“Dispela Em Gospel Bilong Mi”—“Dispela Em Sios Bilong Mi”

Blakpela pauda i stap olsem strongpela eksplosiv longpela taim tru. Em ken kirapim ol kenon bol, tasol i no gutpela long ol maining na ol rot konstraksen projek. Em no strong long brukim ol ston.

Long 1846 wanpela kemist bilong Italy nem bilong em Ascanio Sobrero i kamapim wanpela nupela eksplosiv, ol i kolim naitrogliserin. Dispela oil i olsem wara em bin strong moa long blakpela pauda. Isi tru em i brukim ol ston. Tasol sori tru, naitrogliserin i no save sindaun gut. Sapos yu dropim pundaun lo liklik hap, em bai blo ap. Sapos em i hot tumas, em bai blo ap. Sapos em i kol tumas, em bai blo ap. Maski i stap long ples i kol, rum i tudak na em yet istap, em bai blo ap. Planti kauntri i tambuim long trenspotim go kam, na planti i tambuim long mekim dispela kemikol.

Long 1860, wanpela saintis bilong kauntri Sweden Alfred Nobel i traim stabilaisim naitrogliserin. Bihain long sevenpela yias long eksperimen, em i kamap long gol bilong em na kisim naitrogliserin i go insait long wanpela sabstens ol i kolim long diatomaseous graun o kiselgur. Kiselgur em i wanpela ston i gat ol hol na i ken brukim go olsem pauda. Taim em i miks wantaim naitrogliserin, kiselgur i absobim naitrogliserin na i kamapim peist we i ken sheip olsem “ol stik.” Long dispela fom, naitrogliserin i stap gut moa. Em i ken stap seif, long trenspot, na yusim wantaim gutpela strongpela pauda. Nobel i givim nem long dispela kombinesen bilong naitrogliserin na kiselgur dainamait.

Dainamait i bin senisim dispela wol. Nobel kamap moni man. I nogat stebilaisa, naitrogliserin i strong tumas long yusim, olsem Ascanio Sobrero i painim. Em yet, dispela stebilaisa, kiselgur, ino gat bikpela wok. Tasol bung bilong dispela tupela i mekim dainamait i narakain tru.

Long wankain wei, dispela bung bilong gospel bilong Jisas Krais na Sios bilong Jisas Krais bilong ol Seint long Las-de i givim yumi ol gutpela samting i gat pawa na senisim yumi. Gospel i stret olgeta, tasol wanpela sios i gat pawa tru bilong God i mas tokaut long en, holim pasim stretpela pasin bilong em, na administarim ol sekred odinens wantaim atoriti bilong Seivia.

Tingim dispela bung bilong gospel bilong Seivia na Sios bilong Em olsem i bin kamap long taim bilong Buk Momon profet Alma. Sios i bin wok hat long tokaut long “pasin bilong tanim bel na feit long Bikpela, husat [bai ridimim] ol pipol bilong Em.” Wantaim atoriti bilong God, Sios i wok long administarim dispela odinens bilong baptisim “long nem bilong Bikpela, olsem witnes [bilong go insait] long kavanen wantaim em … [long] sevim em na kipim ol komanmen bilong em.” Ol pipol husat i bin baptais kisim long ol yet nem bilong Jisas Krais, joinim Sios bilong Em , na ol i bin gat promis olsem bikpela pawa bilong Spirit bai kapsait.

Ol pipol i kapsait i kam long ol wara bilong Momon long harim Alma i tokaut long gospel. Ol i bin luk save long wara na bus arere long ol tasol Sios bilong Bikpela i no ples o wanpela bilding, olsem tede. Sios em ol man nating, ol disaipel bilong Jisas Krais, i bung na oganais long ol wei God i putim long helpim Bikpela i inapim ol wok bilong Em. Sios em instramen thru long em yumi lainim dispela namba wan wok bilong Jisas Krais na Atonmen bilong Em long plen bilong Papa God. Sios i givim rot i gat atoriti bai ol wanwan lain i tek pat long ol odinens na mekim kavanen bai stap oltaim wantaim God. Holim pasim ol kavanen bai kisim yumi go klostu long God, givim yumi rot long kisim pawa bilong Em, na senisim yumi go long husat Em i laikim yumi long kamap.

