Pwohngih

Ehu me keioun kalapw wiawi oh kesempwal ni mwomwen kaudokiong iei kohpenehn aramas nan ehu wasa pwehn wia tiahk sarawi kan. Kauno masanih, “Pwe ken kak ahneki mwakelekel sang sampah, ke anahne kohla ni tehnpas en kaudok oh wiahda ahmw kamadipw sarawi ni ahi rahn me sarawi.” Met iei, ni mehlel, keioun kahrepen atail kin kauwada imwen sarawi kan. Ahpw, ma anahnepe, wasa me pil sohte-kasarawihla pahn mwahu ma kitail kak kasalehda atail wauneki oh kesempwalki.

Me keioun kesempwal iei dahme kitail pahn wia ni atail pahn pokonpene ni sapwellimen Kauno rahno. Ei, kitail kin kapwatada mwahu ni wen atail kak—kaidehn en udahn lingan ahpw ni mwohmw me konehng me pahn kak kasalehda atail kesempwalki oh wahuneki Koht. Mwomwetail pahn kin mihmi ni wahu oh karakarahk. Kitail kin pwongih ni atail kin patpene ni kapakap; kitail kin pwongih ni atail kin koulki koulen sarawi kan (kaidehn rongorongte ahpw kokouliki koulko); kitail kin pwongih sang ni atail kin padahk oh wehwehkihla sang emen emen. Sises masanih, “Tamataman met ni, Sapwellimen Kauno rahn, kitail en ketkihda atail meirong kan [me wehwehki atail ‘meirong kan … atail ansou, koahiek kan, de atail pai kan, ni atail kin papah Koht oh sapwellime aramas akan’ oh atail kamadipw sarawi ong Kauno wasa lapalahpie, ni atail wehkada dipatail kan ong riatail kan, oh mwohn Kauno.” Kitail kin kohpene kaidehn en kaparanda mehteikan de kitail en pereperen—ni mwomwen pwihn en keseng ehu, ni karasepe—ahpw pwe kitail en kin tamataman Ih oh “alehdi kaweid mwahu” nan Sapwellime rongamwahuo.

Ni tiepene lap me apwte neko, Elder Patrick Kearon kataman kiheng kitail me “kitail sohte kin kohpene rahn Sarawi pwe kitail en towehdahte kaudok en kamwadipw sarawi oh kilelehdi me kitail iang sarawi. Kitail kin patpene pwehn kaudok. Mie wekpeseng laud nan pwungara. En patehng wehwehki en iang mihmi wasahu. Ahpw en pwongih iei en insenkihda kapinga oh poakehng atail Koht ni mwohmw ehu me pahn wekid kitailla!”

Ni atail kin wauneki rahn Sarawi ong Kauno oh Sapwellime koasoandih kan iei met pil wia wiepen pwongih Ih. Sounpar kei samwalahro, Elder Russell M. Nelson kasawihadar: “Ia mwomwen atail kin wauneki Rahn Sarawi? Ni ei pwulopwulo, I kin onopiki en ekei aramas me kin wiahda soahng kan me re kak wia oh sohte kak wia rahn Sarawi kan. Mwuhr I ahpw esehda sang nan pwuhk sarawi me mwomwei oh ahi wiewia nan rahn Sarawi wia kilel ehu nan pwungen ngehi oh Semei Nanleng [kilang Eksodus 31:13; Esekiel 20:12, 20]. Ni ansou me I wehwehkihla, I sohla anahne kilelehdi soahng kan me I kak wia oh sohte kak wia. Ni ansou me I pahn kin wiahda ai pilipil en koasoanehdi mehnia kemwekid kan me konehng de sohte konehng rahn sarawio, I kin pein peidek rehi, ‘Soangen kilel dah me I men kihong Koht?’”

Kaudok ni sapwellimen Kauno rahn wia kilel kesempwal ehu me uhlahngete meiroangen tomwpen Sises Krais. Kitail kin kawawih Sapwellime Iasadau nan Ihster, oh pil nan wihk koaros ni atail kin ale kamadipw sarawi me iei kasalepen Sapwellime Tomwpen dihp, me pil iangahki Sapwellime Iasadau. Ohng me men koluhla, alehda kamadipw sarawi iei inoandehn kaudok en Rahn sarawi.

Kaudok pene ni atail wia “paliwar en Krais” ahniki manaman oh kamwahupe kan ohng atail kin padahk, papah, oh utung emen emen. Me pil kesempwal, ehu onop me wiawi ansou keren kasalehdahr me irail akan me kin wiahki ngenirail akan pein arail kin sohte kesempwalki keirdahn pali ngehn, de inda me arail pwoson inenen kesempwal, de ahniki ansoun sarawi ieng Koht. Ni atail wia Souleng kan en nan kousapw ehu, kitail kin kakehlaka emen emen ni kaudok oh pwoson.

