Bikpela Jisas Krais Bai Kam Bek Gen

Ol brata na susa, Mi amamas Bikpela i blesim mi long toktok long yupela.

Long dispela konferens, Bikpela i toktok long yumi thru long ol wokman bilong Em. Mi enkarijim yupela long stadim ol toktok bilong ol. Yusim ol olsem ol test bilong wanem i tru na wanem i no tru long narapela 6-pela mun.

Wok bilong stretim Salt Lake Temple na ol narapela hap long Temple Square i kamap inapim 5-pela yia olgeta. I luk olsem ol dispela wok bai pinis long 2026. Mipela i amamas long olgeta i mekim dispela wok.

Long laspela sikspela mun , mipela dediketim o ridediketim nainpela temple long faipela kauntri. Namel long nau na pinis bilong yia, mipela bai dediketim faipela moa.

Tede, mipela i amamas long anaunsim ol plen long sanapim 17pela moa temple. Plis harim wantaim reverens taim mi anaunsim ol hap.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Ol brata na susa, yupela lukim tu samting kamap long ai bilong yumi? Mi beten yumi bai no inap abrusim dispela bikpela taim! Tru Bikpela i hariapim wok bilong Em.

Wai na yumi sanapim ol temple hariap tru? Wai? Bikos Bikpela i tokim yumi long mekim. Blesing bilong temple i helpim bungim Israel long tupela sait bilong veil. Ol dispela blesing i helpim ol pipol i husat bai helpim long redim wol bilong Namba tu Kambek bilong Bikpela!

Olsem profet Isaiah i tok,na wankain long Handel, Messiah,taim Jisas Krais kam bek,“glori bilong Bikpela bai kamap plesklia, na olgeta man bilong graun bai lukim.”

Long dispela taim, “gavman bai stap long solda bilong Em: na nem bilong em yumi bai kolim Wandaful, Kaunsela, Dispela God i gat strong, Papa istap oltaim, Prins bilong Bel isi.”

Jisas Krais bai bosim olpela Jerusalem na Nupela Jerusalem “i stap antap long graun bilong Amerika.” Long dispela tupela hap, Em bai go pas long Sios bilong Em.

Long dispela de, olgeta bai save long Bikpela olsem “King bilong ol King, na Bikpela bilong ol Bikpela.” Ol lain husat istap wantaim Em bai Em “singautim, na makim, na bai feitful.”

Ol brata na susa, nau em taim bilong yu, na mi, long redi long Kam bek bilong Bikpela na Seivia bilong yumi, Jisas dispela Krais. Nau em taim bilong yumi long mekim wok disaipel i namba wan tru. Wol i pulap long ol het pen pasin, hau bai yumi mekim dispela?

Lotu olgeta taim long temple bai helpim yumi. Long haus bilong Bikpela, yumi fokas long Jisas Krais. Yumi lainim long Em. Yumi mekim kavanen long bihainim Em. Yumi bai kam save long Em. Taim yumi holim strong ol temple kavanen bilong yumi, yumi bai gat bikpela wei long pawa bilong Bigpela. Insait long temple, yumi kisim banis long ol samting bilong dispela graun. Yumi bai pilim trupela piua lav bilong Jisas Krais na Papa long Heven long bikpela wei! Yumi bai pilim bel isi, na strong i kam long spirit, i no olsem ol hevi bilong dispela graun.

Hia em promis bilong mi long yupela:Olgeta husat i laik tru long painim Jisas Krais bai painim Em insait long temple. Yu bai pilim marimari bilong Em. Yu bai kisim ansa bilong ol askim bilong yu. Yu bai save gut long amamas bilong gospel bilong Em.

Mi lainim olsem namba wan askim yumi mas bekim em : Bai mi givim laip bilong mi long husat o long wanem?

