“Harim Mi dispela Lait Yu Mas Holim Go Antap”

Long planti testimoni long dispela konferens, mi givim apostolik witnes bilong mi olsem Jisas Krais em i Pikinini Man bilong God, Bikpela na Seivia bilong yumi, Ridima bilong olgeta pikinini bilong Papa. Long Atonmen bilong Em, Jisas Krais mekim isi long yumi, sapos yumi stap stret, long go bek long Papa long Heven na stap wantaim famili bilong yumi oltaim oltaim.

Seivia i stap wantaim long wokabout bilong yumi long dispela graun. Long tupela dei i kam yumi i harim em toktok i kam long ol maus man bilong Em, olsem bai yumi go klostu long Em. Olgeta taim, Em save strongim yumi long dispela laip wantaim laikim na marimari bilong Em. Nifai i tok , “God bilong mi Em strong bilong mi; Em go pas long mi long ol hevi bilong mi. … Em i bin pulapim mi wantaim lav bilong Em.”

Dispela lav i stap plesklia taim yumi strongim wanpela arapela long wok bilong Em.

Yumi sapotim profet bilong yumi long jeneral konferens, wantaim Nambawan Presidensi, Kwarum bilong Twelfpela Aposel, ol Jeneral Atoriti, na ol Ofisa bilong Sios Long sasteinim em long holim i go antap narapela man, long harim tok bilong ol, long stap olgeta taim wantaim ol, long mekim wanem ol i tok long mekim. Ol i save toktok wantaim strong bilong Bikpela; ol klia long samting i kamap nau, long pasin doti igo bikpela, na wok bilong Satan long bagarapim wok bilong Papa God. Long apim han, yumi tokaut yumi bai sanap wantaim ol, ino long dispela dei tasol, tasol long olgeta dei bilong yumi.

Sasteining tu em bilong apim ol steik presiden na bisop, ol hetman bilong kwarum na oganaisesen, ol tisa, na ol kamp dairekta bilong ol wod na steik. Long haus, yumi apim ol meri na man bilong yumi, pikinini, papamama, ol narapela famili bilong yumi, na ol neiba bilong yumi. Taim yumi apim narapela yumi i wok long tok, “Mi stap wantaim yu,i no long apim yu tasol long han bilong yu taim ol i ‘pundaun i go daun’ tasol long givim yu strong na bel isi.”

Pasin bilong apim i stap insait long skripsa. Long Wara bilong Momon, ol Sios memba bin kisim baptais nupela long “karim hevi bilong narapela, bai ino inap hevi; … long givim bel isi long husat igat hevi, na long stap olsem witnes bilong God long olgeta taim, olgeta ples, na olgeta samting.”

Jisas itok long ol lain bilong Nifai: “Apim lait bilong yu go antap na em bai laitim olgeta hap. Mi dispela lait yupela mas apim go antap.” Yumi apim lait bilong Bikpela taim yumi holim strong ol promis yumi mekim na taim yumi sapotim profet bilong yumi taim em telimautim tok bilong God.

Presiden Russell M. Nelson i tok taim em stap long Kwarum bilong Twelfpela Aposel, “Taim yumi sasteinim ol profet, yumi tokaut olsem yumi bai sapotim wok profet bilong ol.”

Long apim profet em wanpela wok holi. Yumi i mas noken sidaun isi tasol. Yumi mas sanap wantaim em, bihainim toktok bilong em, skulim toktok bilong em, na beten long em.

King Benjamin long Buk bilong Momon itok olsem, “Mi olsem yupela. Mi bai kisim ol hevi bilong bodi na tingting, tasol God i makim mi long han bilong Em … na ibin safa long han bilong Bikpela, long mekim wok bilong halivim yupela long bel, tingting na strong Bikpela i givim long mi.”

