Planim ol Samting Bilong Pait

Buk Momon i rekodim olsem sampela 90 yias bipo long Krais i bon ol pikinini bilong King Mosaia i statim samting bai kisim olsem 14-yias misin long ol Lain bilong Leman. Planti wok we i no bin karim kaikai i bin kamap long bringim ol Lain bilong Leman i kam long bilip long doktrin bilong Krais. Tasol, dispela taim, thru long mirakel bilong Holi Spirit, ol tausen Lain bilong Leman i bin senis na kamap ol disaipel bilong Jisas Krais.

Yumi ritim, “Na tru tumas olsem Bikpela i stap, olsem na planti lain i bilip, o olsem planti lain i bin kisim save long tok tru, taim Amon na ol brata bilong em, thru long spirit bilong revelesen na profesi, na pawa bilong God i wokim ol mirakel long ol—ye, mi tokim yupela, olsem Bikpela i stap, planti Lain bilong Leman i bilip , na ol i bin senis i go long Bikpela na i no pundaun gen.”

Samting i mekim ol dispela lain senis i stap long narapela ves: “Long wanem, ol lain i kamap wanpela stretpela pipol, ol i bin lusim ol samting bilong sakim tok, inap long ol i no moa pait wantaim God, na tu long ol lain brata bilong ol.”

Dispela toktok “ol samting bilong pait” i kam long toktok na tu long tok piksa. Em i minim ol naip na ol narapela samting bilong pait tasol ol pasin bilong noken harim tok bilong God na ol komanmen bilong Em.

King bilong ol Lain bilong Leman i senis i tok olsem: “Na nau, lukim, ol brata bilong mi, … em dispela tasol yumi ken wokim long … tanim bel long olgeta sin bilong yumi na planti man yumi kilim, na askim God long rausim ol long bel bilong yumi, bikos em dispela samting tasol yumi ken wokim na tanim bel long ai bilong God bai em i rausim doti bilong yumi.”

Lukim toktok bilong King —laik bilong ol long tanim bel i mekim ol i kisim pogivnes long ol sin bilong ol, tasol God tu i rausim ol mak bilong sin na laik long sin long bel bilong ol. Olsem yu save, mobeta long go bek long olpela pasin bilong ol long stap longwe long God, ol i planim ol naip bilong pait bilong ol. Na taim ol i planim ol samting bilong pait, ol i planim tu ol pasin bilong sin.

Yumi bai askim yumi yet wanem yumi ken mekim long bihainim dispela wei, long “putim daun ol samting bilong [yumi] long pait” wanem kain samting na kamap “senis olgeta long Bikpela” bai dispela mak bilong sin na laik bilong mekim sin i raus long bel bilong yumi na yumi bai noken tru pundaun gen.

Pait i ken ples klia o i ken hait. Eksampel em dispela pasin bilong Lusifa, husat, long primotal wol, i bin agensim plen bilong ridemsen bilong Papa na kisim ol narapela long oposim tu, “na, long dispela de, planti bin bihainim em.” Em i no hat long luksave long hevi bai kam long pasin bilong kros long taim bilong yumi.

Insait long Buk Momon i bin gat ol tripela lain anti-Krais—Sherem, Nehor, na Korihor—i givim gutpela stadi long kros agensim God. Bikpela tingting bilong Nehor na Korihor em olsem i nogat sin; olsem na, bai i nogat nid long tanim bel, na i nogat Seivia. “Wanwan man bai kamap gut long strong bilong em, na … wanwan man bai win long strong bilong em, na wanem samting wanpela man [i wokim i] no rong.” Ol anti-Krais i no laikim atoriti bilong lotu, we i gat ol odinens na ol kavanen bai kamap “we ol pris bilong bipo taim i putim, long kisim pawa na atoriti.”

