Pein ahmw Kaunop en Tuhwong Sounkomouro

Riei ohl oh lih akan, Oakotohpe nekiero, Preseden Russell M. Nelson padahngkiher, “Ansouwet iei ansou me komwi oh ngehi en kaunopada ohng Ketido Keriau en atail Kaun oh Sounkomour, iei Sises me Kraiso.” Ansou me Preseden Nelson kin koasoia duwen Ketido Keriauo, e kin ansou koaros wia ni koapworopwor kaperen. Ahpw, kisin serepein men nan Praimeri koasoiahiong ie me e kin salohda ansou koaros e kin rong koasoiepen Ketido Keriauo. E koasoia, “I masepwehk pwehki soahng suwed kan pahn wiawi mwohn Sises ah pahn pwurehng Ketido.”

Kaidehnte seri kan me kak ahneki soangen pepehm et. Iren kaweid me keieu mwahu ong kisin serepeino, ong komwi, oh ong ie iei en idawehn sapwellimen Sounkomouro padahk kan. Sapwellime kaweid kan sohte kin rir de pingiping. Ansou me kitail kin idawehn, kitail sohte anahne masak de pil pwunod.

Mwohn Sapwellime doadoahk pohn sampah ah pahn imwsekilahro, mie me peidengkihong Sises Krais iahd E pahn pwurehng sapahldo. Nan pasapengo, E ketin padahngki karasaras siluh, me kileldiher nan Madiu 25, me pid mwomwen kaunop en tuhwong Ih—mehnda ma ni Sapwellime Ketido Keriauo de ansou me kitail mweseldahsang sampah wet. Padahk pwukat inenen kesempwal pwehki pein atail kaukaunop en tuhwong Ih wia poahson en mour.

Sounkomouro tepkihda koasoiepen karasaras en lih meipwon ehko. Nan karasaras wet, lih meipwon ehk kohlahn iang kamadipw en kopwopwoud ehu. Me loalokong limen wahda pilen neirail lamp ko, oh meh limen ko sohte wahda neirail. Ansou me ketidohn ohl pwoudo pakairdahr, me pweipwei limen ko kohkohla pwe ren alehda pilen neirail lamp ko. Ansou me re pwurodo, e pwandalahr; wenihmw ong kamadipwo ritidiher.

Sises ketin kasalehda soahng siluh nan karasaras wet pwe en sewese kitail. E kawehweda:

“Oh ni rahno, ansou me Ih pahn pwurodo ni lingan, Ih ansou me karasaras et pahn pweida me Ih koasoiahier duwen lih meipwon ehko.

“Pwe irail akan me loalokong oh alehdier me mehlelo, oh alehdier Ngehn Sarawi en wie ahr soun kaweid, oh sohte lohdiong nan kasongosong—met Ih indaiong kumwail, irail pahn … alahlda rahno.”

Ni ehu soangen koasoi, irail sohte anahne masak de saloh pwe irail pahn mourla oh pweida. Irail pahn powehdi.

Ma kitail loalokong, kitail alehdi mehlelo sang ni atail alehda rongamwahu en Sises Krais nan tiahk sarawi kan en prihsduhd oh inou sarawi kan. Mwuri, kitail nantiheng doulahte warohng Ngehn Sarawio en ketiket rehtail ansou koaros. Met anahne wiawi ong emen emen de pein kowe anahne pein alehdi, sang ekis ekis. E en kalapw wiewiawi, ni atail kelepw, ni mwekid en kaudok rir kan me kin luke Ngehn Sarawie en kaweid kitail.

Kesiluh ire me Sises ketin kasalehda iei kehn keperkinuhk pwe ke de lohdi. Sounkomouro ketin mahsanih:

“Kumwail mwasahn oh kaleke pwe emen dehr ketweikumwaildi.

“Pwe aramas tohto pahn kohdo ni mwarei oh ndinda, Ngehi me Krais; oh re pahn pitihedi me tohto.”

Sounkomouro ketin wewehki me tohto pahn mwomwehda pwe rehn song en pitihedi me pilipilda kan oh tohto tohn padahk kan pahn lohdi. Kitail en dehr kamehlele irail oko me kin kose ni sapwung mweimwei en Kauno de kohla wasa kan me peikasal kan inenen laud de wasa rir kan en sukuhlkihda sang aramas likamw akan.

Pwuhk en Mormon padahkiong kitail mwomwen atail pahn kak kasawiahda wikpeseng en aramas likamw kan oh tohn padahk kan. Tohn padahk kan kin kalapw kalaudehla kamehlele pen Koht, wie papah Ih, oh wiewia me mwahu. Kitail sohte pahn lohdi ma kitail pahn kin rapahki oh ale kaweid sang aramas akan me pein kin loalopwoat ni arail kin wia tohn padahk mehlel kei en Sounkomouro.

