Ansou kan en Kapwurupwurdohn Soahng Koaros

Koasoandi en Mwomwohdiso en Sises Krais en Souleng en Imwin-Rahn akan wia doadoahk ehu sang ni mwekid oh wiewia kapwuriamwei kei. Keieu en mwekid pwukat wiawi sounpar eisek samwalahro nan New York.

Nan spring en pahr 1820, pwutak pwulopwul emen me adahneki Joseph Smith kohla nan tuhke kei limwahn ihmwehu pwehn kapakap. E ahneki peidek kan me pid komour pen palingeni, oh e men ese “mehnia rehn [mwomwohdiso kan] me pwung, me [e] pahn kak iangala.” Joseph koapworopworki me Koht pahn ketin sapeng ah kapakap oh kaweid ih.

Menlau ese me Joseph sohte kapakapkihte dahme pwung, Ahpw, e kapakapki en ese dahme pwung pwe en kak wia dahme pwung. Joseph peki ni pwoson oh e loalopwoat en wia nin duwen pasapeng kan me e alehdi.

“Ni [pasapeng] en ah kapakap sang [nan ah mohngiong], Koht Sahm oh Sapwellime Ieros, Sises Krais, ketin pwarehng Joseph oh kasarawiahla ‘kopwuropwurdohn mehkoaros’ (Wiewia kan 3:21nin duwen Pwuhk Sarawi ah mahsaniher. Nan kasansal wet, e esehla me mwurin kamakamalahn tepin Wahnpoaron ko, Sapwellimen Krais Mwomwohdiso en Kedehde Kapw sohrala sang sampah.” Joseph Smith pahn wia dipwisou en doadoahk ehu ong kapwurpwurdohn mehlel kan, mweimwei, oh inou kan oh tiahk sarawi kan en Sapwellimen Sounkomouro Mwomwohdiso.

Joseph kasalehda ni mehlel: “I kilangada Kahlap en aramas riemen, me sapwellimara marain oh lingan sohte me kak kawehwehdi, ketin keskesihnen pohi nan wehwe. Emen ira mahsendohng ie, lukwerihkinie edei oh mahsanih, idilahng mehteio—Met Nei Pwutak Kempoake. Rong Ih!”

Sang ni kaudiahl wet oh mwekid kapwuriamwei kan me wiawi mwuhr, Joseph Smith eselahr me Koht oh Sises Krais mwangih Ih nin duwen aramas emen, kesempwaliki ah mour soutuk, oh sapwellimaniki doadoahk ehu ong Ih en wia. E pil esehla iren kaweid kei duwen mwekid, mwohmw, oh unsek pen Koht—oh me Sahm oh Nah torohrpeseng oh ira wia aramas riemen. Sises Krais iei udahn Iehros en Koht ni palingehn oh ni paliwar.

Joseph Smith kahlohki me Samatail Nanleng oh Sises Krais sapwellimaniki paliwar kan. E koasoia, “Sahmo sapwellimaniki paliwar en uduk oh tih me duwehte aramas emen; Iehroso pil duwehte; ahpw Ngehn Sarawio sohte ahneki Paliwar en uduk oh tih, ahpw e wia aramas en Ngehn ehu.”

I kadehdehki pwaredohn Sahm oh Nah ong Joseph Smith wia mwekid laud ehu ong ni “kapwurpwurdohn mehkoaros me kalohkdahr sang irail soukohp sarawi kan sangete nin tapio.”

Keriau en doadoahk laud oh manaman me kahrehiong sapwelimen Sounkomouro Mwomwohdiso ah soandi mwahu iei sang ni kawehwehdi oh kapwurpwurdohn Pwuhk en Mormon.

“Joseph Smith alehdi kisakis oh manaman en Koht pwehn kawehweh poadopoad en kawahu: iei Pwuhk en Mormon—Pil Ehu Kadehde pen Sises Krais. … Pwuhk sarawi wet me iangahki[s]poadopoad en Sises Krais doadoahk rehn aramas en palikapi en sampah mwurinte Sapwellime Iasadao. [Pwuken Mormon] padahngki kahrehpen mour oh kawehwe padahk kan en Krais, me wia poahsoan en kahrehpehu. Ni eh wia iengen Pwuhk Sarawi, Pwuhk en Mormon kin kadehde me aramas koaros wia sapwellimen Sahm Nanleng me diren limpoak, me mie Sapwellime koasoandi ong atail mour, oh me Sapwellime Ieros, Sises Krais, kin wie mahmahsente rahn wet duwehte keilahn aio.”

