisin pwutako sarada oh nin duwen seri men e sapeng, “Apwe E ieias.”

I men kapatahieng ahi kadehdeh ohng en serio—oh ohng amwail kan oh ohng tohngleng kan oh soukohp akan—me E ketin iasadahr oh E ketin ieias, met iei me I kadehdehki ni mwaren Sises Krais, ahmen.