Kitail pil kak dohsang widingo sang ni atail pahn kin kalapw kohla kaudok nan Tehnpas Sarawi. Met pahn sewese kitail ahniki lamalam poatopoat oh e pahn sinsile kitail sang soangen mwekid kan me pahn kasongosonge de kahrehiong kitail en sohpeisang ahl en inouo.

Me keieu kesempwal en padahk wet iei me kitail kin loalokong ni atail alehda rongamwahu et, rapahki en ahneki Ngehn Sarawi rehtail, oh kin soikala widing kan. Lih meipwon limen ko sohte kak sewese irail kan me sohte pilen neirail lamp ko; sohte me kak wiliankitaildi alehda rongamwahuo, ale Ngehn Sarawio ni soun kaweid men, oh soikalahsang widing kan. Kitail anahne pein wia met.

Sounkomouro ahpw koasoiada karasaras en tala kan. Nan karasaras wet, ohl emen kihwei wehn mwohni kei, me adahniki tala kan, ong nah ladu silimen. Ong ladu emen e kihong tala me limau, emen e kihong meh riau, oh ong kesilimeno eh kihong me ehu. Mwurin ansou kis, ladu riemen kalaudehla pak riau wehn me ira alehdio. Ahpw ladu kesilimeno sarepedihte me e alehdio. Ong ladu riemen me kalaudehla pak riau wehn me ira alehdio, ohlo koasoia, “Keieu mwahu, … ladu lelepek oh loalopwoat men kowe: pwehki omw loalopwoat ni koadoahkpen mehkot tikitik, I pahn kihong uhk mehkot laud pwe ke en kin apwahpwalih: keido pwe ke en iang nsenamwahuki ei pai.”

Ohlo eri lipwoarehda ladu me sarepedi ah talao pwehki ah “suwed oh pohnkahke.” Ahn ladu menet talao kohsang ih, oh e pokousla. Ahpw, ma ladu menet pil kalaudehla ah talao, e pahn iang alehdi soangen koasoi oh kisakis ohte me kohieng ladu riemeno.

Ehu iren kaweid en karasaras wet iei Koht ketin kasik kitail en kalaudehla koahiek kan me kitail ahneki, ahpw E sohte kupwur kitail en karasapene atail koahiek kan ong ahn mehteikan koahiek kan. Medewehki ire wet me kohdo sang sounpadahk en Hasdic, Zusya en Anipol nan dih 18. Zusya wia sounpadahk dehde men me ahnekida masepwehk ni e kerenihong pahn mehla. Nah tohn padahk kan peidehngki, “Aht Kaun, dahme ke tepida rerrerki? Ke momourikier mour mwahu; udahn Koht pahn ketikihong uhk pweipwei laud ehu.”

Zusya koasoia: “Ma Koht mahsanihong ie, ‘Zusya, dahme ke sohte wiahki emen Moses?’ I pahn inda, ‘Pwehki komw sohte ketikiong ie palingehn lapalap me komw ketikiong Moseso.’ Oh ma I kesihnen mwohn Koht oh E mahsanih, ‘Zusya, dahme ke sohte wiahki emen Solomon?’ I pahn inda, ‘Pwehki komw sohte ketikiong ie eripit en Solomon.’ Ahpw, dahme, I pahn koasoia ma ih kesihnen mwohn Ih me ketin kapikiehdao oh E mahsanih, ‘Zusya, dahme ke sohte wiahki Zusya? Dahme ke sohte wiahki ohl me I ketikihong uhk en wia?’ Eri, ih met me I wie rerrerki.”

Uhdahn, Koht pahn nsensuwedkinkitail ma kitail sohte pahn kin kehliki koahiehk, kupwuremahk, oh kalahngan en Sounkomouro pwe en kalaudehla koahiek kan me Koht ketikihdohng kitailehr. Sang ni Sapwellime sawas limpoak, E ketin kasik kitail en wiahla aramas me keieu mwahu me pein kitail kakehng. Me kitail kin tepkihda soangesoangen koahiek kan sohte katepe Reh. Oh ah en duwehte rehtail.

En imwsekila, Sounkomouro ketin padahngki karasaras en sihpw oh kout kan. Ni ah pahn sapahldo ni Sapwellime lingan, “tohn sampah koaruhsie pahn pokonpene mwomwe: e ahpw pahn ketin irepeseng irail ni pwihn riau, duwehte silepen sihpw men me kin katohrepeseng nah sihpw kan sang koat kan: e pahn kihla sihpw kan ni palimauni, a kout kan ni palimeingi.”

