“Pwehki Met Koaros Pahn Ese Me Kumwil Wia Nei Tohnpadahk kei”
Atail limpoak ong Koht oh Sapwellime serihkan wia kadehde kehlail ehu ong sampah me ni mehlel Sapwellimen Sounkomour o Mwomwohdiso met.
Sounpar kei samwalahro, Ngehi oh ahi pwoud wie seiseiloakseli nan palieir en Sehmen. Mwohnte Ihster, oh se lukehier kempoakepaht emen, me sohte wia tohn Mwomwohdiso, en patehng kit nan aht kaudek en Rahn Sarawi. Se poakehng kempoakepaht menet, oh e konehng se en lukehieng ih aht pepehm me pid duwen Sounkomouro oh Sapwellime Mwomwohdiso oh lukehieng en kohdo oh kilang! E alehdahr luhk o oh patehng kitehr nan mihting kan en nan prans me keren ieu.
Ma miehier pak ehu ke wahdo kempoakepahmw men nan Mwomwohdiso, mwein ke kak ese pepehm me I ahnekiher menseng en Rahn Sarawi o. I mentenoh soahng koaros en wiawi mwahu sohte sapwung. Kempoakepaht menet wia aramas emen me sukuhl laud oh palingeni kehlail. I mentenoh mihting kan nan prans wet en wia mehn kasansalamwahu ehu ong ih oh pil wia weliepe kaselel en Mwomwohdisoh.
Prans wet kin tuhpene nan perehn rend kei nan keriaun posoke en sdohwa ieu. Pwehn lela wasahu, se anahne douda ni kehndake kei nan tinsewen ihmw wet.
Ni kamadipw sarawi o ah tepdahr, I medemedewe kempoakepahi o ah ehdin iang soahng wet, oh I sohte kak ien sohte tehk soahng kan me kiheng ie pepehm en namenek. Ngilen koul o, ni karasepe, sohte duwehte ngilen Tabernacle Choir. Ngilen seri kan me pwangadahr oh katkatairong koaros kak rong erein ansoun kamadipw sarawi o. Sounpadahk en rahno koa wia uwen ahr kak, ahpw irail sohte koahiek nan pelien padahk nan pokon. Erein mihting o I wie mwomwohd nan ahi soansuwed, wie pekipeki me Santi Skuhl pahn mwahusang.
E sohte mwahusang.
Menseng o pwon I wie sansalohki dahme kempoakepaht o pahn medewehki mwomwohdiso me se wahlahngehr o.
Ni aht wie tangatang kohla imwat o, I sohpeilahng kempoakepaht o pwe ien lokaiahng. I men kawehwehieng me kisin prans tikitik ehu met oh e sohte wia weliepen Mwomwohdisoh unsek. Ahpw mwohn ahi kak inda mehkot, apa lokaiahda.
E inda, “E udahn lingan.”
I sehsehla dahme I pahn inda.
E doulahte, “I inenen pwuriamweikihla mwomwen aramas akan ahr kin tehk emen emen nan amwail mwomwohdisoh. Irail koaros mwomwen kohsang mourkan me wekpeseng, ahpw e sansal me irail poakpene.ni mehlel. Ih mwomwen ahi kin medewe me Krais ketin kupwurki Sapwellime Mwomwohdiso en duwehte.”
Eri, I mwadangete koluhkiha madamadau en tenek me I ahnekiher o. Dahme I mwahuki o iei mihting kan en inenen kaselel pwehn kamwakidada kempoakepahi o. Ahpw dahme towe kan en prans wet alehdier iei ehu mohngiong unsek me direki ngenen limpoak, kadek, kanengamah, oh kesempwaliki.
Pwe Pwoson en Kak Keirda nan Sampah
Riei soulengko, kempoakepahi kan, I poakehng Mwomwohdiso en Sises Krais en Souleng en Imwin-rahn akan. E wia sapwellimen Sounkomour o Mwomwohdiso momour, oh e kin padahngki rongamwahu unsek en Sises Krais me kopwurpwurodohu. Sapwellime manaman en prihsduhd oh mweimwei mie wasaht. Sises Krais me ketin Kahlua Mwomwohdiso wet, sang soun sawas kan me E ketin piladahr, oh sang soukohp ieias, iei President Russell M. Nelson. Sounkomouro ketkihengehr Souleng en Imwin rahn akan ehu Pwukoah kesempwal en kihpene Sapwellimen Koht serihkan oh kunopada sampah ong Sapwellimen Sounkomour o Ketdo Keriau o. I wiahki ahi kadehde me mepwukat koaros mehlel.
Ahpw e kesempwal en taman me pali laud en ansou me aramas kin keioun patehng Mwomwohdiso en Sises Krais, irail sohte kin medewe duwen mweimwei en prihsduhd de tiahk sarawi kan de kapokonpenehn Israel. Dahme irail pahn kak kilangada, mwohn mehkoaros, iei duwen arail pepehm ansou irail patehng kitail oh duwen atail kin sewese emen emen.