Kain olsem, Presiden Russell M. Nelson em gat 100 krismas. Bikpela i holim em ikam. Presiden Harold B. Lee, taim em i bin memba long Nambawan Presidensi, i toktok long Moses i soim antap long maunten long Rephidim. “Ol han bilong [Presiden bilong Sios] i ken tait,” em tok. “Han bilong em inap long tait, long wanem, em i gat bikpela wok. Tasol taim yumi holim bilong em na lid aninit long daireksen bilong Em, long sait bilong em, ol samting nogut bai ino inap bagarapim yu na Israel. Sefti bilong yu na mipela i stap long bihainim husat Bikpela i putim long go pas long Sios bilong Em. Em save long husat Em laikim long go pas long dispela Sios, na Em ino inap paulim wok bilong Em.”

Presiden Nelson igat bikpela save long dispela. Em i mekim dispela wok long planti yia kam nau. Gutpela tingting na save em i gat, na ol revelesen em i save kisim em bilong taim bilong yumi stret. Em itok: “Sios bilong Jisas Krais bilong ol Seint long Las-de i wok long redim yumi long taim ‘graun i bai pulap long save bilong Bikpela’ (Isaiah 11:9). … Dispela wok i kisim strong long wanpela toktok i kamap 200-pela yia igo. Em i dispela: ‘Dispela em Pikinini bilong Mi. Harim Em!’ (lukim Joseph Smith—History 1:17).”

Presiden Nelson i tok tu olsem: “Inogat wanpela taim long histri bilong wol taim save bilong Seivia i moa impoten na bikpela long sol bilong olgeta manmeri. Tingim taim olgeta hevi na pait long graun, na long laip bilong yumi wanwan, bai orait sapos yumi bihainim Jisas Krais na olgeta tokskul bilong Em.”

Ol brata na susa, yumi mas strongim ol arapela na noken toktok planti. Na yumi mas apim tok bilong Bikpela, pasin bilong Em, na profet bilong Em, husat itok: “Wanpela bikpela salens long nau em long luksave long tok tru bilong God na tok giaman bilong Satan. Olsem na Bikpela i tok strong long yumi mas ‘beten olgeta taim, … bai [yumi] winim Satan, na … abrusim ol han bilong ol wokman bilong Satan husat i save wokim wok bilong [man nogut] ’ [Doktrin na ol Kavanen 10:5; i gat strong added].”

Long mun Epril, Sista Rasband na mi i bin bung wantaim profet bilong yumi na Sista Nelson long blesim gen Manti Utah Temple.

Presiden Nelson mekim olgeta kirap nogut taim em i go insait long rum. Ino planti bilong mipela save olsem em bai kam. Taim mi stap wantaim em, mi pilim dispela lait na wei bilong profet em save karim. Amamas long pes bilong ol manmeri taim ol lukim profet, bai stap wantaim mi oltaim.

Long beten bilong ridedikesen, Presiden Nelson askim Bikpela olsem holi haus bilong Em bai strongim olgeta manmeri husat igo insait “bai ol i kisim ol holi blesing na stap klin na strong long ol promis ol mekim … bai dispela wanpela haus bilong bel isi, haus bilong kisim malolo, na haus bilong kisim ol revelesen bilong God, bilong husat ol i stap klin na go insait.”

Yumi olgeta mas larim Bikpela strongim yumi wantaim bel isi, malolo, na antap long olgeta, ol revelesen bilong abrusim pret, tudak, na ol toktok pait we i pulap long wol.

Bipo long sevis, mipela sanap arasait long san wantaim Presiden na Sista Nelson long lukim dispela gutpela ples. Ol tumbuna bilong Presiden Nelson i bilong dispela hap. 8-pela tumbuna bilong em, na sampela tumbuna bilong mi, i bin kam stap long dispela hap we i raunim temple. Tumbuna bilong mi Andrew Anderson bin wok wantaim ol lain konstraksen long bipo, husat i wok 11-pela yia long sanapim temple long Manti, namba tri insait long Rocky Mountains.

