Ol Sekred Skripsa—As bilong Bilip

Mi na meri bilong mi, Mary, bin lukim wanpela siot igat piksa bilong buk na liklik toktok long frant i tok, “Ol Buk: Dispela Namba wan Masin bilong Holim long Han.”

Mi tingting long dispela toktok na hau ol dispela kainkain masin bilong holim long han i kamap. Mi tingting moa, na mi luksave olsem ol kainkain masin maski ol i gat atifisel intelijens bai ino inap tru long winim ol gaidens bilong spirit i kam olsem revelesen long God.

Maski yumi holim long han o istap long masin, Buk Baibel na Buk Momon: Narapela Testamen bilong Jisas Krais i givim gaidens bilong spirit na tising i kam long Jisas Krais, Seivia bilong wol. Yumi laikim tumas ol dispela buk long wok bilong ol long rekodim daireksen God i givim long ol profet bilong bipo na gaidens ol i givim long wanwan laip bilong yumi.

Wantaim tokskul bilong ol profet bilong nau, ol dispela sekred skripsa i soim yumi rot wantaim trupela doktrin long wol tede. Ol dispela skripsa igat pawa taim ol i givim instraksen, stretim, na givim bel isi long ol wanwan na famili husat i laikim Bikpela long gaidim ol.

Ol skripsa, wantaim tingting i kam long Holi Spirit, igo het yet long senisim husat ol i gat “bel i bruk na spirit bilong tanim bel na laik long bihainim Jisas Krais. Ol skripsa i halivim long kirapim faundesen i ken sanap strong taim birua i traim long daunim bilip bilong yumi.

Ol nupela memba long Sios i save blesim na mekim Sios i laip long bipo kam inap nau. Wanpela eksampel em gutpela tru long mi. Taim mi bin yangpela bisop, tupela sista misinari bin skulim William Edward Mussman na famili bilong em. Papa, em wanpela loya man, em bin jeneral kaunsel bilong wanpela bikpela koporesen. Gutpela meri bilong em, Janet, i helpim famili bihainim pasin bilong Krais.

Pikinini man na meri bilong tupela, krismas bilong tupela i stap long 20, bin wok long kisim tising tu. Olgeta kisim tising pinis na ol wok long go long lotu. Ol sista misinari tok strong long ritim Buk Momon na beten long testimoni bilong dispela sekred buk. Gutpela tru, wantaim prea famili i ridim Buk Momon long sotpela taim tasol.

Ol steik misinari, tupela bin stap presiden bilong Rilif Sosaiti bipo, save go wantaim ol long sakramen bung.

Klostu taim long ol i baptais, ol i bin kisim sampela raiting i toktok agensim Sios. Dispela em bipo long Intanet, tasol ol dispela raiting i pulmapim wanpela bikpela bokis.

Tupela misinari invaitim mi, olsem wanpela nupela bisop i gat 34 yias long helpim na bekim ol askim. Taim mipela sindaun insait long haus bilong ol, dispela bikpela bokis pulap long ol liklik buk i agensim Sios istap namel long rum. Mi bin beten bipo long mi kam long dispela wok. Namel long beten, Spirit tok isi long mi, “Em save pinis dispela em i tru.” Dispela em bikpela samting. Tupela sista misinari bilip olsem dispela famili gat testimoni pinis. Tasol ol gat tupela tingting long papa bilong famili.

Mi tokim papa bilong famili olsem “Spirit i tokaut long mi olsem em gat testimoni pinis. “Dispela i tru?” Em lukluk strong long mi na tok olsem Spirit i tokaut long em olsem Buk Momon na Sios i tru.

Mi askim em sapos em bai impoten long lukluk long ol buk, sapos ol i gat testimoni pinis.

Papa bilong ol itok em i orait long noken ritim. Famili bilong em i wanbel wantaim em.

Em tok em i gat wanpela bikpela askim: Wanpela as bilong ol kisim ol dispela buk i tok agensim Sios em olsem, ol i memba bilong narapela lotu. Na tu, em promis long helpim long sanapim wanpela nupela haus lotu bilong dispela feit. Em tokim mi ol sista misinari skulim em long gutpela bilong givim taiting, we em i wanbel wantaim, tasol em tingting planti sapos em bai asua sapos em inapim promis em mekim pinis. Mi tokim em olsem long inapim promis em mekim bai gutpela tru.

