“Keido Karanih Ie”

Riei ko, e kaperenohngie ai kak patehng kumwail nan kapokon lap wet en Mwomwohdiso en Sises Krais en Souleng en Imwin-rahn akan. Sapwellime Mwomwohdiso met. Kitail kohpenehr nan ihmw akan oh wasahn kousoan kan nan sampah ni Mware.

Kitail kin alehda Mware ni atail kin pidolong nan Sapwellime wehi sang wiahda inou sarawi. Ih me wia Iehros en Koht me iasadahro oh linganlahro. Kitail wia aramas kei, me kak lelohng dihp oh mehla. Ahpw, pwehki Sapwellime limpoak ohng kitail, Sounkomouro kin lukei kitail en kerenlahng Ih.

Iet Sapwellime luhk ohng kitail: “Keido kerendo rehi oh I pahn kerenwei rehmw; rapahki ni ngoang oh e pahn diar; peki oh ke pahn alehdi; letelet oh e pahn ritidahnguhk.”

Mie ansou kan kitail kin ahneki pepehm en karanih Sounkomour Sises Krais. Ahpw, ekei pak nan kahpwal en mourwet, kitail kin kehn me kitail dohsang Ih oh kitail kin men ese me E ketin mwahngih dahme mihmi nan atail mongiong kan oh E ketin poakoahng emen emen kitail.

Sapwellimen Sounkomouro luhk iangahki mwomwen atail pahn kak kehn koapwoaroapwoaro. Alehda Ih sang ni ahmw pahn tamataman Ih kokohlahte. Rapahki Ih sang ni ahmw pahn wadek pwuhk sarawi ansou koaros. Peki sang nan mohngiongumw unsek rehn Sahm Nanleng pwehn pehm kerendohn Sapwellime Pwutak Kesempwalo.

Mie wiepe mengei ehu me kitail kak medewehki met. Iei ihme ke pahn wia ma ke dohsang kempoakepahm koa ni uwen ansou iou. Ke pahn rapahkihda elen ahmw kak wehwehieng irail, ke pahn kesempwaliki soahng kan me re pahn kosoia, oh ke pahn wia uhwen ahmw kak pwe ken sewese irail.

Ni ah pahn kalapw wiawi, ni eh wie doudoulahte, ehupene pahn kehlailla, oh ke pahn kehn ahmw karkaranih irailla. Ma ansou reirei kitail sohte pahn kin lokaiapene oh sohte sewese emen emen, atail ehupene pahn luetala.

Sises Krais ketin poakoahng emen emen kitail. E ketkihdo mehn sawaso pwehn karanihala Ih. Pil duwehte kempoakepahmw men, ke pahn wia soahngohte, sang ni kapakap ong Sahm Nanleng ni mwaren Sises Krais, rongorong kaweid mwahu kan sang Ngehn Sarawi, oh mwuri perenkihda sewese mehteikan pwehki Sounkomouro. Me keren ke pahn kehn kapai en kerenlahng Reh.

Ni ahi pwulopwulo, I kehnehr popohl en karanihala Sounkomouro—oh duwen Eh ketin karanihie—sang ni kemwekid mengei kan en peikiong kosonned akan. Ni ahi pwulopwulo, kamadipw sarawi kin wiawi ni mihting en nisoutik. I tamatamante ehu pwohngo, tohtohsang sounpar 75 [isihsek limau] samwalahro, ansou ehu me e rotorot oh kepou likio. I taman pepehm en marain oh soanamwahu ni ahi kapwaiadahr kosonned en patehng Souleng kan oh alehda kamadipw sarawi, inouong Samatail Nanleng en ansou koaros tamataman Sapwellime Iehroso oh kolokol Sapwellime kosonned akan.

Ni imwseklahn mihtingo ni soutiko, se koulki koulen nan pwuken koul iei “Abide with Me; ’Tis Eventide,” me ni lepin mahsen kesempwal kan “O Savior, stay this night with me.”

Lokaia pwukat wadohr pepehm laud en Ngehno ong ie, mendahte ahi wia kisin pwukat kis. I pehmadahr sapwellimen Sounkomouro limpoak oh pepehm en keren soutiko sang ni kaloalamwahu en Ngehn Sarawi.