Pil duwehte, kitail sohte kak manokehla wiepen kaudok en ehu ehu rahn me kitail kin wia ohng pein kitail oh nan atail wasahn kousoan kan. Sounkomouro kin katamankiheng kitail, “Ahpw amwail inou kan pahn kin wiawi ni pwung rahn koaros oh pil ansou koaros.” Emen serepein ni loalokong kasawihada me, “Ih sohte kak medewe ehu wiepen kaudok ong Koht sang ni ai pahn kasamwoh Sapwellime seri kan nan atail mour oh apwalih irail oh padahkiong irail Sapwellime pilahn ong Irail.”

Alma oh Amulek padahkiong mehn Zoram kan me pokousla sangehr nan arail sinakoke kan ren kin kaudokiong Koht kaidehn pak ehu nan ehu wihk ahpw ansou koaros oh “sohte lipilipil wasa me re pahn mih ie.” Irail koasoia kapakap me rasehng kaudok:

“Kumwail anahne ngidingidki amwail kapakap nan amwail pere tikitik kan, oh nan amwail wasa rir kan, oh nan amwail sapwtehn kan.

“Ei, apw ma ahnsou me kumwailsohte kapakap ong Kauno, a mohngiongimwail kan en kin direkihla kapakap ong ih ahnsou koaros.”

Irail pil koasoia duwen roporop en pwuhk Sarawi kan, wiewia arail kadehdehpen Krais, wiewia mwekid en limpoak oh pil sewese mehteikan, alehda Ngehn Sarawi, oh kin momourki kaping nan rahn koaros. Medewe madamadau o: “momouriki kaping nan rahn koaros.” E doke ai ire keriau:

Ahniki pepehm oh kiheng atail kaping ong Koht iei, ni mehlel, me kin kiheng kaudok en wia mehkot kaperen ah kaidehn kitail en wiahki me doadoahk ehu.

Kaudok mehlel wehwehki limpoak ong Koht oh kiheng Ih atail inou koaros—iei kisakis keioun lingan me kitail kak kiheng Ih. Ni ansou aramas kalelapangki mehnia kosonned nan pelien kosonnedo me keieu kesempwal, Sises apw sapengki, “Ke pahn poakohng Kaun-o omw Koht sang nan kapehdomw unsek, sang ni ngenomw unsek, sang ni omw lamalam koaros unsek.” E pil kahdaneki met kosonned keieuo.

Iet mwomwen pein sapwellimen Sises ah kin kaudok ong Seme Nanleng. Sapwellime mour oh Sapwellime tomwpen dihp wiawi ong ni lingan en Sahmo. Ni pahtou kitail kin tamanda sapwellimen Sises pekipek nan ansou en lokolok laud oh weirek laud: “Ipa, ma e kak, a komw ketikihweisang ie dahl en lokolok wet,” apw mwuri E patowan “kaidehkin nseneiet, pwe kupwuromwihte en pweida.”

Kaudok iei nantiheng en idawehn karasaras unsek wet. Kitail sohte kak unsekla nan ahl wet pwohng ehu, ahpw ma nan ehuehu rahn kitail “kin kihong [Ih] meiroang ni mohngiong karakarahk oh ngehn peik,” E pahn pwurehng pepdaiskin kitail Sapwellime Ngehno oh audehkin kitail Sapwellime mahk.

Ire tikitik keieu en Padahk oh Inou kan, Kauno ketin kalohkihda me sampah direki suwed:

“Irail salongasang ahi tiahk sarawi kan, oh kawehla ahi inou kan;

“Re sohte kin rapahki Kauno ong me pwung, ahpw emen emen kin pein wia ah, oh kin idawehn pein ah koht, me mwomwe kohsang ni dipwisou en sampah.”

E mwahu ong kitail en tamataman karasaras en mehn Suhs silimeno, ananaia, Misael, oh Asaraia, me mehn Babylon kan saliedier mwurinte Lehi oh ah peneinei ahr kohkohlahsang Serusalem. Nanmwariki Nepukadnesar kihong ederail Sadrak, Mihsak, oh Apedneko. Mwuhr, ansou me irail silimeno sohte men pwongih sansal ehu me e wiahdahu, Nepukadnesar koasoanehdier me re pahn lekidekla nan kisiniei laud ehu, oh padahkiong irail, “Ia duwe, kumwail lemeleme me mie koht emen me pahn kak doareikumwailla?”

Ke pahn tamataman arail pasapengo:

“Ma at Koht me se kin papah pahn kak kapitkitaila sang nan kisiniei mwehlo, oh sang omwi manaman, a ih me pahn ketin wia.

“Ahpw ma e pil sohte ketin wia, a komwi en ketin mwahngih me se sohte pahn pwongih omwi koht, oh se sohte pahn pil poaridihsang sansal kohl me komw ketin kauwadahro.”