Wanpela las-de eksampel bilong kros i gat gutpela pinis bilong em em stori bilong William W. Phelps. Phelps i joinim Sios long 1831 na i kisim apoinmen olsem printa bilong Sios. Em i bin editim sampela namba wan pablikesen bilong Sios, raitim sampela singsing lotu, na wok olsem man bilong rait bilong Joseph Smith. Sore tru, em i tanim baksait long Sios na Profet, i bin givim ol giaman testimoni agens long Joseph Smith long kot long Missouri court, na dispela bin putim Profet long kalabus long hap.

Bihain Phelps i rait long Joseph na askim long pogivnes. “Mi save long sindaun bilong mi, yu save long en, na God i save long en, … na mi laik kamap seiv sapos ol poro bilong mi bai helpim mi.”

Long bekim bilong em Profet i tok: “Em i tru olsem yumi karim hevi long pasin bilong yu. … Tasol, dispela kap em i dring pinis, laik bilong Papa long Heven i kamap pinis na yumi stap laip yet. Kam, brata, kros pait i pinis, … long wanem yumi ol poro pastaim na yumi bai ol poro bihain gen.”

Wantaim laik bilong tanim bel, William Phelps i plainim ol “samting bilong pait,” ol bin kisim em gen long felosip, na i no bin pundaun lusim gen.

Ating bikpela pasin bilong birua long God em long pasin bikhet—na i no bihainim laik bilong Em long laip bilong yumi. Planti husat i stap long laik bilong ol na i no bihainim laik na tok bilong God bikos ol i no bisi long bihainim laik bilong Em. Mi tingim wanpela singsing bilong bipo wanpela singa Frank Sinatra i singim, “Mi mekim long wei bilong mi.” Tru, insait long laip i gat planti rum long laik bilong wanwan, tasol taim em i kam long salvesen na laip oltaim, yumi mas singsing olsem, “Mi mekim long wei bilong God,” bikos tru tumas i nogat narapela wei.

Lukim eksampel bilong Seivia long baptisim bilong Em. Em i go long baptisim long soim pasin bilong bihainim laik bilong Papa na olsem eksampel long yumi:

“Em i soim long ol pikinini bilong man olsem, long bodi em i daunim em yet long ai bilong Papa,, and witnesim long Papa olsem em bai bihainim komanmen bilong em. …

Na em tokim ol pikinini bilong ol man: Bihainim mi. Olsem na, ol brata bilong mi, mi laikim tumas, mipela ken bihainim Jisas sapos mipela gat laik long bihainim lo bilong Papa?”

I nogat “wei bilong mi” sapos yumi bai bihainim eksampel bilong Krais. Long traim painim narapela rot go long heven i olsem dispela wok bilong Tawa bilong Babel na maski long Krais na salvesen bilong Em.

Ol naip na ol narapela samting bilong pait ol Lain bilong Leman i bin planim em ol samting bilong pait bikos long hau ol bin yusim ol. Ol dispela wankain samting bilong pait long han bilong ol pikinini man, ol i yusim long banisim ol famili na fridom, i no bin ol samting bilong pait agensim God. Wankain samting i tru long ol samting bilong pait long han bilong ol Lain bilong Nifai: “Ol no pait long pawa bilong king tasol … ol i pait long ol ples bilong ol na fridom bilong ol, ol meri na pikinini bilong ol, ye, long pasin bilong lotu na long sios bilong ol.”

Long wankain wei, i gat ol samting long laip bilong yumi we bai stap namel ol i gutpela tasol sapos yumi yusim long rong wei bai kamap “ol samting bilong pait.” Toktok bilong yumi, olsem eksampel, i ken apim o daunim. Olsem James i tok:

“Tasol tang [i olsem] nogat man i ken bosim; i wanpela nogut samting, pulap long poison i save kilim man.

“Long dispela yumi blesim God, na long dispela yumi tok nogut long ol man, husat ol i wokim bihainim piksa bilong God.

“Kamap long dispela maus blesing na tok nogut. Ol brata bilong mi, dispela ol samting i noken olsem.”

