Mihmi Mwohn Masatailkat

Riei ohl oh lih akan, I inenen kapingki ahi kak patehng kumwail. Se poakohng kumwail, se kapingkin kumwail, oh se ahneki pepehm en kapaida sang ni amwail kapakap kan.

Preseden Russell M. Nelson mahsaniher nan atail tiepene lap me apwte neko: “Kumwail kin kilang dahme wihwiawi mwohn masatail kat? I kapakapki kitail en dehr katiasang ansou kesempwal wet! Kauno ni mehlel ketin kamwakamwadangahla Sapwellime doadoahk.”

Kamwakamwadangahla Sapwellime doadoahk. “Kamwakamwadangahla” iei lepin lokaia kesempwal ehu. E wehwehki en mwekidwei mwadang, wie marahrahla, oh pil karuwaru. Nan keirdahn Mwomwohdiso wet oh sapwellimen Krais koasoandio, wiepe kan en kamwakamwadahngahla wihwiawiher. Oh kitail koaros pahn iang wia kisehn doadoahk wet.

Nan Epreil en pahr 1834[kid welipwiki silihsek pahieu] nan Kirtland, Ohio, Soukohp Joseph Smith kapokonepenehr ohl prihsduhd koaros nan imwen kaskuhl ehu, me reireiki piht 14[eisek pahieu]. Kitail kak audehkihla soangen imwen sukuhlko meh eisek riau nan wasahn kapokon wet, oh e pahn mihmiehte dowen ekei. Joseph Smith masaniher, “Kumwail kilang prihsduhd malaulaukei me mihmi wasaht pwohnget, ahpw Mwomwohdiso wet pahn audehla paliepeng oh palieir en Amerika—e pahn audehla sampah.”

Kokohpo wie pweipweidahr “mwohn masatail kat.” Mwomwohdiso en Sises Krais en Souleng en Imwin-rahn akan wie tohtohla pwehki towe kan oh pil peneinei kan, misin oh misineri kan, imwen mihting kan oh tehnpas sarawih kan, oh pil tohn semineri, Insdiduhd kan, oh nan university kan nan sampah pwon.

Se kapingki mehlel aht mihmi pohn sampah ni ansou me Mwomwohdiso wet toweh kan wie tohtohla, ahpw me kesempwalsang iei nan mohngiong kan oh mour en toweh kan. Kitail dehdehki me kitail wia Sapwellimen Sises Krais tohnpadahk kei. Kitail kin ehukihwei atail kadedehki Ih, Sapwellime Mwomwohdiso, Sapwellime wiewiahkan, oh Sapwellime elen inouo. Kitail wia Sapwellime aramas, oh E ketin wia atail Sounkomour.

I kesempwalki dahme Preseden Nelson kahdanki “kesempwal en ansouwet” oh kasalehiong Kauno atail kaping kalahnganki Sapwellime doadoahk. I men kangoangehkin kitail en kesihnenkihda atail wia Sapwellime tohnpadahk kei, kadedehki pweidahn kokohp koaros, sang mahs leledo ansouwet.

Mie me kin uhwong pahn werkihda, ”‘Kilengdo me!’ oh … ‘kilengla mwo!” soahngete me re wia nan mwehi en Joseph Smith. Ahpw, pahn mie oh re pahn wia kisin mehkot tikitik nan doadoahk kesempwal wet. Kumwail taman mahsen kan Joseph Smith kosoia ko: “Sohte emen me sohte ale mweimwei kak kauhdi doadoahk wet; me uhwong kan pahn lingerngerda, … ahpw me mehlel en Koht pahn kohkohlahte mwowe ni kehlail, sarawi, oh saledek, lao e pahn kipehdi wasa laud kan nan sampah, lela nan keimw koaros, lelohng nan wehi kan koaros, saleng koaros pahn rong, lao kupwuren Koht pahn pweida, oh Siohwa Lapalap ahpw pahn masanih doadoahk wet imwseklahr.”

Ahi pwukoah kan me kohiengie pahrwet, I iang mwohd nan irek en sehr en mwowe ong en Kauno kamwakamwakidewei mwowe Sapwellime doadoahk. Mwomwohdiso wet kakauwada tehnpas sarawi kan ni mwohmw kopwuriamwei ehu, pwe en kihong towe kan ansou mwahu en kaudok nan tehnpas en Kauno. Keriau, doadoahk en misineri kapwkapwurepene aramas tohto kan ong sapwellimen Silepen Sihpw mwahuo seri kan, me iei Sises Krais. Oh kesiluh, palien kasukuhl en Mwomwohdiso wet nan pali tohto koasoanehdier mehn kasukuhl tohto kapw kei ong irail kan me kin “rapahki Sises menet.”

Rahnwet tehnpas sarawi meh 367 mie me mih nan soangsoangen dake kei ni mwohmw, wiepen kokouda, de koadoahkpe. Oh ong soangen kahrepehda? Pasapengpe mihmier ni ehu ehu tehnpas sarawi: “Sarawihla ong Kauno.” Tehnpas sarawi kin ritingadahng kitail kapai keieu ileile kan me Samatail Nanleng sapwellimaniki ong emen emen kitail. Riei ohl oh Lih akan, kitail pil kalkalaudehla atail sarawihla ni atail pahn momourki atail warohng tehnpas sarawi, ni atail pahn kaudok nan tehnpas en Kauno, oh ni atail pahn wiahda atail inou kan ong Koht ong pein kitail oh atail keinek kan me melahr.

