Bihainim Krais

Namba wan step long bihainim Krais em long harim na bihainim wanem Em i kolim olsem “dispela bikpela komanmen insait long lo”:

“Yu mas laikim God wantaim olgeta bel, na wantaim olgeta sol, na olgeta tingting bilong yu.

“Dispela em i namba wan na bikpela komanmen.

“Na namba tu i wankain tu long en, Yu mas laikim neiba bilong yu olsem yu yet.

“Olgeta lo na olgeta profet i hangamap long dispela tupela komanmen.”

Ol komanmen bilong God i givim gaidens na strong insait long laip bilong yumi. Ekspiriens bilong yumi long dispela laip i olsem liklik mangi na papa bilong em i flaim kait long de i gat win. Taim kait i flai i go antap, win i mekim em i pulim string long liklik han bilong mangi. Liklik mangi i nogat save tumas long strong bilong win, em i tingting long katim string bai kait i go antap tru. Papa bilong em i save na tokim em nogat, em i tok klia long em olsem string em samting i holim kait i stap agens long ol win. Sapos yumi lusim han long string, kait bai no inap go antap tru. Win bai karim go kam na bihain em bai pundaun long graun.

String i makim ol kavanen i pasim yumi go long God, Papa long Heven na Pikinini Man bilong Em, Jisas Krais. Taim yumi onarim ol kavanen na holim strong ol komanmen na bihainim plen bilong ridemsen, Ol blesing i stap long promis bai mekim yumi go antap long selesial hap.

Buk Momon i save tokaut planti taim olsem Krais em “lait bilong graun.” Taim Em i kamap long ol Lain bilong Nifai, Bikpela i kirap gen i tok klia long dispela skul: “Mi setim eksampel bilong yupela.” “Mi em lait we yupela bai holim antap—dispela yupela lukim mi mekim.” Em i rol model bilong yumi. Yumi lainim wanem Em i tok na mekim taim yumi stadim ol skripsa na bihainim ol tok profet, olsem Presiden Russell M. Nelson i enkarijim yumi long mekim. Long odinens bilong sakramen, yumi kavanen long wanwan Sabat de olsem yumi bai “olgeta taim tingim em na kipim ol komanmen bilong em.”

Long Buk Momon, Bikpela i givim yumi ol namba wan toktok long wanem Em i kolim “doktrin bilong Krais.” Dispela em feit long Bikpela Jisas Krais, tanim bel, baptisim, kisim presen bilong Holi Spirit, stap strong igo long pinis, na kamap olsem ol liklik pikinini, long trastim Bikpela na givim long laik bilong Em.

Ol komanmen bilong Bikpela em tupela kain: bilong stap oltaim, olsem doktrin bilong Krais, na bilong sotpela taim. Ol komanmen bilong sotpela taim em bilong helpim nids bilong Sios bilong Bikpela o ol feitful i stap long ol sindaun ino stret, tasol i mas putim long sait taim nid i nomoa stap. Wanpela eksampel bilong ol komanmen bilong sotpela taim em ol daireksin ol lida bilong Sios bilong pastaim i kisim long muvim ol Seint long New York i go long Ohio, Missouri, Illinois, na las tru long lidim ol paionia i go West. Maski i sotpela taim tasol, taim ol i stap yet ol dispela komanmen i mas bihainim.

Sampela komanmen bilong stap oltaim i save tekim sampela taim long luksave na bihainim. Eksampel, toktok bilong Presiden Lorenzo Snow long lo bilong taiting i bin kam pastaim tru tasol ino bin gat luksave. Em bin nidim strongpela tingting gen long taim Sios na ol memba i pesim ol hat taim. I no long taim igo sampela toktok i kam gen long strongim ol lo gen bikos long ol sindaun ol Las-de Seint o Sios i pesim. Dispela em tokaut i go long wol long famili, em Presiden Gordon B. Hinckley i bin givim sampela taim i go, na Presiden Russell M. Nelson i mekim singaut long Sios i mas yusim nem bilong em tru, Sios bilong Jisas Krais bilong ol Seint long Las-de.

Narapela ol skul bilong Seivia i luk i nidim strongpela moa toktok long nau taim bilong yumi.

Em i taim bilong planti tok nogut bilong bagarapim bel long publik na sampela taim insait long ol famili. Kainkain tingting long ol pablik polisi sampela taim i kirapim bel kros—na belhat— long pablik na long wanwan sindaun. Dispela belhat sampela taim i save kisim bikpela bagarap i kam long mekim lo we ol manmeri save lukim olsem i mas gat eksen hariap long gutpela bilong ol pablik.

Ol lain i bihainim Krais i mas skulim na mekim wanem long kain taim bilong ol belhat toktok? Wanem em ol tising na eksampel bilong Em?

