Tomwpen Sises Krais kin Ketkihda Perehpen Kahpwal

Tomwpen Sises Krais kin ketkihda perepen kahpwal en kasongsong me kitail kin sohpai nan mour wet. Presedend Russell M. Nelson kiehngie ien kasarawihla Tehnpas Sarawi en Casper Wyoming pahr nekiero. E wia mehn kapehm laud, kasengseng, oh ngehno audeiehla. E wadohng kitail kilel sansal ehu me pid dahme kin wiawi nan tehnpas sarawi wia doarepen Sapwellimen Koht seri kan pwehki Tomwpen Sounkomouro.

Steik kan me iang mih wasa me Tehnpas Sarawi en Casper Wyoming mihieu pali laud en sahpwo wia ahl me irail paionihr kan en Souleng kan en Imwin-rahn akan keid loale nan pwungen pahr 1847 oh 1868. Ni ei kaukaunop ohng kasarawi en tehnpaso, I pilehu wadek ekei poadoapoad en ahl me peian Pillap en Platte me karanih Casper oh kohkolahng Kahnihmw en Salt Lake. Wasahu wia ahl ehu me diren mehn masliki kan kin doadoahngki. Ihmei udahn kesempwalki iei paionihr en Souleng en Imwin-rahn akan me tohtoh sang meh 60,000 (wene nen) me keid nan ahlo.

Pali lauden paionihr kan dakehdo kuruma, ahpw irail meh 3,000 (sili kid) doadoahngki me kin pwupwuhski peh. Kompani en kurumahn pwupwuhs meh waluh wiahda sansal takai en ketemen ohng dahme pweidahr oh ohng ekei irail me melahr. En Willie oh Martin kompani en kurumahn pwupwuhs en nan 1856 me sohte iang.

I pilehu onopki soaipen ahn Willie oh Martin kompani en kurumahkau sangete ansou me nan wehwe tepda sakanakanlaho. I tepda wehwehkihda mwahu apwal kan me irail lelohng arail kotkote Pillap en Sweetwater, Martin’s Cove, Rocky Ridge, oh Rock Creek Hollow.

Nanpwungen Melmel kan, Sang Albin Veselka

I saik kohla nan Tehnpas Sarawi en Casper mwohn ahi wia kasarawio. Ansou me I aluhlong wasahn pwedilongo, ihme I keieu kilkilang kilelen kurumahn mahso me kahdaniki Between Storms. Mahleno sohte nohn kawehwehda mwahu duwen kahpwal me wiawiherko. Ni ahi kadehde mwahu, I medewehla me, “Mahlen wet pwung; pali lauden nein pwihn en paionihr kurumahko sohte kin kasalehda kahpwal me kin wiawihko.” I kamehlele me met rasehng mour. Ekei pak kitail kin mih nan pwungen melimel kan oh ekei pak nan pwungen depwek kan oh marain en ketipin.

Heaven’s Portal, Sang Jim Wilcox

Ansou mei kilenglahng udahn mahleno ni dihd teio, e kahdaniki Heaven’s Portal, I kasawihda me mahlen kaselel en soamer wet me kahdaniki “Devil’s Gate,” me meleilei oh sansal mwahu ni Pillap en Sweetwater wie kerekerdie, kasalehda lingan en Sapwellimen Kauno kepikipiko, kaidehnte kasongosong kan me paionihr ko sohpai nan kahpwal laud en ansou en sinoh.

Eri ngehi uhd kilengla mwowehu, mwurin desko, oh kilangada kilel kaselel ehu en Sounkomouro. Ansouohte e kahrehieng ahi direkihla pepehm en kalahngan. Nan sampah me direki lingan, pil mie kasongosong laud kei loale. Ni atail pahn sohpeilahng Sises Krais, iei Sounkomour en sampah, E pahn perehsang kitail melimel en mour kan sang ni Sapwellime Tomwo me kin peiante sapwellimen Sahmo pilahn.

Ohngie, wasahn pwedilongo wia wasahn kaunop mwahu ohng perehn tiahk sarawi en tehnpaso pwehn mweidohng kitail en alehda tiahk sarawi soutik kan, wiahda inou sarawi kan, oh alehda ni mehlel oh kehn kapai kan en Tomwpen Sounkomouro. Sapwellimen Sahmo pilahn en peren poahsoan sang ni perepen tomwpen Sounkomouro.

Dahme paionihrko lelehng kiheng Souleng en Imwin-Rahn akan poadoapoad kesempwal en tiahk oh kihpene manaman en sohso sarawi. Ohng ekei, mwein likasapwo wiawihkiher sounpar kei mwurin ahr idihdieng en kohkohsang Missouri oh Nauvoo. Ohng ekei e tepda mwurin Presedend Brigham Young ah pakairkihda koasoandihn kurumahn pwupwuhsko, me wiawihda pwehn mengeiong koaros pwehki ah pweitikitik. Kurumahn pwupwuhsko pweitikitik sang kurumahn dakadako oh kou ko.