“Limpoakpene nanpwungamwail,” Sises ketin mahsaniher. “Pwe ihme aramas koaros pahn esehki me kumwail Nei tohnpadahk.” Pali laud en ansou, en aramas men keioun kadehdehpen Sises Krais kin kohsang ansou e kin pehmada limpoak nan pwungen werengkan en Sises Krais.
Sounkomouro mahsaniher me E kapwuredohr Sapwellime Mwomwohdiso pwe “pwoson … en kak laudla nan sampah.” Kahrehda, ansou aramas akan pahn pwarek atail mihting kan en Mwomwohdiso, Sounkomour o ketin kupwurki irail en pwurala ni arail pwoson Ih ah kehlailahr! Limpoak me kempoakepahtail kan kehnda nan pwungatail pahn pwok irailda karanihala Sises Krais! E wia koasoandi mengei ehu me kitail anahne wia ansou koaros
Mehmen me raparapahki pwoson me kehlail lahr rehn Krais, de ah ehuong Sahm Nanleng en keren, kak ahneki pepehm me e miher nan dewe nan Mwomwohdiso en Sises Krais en Souleng en Imwin-rahn akan. Lukehieng irail ong atail mihting kan kak wia mehkot me man oh konehng duwehte lukei irail ong nan imwatail.
Madamadau en Unsek oh me Mehlelo
Met, I tehkadahr me I koskosoia mehkot me mwomwen unsek. Oh nan mour en sampah wet, ekei pakete kitail kak kehn me unsek o. Oh “Lau lel rahn en unsek lao,” pahn miehte wekpeseng duen pwungila oh me mehlelo. Eri dahme kitail anahne wia ansou me Mwomwohdiso wetsohte duwehte rahn en unseklao? Ansou da, de soangen kahrepe sohte lipilipl da, me atail ward sohte kin apwalihada pwoson unsek de limpoak? De ansouda me mie pepehm me kitail sohte wia kiseh?
Ehu mehkot me kitail en dehr wia iei kesehla dahme mwomwen unsek o!
Tehn daidel en Pwuken Mormon iangahki mehn kapar kesempwal wet: “Ma mie soh itar kei,” e kosoia, “a iei sapwung en aramas; sang ni kahrepe wet, dehr kapwopwohniki Koht mehkan.”
Pwuhk ehu kak—de mwomwohdiso ehu de aramas emen—ahneki “soh itar” oh “sapwung kan” oh pil kak wiwiahte doadoahk en Koht?
Ahi pasapeng iei ni mehlel ei!
Eri, erein atail nanantiheng momourki sapwellimen Kauno koasoandi ileh kan, kitail en ahneki kanengamah ong emen emen. Emen emen kitail wia doadoahk ehu me wihwiawihte, oh kitail koaros anahne Sounkomour o ong sohte lipilipil keirda kitail wia. Met mehlel ong emen emen kitail, oh e mehlel ong wehin Koht pohn sampah.
Kauno kin ketin lukei kitail kaidehn en iangalahte Sapwellime wehi ahpw pil patehng doadoahk en kauwada. Koht kin ketin mahsanih aramas ekei me “ahneki mohngiong ehute oh lamalam ehute.” En wia ehu mohngiong, kitail anahne ahneki mohngiong mwakelekel, oh e anahne ehu weliakapw mehlel en mohngiong.
Ahpw e sohte wehwehki wekidala ahi mohngiong pwehn pahrekieng amwail kan. E pil sohte wehwehki wekidala ahmw mohngiong en pwehn pahrekieng ahiet. Me wehwehki kitail koaros en wekidala atail mohngiong kan pwehn pahrekieng Sounkomour o.
Ma kitail saikinte lela wasahu, taman: me sang sawas en Kauno, sohte mehkot me sohte kak pweida.
Soanamwahu oh WiaTowe
Ma komwi pehm me komw sohte konehng patehng, menlau ese me komwi sohte kelehpw. Kaidehn kitail koaros miher nan irair en mour kei me kitail ahneki pepehm me kitail wia aramas emen me sohte me ese nan pere ieu? I lelehngehr met tohto sang pak ehu. Ansou me I sounpar 11, ahi peneinei pekeusang nan imwato oh kosoulahng wasa ieu me se sohte ese. Soahng koaros weksang soahng kan me I kin ese. Oh ngilen ahi lokaia kasalehing seri teikan me I weksang dahme irail ahn. Ansou ehu me I udahn anahne en mie kempoakepahi oh pepehm en kak patehng, I kehnda sangat oh soansuwed.
Pohn sampah wet, pali laud en wekpeseng kan me kitail kin kilang—wekpeseng kan me ekei kin doadoahngki pwehn katohrepeseng aramas—pidada kepwehn sampah: mwomwen aramas, wasa aramas kohsang ie, lokaia, likou, tiahk, oh mehteikan. Ahpw “Pwehki I sohte kin kasawih aramas nin duwen me aramas akan kin wia. Aramas kin kilang mas liki, ahpw Kauno kin kasawih mohngiong.”