Preseden Nelson mahsaniher: “Ahn imwintihtio doadoahk suwed inenen lalaudlahr mwadang, oh kekeirda ni soangsoangen wiepe tohto. Atail anahn en mihmi nan tehnpas sarawi ansou koaros inenen laud ansou wet. I peki kumwail en ni kapakap tehk mwomwen amwail kin doadoahngki amwail ansou.” Nan Sapwellime tehnpas kitail kak kehn Sapwellimen Kauno ngehn ah ketket wasao oh meleilei me kitail sohte kin kehn.

Pahr nekiero I ahniki paiamwahu en kaunda ni kasarawihpen Tehnpas Sarawi en Mendoza Argentina. Nan ahi padahko, I karasaraski ahn Elder Melvin J. Ballard kokohp en pahr 1926 [kid duwopwiki rieisek wenou] me doadoahk en Kauno pahn wie kekeirda wawai nan pali kapi en Amerika, “me duwehte tuhke oak e kin wie kekeirda wawai sang acorn ehu. E sohte pahn wiahkintehieu keirda nan rahn ehute,” ahpw meh kid kei pahn iangala Mwomwohdiso wet, oh wehi kan nan pali kapi en Amerika pahn wiahla “kehl ehu nan Mwomwohdiso wet.” I kilangehr kokohpo ah pweida mwohn meseiet.

Mendoza, mahs e wia kisin acorn kis, met wialahr lapalahn tuhke oak ehu. Kekeirda wo wihwiawihier nan wasa laud kan nan sampah oh lel ongehr ni sahpw deke kan.

Kitail kilangehr Kauno kamwkamwadangalahr Sapwellime doadoahk nan misin kan. Nan pahr 2024[riekid rieisek pahieu] misineri meh 80,000 [welinen] me wie papah nan misin 450[pahpwiki limeisek] kan.[ Misin silihsek wenou sang nan mepwukat me kapw. Pahr nekiero, doadoahk en misineri wadohr pohnangin towe kapw meh 308,000[sililopw welinen] nan Mwomwohdisoh. Me kesempwalsang nempehkan, ngehn en kapwurepenehu wie weuwadohr ngehn akan rehn Sises Krais oh Sapwellime rongamwahu.

I kin medewe Wahnparon Brigham Young oh Heber C. Kimball, me nan pahr 1839[kid welipwiki silihsek duwau] mweseldahr ni ara wia misineri kei ong dekeh kan en British. Ira soumwahu; ira mwesel sang rehn ara peneinei ni ara soumwahu oh sohte mehkot ira wa. Mendahte soahng wet wiawi, ira douda nan kurumahu, oh ni ara mihmite mwohn mesen me ira poakohng kan, Heber koasoia, “Kita uhda oh werkihong irail en ahneki ngoang.” Ira nantihong kesinenda oh werkihda, “Popohl, popohl ong Isrehl.”

I kilangehr soangen ngoangen wia sapwellimen Kauno doadoahk wet nan Lima, Peru, ni ansou me I tuhong misineri kan sang wasahn kaiahn en misineri oh nan Lima misin kan. Udahn kaselel! I kilangehr mwekmwekid wet mwohn meseiet. Ansouwet nan wein Lima te misin isuh ier.

Ni imwilahn aht mihtingo, misineri kan kapwuriamweiikinie mehkot kesempwalieu. Irail kesihnenda oh werkihla, “Popohl ong Isrehl.” I sohte kak manokehla ansou kesempwalo; I mentehno kumwail koaros en iang mih wasao. Mwohn meseiet iei misineri kan me pwilikidier “soahng kan me pid sampah” pwe irail en papah Kauno oh sawas kamwadangahla rahn en Sapwellime ketdohu.

Kitail kilang me Kauno kalaudehla kasukuhl kan ong towehkan oh me pil kaidehn towe pidakihdi sampah. Ehu mehkot me kawek kitailsang mehteikan ni atail wia mwomwohdiso ieu iei mwomwen atail kin kesempwaliki kasukuhl. Kauno ketin masanihier nan ansou me Kopwurpwurdohu wiawihier iei en “rapahki en esehla, sang ni onopki oh pwoson.” Ihme wihwiawi rahn pwukat oh e warohng en werkihda “popohl.”

Ansou wet tohtohsang tohn skuhl 800.000[welilopw] nan sampah kileledier nan semineri oh insdiduhd, met me wia repwoht en kileledi me keieu tohto nan poadepen Mwomwohdiso. Neitail me pwulopwul kan kin pokon pene ni soangen wiepeh kei, sang nimensengie, ninsouwas, kilahs en online ninsoutik, oh kasukuhl en online nan ihmw kan. Irail wia pwihn ehu me kehlail oh pwung, aliale kakehlaparail sang emen emen ni ansou me irail kin esehla Sises Krais, idawehn, oh kadedehki Ih me E wia Sapwellimen Koht Iehros.