Misineri men nan England, iei Millen Atwood, inda me ansou me kurumahn pwupwuhsko pakairdahu, “e mwekida rasehng tiwi ngalangal ah lulda, oh mohngiong en Souleng kan me paisuwed direkihla pohpohl oh kaping.” Me tohto kin wie “kapakapki oh kaikaisihsolki rahn kei, oh pwohng kei, pwe irail en ahnki ansou mwahu en ehuieng riarail ohl oh lih akan nan nahnahko.”

Pali laud Souleng me pwuhs kurumahko lelehng apwal laud ahpw re sohte insenohki kasongsong laud me wiawihko. Ahpw kompani en kurumahn pwupwuhs meh riau me iei, Willie oh Martin, irail inenen duhpekla, tenkihla uwen laud en lomwlomwuro, oh dir me mehla.

Pali lauden irail me seiloak nan sed sang Liverpook England, nan Mei pahr 1856 irail dakehdo sohp riau. Irail lella wasahn pwuhs kurumahu nan Kahnihmw en Iowa nan Suhn oh Sulai. Ni sohte kasikpe, kompani riauo koaros pil samwalahr Salt Lake Valley ni imwin ansou pwuko.

Presedend Brigham Young tepda kasawihda lapalahn apwal me kompani pwuk lelehng nan Oaktohpe 4, 1856. Mwurin rahno e kesihnenda mwohn Soulengko nan Salt Lake City oh inda, “Tohto riatail ohl oh lih akan loken pwupwuhs kuruma kohdo, … oh irail anahne wisikdo me; kitail anahne kadarehng irail sawas … mwohn sinoh ah pahn leledo.”

E peki rehn pisop kan en kaunopada pwihn 60, kuruma 12, oh ten en pilawa amas 12 oh kosoia, “Kohla oh wahdo aramas akan ansou wet nan patapat et.”

Paionihr koaros me iang kompani en kurumahn me kin pwupwuhs en Willie oh Martin tohtohki mwein ele 1,100. Ekei kisehn souleng mwahu pwukat me 200 mehla nan ahlo. Ma sohte sawas wiawi ansou mwadang, me tohtoh sang mwo kakete mehla.

Melimel en sinoh pahn tep wihk riau mwurin pwihn en sawas keieuo arail mweselsang Salt Lake City. Ekei irail me iang pesnes en Willie oh Martin kawehwehda uwen ah apwal melimelo ah tepdahu. Irail pil kawehwehda uwen popohl laud ansou me sounsawasko lellahu.

Mary Hurren kosoiahda mwomwen sounsawasko ahr lellahu, dene: “Pilen mesen ohl akan keredi, oh seri kan kahkahlengki arail popohl. Irail meleileidihte, irail koaros kelepwikihdi nan sinohu oh kepinga Koht.”

Mwurin rahn riau, kompani en Willie anahne seiloangki seiloak me keieu apwal nan ahlo, irail keid pohn Rocky Ridge, nan melimel keieu lomwlomwuro. Irail me lahsoko sohte lella ni impwalo lau lel kiloak 5:00 nimenseng. Aramas ehk-silimen mehla oh seridi nan ehute sousou.

Nan Nohpempe 7, kompani en Willie kerenlahngeh Salt Lake Valley, ahpw nimensengo, meh silimen mehla. Mwurin rahn riau, kompani en Willie lella Salt Lake, wasa me irail alehdi koasoamw kaperen ie oh Souleng kan kasamwoh irail ohng nan imwarail kan.

Rahnohte, kompani en Martin mihmihkihte mwail 325 (523 km) nan ahlo, wie lokolokte nan lomwlomwuro oh sohte itar mwenge. Rahn kei mwowe, irail kotehier Pillap en Sweetwater pwe ren lella wasa me kahdaniki ansou wet Martin’s Cove, wasa irail koapwoaroapwoarki ren diar pereparail ie. Emen paionihrko inda, “Kotehla pihlo me keieu kalok sang soahng koaros.” Ekei sounsawasko—me iangahki en ahi pahpahu pahpa kahlapo, me iei David Patten Kimball, sounparte 17, iangahiki ekei ienge me pwulopwul, “George W. Grant, Allen Huntington, Stephen Taylor, oh Ira Nebeker—mihmihkiher awah kei nan pihl lomwlowmuro,” wie sewsewese aramas kan en kotehla pillap en Sweetwater o.

Erein kemwekid wet ah wihwiawi, nin duwen ahi esehla duwen sounsawasko, I diarada me irail koaros ideidawehn soukohpo oh wia soahng kei pwehn sewesehda kahpwal me Soulengko mihla loalehu. Sounsawasko koaros komwad, duwehte irail me kin kohkohsang sapwarail kan.

Sang ni ei onohnopiki soaiparail, I kapingkihda uwen ehupene oh kairoir sohte imwi me mih nan pwungen irail me kohkohsang sapwarail kan. John oh Maria Linford oh neira pwutak silimeno iang pwihn en kompani en Willie. John mehla awah kei mwohn sounsawasko arail lellahu. E indahng Maria me e perenki me irail pahn kanekehla seiloako. E inda, “I sohte pahn mour lella nan Salt Lake,” “ahpw kowe oh neita pwutak kan pahn lella, oh I sohte kaulimkihla dahme kitail lelohng ma neita pwutak kan pahn keirda oh wiahda arail peneinei nan Saion.”