Dispela olgeta famili bin baptais. Wanpela yia bihain ol kisim siling olsem famili long California Oakland Temple. Mi bin amamas tru long stap. Pikinini man bilong ol i bin pinisim lo skul, pasim California Ba eksam, na go sevim misin long Japan. Long ol yia igo, mi lukim ol lain bilong ol istap strong insait long gospel. Mi bin amamas long mekim siling bilong wanpela ol tumbuna pikinini meri bilong ol.

Ol senis i wok long kamap nau long de bilong yumi em bikpela samting tru. Las Jun, Kos Andy Reid, hed Kos bilong ol Kansas Citi Chifs, na mi, wantaim ol narapela makim feit bilong yumi na ol narapela feit, i bin toktok long wanpela bikpela bung long Riverside Sios long New York Siti. Kos Reid i tok strong long ol namba tu sans, na bekim ol invitesen na narapela wok bilong mekim. Em ol bikpela samting long gospel bilong Jisas Krais. Narapela moning, wantaim ol meri bilong mipela,Tammy Reid na Mary, mipela i bin go long sakramen bung long Manhattan Seken Wod. Em i bin sevis i pulap long spirit. I bin gat planti nupela lain insait long dispela kongrigesen. Faipela nupela memba , fopela man na wanpela yangpela man, i stap namel long ol Aronik Prishud memba i pasim sakramen. Mi amamas long toksave olsem igat bikpela namba bilong ol nupela lain i kamap memba long Sios long olgeta hap.

Mipela i amamas long bikpela namba bilong husat i tok yes long ol sekred invitesen, senisim laip bilong ol, na bihainim Jisas Krais. Ol i kam insait long kavanen rot long feit, tanim bel, baptisim, na konfemesen olsem i stap long Buk Baibel na Buk Momon.

Yumi no inap long daunim wok na strong bilong ol sekred skripsa long senisim man na strongim ol insait long gospel. Ol profet bilong bipo i tok insait long Buk Momon i bin save long wok bilong Jisas Krais na ol i tisim gospel bilong Em. Buk Momon i helpim yumi go klostu long God taim yumi lainim, luksave, na bihainim ol tokskul bilong em. Profet Joseph Smith tis olsem “wanpela man [o meri] bai go klostu long God taim em i bihainim ol toktok bilong [dispela buk], moa long ol narapela buk.”

Sapos yumi laik save olsem Buk Momon em tok bilong God, yumi mas ritim, skelim, beten, na bihainim ol samting em i tok. Profet Moronai i promis olsem God bai soim olsem dispela buk i tru taim yumi beten wantaim trupela bel na pasin, na wantaim bilip long Krais. Stadim Buk Momon i gutpela moa long strongim senis bilong yumi.

Taim yumi tingim Buk Baibel na Buk Momon i stap wantaim, olsem ol masin bilong holim long han, wanpela bai askim. Long wanem rot yu ting dispela tupela buk bai strongim tupela yet sapos Bikpela tok tupela bai bung wantaim na “kamap olsem wanpela long han bilong yu”? Papa God i tok olsem long “stik bilong Judah,” em Buk Baibel, na “stik bilong Joseph,” em Buk Momon.

Long planti samting, Buk Momon i toktok moa long ol doktrin we i helpim na sapotim ol toktok bilong Buk Baibel. Dispela doktrin bilong Atonmen bilong Jisas Krais em wanpela eksampel.

Buk Baibel i stori long wok bilong Jisas Krais antap long dispela graun, wantaim dai na Kirap Bek bilong Em. Buk Momon i toktok plesklia long Atonmen bilong Jisas Krais, samting ol profet toktok moa bipo Em i dai.

Het tok bilong Alma sapta 42 soim aut ol bikpela doktrin bilong Atonmen bilong Jisas Krais.