Ni atail wia towe mehlel en Sapwellimen Sounkomouro Mwomwohdiso me kapwurupwurdohu, “Se kamehlele me Pwuhk Sarawi iei mahsen en Koht ni ah kawehwehdi ni pwung; se pil kamehlele me Pwuhk en Mormon iei mahsen en Koht.” Pwuhk en Mormon wia pil ehu kadehde pen Sises Krais, kapwungki duwen mehlel pen Pwuhk Sarawi, oh kapwurehdo mehlel sansal oh kesempwal akan me salongala sang Pwuhk Sarawi.

Mwomwohdiso en Sises Krais en Souleng en Imwin-rahn akan kin padahngki me Mwomwohdiso me tepin kawada sang Sounkomouro, iangahki ah mweimwei, sarawi, mehlel, oh inou oh tiahk sarawi kan, salongala sang sampah. Ni ah wia kisehn kapwurupwurdohn mehkoaros me kokohpadahr ni imwin rahn akan, soukohp en mahs oko oh wahnpoaron akan pein ketkihda manaman en Prihsduhd ong Joseph Smith oh ketikihong kih kan en Prihsduhd. Met wia kesiluh en doadoahk kapwuriamwei oh manaman me kahrehiong koasoandien sapwellimen Sounkomour Mwomwodiso kopwuropwurdo.

Mweimwei en prihsduhd kin mweidada Sapwellimen Koht ladu kan en “weliandi [Ih] oh mwekid ni Mware.” “Kih kan en prihsduhd iei mweimwei me kohieng irail en kak kaweid wiepen doadoahk en prihsduhd en sewese Sapwellimen Koht seri kan.”

Pahn manaman en Sahmo oh Sapwellimehu, Sohn Sounpepdais me iasadahro kapwuredohr, nan 1829,[kid welipwiki rieisek duwau] mweimwei en pepdais sang ni kaduhdi ong lapwepen dihp akan. Nan pahrohte, silimen sang nan pwungen Wahnparon Ehkriemeno—Piter, Sems, and Sohn—kapwuredohr pwukoahn wahnparon oh patehng manaman oh mweimwei en prihsduhd oh kih kan.

Sounpar weneu mwurin kawkawadahn Mwomwohdiso, ni Tehnpas Sarawi en Kirtland, Moses, Elaias, oh Elaisah kihong Joseph kisehn manaman oh mweimwei pwe en kaneknekla Sapwellimen Koht doadoahk ni imwin rahn akan.

Moses kiheng kih kan en kowpurpwurpenehn mehn Israel.

Elaias kiheng mwehi en rongamwahu en Eipraam, me iangahki kapwurupwurdohn inou kan en Eipraam.

Elaisah ketikihdo kih kan en manaman en katengtengpene, mweimweidohng manaman en tiahk sarawi kan en wiawi pohn sampah en katengtengpene soutuk, duwehte katengepene peneinei kan kohkohlahte me lapalasang mehla.

Ni Joseph Smith kawehwehdi Pwuhk en Mormon, e alehdi kaudiahl kei me Mwomwohdiso en Sises Krais pahn pwurehng wiawihda. Ahpw Kauno ketin padahkihong Joseph ah en dehr mwadang en kawada Sapwellime Mwomwohdiso. Ahpw, “sang ni ngehn en kokohp oh kaudiahl,” Kauno ketin kasalehiong Joseph “rahno … [me e] pahn [pwurehng] kawada sapahl Sapwellime Mwomwohdiso pohn sampah.”

Mwomwohdiso soandiehr ni soanamwahu mwurinihte kapwurupwurdohn Prihsduhd oh wiawidahn Pwuhk en Mormon. Tepin kopi en Pwuhk en Mormon kohdahr ni Mahs 26, 1830, oh Mwomwohdiso wiawihda ni Epreil 6.

“Mwomwohdiso en Sises Krais en Souleng En Imwin-rahn akan … iei sapwellimen Krais Mwohmwohdiso en nan kadehde kapw me kopwurpwurdohr. Mwomwohdiso wet poahsoanda pohn takain pwukekeimw, iei Sises Krais, oh Sapwellime Tomwo soutuk oh Iasadao. Sises Krais pwurehng malipe Wahnpoaron akan oh ketikihong irailehr mweimwei en Prihsduhd. E ketin luke koaors en kohdo Reh oh Sapwellime Mwomwohdiso, pwehn alehda Ngehn Sarawi, tiahk sarawi en komour, oh alehda popohl soutuk.”

Pwaredohn Sahm oh Nah ong Joseph Smith, kawehwedi oh kohdong Pwuhk en Mormon, oh kapwurupwurdohn mweimwei oh kih kan en prihsduhd inenen anahnepe ong koukoudahn sapwellimen Kauno Mwomwohdiso sounpar 195 [epwiki duweisek limau] samwalahro.