Olsem dainamait i nogat naitrogliserin i no gutpela samting, Sios bilong Seivia bai i gutpela moa sapos i sanap long gospel bilong Em. Gospel i nogat atoriti long administarim ol odinens, i olsem Sios i samting nating.

Naitrogliserin i no nap wok gut olsem eksplosiv taim i nogat helpim bilong kiselgur. Olsem histori i soim, taim nogat Sios bilong Bikpela, ol pipol bai nogat gutpela tingting long gospel bilong Em—planti tingting bai senis bikos long ol senis i kam long ol narapela lotu, kalsa na tingting. Wok bilong bungim ol dispela pasin bilong tanim tingting i kamap ples klia long olgeta dispensesen i kam inap long dispela las wan. Maski gospel i bin kamap long trupela lukluk bilong em, dispela wok bilong soim gospel isi isi i lusim dispela pawa bikos atoriti bilong God long Sios i bin lus.

Sios bilong Jisas Krais bilong ol Seint long Las-de i mekim klia rot i go long pawa bilong God bikos em i gat atoriti bilong Em long tisim doktrin bilong Krais na ofarim ol seiving na eksaltesen odinens bilong gospel. Seivia i laikim tumas long pogivim ol sin bilong yumi, helpim yumi kisim pawa bilong Em, na senisim yumi. Em i safa long ol sin bilong yumi na laikim tumas long oraitim yumi long ol panismen yumi ken kisim, sapos yumi ino tanim bel. Em i laikim yumi long kamap holi na kamap stretpela insait long Em.

Jisas Krais i gat pawa long mekim dispela. Em i no sore wantaim ol pasin i no stret bilong yumi na krai long nogut bai yumi kisim bagarap oltaim bikos long pasin bilong sin. Nogat, Em i go moa yet long dispela, mo mo yet na bringim kam bek Sios bilong em long kisim pawa bilong em.

Namel tru long dispela gospel em Sios i tisim olsem Jisas Krais i karim “olgeta hevi bilong yumi, na karim ol wari bilong yumi.” Em i “putim antap long em pasin nogut bilong yumi olgeta.” Em i “strong na karim kros,” brukim “strong bilong dai,” go antap long heven, na … sindaun long han sut bilong God, long kisim long Papa olgeta rait bilong marimari.” Seivia i mekim olgeta dispela bikos Em i lavim Papa bilong Em na Em i lavim yumi. Em i baim pinis dispela prais i no save pinis Em “i [kleimim] olgeta husat i gat feit long em [na tok pait]” bilong ol—bilong yumi. Jisas Krais i laikim bai yumi tanim bel na kam long Em so bai Em i ken stretim yumi na mekim yumi holi. Long dispela, Em i strong na i no inap stop.

Rot long dispela kavanen pawa bilong God na kavanen lav bilong em bai kam thru long Sios bilong Em. Dispela bung bilong gospel bilong Seivia na Sios bilong Em i senisim olgeta ol laip bilong yumi. Em i bin senisim ol bubu bilong mi. Bubuman bilong mi, Oskar Andersson i bin wok long wanpela sipyad long Högmarsö, wanpela ailan insait long Stockholm akipelago. Meri bilong em, Albertina, na ol pikinini bilong tupela i bin stap long meinlen Sweden. Wanpela taim long olgeta tupela wiks, long Sarere, Oskar bai pul long liklik bot i go long haus long wiken bihain bai kam bek long Högmarsö long Sande avinun. Wanpela de, taim em i stap long Högmarsö, em i harim tupela misinari bilong Amerika i tokaut long ristod gospel bilong Jisas Krais. Oskar i pilim olsem wanem em i harim i tru olgeta, na em i pulap long wanpela kain amamas em i hat long toktok.

Narapela taim em i kam long haus, Oskar i amamas tru na tokim Albertina olgeta samting long ol misinari. Em i tok olsem em i bilipim olgeta samting ol i tisim. Em i askim em long ridim ol hap pepa ol misinari i givim em, na tokim em olsem em i no ting ol pikinini bilong ol bihain bai baptais olsem ol bebi. Albertina i kros na tromoi ol pepa long rabis hip. Nogat planti toktok i kamap bipo long Oskar i go bek long wok long Sande avinun.