Laip long skin i wanpela taim long traim long manmeri long tanim bel na sevim God—Pundaun bilong Adam i bin kisim kam idai long skin na dai long spirit long olgeta manmeri—Ridimsen save kam long tanim bel—God em yet i aton long ol sin bilong graun—Marimari bai kam long ol lain i tanim bel—Olgeta narapela lain i kam aninit long stretpela pasin bilong God—Marimari i kam bikos long Atonmen—Ol lain ol i tanim bel trutru bai ol i kisim selvesen.

Presiden Russell M. Nelson i tok, “Mi promis olsem taim yu beten na stadim Buk Momon olgeta de, yu bai skelim gut na mekim gut samting—olgeta de.” Em promis tu olsem sapos “yu pulmapim yu yet wantaim ol tok bilong Buk Momon olgeta dei, yu bai inap long winim ol samting nogut bilong nau.”

Olsem mi tok pinis, mi bin gat gutpela bel stret long namba wan masin bilong han—em buk. Tasol, mi luksave tu long bikpela wok bilong Intanet long dispela wol tede. Wanpela masin bilong holim long han inap long holim planti ol toktok na samting we isave pulmapim laiberi. Yumi mas amamas long stap long dispela kain taim. Mi amamas tru olsem ol sekred buk na narapela buk bilong Sios i stap tu insait long ol digital samting. Intanet em i wanpela pawaful tul long stadim gospel. Tede, planti manmeri i serim ol skripsa wantaim ol prens long teknoloji. Dispela Book of Mormon app, eksampel, em gutpela rot long soim ol prens bilong yumi long Buk Momon, na yumi ken serim long wanem hap yumi stap.

Taim Intanet i givim planti blesings, em tu i save makim olsem ol dispela pamlets i save bagarapim Sios olsem mi toktok pastaim, ol i bin yusim tu long pasim tingting na agensim feit long gutpela gospel prinsipal. Em iken stap olsem “samting nogut bilong nau” Presiden Nelson itok long en.

Satan na ol lain bilong em i kamapim long Intanet, ol samting wankain olsem dispela bikpela bokis pulap wantaim ol liklik buk i tok agensim Sios mi bin stori long en, long kisim yu go longwe long tok tru bilong God.

Ol samting i kamap bilong givim tupela tingting em wankain tru. Dispela em wankain tru taim yu skelim de bilong yumi nau go long 1960, taim mi bin 20 yias.

Ol skripsa i skulim yumi long yusim jasmen na gutpela tingting long olgeta samting. Yumi ken yusim Intanet long gutpela rot o rot nogut.

Olgeta longtaim membas na ol nupela membas lainim gospel mas luksave long wanem samting ol i lukim. Noken lukim ol samting i soim ol pasin nogut, giaman pasin, na pasin ino stret. Sapos yu lukim, ol dispela samting em bai putim yu long narapela rot, bilong bagarapim feit na wokabaut bilong yu long kisim laip oltaim. Yu ken kamap gutpela o nogut. Bihainim stretpela pasin, na abrusim ol samting nogut long Intanet. Pulmapim laip bilong yu wantaim ol gutpela samting. amamas, tasol abrusim ol noguti pasin. I gat difrens. Dispela thirteenth article of faith ii wanpela gutpela gaid. Antap long olgeta, ritim Buk Momon olgeta taim, em bai bringim Spirit kam long laip bilong yu na helpim yu skelim tok tru long tok giaman.

Toktok bilong mi long ol husat i lusim dispela gutpela rot em, go bek long ol sekred skripsa, toktok bilong ol profet, ol pasin bilong lotu insait long haus, na musik bilong bilip bilong yu. Olgeta sol i gutpela tumas long Bikpela. Mipela nidim yu! Bikpela i nidim yu, na yu nidim Em! Yu em welkam olgeta taim. Long planti yia mi mekim wok bilong Sios, mi luksave long ol gutpela lain husat i kam bek gen long dispela gutpela rot, na ol i mekim wok bilong helpim na blesim husat ol i laikim tumas o ol i bungim.

Ol sekred skripsa na ol profet bilong nau em ol bikpela rot Papa God i soim yumi rot bilong yumi ol pikinini bilong Em long amamas.

Mi tokaut olsem Jisas Krais i bilong God, na Atonmen bilong Em i tru, long nem bilong Jisas Krais, amen.