Taim mipela sanap wantaim Presiden Nelson, mipela igat sans long apim na sapotim profet bilong God long taim mipela i amamas em i blesim gen holi haus bilong Bikpela. Em wanpela dei mi ino inap lustingting.

“Yumi sanapim ol temple long liptimapim Bigpela,” Presiden Nelson itok long dispela holi dei. “Ol sanapim bilong lotu na ino bilong soim namba. Yumi mekim ol holi promis we i save stap oltaim insait long dispela holi banis.” Yumi bungim lain bilong Israel.

Presiden Nelson na ol profet pas long em i save holim pas tru ol temple. Nau long ples graun, yumi gat 350-pela holi haus bilong Bikpela we ol i ron istap, ol toksave long en, na ol sanapim long en. Presiden Nelson i toksave long 168-pela temple taim em stap profet long 2018 inap nau.

“Long taim bilong yumi,” em itok, “olgeta, stretpela bung bilong olgeta taim gutnius ol autim, ki, na strong bai bung wantaim (lukim Doctrine and Covenants 128:18). Long dispela holi samting, ol holi temple i pulap long graun. Mi tok strong gen olsem wok bilong yu insait long temple bai senisim laip bilong yu, ino taim ol sanapim tasol.”

“Seivia na doktrin bilong Em i nambawan samting long temple,” Presiden itok. “Olgeta samting yumi lainim insait long temple, ol i skulim yumi o Spirit i soim yumi, isave mekim yumi save moa long Jisas Krais. … Ol odinens bilong Em i pasim yumi long Em, wantaim ol holi promis bilong prishud. Olsem na taim yumi stap aninit long promis yumi mekim wantaim, Em bai givim yumi strong i save strongim na oraitim yumi.”

“Olgeta husait save lotu insait long temple,” Presiden Nelson itok, “bai igat pawa bilong God na ol ensel bai ‘was long ol’ [Doctrine and Covenants 109:22]. Hau na dispela i strongim yu long save olsem, olsem wanpela man o meri i kisim endaumen [o yut i kam long temple] i gat pawa bilong God, yu bai noken pesim laip yu wan? Wanem strong i kam long yu taim yu save olsem ol ensel bai halivim yu?”

Skripsa i stori long ensel i strongim ol lain. Em wanem samting bin kamap taim Jisas brukim skru long gaden Getsemani. Pen em karim i rausim sin bilong yumi oltaim. “Long hap,” Presiden Nelson itok, “nambawan pasin bilong laikim, we i winim tru olgeta i kamap. … Long Getsemani, Bikpela ‘karim pen bilong olgeta man, bai olgeta … tanim bel na kam long em’ [Doktrin na ol Kavanen 18:11].”

“Rausim dispela kap long mi:” Jisas Krais i bin askim, “tasol ino laik bilong me, tasol bilong yu, bai kamap.

“Na wanpela ensel i bin kamap long Em na strongim Em.”

Ol ensel i raunim yumi tede. Presiden Nelson itok, “[Insait long temple,] yu bai lainim long opim banis namel long heven na graun, rot bilong askim ol ensel bilong God long halivim yu.”

Ol ensel bringim lait i kam. Lait bilong God. Jisas itok long ol Aposel bilong Em long ol lain bilong Nifai, “Lukim Mi dispela lait yupela mas apim go antap.” Taim yumi sasteinim profet bilong yumi, yumi testifai Seivia i makim em, em i “lait … bilong dispela graun.”

Dia Presiden Nelson, mi makim olgeta memba na prens bilong Sios bilong Bikpela long olgeta wol, mipela pilim blesing long apim ol skul bilong yu, long apim eksampel bilong yu long stap olsem Krais, na long apim testimon bilong yu long Bikpela na Seivi, Ridima bilong yumi olgeta.

Mi berim apostolik witnes bilong mi olsem Jisas Krais em “lait … bilong wol.” Bai yumi olgeta, olsem disaipel bilong Em,“apim” lait bilong Em. Long nem bilong Jisas Krais, amen.