Ol De I No Inap long Lus Tingting

Ol dia brata na susa, histori bilong Sios bilong Jisas Krais long dispela taim nau i gat ol gutpela ekspiriens i kamap we i soim hau Bikpela i gaidim Sios bilong Em. I gat tenpela yia long histori bilong yumi, em i winim tru olgeta narapela yia—em yia 1820 i go 1830. Stat wantaim ekspiriens bilong Profet Joseph Smith long Sekred Bus long spring bilong 1820, taim em lukim God Papa na Pikinini bilong Em, Jisas Krais, na gohet inap Epril 6, 1830, dispela 10pela yia em ino olsem narapela.

Tingim ol dispela bikpela samting! Dispela yangpela profet i toktok wantaim ensel Moronai, tanim tok long ol gol plet, na kamapim Buk Momon! Thru long em Aronik na Melkisedek prishud i bin kam bek, na em bin oganaisim Sios! Oliver Cowdery i kolim ol dispela taim: “Ol de ino inap long lus tingting.” Ol mirakel i kamap yet long nau.

Bai mi mas tok stret olsem dispela yia yumi statim wanpela ten yia bai kamap wanpela i gat planti samting bai kamap olsem dispela ten yias tu handet yias i go pinis.

Larim mi tok klia. Long nau, 2024, na 2034, yumi bai ekspiriensim ol bikpela samting i kamap na dispela bai opim rot long yumi long sev, bung wantaim ol wanlotu na ol pren, na kisim Sios Bilong Jisas Krais Bilong Ol Seint Long Las De i go long planti moa pipol moa long bipo.

Yumi witnesim wanpela bikpela taim long histori taim yumi makim wantaim planti milion lain 100 betde bilong Presiden Russell M. Nelson.

Long ripot bilong betde bilong Presiden Nelson, Niuswik i raitim wanpela hetlain olsem,“Wanpela Lotu Lidaman i Winim 100 Yias.” Na ol i putim lis bilong 10-pela lida bilong ol narapela lotu—wantaim Presiden Nelson i namba wan long lis i gat Pop Francis na Dalai Lama.

Toktok i kam long New York Timesstori i makim spirit bilong planti nius i kamap long olgeta hap bilong graun: “Long wanpela presidensel ileksen saikel i kirapim ol tingting bilong kamap lapun na wok lida, Mr. Nelson i soim olsem long lotu bilong em, sapos yu gat tripela-namba dispela i no minim olsem yu mas mekim planti samting long em. Ol manmeri bilong lotu i save laikim yet em, ol i lukim presiden bilong ol i no olsem wanpela bikman tasol, nogat, ol i lukim em olsem ‘profet, sia, na man bilong autim tok’”.

Yumi amamas tru olsem bikpela de bilong Presiden Nelson i givim rot long yumi soim profet bilong God long ol man long olgeta hap bilong graun, em wanpela selebresen ol man i no inap lusim tingting long en.

Long spring dispela yia, ol i kamapim wanpela plasa long temple skwe—i soim ol plak bilong ol kauntri i luksave long Sios—ol i rausim veil long en. Dua bilong plasa i gat wanpela granait ston i gat ol dispela tok profet: “Na em bin kamap olsem long taim bilong las de, dispela maunten bilong haus bilong Bikpela bai sanap antap long maunten, na bai winim olgeta arapela maunten; na olgeta nesen bai i ron i kam long en.”

Tru tumas, dispela ol samting bai kamap long narapela tenpela yias bai soim na inapim ol tok profet bilong Isaiah.

Tingim bikpela namba tru bilong ol temple ol bai opim na ol bai dediketim insait long 10-pela yia i kam bihain, inap 164 temple na i go inap long nau. Tingim planti milion long yu na ol pren bilong yu i wokabaut i go insait long haus bilong God. Namba wan bikpela samting bai kamap em wok bilong dedikeitim gen Salt Lake Temple na ol samting bai go wantaim dispela. Ol dispela de kamap ol de yumi no inap long lus tingting long ol.

Dispela yia 2030 bai bringim ol sans long olgeta wol long makim 200 yias bilong ol i stretim na oganaisim dispela Sios. Maski em i no taim yet long tok hau Sios bai luksave long dispela bikpela samting, em bai helpim yumi invaitim ol famili, ol pren, ol wanwok, na ol bikman long “kam na lukim” na klia gut long bikpela strong em i gat long laip bilong ol Sios memba.

