Doktrin bilong Jisas Krais Em Isi

Yumi olgeta i gat ol famili memba yumi laikim tumas, husat Satan, dispela man bilong bagarapim, i save traim ol, husat bai mekim olgeta pikinini bilong God i stap long sore. Planti bilong yumi, ino save silip gut long nait. Yumi traim long raunim ol lain husat i gat hevi wantaim olgeta gutpela wok. Yumi beten long ol. Yumi lavim ol. Yumi soim ol gutpela eksampel.

Alma, wanpela wais profet bilong taim bipo, i pesim ol wankain traim. Ol pipol em i lidim na i laikim tumas planti taim i kisim hevi long ol birua, tasol ol traim hat long lukautim ol stretpela pikinini insait long wol i pulap long pasin nogut. Alma i pilim olsem wanpela hop bilong em em wanpela pawa yumi ino save tingim na no save yusim planti taim. Em i krai long God long helpim.

Alma i save olsem long God bai helpim ol, olgeta lain em i lidim, na tu ol birua lain i mas tanim bel. Olsem na, em i painim narapela rot bilong pait.

Buk Momon i toktok long dispela olsem: “Na nau, olsem autim tok i save lidim ol pipol long wokim stretpela samting—ye, em i gat moa pawa long senisim ol pipol we naip bilong pait i no inap wokim, o wanpela samting, kain olsem i bin wokim long ol bipo—olsem na Alma i bin ting olsem em i gutpela long traim pawa bilong toktok bilong God.”

Dispela tok bilong God em i doktrin Jisas Krais na ol profet bilong em i tisim. Alma i save ol tok bilong doktrin i gat bikpela pawa.

Long seksen 18 bilong Doktrin na ol Kavanen, Bikpela i autim faundesen bilong Doktrin bilong Em.

“Long wanem, lukim, Mi tok strong long olgeta man long olgeta hap long tanim bel. …

“Long wanem, lukim, Bikpela Ridima bilong yupela i karim hevi na dai; olsem em i karim pen bilong olgeta man, bai olgeta man i tanim bel na kam long em.

“Na em i kirap bek long dai, bai em i bringim kam olgeta man long em, taim ol i soim pasin bilong tanim bel.”

“Na yu bai pundaun na lotuim Papa long nem bilong mi.

“… Yu mas tanim bel na kisim baptais, long nem bilong Jisas Krais.”

“Wantaim bilip, yu mas askim Papa long nem bilong mi. bilip olsem yu bai kisim, na Holi Spirit bai stap wantaim yu.”

“Na nau, bihain … yu kisim dispela, yu mas bihainim ol lo bilong mi insait long olgeta samting.”

“Kisim nem bilong Krais go antap long yu, na toktok long tok tru wantaim strongpela bel.

“Na planti husat i tanim bel na kisim baptais long nem bilong mi, Jisas Krais, na stap strong i go long pinis, ol dispela lain mi bai seivim ol.”

Long ol dispela liklik toktok, Seivia i givim yumi dispela stretpela eksampel long hau yumi bai tisim doktrin bilong Em. Dispela doktrin em feit long Bikpela Jisas Krais, tanim bel, baptisim, kisim Holi Gos, na stap strong go long pinis bai blesim olgeta pikinini bilong God.

Taim yumi tisim ol dispela samting long ol lain yumi lavim, Holi Gos bai helpim yumi save long dispela tok tru. Bikos yumi nidim ol tingting i kam long Holi Gos, yumi mas abrusim ol kranki tingting o tingting bilong yumi yet we i ino tisim trupela doktrin.

Em bai hat long mekim taim yu lavim dispela man o meri yu laik senisim. Em bai no laik harim dispela doktrin yu skulim em. Yu bai kisim temtesen long traim nupela kain samting. Tasol Holi Gos bai soim long ples klia dispela spirit bilong tok tru tasol taim yumi lukaut gut long noken tisim doktrin i no tru. Wanpela wei long abrusim giaman doktrin em long tisim isi samting long tising bilong yumi. Seifti bai kam long isi pasin, na liklik bai lus.

Taim yumi tis em i taim bilong serim doktrin bilong seivim man, taim ol pikinini i stap klia long temtesen bilong man nogut we bihain bai laik kam painim ol, pastaim long ol tok tru ol nid long lainim i lus insait long nois bilong sosel midia, ol poro na ol hevi bilong ol yet. Yumi mas sus long holim pasim ol opotuniti long serim ol tising bilong Jisas Krais wantaim ol pikinini. Ol dispela taim bilong tis i moa gutpela na i no planti olsem ol wok bilong birua man. Long olgeta aua yumi putim long lainim doktrin long laip bilong wanpela pikinini, i gat ol planti aua bilong birua i pulap long ol toksave na ol piksa i salensim ol dispela tok tru bilong seivim yumi.

Sampela bilong yupela bai tingting sapos em i gutpela long stap klostu long pikinini long pasin bilong pilai, o yu bai askim sapos pikinini bai stat long pilim hevi long ol tising bilong yu. Long ples bilong dispela, yumi mas tingting, “Wantaim liklik taim na liklik opotuniti, wanem ol toktok bilong doktrin mi ken serim we bai strongim ol agensim ol salens long feit bilong ol?” Ol toktok yu serim tede bai kamap ol dispela ol bai karim wantaim ol, na tede bai hariap tru i lus.

Mi amamas tru long tumbuna meri bilong mi Mary Bommeli na divosen bilong em long serim dispela doktrin bilong Jisas Krais. Ol misinari bin tisim famili bilong em long Switzerland taim em i bin 24 yias.