Presedend James E. Faust kihda oaralap kopwuriamwei wet: “Nan ansoun me paionihrko pwupwuhs kurumahko ni ngoang mehlel, e kaskuhlihkin kitail mehkot mehlel kesempwal ehu. Koaros pahn anahne lelehng kahpwal, oh dahme kasawehweh oh sohte kesempwal nan atail mour kak sohrala duwehte samin oh pahn kahrehieng atail pwoson en marainla, unsekla, oh kehlaila. E mwomwen diralahr pwunod, lokolok, oh insensuwed ohng koaros, pil iangahki irail me pil kin ngoangki wia me pwung oh men loaloapwoat. Met wia kisehn nannantiheng en kerenlahng rehn Koht.”

Nan Sapwellime Tomw oh Iasada soutiko, Sounkomouro kamweidpeseng, “selin mehla, pwehki eh ketin powehdi mehla” ohng koaros. Ohng irail me koluhkihla diparail kan, E ketin, “pein wilianla me dipan akan, ni eh ketin doareiraillahr, oh kapwungalahr anahn en kopwungo.”

Ma sohte Tomwo, kitail sohte kak pein doareikitaila sang dihp oh mehla. Erein dihp ah kak wia kisehn atail kahpwal kan, kasongsong en mour kin peian sapwungala kan, wiahda sapwung kan, mwekid en tepel kan sang mehteikan, oh soahng tohto me kitail sohte kak powehdi.

Kalohki Ei Rongamwahu padahki: “Ni atail pahn likih Sises Krais oh Sapwellime Tomwpen dihp, E kak ketin kakehlailih kitail nan ansoun kasongosong, soumwahu, oh weirek kan. Kitail kak direkihla peren, meleilei, oh kaloalamwahu. Mehkoaros me sapahrek nan mour kak pahrekla pwehki Tomwpen Sises Krais.”

Nan ansou en Ihster wet, kitail sohpeilahngte Sounkomouro oh Sapwellime tohnmetei en tomwo. Tomwo ketkihdo koapwoaroapwoar oh marain nan ansoun rotorot laud oh pahtou. Presedend Gordon B. Hinckley kasalehda me, “Ansou me kosoupen poadoapoad koaros kin wiawi, … [sohte] mehkot … kaselel, lamwin, kaperen sang mwekid en kalahngan wet.”

Soahng siluh mei men ehukihda mei medewe me pahn mwahuieng kitail.

Keieu, kedehr kasohwe kesempwalpen wia dahme kitail kak wia pwehn sewesehda kahpwal en mehteikan sang ni paliwar oh ni mehlel pali ngehn kan.

Keriau, ngoangki alehda Tomwpen Sounkomouro. Kitail koaros anahne nantiheng kairada popohl oh peren pil lel ansou me kitail kin sohpai kahpwal en mour kan. Atail koasoandi anahne en momourki marain en ketipin pohn ahlo. I kin kilkilang ei pwoud kesempwal, Mary, eh kin wia met erein ah mour. I kin kapingkiheng ah kin kamarainiada, kakehlailiada mendahte aht kin sohpai kahpwal kan nan erein sounpar akan.

Kesiluh en ire iei en wiahda ansou en loaloapwoatehng peudiahl Tomwpen Sounkomouro. Soangsoangen wiepe kei kitail kak wia pwehn kasawih pein atail pelien lamalam. Ahpw, iang sarawi oh ale kamadipw sarawi me keieu kesempwal.

Me pil kesempwal duwehte iei kalapw kohla nan tehnpas sarawi wasa me kak. Tehnpas sarawio kin katamando duwen Tomwpen Sounkomouro oh dahme e kin powehdi kan. Oh me pil keieu kesempwal, kohla nan tehnpas sarawi kin kahrehieng kitail en sewesehda irail me melahr kan me kitail poakehng oh kadaudokatail kan.

Atail lahsin kapokon lapo, Presedend Russell M. Nelson kasalehda padahk wet oh kapatahieng me, “Kapaipen [Tehnpas Sarawi] kan … kin sawas kaunopehng irail me pahn sewese kaunopehng sampah Ketido Keriau en Kauno!”

Kitail anahne tamataman tohnmetei oh karasaras kan en dih kan, ahpw atail kapingki, kalahnganki, oh pwongih anahne poahsoanki Sounkomour en sampah oh Sapwellime tohnmetei en tomwo. I kadehdehki me kih ohng sapwellimen Sahmo pilahn en pereno iei Tomwo me pweidahr pwehki Sounkomour, Sises Krais. E ketin ieias oh kin kaweid Sapwellime Mwomwohdiso. Tomwpen Sises Krais kin ketkihda perepen kahpwal sang kasongsong kan me kitail kin sohpai nan mour wet. Ni mwaren Sises Krais, ahmen.