Sang Sapwellime keseu, mie ehu Pali me kohdo mwohn meh koaros: seri en Koht. Oh kitail koaros itar soanamwahu nan met.
E konehng en men patehng aramas me duwehte, kin lokaia, mwekid, oh madamadau duwehte kitail. Mie dewen soahng wet.
Ahpw nan sapwellimen Sounkomouro Mwomwohdiso, kitail kin kapokonepene Sapwellimen Koht serihkan me kin inengieng pokonpene oh raparapahki me mehlelo. Kaidehn mwomwatail, dahme kitail kamehlele me pid kopwerment, tiahk, de kitail mehn ia me kihkitail pene. Kaidehn soahng duwepene kan nan atail mour me wiahda atail ehupene. Iei atail pwukoah, atail limpoak ong Koht oh mehn impatail kan, atail poadidieng Sises Krais oh Sapwellime rongamwahu kopwurpwurodohu. Kitail “ehute rehn Krais.”
Ehupene me se raparapahki kaidehn koaros en kesihnen wasahte kis; e wia pwe koaros en sohpeilahng wasa ehute—kilenglahng Sises Krais. Kitail ehute kaidehn pwehki iawasa kitail miher ie ahpw iawasa kitail nanantihla ie, kaidehn pwehki ihs kitail ahpw isime kitail nanantiheng wiahla.
Iei met duwen Mwohmwohdiso mehlel en Krais.
Ehu Paliwar
Ma komwi poakohng Koht, ma komwi men esehla Ih sang ni ideidawehn Sapwellime Iehros o, eri komw iang wia towe. Ma komwi nanantihong momourki sapwellimen Sounkomour o kosonned akan—menda ma komwi saikinte unsekla—eri komwi inenen pwungehng Mwomwohdiso en Sises Krais en Souleng en Imwin-rahn akan.
Oh iaduwen ma komw weksang aramas teikan? E sohte wiahda me komwi mehn liki men—e wiahng komwi kisehn paliwar en Krais me udahn anahnepe. Koaros mie anahnepe nan paliwar en Krais. Salengeh kan kak kilangada mehkan me mahs akan sohte kak. Nehkan kin wia soahng kan me pehkan sohte kak wia.
E sohte wehwehki ahmw pwukoah iei en wekidala koaros en duweiukala. Ahpw e wehwehki me mie ahmw pwukoah kesempwal me komwi pahn sawaskihda—oh me mie mehkot kesempwal me komwi pahn esehla!
Ehu Ngihl
Nan tiepene koaros en kapokon lap, kitail kin paiamwahuki koulen kamarain kan, sang pwihn en koul koahiek kan. Ni omwi pahn karonge, komw kak kasawihada me soun koul kan sohte kin koaros koulki ngihl ehute. Ekei pak ehu pwihn kin koulki ehu ngihl, ekei pak ehu soangen ngihl. Ahpw irail koaros kin ehukipene ngihl kaselelo, oh irail udahn ehupene. Emen emen tohn pwihn en koul ahnekiher ehute koasoandi: en kepinga Koht oh pwokada atail mohngiong kan ong Ih. Emen emen anahne ahneki madamadau oh mohngiong tengedieng ehute kahrepe sarawi. Oh ansou e kin wiawi, irail kin udahn wiahla ehu ngihl.
Ma komw saikinte wiahla towe men nan Mwomwohdiso en Sises Krais en Souleng en Imwin-rahn akan, se lukei komwi en patehng kit ni aht perepereniki en Sounkomour o “koul en limpoak en komour o.” Se anahnei kumwail!! Se poakohng kumwail. Mwomwohdisoh pahn mwahula sang ni ahmw nananti en papah Kauno oh Sapwellime serihkan.
Ma komw kasalehdahr, sang ni ahmw pepdaisla, sang ahmw wiahda inou sarawihkan ong Koht, ahmw ineng en “iangala sapwellimen Koht pwihn, oh kahdankihla Sapwellime aramas,” kalahngan en komwi omwi wia kisehn doadoahk kesempwal oh sarawi wet oh omwi sawas wiahda Mwomwohdiso en Sises Krais dahme Sounkomour o kupwurki en wia.
Ni ahi kaskuhl sangehr kempoakepahi o nan Sehmen, atail limpoak ong Koht oh Sapwellime serihkan wia kadehde kehlail ehu ong sampah me met iei ni mehlel sapwellimen Sounkomour o Mwomwohdiso.
Kauno en ketin kapai kitailda en ni kanemgamah ahpw ngoang nantiheng momour rasehng karasaras kan en atail Sounkomour, Soundoar, oh Kaun kilelehieng kitailehr—pwe koaros en ese me kitail iei Sapwellime tohnpadahk. Ni lengileng sarawi en Sises Krais, amen.