Wanpela namba wan samting Jisas i skulim ol taim Em i kamap long ol Lain bilong Nifai em long abrusim tokpait. Taim Em bin skulim ol long ol tok kros long doktrin bilong lotu, Em i givim ol as tingting long ol long toktok na sindaun gut long politiks, pablik polisi na sindaun bilong famili. Jisas i skulim ol:

“Husat i gat spirit bilong tokpait em i no bilong mi, tasol bilong devil, husat i papa bilong tokpait, na em i save kirapim bel bilong ol man long kros wantaim belhat, long wanpela narapela.

“Lukim, dispela i no doktrin bilong mi long kirapim bel bilong ol man wantaim kros, wanpela agensim narapela, tasol dispela em doktrin bilong mi, olsem dispela ol samting i mas raus”

Long laspela ministri bilong Em long ol Lain bilong Nifai, Jisas i skulim ol long ol narapela komanmen i stap klostu long dispela i stopim tokpait. Long Baibel dispela Em i bin givim pinis long Skul antap long Maunten, i bihainim stret wankain toktok bihain Em i givim long ol Lain bilong Nifai. Mi bai bihainim wan kain toktok:

“Laikim ol birua bilong yupela, blesim ol husat bai kesim yu, mekim gut long ol husat i no laikim yu, na beten long ol husat i mekim pasin nogut long yu, na bagarapim yu.”

Dispela em i wanpela komanmen bilong Krais yumi olgeta i save gut long en—i gat bikpela senis tru na hat long bihainim. Tasol em i wanpela namba wan hap bilong invitesen bilong olgeta long bihainim Em. Olsem Presiden David O. McKay i skulim, “I nogat gutpela rot long soim laik bilong God sapos yu bai soim laik bilong narapela long wanpela.”

Hia em narapela namba wan skul i kam long Em husat i rol model bilong yumi: “Blesing em bilong ol lain i save mekim bel isi: bai ol kolim ol pikinini bilong God.”

Lain bilong mekim bel isi! Hau bai wanwan sindaun i senis sapos olgeta lain i bihainim Krais i lusim ol pasin bilong tok nogut na kros long ol toktok bilong ol.

Long jeneral konferens las yia, President Russell M. Nelson i givim yumi tripela ol salens:

“Wanpela isi wei long luksave long wanpela trupela lain bilong bihainim Jisas Krais em hau dispela man o meri i save gat bel bilong lukim ol narapela. …

“… Ol trupela disaipel bilong Jisas Krais em ol lain bilong mekim bel isi.

“… Wanpela gutpela wei long givim ona long Seivia em long kamap wanpela husat i save mekim bel isi.”

Pinisim skul bilong em: “Tokpait em i laik bilong yu. Mekim bel isi em laik bilong yu yet. Yu gat laik bilong yu long tokpait o mekim wanbel. Mi tok strong long yu long makimlong kamap wanpela bilong mekim bel isi, nau na olgeta taim.”

Ol lain bilong birua mas statim ol toktok bilong ol wantaim luksave long ol samting bilong wanbel wantaim.

Long bihainim Gutpela Rol Model na profet bilong Em, yumi nid long bihainim samting yumi save long en olsem Golden Rul: “Olgeta samting we man i mekim long yu, mekim wankain long ol: long wanem dispela em i lo na ol profet.” Yumi mas laikim na mekim gut long olgeta. Yumi mas abrusim tokpait na kamap ol lain bilong mekim bel isi long olgeta toktok bilong yumi. Dispela i no min long kamap wanbel na daunim ol mak bilong yumi tasol long stopim ol pasin bilong bagarapim ol narapela. Dispela em wanem Stretpela Rol Model bilong yumi bin mekim long ministri bilong Em. Dispela em i eksampel Em i putim na invaitim yumi long bihainim Em.

Long dispela konferens fopela yia i go pinis, Presiden Nelson i bin givim yumi wanpela profetic salens long de bilong yumi :

“Yu bai inap long larim God stap insait long laip bilong yu? Yu bai inap long larim God kamap namba wan senis insait long laip bilong yu? Bai yu larim ol tok bilong Em, komanmen bilong Em, na ol kavanen bilong Em senisim ol samting yu mekim olgeta de? Bai yu larim nek bilong Em kisim namba wan ples long ol narapela nek?”

Olsem ol lain i bihainim Krais, yumi tis na testifai long Jisas Krais, Rol Model bilong yumi. So yumi bihainim Em na abrusim tokpait. Taim yumi bihainim ol pasin olgeta lain bai lukim, yumi bai nap long kisim ol blesing bilong Em taim yumi yusim ol toktok na pasin bilong bel isi. Long ol famili na ol narapela wanwan sindaun bilong yumi, yumi abrusim pasin nogut bai hatim bel. Yumi mas kamap holi, olsem Seivia, husat mi testifai long holi nem bilong Em na givim blesing bilong Em long helpim yumi kamap ol Seint. Long nem bilong Jisas Krais, amen.