Long 2034, planti tausen bikman, ol visita, na ol lain bilong pilai spot bilong olgeta hap long wol bai pulapim ol rot bilong Salt Lake City, we Winta Olimpik Gems bai kamap long en. Ating i nogat narapela wei long soim klia tru pasin wanbel long olgeta wol olsem dispela i stap long Olimpik Gems. Ol ai bilong wol bai lukluk long Sios na ol memba bilong en, na ol bai i gat planti sans long voluntia, mekim wok, na autim gutnius thru long ol gutpela pasin—⁠wanpela samting ol man i no inap lusim tingting long en.

Ol dispela samting bai givim ol Sios memba long olgeta hap planti moa sans long serim ol gut nius bilong gospel bilong Jisas Krais thru long toktok na pasin, wanpela tenpela yias yu no inap long lus tingting long en.

Long wanpela bung wan wik bipo long betde bilong em, Presiden Nelson i serim risen wai em i laikim tru dispela tok “gutnius.” Em i tok, dispela tok i kamapim amamas. Tasol “gut nius” i givim sampela samting moa. Em i tok dispela tok i kam long tok Grik euangelionmining bilong em “gutnius” o “gospel.” Amamas long dispela laip na long neks laip i olgeta taim pas wantaim gospel bilong Jisas Krais. Olsem dispela tok “gut nius” i holim dispela tupela mining long gutpela wei.

“Ol man [na ol meri] i stap, olsem ol bai gat amamas.” Papa long Heven i bin givim plen bilong amamas long inapim ol amamas thru long ol blesing bilong Em. Em olsem ol famili i ken i stap oltaim long ai bilong Em. Atonmen bilong Jisas Krais i stap namel long dispela plen bilong God. Long kisim laip oltaim oltaim yumi mas kam long Krais. Taim yumi mekim olsem “na helpim ol narapela mekim olsem, yumi mekim wok bilong God long salvesen na eksaltesen.”

Dispela toksave bilong gut nius bilong gospel bilong Jisas Krais em i impoten tru long ples graun. Na dispela em we ol yut na ol yangpela bilong Sios i kam insait.

Nau, taim dispela 10-pela yias bai kam bai pulap long ol de yumi no inap long lus tingting long ol olgeta memba bilong Sios, dispela i tru moa yet long ol yangpela jeneresen. Yu stap hia long ples graun bikos ol bin makim yu long stap hia long nau. Yu gat strong na inap long kamap olsem ol disaipel bilong Krais long dispela kain taim.

Presiden George Q. Cannon i bin skulim “God i makim ol spirit bilong dispela taim nau husat i gat strongpela bel na tingting long pesim dispela wol na olgeta strong bilong man nogut, [na long] bildim Saion bilong God bilong yumi i no pret long ol samting bai kamap.”

Olsem na, mi laik toktok long yupela ol yangpela lain i kam nau, long invaitim yupela long tingim dispela 10-pela yia bai kam bihain, bai ol man i no inap lus ting long em, bai olsem wanem bilong yupela. Mi laik givim sampela tok bilong strongim bel bilong yupela, na dispela bai strongim yupela long dispela 10-pela yia i laik kamap.

Olsem planti bilong yupela, mi gat wanpela smatfon, na sampela taim, i no gat sampela tok, em i save bungim ol piksa bilong ol samting mi mekim long wanpela de. Mi kirap nogut long lukim olsem mi na famili bilong mi i bin kisim bikpela senis insait long sampela yia tasol.

Tingim ol piksa bilong yufone bai sevim inap 10-pela yia bihain! Ating yu inap greduet haiskul o kolij, kisim endaumen bilong yu, mekim wok misinari, marit, na karim namba wan pikinini bilong yu. Long yu yet, dispela bai 10 pela yia i no inap lus tingting. Tasol em bai wok tru moasapos yu traim kamap lait long dispela wol long hau gut nius bilong Jisas Kraist inap givim gutpela sindaun long yu na ol famili bilong yu, ol pren bilong yu, na ol lain i bihainim yu long sosel midia.

Ating yu tingting hau yu bai mekim dispela.

Ol Profet bilong God i skulim yumi dispela i kamap long fopela ektiviti, ol i kolim ol wok God i makim:namba wan, bihainim gospel bilong Jisas Krais; namba tu, helpim ol lain i gat nid, namba tri, invaitim olgeta long kisim gospel, na namba fo, yunaitim ol famili oltaim oltaim. Ol i ken mekim long rot i stret na i bihainim wei bilong ol.