Sounpar kei mwuri I mentehnoh kapwurehda pepehm en limpoaken Sounkomouro oh pepehm en kereniong Ih erein kamadipw sarawio me I ahnekihdi ni ei pwulopwulo. Eri I kin kolokol ehu kosonned: I onopikiher pwuhk sarawi kan.

Nan pwuken Luk, I wadekehr duwen rahn kesiluhwo mwurin Ah kalopwulahr oh serdier, ansou me sounpapah pwoson kan kodohr, pwehki arail poakohng Sounkomouro, pwehn keiehdi Sapwellime paliwaro. Ni arail lelehr mwo, irail diar takaio eh ketepwursangehr ewen sousouo oh kilangadahr me Kahlepeo solahr mie.

Tohnleng riemen kesihnen limwahrail oh idek dahme re masepwehngki:

“Dahme kumwail raparapahkihki me momour emen nanpwungen me melahr akan?

“E souwer ket met, ahpw e ketin iasadahr. Tamanda dahme e ketin mahsanihong kumwail ni eh ketikette rehmwail nan Kalili,

“Mahsani, Nein-Aramas udahn pahn pengpengla rehn me dipan akan oh kalohpwuala oh e pahn iasada ni kesiluh en rahn.”

Nisoutiko ni ah rotorotlahr, tohnpadahk riemen aluhsangehr Serusalem kolahng Emmaus, oh Kaun iasadahro pwarehng irahier oh ieiang ira.

Pwuhken Luk mweidehng kitail en ieiang irail nisoutiko.

“Eri, nindokon ara koasoakoasoi kohla, pein Sises pa ketin keiong mpara, oh iang ira ketiket kohla nanialo.

“Ira kilangada, ira ahpw sohte kadehde me iei ih mwo.

“Sises eri ketin keinemwe rehra, Dahme kumwa koasoakoasoia kohdo? Ira ahpw uhdi, mwomwen pahtou?

“Emen ira, ede Kleopas, ahpw patohwanohng Sises, Komwihte mehn keiru men nan Serusalem me sohte mwahngih dahme wiawiher kohdo rahn pwukat nan kahnimwo?”

Ira ndahieng duwen ara pahtoukihla me Sises mehla ni ara koapwoaroapwoariki me Ih me pahn wia Soundoar en Israel.

Kaun iasadahro mweinte mahsen ni limpoak ansou me E mahsenohng tohnpadahk nsensuwedilahr riemenet.

Ni ai doulahte wie wadawad, lokaia pwukat kodohng ie me sair ahi mohngionget, duwehte pepehm me I alehdier ni ai wia sin pwutak kiso:

“Irail eri ketin lel nan kahnimw me re ketiket kolahng ie: oh Sises ahpw ketin mwomwehda me e pahn ketin dodouluhllahte.

“Ira ahpw ngidingidki patohwanohng, Komw ketin pweiekdi reht: pwe ketipin peiklahr, oh wasa pwongier. Ih eri ketilong rehra nan ihmwo pwe en iang pweiekdi wasao.”

Sounkomouro alehda luhko nihpwongo en pidolong nan imwen Sapwellime tohnpadahko. E ketidi pwehn iang irail mwonge. E ale pilawa, kapaiada, pilitikihpeseng, oh kihieng ira. Eri ira eri kilangada wasa, oh ira esehier ihs Ih. Sises ahpw ketin sohrasang mwohra.

Luk ntingihdi duwen pepehm en tohnpadahk pai pwuko: “Ira ahpw ndapene, Nan kapehdita kat soh kin mwekimwekidki peren, rasehng kisiniei, ni eh kin mahmahsen oh kawehwehiong kita Pwuhk Sarawi, kohdo nanialo?”

Tohnpadahk riemeno ahpw karuaru pwuralahng Serusalem pwehn kehsehki Wahnpoaron ehk-emeno dahme wiawihero. Ni ara koskosoia soahng kan me lelehng irahier koa, Sounkomouro pwurehng pwarada.

E ketin uh nanpwungarail oh “mahsanihong irail, Popohl ong kumwail.” E kasalehda kokohp en Sapwellime misin pwehn tomwki dipen koaros Sapwellimen Seme serihkan oh en sapwadekada selin mehla.