Wen karakar en kisinieio e kemehla irailoko me keseiraillong loale, ahpw Sadrak, Mihsak, oh Apedneko sohte mwasikala. “Nepukadnesar lokaiahda, oh mahsanih, Kapinga Koht en Sadrak, Mihsak, oh Apedneko, me ketin … doarehlahr Sapwellime sounpapah kan, … oh silehdi paliwararail kan, pwe ren dehr papah de pwongih emen Koht, ihte arail Koht.” Irail koapwoaroapwoarki Siohwa en doareirailla, “ahpw ma pil soh,” mendahte ma Koht nan Sapwellime eripit sohte doarehirail sang mehla, irail pahn mehlelohngete Ih.

Soahng kan me kesempwal sang kaudok ohng Sahmo oh Nah kin wiahla dikadik en eni ehu. Koaros me kin soikala Koht pwe dene re pwung, de kahmahmki soahng kan me pidada Ih, kin wiahki pein irail arail Koht. Mehmen me loaloapwoationg pwihn ehu de kahrepe ehu mwohn kaweid en nanleng kin pwongih koht likamw emen. Pil duwehte irail akan me dene re kin pwongih Koht ahpw sohte kin kolokol Sapwellime kosonned akan kin weweid nan pein arail ahl: “Re kin karanihla ni kilin ewerail, ahpw mohngiongarail kan dohsang ie.” Inoandehn atail pahn kin kaudok pahn kin doke “[Ihte] Koht mehlel, oh pil … Sises Krais, me [E] ketin poaronedohr.”

Ni imwio, mwomwen atail kin momour me wia kasalepe mehlel, oh me keiou mwahu duwen atail kin pwongih. Kasalehda atail poadedi wehwehki atail kin alasang Samatailo oh Iehroso—poadokedieng songisong alehda wiepen Ara mour nan loaletail. Ma, nin duwen dahme aramas kin inda, alimengi iei mwohmw keioun mehlel duwen kapaia, kitail pil kak inda ni atail wauniki Koht, me alasang me mwohmw keiou mwahu duwen atail pahn wauneki emen. Met ketihtihki nannnantih oh ngoang en rapahki mehkot sarawi. Ahpw duwduwehla Krais pil iei mehn dehde pen atail wiewia kan en pwongih Ih. En Elder Kearon koasoi me sansalda ninkapwan duwen atail pahn pwongih, “ni soangen mwohmw ehu me pahn wekidala atail mour,” inenen kesempwal. Pwongih ni pwung pahn wekidala atail mour.

Met iei lingan en ahlen inou sarawio—ahl en pwongih, poakohng, oh loaloapwoat ong Koht. Kitail pidelong pohn ahlo sang atail pepdaisla, ni atail pein alehieng kitail mwaren Krais oh kolokol Sapwellime kosonned akan. Kitail alehda kisakis en Ngehn Sarawio, me wia meninkeder en Sapwellimen Sounkomour kalahngan me kin doarehla oh kamwakeleikitailda sang dihp ni atail kin koluhla. Kitail pil kak inda me ni atail kin koluhla kitail pil kin pwongih Ih.

Me pil iangahki ekei tiahk sarawi kan en prihsduhd oh inou sarawi me kitail wiadahr nan tehnpas en Kauno me pil kamwekelei kitailda. Kasarawi oh tiahk sarawi kan en nan tehnpas sarawi wia kisehn wiepen kaudok ile ieu.

Preseden Russell M. Nelson kasaledahr me “ohl koaros oh lih koaros me iang patehng wia doadoahk en tiahk sarawi kan en prihsduhd oh me kin wiahda oh kolokol inou sarawih kan ong Koht ahnikiher mweimwei en doadoahngki sapwellimen Koht manamano.” Met kaidehnte manaman ehu me kitail kin ahniki ni atail kin papah oh kapaida emen. E pil wia manaman sarawi me kin doadoahk loaletail me kin kamwahuih kitailla oh kamwakelei kitailda. Ni atail kin weweid nan ahl en inouo, “manaman en Koht kin sansalda” rehtail.

Kitail en, duwehte kaudok en Nihpai oh Leimen kan, “poaridi ni alualuwen Sises ko, oh … pwongih Ih.” Kitail en, nin duwen Sises ah mahsanih, “poaridi oh pwongih Sahmo ni [mwaren Iehroso.” Kitail en alehda Ngehn Sarawi oh mweidehng Koht mohngiongatail akan, sohte ahneki emen Koht likin Ih, oh nin duwen tohnpadahk en Sises Krais kei, alasang Sapwellime karasaras nan pein atail mour kan. I kadehdehki me ni atail pahn wia met, kitail pahn kehn popohl ni atail pwongih Ih. Ni mwaren Sises Krais, ahmen.