Mi promisim yupela dispela tenpela yias yu bai no inap long lus tingting bilong yupela sapos yupela holim pas long ol dispela fopela wok God i makim. Yumi tingim em bai luk olsem wanem.

Namba wan, bihainim gospel bilong Jisas Krais. Stadim ol toktok bilong profet na lainim long lavim Papa long Heven bilong yu. Putim bel bilong yupela long Em, na wokabaut wantaim Em. Kirap wantaim “kavanen na strong” Elda Ulisses Soares i tok klia long en. Dispela strong i kam long mekim ol kavanen long bihainim Jisas Krais, save olsem Seiva bai strongim na sapotim yu.

Larim ol pren bilong yu lukim amamas yu pilim long bihainim gospel, na bai yu kamap namba wan gospel toktok ol i bin kisim.

Namba tu, soim helpim ol lain i gat nid. Jeneresen bilong yupela i save tingim gut ol lain i nogat planti samting. Taim bagarap i kamap na ol memba bilong Sios i hariap long helpim long rausim ol pipia na mekim gut long ol tarangu, i luk olsem planti husat i werim “Ol Han bilong Helpim” T-set em ol yangpela na ol lain i gat 20 krismas samting. Em pasin bilong yu long “karim ol hevi” bilong ol narapela na “mekim isi bel bilong ol man ” Taim yumi mekim olsem, yumi inapim lo bilong Krais.”

Evan, wanpela Praimeri mangi, i yusim skul holide bilong em na bungim ol saplai bilong mekim pinat bata na jeli senwis long givim long lokel fud benk. Em painim projek long JustServe website. Yangpela Evan i singautim wanskul bilong em long helpim em bungim 700 pela jeli botol ja! Larim ol pipol yu sevim save olsem laik bilong yu long ol i stap long laik bilong yu long God na laik bilong yu long mekim gut ol neiba bilong yu olsem yu yet.

Namba tri, invaitim olgeta long kisim gospel Dispela yia 36 pela nupela misin i open long wol long lukautim olgeta i laik mekim wok misinari ful-taim. Long dispela taim planti yut i lusim lotu, dispela i gutpela samting tru na i kamapim klia olsem ol tok bilong yupela i gutpela tru. Maski yu sev ful-taim o nogat, luksave long bikpela strong bilong yu long strongim ol lain bilong yu na invaitim ol long kisim save long gospel bilong Jisas Krais.

Namba fo, yunaitim ol famili bilong oltaim oltaim. Taim mi visitim ol temple long wol, mi kirap nogut long lukim planti lain yut i wet long baptistri na long namba bilong ol yangpela i go antap olsem ol lain i sev olsem ol odinens woklain. I no long taim i go moa long 600 yut i kam long Scotland na Ireland i go long Preston England Temple, long mekim moa long 4,000 pela odinens, planti bilong ol tumbuna bilong ol i dai pinis! Mi tok strong long yu long mekim famili histori, givim taim long temple, na redim yu yet long kamap gutpela man o meri i redi long maritim wanpela poroman i gat wankain woti pasin olsem yu long temple. Kamapim peten bilong yupela nau long mekim temple i bikpela hap bilong laip bilong yupela.

Ol brata na susa bilong mi, ol yangpela ol frens bilong mi, bai gat ol hevi yumi wanwan bai bungim long ol de i kam. Tasol, taim yumi go insait long dispela 10-pela yia i kam, bai yumi serim gut nius long ol liklik samting yumi mekim bilong stap laip, lukautim, invaitim na yunaitim. Taim yumi mekim olsem, Bikpela bai blesim yumi wantaim ol ekspiriens bai yumi hat long lus tingting.

Mi testifai olsem ol lain igo long Bikpela wantaim gutpela bel na laik, ol lain i gat nem bilong Seivia long maus bilong ol na Holi Spirit long sol bilong ol, ol lain i kirap long mekim dispela bikpela na gutpela raun bilong lotu, bai yupela i painim na ekspiriensim ol selesel blesing na kisim witnes olsem God i harim yupela, em i save long yupela, na i lavim yupela. Yupela bai ekspiriensim ol de yupela bai no inap lus tingting long ol. Long nem bilong Jisas Krais, amen.