Laik bilong mi long bihainim Jisas Krais em namba wan disisin mi bin mekim. Taim mi stap long medikal skul mi kisim testimoni bilong Papa God na Pikinini bilong Em, Jisas Krais. Long dispela taim kam nau, Seivia bilong yumi em ston mi sanapim laip bilong mi antap long Em. Dispela i mekim olgeta samting i orait! Dispela i mekim ol narapela samting isi liklik. Dispela i givim mi as bilong wok na daireksen. Em i helpim mi sanap strong long ol kain kain hevi long laip. Bai mi serim tupela eksampel:

Namba wan, taim meri bilong mi Dantzel i dai, mi no inap long kisim ol pikinini bilong mitupela. Mi stap long hap, mi yet, wari, na krai long help. Tru long Holi Spirit bilong Em, Bikpela i tokim mi long wanem as Em i kisim Dantzel igo. Wantaim dispela tingting, mi kisim bel isi. Sampela taim i go pinis na mi bin gat bel isi. Bihain, mi maritim meri bilong mi Wendy. Em i stap namel long namba tu eksampel bilong mi.

Taim mitupela Wendy go mekim wok long wanpela longwe ples, ol raskol putim gan long het bilong mi na pulim triga. Tasol gan ino paia. Long dispela taim,laip bilong mitupela i bin stap long han bilong ol birua. Tasol mi na Wendy pilim bikpela bel isi tru. Em dispela bel isi “i save winim olgeta save .”

Ol brata na susa, Bikpela bai givim yu bel isi tu! Em bai strongim yu. Em bai blesim yu wantaim bel isi, namel long hevi.

Plis harim dispela promis bilong Jisas Krais long yu: “Mi bai stap long han sut bilong yu na han kais bilong yu, na Spirit bilong mi bai stap insait long bel bilong yupela, na ol ensel bilong mi bai raunim yupela long strongim yupela.”

I nogat pinis bilong strong bilong Jisas long helpim yu. Hevi Em karim long Getsemani na Kalvari em bilong yu! Dai na Kirap Bek bilong Em, em bilong yu!

Mi askim yupela long givim taim long wanwan wik—long olgeta laip bilong yu—long save moa long Dai na Kirap Bek bilong Jisas Krais. Mi pilim bel sore long husat ol pas insait long sin na ino save long lusim na kam aut. Mi krai long husat ol pilim hevi long spirit bilong ol, o husat i karim hevi ol yet, long wanem, ol ino luksave long wok Jisas Krais mekim bilong ol.

Jisas Krais i kisim antap long Em ol sin bilong yu ol, pen bilong yu, ol bel hevi bilong yu na ol rong bilong yu. Yu no nid long karim hevi bilong yu yet! Em bai lusim rong bilong yu taim yu tanim bel. Em bai blesim yu wantaim ol samting yu laikim. Em bai oraitim sol bilong yu i pilim pen. Taim yu pas wantaim Em, ol hevi bilong yu bai ino hevi. Sapos yu mekim na stap strong long ol promis long bihainim Jisas Krais, yu bai lukim olsem olgeta hevi long laip bilong yu em samting nating. Ol hevi bilong yu bai “pinis nating long amamas bilong Krais.”

I no tu leit long yu kamap trupela disaipel bilong Jisas Krais. Na bai yu pilim tru olgeta blesing bilong Dai na Kirap Bek bilong Em. Yu bai save moa long helpim long bungim Israel.

Ol brata na susa bilong mi, i no long taim, Jisas Krais bai kam bek long graun olsem mileniel Mesaia. So tede, mi singaut long yupela long givim gen laip bilong yupela long Jisas Krais. Mi singautim yupela long helpim bungim Israel na long redim ples graun long Kambek bilong Bikpela. Mi singautim yupela long toktok long Krais,testifai long Krais,bilip long Krais,na amamas long Krais!

Kam long Krais na “givim olgeta [sol]”bilong yu long Em . Dispela em i sikret bilong laip pulap long amamas!

Gutpela samting i kam yet, ol brata susa bilong mi, bikos, Seivia bai kam gen! Gutpela samting i kam yet, bikos Bikpela i hariapim wok bilong Em. Gutpela samting i kam yet taim yumi tanim bel na laip bilong yumi go long Jisas Krais.

Mi berim testimoni bilong mi olsem Jisas Krais em Pikinini bilong God. Mi disaipel bilong Em. Mi gat ona olsem wokman bilong Em. Taim Em kam bek, “glori bilong Bikpela bai stap plesklia, na olgeta manmeri bai lukim.” Dispela de bai pulap wantaim amamas bilong ol gutpela lain!

Long pawa bilong ol sekred prishud ki mi holim, mi tokaut long dispela tok tru long yu na long olgeta wol! Long nem bilong Jisas Krais, amen.