Nan fall nekiero I padahk nan devotional ehu me wiawi nan wasahn kamwadong ehu me direkihla tohn skuhl en semineri oh insdiduhd oh arail nohno pahpa nan University en Utah. Arail patehngo kasaledahr iawen laud en arail inengieng en esehla oh idawehn Sises Krais. Ahi padahk ong irail tohnsukuhl koa me sansal mwahu: Kapahrekihong Kauno sapwellime ansou. I kaweid kin irail en kapahrekih arail onop kan ong esehla dahme mehlel oh ileile, me iei onopiki “Iehros en Koht ieiaso.”

I peki soahngohte rehmwail koaros rahnwet: Dahme mih nan noumw lisd en, wiahda ahmw ansou en pahrek, kaidehn ma sohte mehkot ke wia, ong Kauno ni ahmw ansou en onopki pwuhk sarawi, ahn peneinei onopki Come, Follow Me, kapakap, pwukoahn Mwomwohdiso, minisdering, ale kamadipw sarawi, kaudok nan tehnpas sarawi, oh medemedewe soahng kan me sang rehn Koht. Atail Kaun oh Sounkomouro masanihier, “Esei iehla … oh ke pahn diar koamoalpen ngenomw.” Alehda Ih sang ni Sapwellime mahsen. Oh kiong Ih Sapwellime ansou pahrek.

Preseden Nelson masanih: “I peki ni ngidingid kumwail en mweidohng Koht en kaunda nan amwail mour. Kapahrekihong Ih amwail ansou. Ni amwail pahn wia met, kumwail pahn kak kilang dahme mwahu me pahn wiawihong mwekimwekid en palingenimwail.”

Kitail kilang mwekmwekid wet me wie kekeirda nan semineri, insdiduhd, oh university kan nan Mwomwohdisoh. Nan momour pwukat, Kauno me tapih. Eri E pahn kak ketket nan ahn emen emen kitail atail mour.

Ehu pali me kasalehda keirda pwukat nan kasukuhl nan Mwomwohdiso wet iei BYU–Pathway Worldwide. Pidahkihdi sampah, me kileledier en sukuhl kereniong tohtohki meh 75,000[isilopw limekid] oh pil wie tohtohla mwadang. Pali tohto wia tohn mwomwohdiso kei, oh tohtohsang silikis ehu mihmi nan Africa. Pathway wia mehn sawas ong pwung en alehdi mehn kasukuhl. Kanekehla course kan wehwehki kak diarada doadoahk, oh alehdi doadoahk wehwehki mour mwahu ong peneinei kan oh miehier ansou mwahu tohto en papah Kauno.

Ni ansou me I mihtingiong irail kaun en steik kan nan Uganda, I esehda me irail tohn steik presedensi pwon iang towehda BYU–Pathway. Uwen laud en kaunopdahn palinwaratail oh palingenitail, iei wen laud en atail kak pelian en imwintihtio kasongosong kan. Tamanda mahsen akan en Piter, “Tepelo, duwehte laion emen, me kin wie weriwer kokohseli, raparapahki ihs me e pahn kadanlehla.”

I kak kasawih me nan pwungen rohng mwahu kan en rongamwahu wet, miehte me mie arail kahpwal, songpen arail pwoson, peikasal, oh peidek kan me sohte pasapengpe. Riei ohl oh lih akan, Sises Krais iei pasapengo. Tepda mahs sang Reh. Rapahki Limeh kan nan ahmw mour. Rong Ih. “Dehr mweidohng ahmw mohngiong en pwunodada,” Ni imwilahn Sapwellime ansou E masanihong Sapwellime tohnpadahko nan Ketsemeni, mwohn Ah kapaikada Sapwellime lohpwuo pohn ahlen Serusalem, mwohn Kalkohda, wasa E ketin kaimwsakala Sapwellime tomwo—me Ihte kelehpw, me Sapwellimen Koht Iehroso, kak wia.

Ese me E ketin wehwehki. Pein Ih sapwellimankihda dipen koros, atail sapwungkan, kapwunod kan, oh atail rahn sohte mwahu kan pwe kitail en kak pwurala oh kousoanla rehn Samatail Nanleng kokolahte. E masanih, “Kilengdohng ie nan madamadau koaros; dehr peikasal, dehr masak.” Pwoson Sises Krais kak pwokuhkada oh kamwahuihala olahn palingenimwen. Likih Ih oh ke pahn kamwadangahla ahmw pwuralahng nan “lime limpoak.”

I men kapwurehiong mahsen akan en atail soukohp ieias: “Kumwail kilang dahme wihwiawi mwohn masatail kat? I kapakapki me kitail sohte pahn katiasang ansou kesempwal wet! Kauno ketin kamwakamwadangahla Sapwellime doadoahk.” Kitail ni atail wia tohnpadahk kei en atail rahnakat werkihda, “Popohl ong Isrehl” ni atail pahn onopehng ketdo sapahl en atail Kaun oh Sounkomour. Ni mwaren Sises Krais, ahmen.