I gat planti long ai bilong olgeta na long laip bilong yumi wanwan tede i pulap long nogut tingting na pasin nogut. I gat planti stori we i nogut na ino sekred, namel long ol yut. Dispela kain toktok em wanpela, ol “samting bilong pait” agensim God, “i pulap long poison.”

Tingim narapela eksampel bilong samting i gutpela tasol i ken tanim nogut agensim wei bilong God—wok bilong wanpela. Wanpela i ken painim gutpela sindaun long wanpela wok, vokesen o sevis, na yumi olgeta bai kisim gutpela bilong ol lain i gat divosen na talen long ol kain kain wok ol i kamapim.

Tasol, divosen long wok i ken kamap namba wan samting long laip bilong wanpela. Na olgeta samting bai kamap namba tu, olsem tu taim Seivia bai laik kisim long taim na talen bilong wanpela. Long ol man na meri, lusim gutpela sans long marit, i no stap wantaim na helpim marit bilong yu, i no lukautim ol pikinini gut, o abrusim blesing na wok bilong lukautim pikinini bai yu go antap long wok na kamap gut moa i ken kamap olsem pasin bilong birua.

Narapela eksampel em long sait bilong bodi bilong yumi. Paul i rimainim yumi olsem yumi mas givim glori long God long bodi na spirit na dispela bodi em temple bilong Holi Gos, “we yumi gat bikos long God, na yumi no bilong yumi yet.” Olsem na, yumi mas mekim taim long lukautim bodi bilong yumi gut. Yumi sampela bai kamap long mak i antap tru olsem yumi lukim long ol Olimpik na Paralimpik man meri, na sampela bilong yumi i pilim ol samting i kamap long yumi taim yumi go lapun, o wanem Presiden M. Russell Ballard i kolim “ol skru i lus.”

Tasol, Mi bilip Bikman i amamas tru taim yumi wok hat long lukautim gutpela presen em bodi bilong yumi. Em bai mak bilong kros sapos yumi bagarapim bodi bilong yumi, o mekim nogut long en, o feil long stap helti. Long wankain taim, pasin bilong laikim tumas lukluk bilong bodi bilong yu, hau yu dres ap i ken wanpela wei bilong birua long lotu long samting God i givim na ino God.

Las tru olsem, planim ol samting bilong pait agensim God i min long bihainim ol tingting bilong Holi Spirit, rausim man inogat spirit na kamap “wanpela seint thru long atonmen bilong Krais Bikpela.” Em i min long putim namba wan komanmen long laip bilong yumi. Em i min long larim God i stap. Sapos lav bilong God na strong bilong yumi long sevim Em wantaim olgeta strong, tingting na pawa i kamap namba wan wei we yumi jasim olgeta samting na mekim ol disisen, yumi bai planim ol samting bilong pait. Long grasia bilong Krais, God bai pogivim ol sin na kros bilong bipo na rausim ol makmak bilong sin na kros long sol bilong yumi. Em bai rausim laik bilong pasin nogut long bel bilong yumi olsem Em bin mekim long ol Lain bilong Leman bipo. Bihain, yumi tu “bai no inap tru [long] pundaun longwe.”

Planim ol samting bilong pait bai kisim yumi go long amamas Wantaim olgeta husat i kamap senis long Bikpela, yumi bai “bringim kam [dispela singsing bilong] ridiming lav.” Papa long heven na Pikinini Man bilong Em, Ridima bilong yumi, i strongim komitmen bilong ol long amamas bilong yumi wantaim bikpela lav na sakripais. Yumi pilim lav bilong ol olgeta de. Tru yumi ken bekim wantaim lav na sapot bilong yumi yet. Bai yumi planim—go insait tru—samting bilong pait agensim God long laip bilong yumi na senism wantaim bel na tingting i gat laik. Long nem bilong Jisas Krais, amen.