Taim em i go pinis, Albertina i kisim ol pepa long hap em i bin tromoi. Em i lukluk gut long ol na komperim ol doktrin wantaim ol tising insait long olpela baibel bilong em. Em i kirap nogut long painim olsem wanem em i ridim i tru. Narapela taim Oskar i go bek long haus, em i kisim wanpela naispela welkam, na tu dispela Buk Momon em i bringim wantaim em. Albertina hariap tru i rid, gen em i komperim dispela doktrin i go long Baibel bilong em. Olsem Oskar, em i luksave long toktru na i pulap long narapela kain amamas.

Oskar, Albertina, na ol pikinini bilong tupela i muv i go long Högmarsö long stap klostu long sampela liklik namba bilong ol Sios memba long hap. Wanpela wik bihain Oskar na Albertina i bin baptais long 1916, Oskar ol i singautim em long kamap grup lida bilong ol dispela lain Seint long Högmarsö. Olsem planti ol nupela konvet, Oskar na Albertina i pesim planti tok kros bikos long nupela feit bilong ol. Ol lokal fama i no laik salim milk long ol, so Oskar i save pul i go long narapela sait olgeta de long painim milk long ol narapela fama i no save bel hat tumas.

Tasol long dispela taim, Sios membasip i go bikpela, tu bikos long strongpela testimoni bilong Albertina na dispela paia bilong misinari wok bilong em. Taim grup i kamap brans, Oskar bin kisim koling olsem namba wan brans presiden.

Ol memba bilong dispela Högmarsö brans i laikim tumas dispela ailan. Dispela em bin wara bilong Momon bilong ol. Dispela hap em we ol i kisim save long Ridima bilong ol.

Ol yias i bin go pinis, tupela i holim pas baptismal kavanen bilong ol, Oskar na Albertina i senis olgeta wantaim pawa bilong Jisas Krais. Ol i laik tru long mekim moa kavanen na kisim ol temple blesings bilong ol. Long kisim ol dispela blesing, ol i lusim ples bilong ol long Sweden na muv i go long Salt Lake City long 1949. Oskar i bin sev olsem lida bilong ol dispela memba long Högmarsö moa long tripela ten yias.

Bung bilong naitrogliserin na kiselgur i mekim dainamait i kamap gutpela samting tru, bung bilong gospel bilong Jisas Krais na Sios bilong Em i antap moa long wanpela prais. Oskar na Albertina i bin harim dispela ristod gospel bikos wanpela profet bilong God i bin singautim, asainim, na salim ol misinari i go long Sweden. Wantaim pawa i kam long God, ol misinari i tisim dispela doktrin bilong Krais na wantaim prishud atoriti ol i baptaisim Oskar and Albertina. Olsem ol memba, Oskar na Albertina i go het long lainim, kamap moa gut na seivim ol narapela. Ol i bin kamap ol Seint bilong Las-de bikos ol i holim pas long ol kavanen ol i bin mekim.

Seivia i lukim Sios bilong Jisas Krais bilong ol Seint long Las-de olsem “Sios bilong mi” bikos Em i komisinim long inapim olgeta wok bilong Embilong autim gospel bilong Em, ofarim ol odinens bilong Em na ol kavanen, na mekim wei long pawa bilong Em long stretim na mekim yumi holi. Nogat Sios bilong Em, bai no gat atoriti, nogat tokaut bilong ol toktru long nem bilong Em , bai nogat odinens o kavanen, nogat soimaut bilong pawa bilong pasin blong God, bai nogat senis igo long wanem God i laikim yumi long kamap, na plen bilong God bilong ol pikinini bilong Em bai bagarap. Sios long dispela taim i stap namel tru long plen bilong Em.

Mi invaitim yu long komitim yu yet moa long Seivia, gospel bilong Em, na Sios bilong Em. Taim yu mekim olsem, yu bai painim olsem dispela bung bilong gospel bilong Seivia na Sios bilong Em bai bringim pawa long laip bilong yu. Dispela pawa i moa bikpela long dainamait. Em bai brukim olgeta bikpela ston long wei bilong yu na senisim yu kamap olsem wanpela bai kisim kingdom bilong God. Na yu bai “pulap long wanpela kain amamas and glori.” Long nem bilong Jisas Krais, amen.