Koaros me pahn mih ni ah palimaun pahn wiahla serihn Sapwellime wehi, oh koaros me mih palimeing sohte pahn sohsohki mehkot. Me wekpeseng nanpwungara pahn duwen ma irail kin kamwenge Ih ansou me E kin men mwengehda, kihong Ih pihl ansou me E kin men nimpilda, kihong Ih wasahn kommoal ansou me irail sehse ihs Ih, kihong Ih likou ansou me E kilisou, oh kin pwarek Ih ansou me E kin soumwahu de mihmi nan kalapwuhs.

Koaros pingipingkihda, koaros me mihmi palimaun oh palimeing. Irail peidengki ansou me re kihong, de ansou me re sohte kihong Ih mwenge, pihl, oh likou de sewese Ih ansou me E mihmi nan kahpwal. Ni pasapeng, Sounkomouro mahsanih, “Met Ih padahkiong kumwail, pwe soahng koaros me kumwail wiahiong emen riei me tikitik pwukat, ngehi me kumwail wiahiong.”

Padahk me mih nan karasaras wet sansal: ni ansou me kitail kin sewese mehteikan, kitail kin papah Koht; ansou me kitail sohte kin wia, kitail kin kansensuwedihla. E kin ketin kasik kitail en doadoahngki atail kisakis kan, koahiek kan, oh pwukoah kan en kapaiada mour en Sapwellimen Sahm serihkan koaros. Pepehm sarawi en papah mehteikan sansal nan poem ehu me intingdi nan dih 19 sang rehn soun nting mehn Finland Johan Ludvig Runeberg. Ngehi oh riei kan kin kalapw rong poem wet “Sounmwoat Paavo” erein aht kekeirdahu. Nan poem wet, Paavo wia sounmwoat semwehmwe men me kin kouson rehn ah pwoud oh seri kan nan werengen Finland. Erein sounpar kei irekido, palilaud en ah wahn sahpw kan kin ohla, me wiawihda sang ni sinow ah kin peipeseng, de melimel en summer kan, de lomwulomwur. Ansou koaros me re kin dolung arail wahn sahpw, ah pwoudo kin insensuwedla oh koasoia, “Paavo, Paavo, ohl riahla men kowe, Koht sohpeisang kitail.” Paavo, kin uhd, sapeng ni konsep, “Doalohkida pilawa amas kilin tuhke kan pwe en wiakihda pilawa pwe seri ko en dehr duhpekla. I pahn doadoahk laud pwe ien kak kihsang dihpw mosul en nan mohso. Koht kin ketin kasongosongei kitail, ahpw E pahn ketin kamangaila.”

Ansou koaros me wahn sapw oko kin ohla, Paavo kin padahkiong ah pwoudo en kin kalaudehla wehn kilin tuhkehu me eh kin doaloaieng nan pilawau pwe re en dehr duhpekla. E pil kin doadoahk laud, weweirada warawar pwe en kihsang pwehlo oh katikala mengei pen ahn ah mohs weirehng nan spring oh lomwlomwur mwadang.

Mwurin sounpar kei en doadoahk laud, Paavo ahpw dolungehr wahn ah doadoahk. Ah pwoudo perenda oh koasoia, “Paavo. Paavo, rahn pwukat ansou en peren! E lellehr ansou en kesehla kilin tuhkehu, oh wiahda pilawa me wiawikihdahte wihd.” Ahpw Paavo kolehdi pehn ah pwoud oh koasoia, “doaloakihda elep en pilawahn kilin tuhke, pwe ahn mehn impatail kan arail mwetuwelo oahkihla lemwulemwur.” Paavo meirongkihla ahn ih oh ah peneinei pai pwe en sewese mehn imparail me lellohng nan kahpwal laud.

Sapwellimen Sounkomouro karasaras en sihpw oh kout kan iei kitail en doadoahngki kisakis me kitail alehdier kan—ansou, koahiek, oh kapai kan—en papah Sapwellimen Sahm Nanleng serihkan, ahpw mehlel irail akan me ahneki anahn tohrohr oh me anahne sawas.

Ahi luhk ong kisin seri en Praimeri me I koasoiahier mwowehu, oh ong emen emen kumwail, iei en idahwen Sises Krais oh likih Ngehn Sarawio duwehte ahmw pahn likih kompoakepomw men. Kehliki irail akan me poakohng uhk oh me kin poakohng Sounkomouro. Rapahki Sapwellimen Koht kaweid pwe en kamwahuihala ahmw koahiek kan, oh sewese mehteikan, mehndahte e sohte mengei. Ke pahn onopadahng tuhwong Sounkomouro, oh ke pahn kak patehng Preseden Nelson nan ah koapworopwor kaperen. Ni ahmw pahn wia met, ke sewese sampah en kaunopada ong Ketido Keriau en Sises Krais, oh ke pahn kapaikihda koapworopwor me itar en iang kommoal oh peren rehn Kauno, ansou et oh ansou me pahn kohdo.

Ni atail koulkihpene nan ehu atail koul kapw kan:

Ni mwaren Sises Krais, ahmen.