“Oh mahsanihong irail, Ih duwen me ntingdier en met: Mesaiao uhdahn pahn lokolok oh iasada sang mehla ni kesiluh en rahn:

“Oh rongamwahu en koluhla en nan kapehd oh lapwapen dihp akan pahn lohkseli nan wehi koaros, ni mware, tepisang Serusalem.

“Eri kumwail me pahn kin sounkadehdehn mepwukat.”

Duwehte Sapwellime tohnpadahk koa, koaros sapwellimen Sahm Nanleng seri me piladahr en pidelong nan kehl en pepdais mih pahn inou sarawi en wia soun kadehde ong Sounkomouro oh en apwalih me ahneki anahn kan erein arail mour pohn sampah. Inou wet wiawidahr ohng kitail sang soukohp Alma nan Pwuken Mormon sounpar ngeder samwalahro ni Pihl akan en Mormon:

“Kumwail me kin inengieng kohdo rehn Koht, oh wiahla sapwellime aramas, oh inengiong en iang toutouki en mehteikan kotoutou kan, pahn iang ahneki sapwellime marain;

“Ehi, oh me kumwail kin men mauk iang irail akan me kin mauk; ehi, oh kin kamwaiti irail akan me anahne en kin kamwaitala, oh en wia nin duwen sounkadehde kan en Koht ni ansou koaros oh ni mehkoaros, oh ni wasa koaros … , lao kumwail mehla, pwe kumwail en kak komourla rehn Koht, … pwe kumwail en kak ahneki mour soutuk.”

Ni amwail pahn mehleliong inou pwukat, kumwail pahn diarada me Kauno kin ketin kolokol Sapwellime inou me E pahn ehuong kumwail nan amwail papah, pwehn kamarahda amwail katoutou kan. Kumwail pahn esehla Sounkomouro, oh mwurin ansou ehu kumwail pahn duwehla Ih oh “pahn unsekla reh.” Sang ni sewese mehteikan pwehki Sounkomouro, kumwail pahn diarada me kumwail kerkerenlahng Reh.

Tohto kumwail mie kempoakapahmwail kan me pwupwisangehr pohn ahl kolahng mour soutuko. Kumwail kin medewe dahme kumwail kak wia pwehn kapwureiraildo. Kumwail kak koapwoaroapwoarki me Kauno pahn keiong mparail ni amwail pahn papah Ih ni pwoson.

Kumwail taman en Kauno inou ong Sosep Smith oh Sidney Rigdon ansou me ira mweselsang arail peneinei ni ara wia Sapwellime ilek: “Kempoakepahi kan Sidney oh Sosep, amwa peneinei kan mwahu; irail mih nan limei kan, oh I pahn wiahiong irail me I ketin kupwurki; pwehki rehi mie manaman koaros.”

Ni amwail pahn sewesehda me anahn laud kan, sapwellimen Kauno manaman pahn kakehlakai kumwail. Limehkan pahn iang pehmwkan kapahwei pwehn sewese oh kapaiada sapwellimen Sahm Nanleng serihkan.

Koaros soun papah-inou sarawi en Sises Krais pahn alehdi Ah kaweid ni arail pahn kapaida oh papah mehteikan pwehki Ih. Eri irail pahn pehm sapwellimen Sounkomouro limpoak oh diar popohl ni arail pahn keiong Mpe.

I wia emen sounkadehde ong Iasadahn Kauno duwehtehte ma I pil iang mih wasahu ni soutiko rehn tohnpadahk riemeno nan ihmwo pohn ahl en Emmaus o. I ese me E ketin ieias.

Met iei Sapwellime Mwomwohdiso mehlel—Mwomwohdiso en Sises Krais. Ni Rahn en Kadeiko, kitail pahn iang uh mwohn Sounkomouro, kilikilengpene. E pahn wia ehu ansou en popohl laud ong irail ko, nan mour wet, me kerenlahngehr Reh nan Sapwellime papah oh kak kaskasik karonge Sapwellime mahsen pwukat: “Keieu mwahu, papah lelepek oh mehlel men kowe.”

I kadehdehki nin duwen sounkadehde men en Soukomour ieiaso oh atail Soundoar, ni mwaren Sises Krais, ahmen.