Nan Kadehde Meiring, soukohp Daniel kawewehda ouraman ehu duwen takai ehu ah pahn pwaiksang nahna ehu ni sohte mehkot ah sair oh pahn audehda sampah. Sounpar ehu mwurin koukoudahn Mwomwohdiso, Kauno ketin padahkihong Joseph Smith me kih en wein Koht pil pwurengehr “kohieng aramas pohn sampah” oh “rongamwahu [en Sises Krais pahn] lelewei ni ehdin sampah, duwehte takai me pwaiksang nahnao ni sohte me sair.”

I kadehdehki: Me Kauno wie kapwkapwaiadahr Sapwellime inou. Sapwellimen Sounkomouro Mwomwohdiso kopwuropwurdo kawkawada pohn sampah oh e wia dipwisou en doadoahk me Koht pahn “kihpene soahng koaros en wiahla ehu rehn Krais, koaros me mihmi nanleng, oh me mih pohn sampah; duwehte me mihmi Reh.”

Sapwellimen Kauno doadoahk en imwin-rahn akan “wia mwekid ehu me kesempwal ong aramas en Koht koaros ni dih koaros; e wia ire ehu me soukohp akan, samworo kan oh nanmwariki kan me medewehki ni peren re kin kasikasik ni peren rahn me kitail kin momouriki; oh karakariki ineng en nanleng oh popohl me irail koulki oh intingkidi oh kohpada met me wiawi rahn pwukat.”

Nan kaimwsekilahn mwehi lap en rongamwahu kan, “koaros oh unseklahn ehupene, en kamwahulahng mwehi kan, oh kih kan, oh manaman akan, oh lingan kan pahn wiawi, oh pahn sansalada sang ni mwein Adam leledohng rahn pwukat. Oh kaidehnte met, ahpw soahng teikan me sohte sansalada sang ni poahsoan en sampah … pahn sansalada … ni met, iei mwein unseklahn ansou kan.”

Soukohp Joseph kawehwehda, “Tiahk sarawi kan koaros oh pwukoah kan me anahnepe sang Prihsduhdo, pahn kaweid oh kosonned akan en me Lapalapo nan ehu ehu mwehi pwukat koaros, pahn wiawi ni imwin rahn akan … weuwahdo kapwurupwurdohn soahng kan koaros me kalohkdahr sang soukohp sarawi kan koaros.”

I songisong en wadilikihla poahson kan me keieu kesempwal oh lingan en “rohng mwahu” me emen emen aramas nan sampah kak alehdi—padahk me Kaun Sises Krais ketin kapwuredohr Sapwellime rongamwahu oh Mwomwodiso ni imwin rahn akan.

Ih luke koaros en kasukuhlki oh kasalehda me padahk wet mehlel. Ih inoukihda me aramas emen “me pahn kapakapki oh onopiki padahk en Kopwuropwurdohu oh wia ni pwoson pahn kapaida [sang ni manaman en Ngehn Sarawi] pwe re en pein alehdi pein ahr kadehde pen ah sarawi oh kahrehpe en kaunopada sampah ong Ketido Keriau en atail Kaun oh Sounkomour, Sises Krais.” Ni omw kin kapakap oh kasikasik en alehdi oh wia nin duwen pasapeng ehu sang rehn Koht, duwehte pwutak pwulopwul Joseph Smith, omw koaihek en kasawih oh sapeng ong soun kadehde sarawio pahn laudla.

I kadehdehki me Koht, Sahm Soutuk, iei Samatail. I kadehdehki oh wia soun kadehde men me Sises Krais iei Sapwellimen Sahm Iehros kompoake oh Sapwellime Iehros ni uduk. Ih me atail Sounkomour oh Soundoar.

Oh I pereniki kadehdeki me Sahm oh Naho ketin pwarohng pwutak Joseph Smith, me tapiada Kapwurupwurdohn rongamwahu en Sises Krais ni imwin rahn akan. Pwuhk en Mormon wia pil ehu kadehde pen Sises Krais oh e kolokol mahsen en Koht. Mweimwei en Prihsduhd en weliandi Sounkomouro oh mwekid ni Mware pwurehngehr dierek pohn sampah. Oh Mwomwohdiso en Sises Krais en Souleng en Imwin-rahn akan iei Sapwellimen Krais Mwomwodiso kapwurupwurdohu me duwehte Sapwellimehu nan Kadehde Kapw. Ih wia ahi kadehde me mehpwukat koaros mehlel ni mwahr sarawi en Kaun Sises Krais, ahmen.