Bihain long em i baptais, Mary bin gat laik long joinim ol Seints long America, so em i mekim wei bilong em i kam long Switzerland i go long Berlin na painim wok wantaim wanpela meri husat i kisim em long wok long mekim ol kolos bilong famili. Mary i slip long rum bilong ol wok meri na putim masin bilong mekim kolos long hap bilong sindaun.

Long dispela taim, lo bilong gavman i tambuim tru wok bilong tisim doktrin bilong Sios bilong Jisas Krais bilong ol Seint long Las-de. Tasol Mary painim em i hat long noken serim ol samting em i lainim. Mama bilong haus na ol poro bilong em bai raunim Mary na harim em i tis. Em i toktok long Papa long Heven na Jisas Krais i kamap long Joseph Smith, ol ensel i visit, na Buk Momon. Em i tingim ol stori bilong Alma, na tisim doktrin bilong Kirap bek. Em i testifai olsem ol famili i ken yunait long selesel kingdom.

Amamas bilong Mary long serim dispela doktrin bilong ristod gospel i no long taim i kamapim hevi. I no long taim polis kisim Mary i go long sel. Long rot, em askim polisman long nem bilong dispela jas bai harim kot bilong em long narapela moning. Em i askim tu long famili bilong jas na sapos em i gutpela papa na man long meri bilong em. Polisman i tok jas em wanpela save man long dispela wol.

Insait long sel, Mary askim long wanpela pensil na hap pepa. Long nait em i raitim wanpela leta i go long jas, em i berim witnes long Kirap bek bilong Jisas Krais olsem i stap long Buk Momon, em i toktok long dispela spirit wol, na tok klia long pasin bilong tanim bel. Em i tok olsem jas bai nidim taim long tingting long laip bilong em bipo long laspela jasmen. Em raitim olsem em i save Jas bai gat planti rong long tanim bel long ol, planti long ol bai mekim famili bilong em i sore tru. Long moning, em i pinisim leta bilong em, em i askim polisman long karim i go long jas, na polisman i wanbel long dispela.

Bihain, polisman i kisim samons long go lukim jas long opis bilong em. Leta Mary bin raitim i gat strongpela evidens olsem em i tisim doktrin bilong ristod gospel na i brukim lo. Tasol, i no long taim na polisman i go bek long sel bilong Mary. Em i tokim em olgeta sas bilong em i raus na em i ken go fri. Mary i bin go long kalabus bikos em bin tisim doktrin bilong ristod gospel. Na taim em tokaut long doktrin bilong tanim bel long jas, em i raus long kalabus.

Tising bilong Mary Bommeli i no pinis taim em i lusim kalabus. Rekod bilong ol toktok bilong em i karim kam daun trupela doktrin long ol lain i no bon yet. Bilip bilong em olsem nupela konvet tu i ken tisim doktrin bilong Jisas Krais i mekim sua olsem ol tumbuna bilong em bai kisim strong long ol hevi bilong ol.

Taim yumi traim bes bilong yumi long tisim ol lain yumi lavim long doktrin bilong Jisas Krais, sampela stil bai no inap long bekim. Tingting bilong tubel bai kam insait long tingting bilong yu. Yu bai askim yu yet sapos yu save gut stret long doktrin bilong Seivia long tisim gut. Na sapos yu traim pinis long tisim, yu bai tingting wai ol gutpela bilong em yu hat long lukim. Noken tru larim ol tubel i stap long yu. Tanim i go long God long halivim.

“Yea, na krai igo long God long kisim sapot;… larim God i save oltaim long ol laik bilong bel bilong yu.”

“Na nau mi laikim yupela mas gat daun pasin, bel malumalum na isi pasin, isi long toktok, pulap long isi pasin na sanap strong long kisim pen, i no inap kros long olgeta samting, strong long bihainim ol lo bilong God long olgeta taim, na askim long wanem samting yupela nidim, long spirit o long skin, givim tenkyu long God long wanem samting yupela i save kisim.”

Sapos yu beten, sapos yu toktok long God, na sapos yu askim Em long halivim wanpela yu laikim na sapos yu tok tenkyu long Em, ino long halivim bilong em tasol, tasol long bel isi taim yu no kisim samting yu laikim nau yet, o yu no kisim olgeta, mi promisim yu olsem yu bai go klostu long Em. Yu bai amamas long mekim wok na yu bai gat strong. Na bihain yu ken save olsem yu wokim olgeta samting yu ken long helpim ol lain yu lavim na ol lain yu beten long ol long abrusim Satan.

“Tasol ol lain bai wetim Bikpela bai kisim nupela strong, ol bai kisim ol wing olsem ol tarangau. bai ol i ran, na i no i nap sotwin, na ol bai wokabaut, na i no inap les.”

Yumi ken painim hop insait long skripsa i gat rekod bilong ol famili. Yumi ritim stori bilong ol lain i givim baksait long ol samting ol i tisim ol o husat i painim hat long kisim pogivnes long God, olsem Alma Dispela Yangpela, ol pikinini bilong Mosaia, na Enos. Long taim bilong hevi, ol i tingim ol toktok bilong ol papamama, ol toktok bilong doktrin bilong Jisas Krais. Ol dispela tingting i seivim ol. Ol tising bilong yu long dispela sekred doktrin bai i stap long tingting.

Mi berim witnes long sekred wok bilong tisim ol pikinini bilong Papa long Heven long dispela isi doktrin bilong Jisas Krais, we i larim yumi kamap klin long spirit na kisim welkam insait long stap wantaim God, long stap wantaim Em na pikinini man bilong Em long glori oltaim. Long nem bilong Jisas Krais, amen.